طوبى ☕شارع القهوة☕

الجزء التاسع والستين الاخير

#طوبى "جنة طوبى"
#جمان_فريد
#الجزء_التاسع_والستين"عابي على ربي الاخير"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#سورة_الفاتحه
عَنْ أَبِي سَعِيدِ بْنِ المُعَلَّى رَضِيَ اللَّهُ عَنْهُ، قَالَ: قَالَ لِيَ النَّبِيُّ صَلَّى اللهُ عَلَيْهِ وَسَلَّمَ: أَلاَ أُعَلِّمُكَ أَعْظَمَ سُورَةٍ فِي القُرْآنِ قَبْلَ أَنْ أَخْرُجَ مِنَ المَسْجِدِ. فَذَهَبَ النَّبِيُّ صَلَّى اللهُ عَلَيْهِ وَسَلَّمَ لِيَخْرُجَ مِنَ المَسْجِدِ فَذَكَّرْتُهُ، فَقَالَ: ( الحَمْدُ لِلَّهِ رَبِّ العَالَمِينَ). هِيَ السَّبْعُ المَثَانِي، وَالقُرْآنُ العَظِيمُ الَّذِي أُوتِيتُهُ ) رَوَاه البُخَارِي
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 أهذهِ ضحكةٌ على وجهك أم نورٌ على قَلبي؟🍃
_________________________________________
الساعه 9:00ليلا
ماشية بإتجاه الباب بعد ماخبروها ان خوها الكبير جاي بيروح بيها..
وصلت في الباب وفتحاته شافت لخوها بملامح زعل..
وهو كانت باديه ع وجهه ملامح الضيق لما قاللها..
/ترا خشي نادي خالتي طوبى نبيها شويه..
سدره هزت راسها بدون ماتكلمه ومشت خشت داخل..
وهو قعد واقف في الباب يستنى لبضع دقائق..
بعدين سمع طوبى تقوله..
"خش محمد"
فتح محمد الباب وخش وخلاه مردود وراه وهو يقول..
/السلام عليكم..
طوبى؛وعليكم السلام..كيف حالك محمد..
هو بدون مايديم النظر ليها قال..
/الحمد لله..كيف حالك انتي؟
طوبى:الحمد لله،شن جو القرايه والخدمه؟
محمد:تمام ماشيه الامور والحمد لله..شاف لأخته وقال..
سدره خشي داخل؛شويه وناديك..
سدرة مررت نظرها بيناتهم بعدين هزت راسها ولفت ومشت خشت داخل الحوش..
وطوبى تشوف لمحمد وهي تفكر في الموضوع اللي يبي يحكي فيه معاها ع الانفراد..
هو بعد ماخشت اخته قال بشي من الاحراج والارتباك..
/بالله بنسألك سؤال جاوبيني عليه بصدق..
عقدت طوبى حواجبها وهي تشوفله..
محمد بضيق:الدوة اللي طلعت ع مروة في منها؟
هي طول قالت..
/اكيد لا..مروة تربت في الحوش هدا ماديرش الغلط..
هو قال:باهي اللي صار معاها شن تفسريه؟
طوبى تنهدت وقالت..
/مروة بنت قمة في الأدب والاحترام حشوميه هلبه وطيبه زياده ع اللزوم وطيبتها هادي سبب اللي صار فيها..
شبح لطوبى بعدم فهم..
طوبى:حاولت تحمي حد تعزه ضرت نفسها بس تعلمت من اللي صارلها درس عمرها ماحتنساه..
محمد؛مش فاهم قصدك من كلامك..
طوبى:انت مفروض تفهم حاجه وحده بس مروة انظلمت وافتروا عليها..
غير عيونه عن طوبى وقال بضيق واحراج شديد..
/باهي هي..يعني..عندها حد؟
ابتسمت طوبى وقالت..
/ايه عندها وانت عارفه كويس..المصحف قاعد تقرا منه؟
بدت ع وجه محمد ملامح الحزن والندم..
طوبى بإبتسامه..
/معليشي مازال قدامكم عمر إن شاء الله غلطتوا بكري واكيد تعلمتوا من غلطكم مرات ينفعكم هلبه القدام..
محمد وهو محرج..
/باهي نحملك امانه توصليهالها؟
طوبى بإبتسامه:إن شاء الله..
🍃🍃🍃🍃🍃
ومروة في نفس الوقت..
كانت امي تعشي فيها ..
وهي تاكل بشهيه وعيونها تتأمل في امها بحب..
ماكانتش تبي شي في هديكا اللحظه غير حب امها وعطفها وحنها بس..
معاش همها شي غير انها تشوف الابتسامه الحلوة ع وجه امها بس..
الاهتمام اللي غرقت بيه فايزة بنتها..
غرقوه بيها اهل الشارع..
زي عمها لطفي اللي مر عليها وجابلها معاه عشي وماروح قبل يسألها كان تبي منه حاجه وهي جاوبت بالشكر والدعاء..
وقداش كانت ممتنه لله اللي عوضها عن بوها اللي سيبها في الدنيا بكري براجل مايقلش عنه ود وحنان...
☘جي بعده المهدي وصى عليها ناس يعرفهم في المصحه..
وإياد كان يبعتلها من يشوف وضعهم وحاجتهم...
الى جانب الممرضه اللي باعتها..مالك...قعدت للفجر وهي تمشي وتجي عليهم...
🍃🍃🍃🍃🍃
ويطل تاني يوم...
الخميس...
اللي ماكانتش نجاح متوقعه انه حيكون يوم حافل بالأحداث بالنسبه ليها...
الساعه 10:25صباحا..
دق باب مكتبها وهي كانت مشغوله..
اذنت للي يدق بالدخول..
انفتح الباب وخشت الأخصائيه..
:استاذة نجاح..
نجاح قعدت تشوفلها تراجي فيها تقول اللي عندها..
:استاذه في جديد يخص مشكله مروة محجوب..
نجاح بإستغراب:شن في؟
طلعت الاخصائيه وهي تشوف يمينها وقالت بحده
/خشي انتي وياها..
خشوا ثويبه واكرام والزوز كان باين عليهم الارتباك والخوف..
ونجاح تشوفلهم وهي عاقده حواجبها بإستغراب..
سكرت الاخصائيه الباب وهي تقول..
/اللي قلتوه فوق عاودوه توا للأستاذه..
نجاح:نسمع فيكم..
تكلمت ثويبه هي الأولى وكانت مرتبكه..
/استاذه...اللي قالاته مروة يومها صح اني رفعتها ورا المدرسه..وقلتلها راما تبيك..
رفعت نجاح حاجبها اليمين وقالت..
/علاش؟
ثويبه ودموعها عبوا عيونها..
/اسما هكي تبي..
نجاح؛كيف اسما هكي تبي وعلاش؟
هي بربكه قالت..
/في بينها وبين مروة مشكله ودارت فيها هكي بش تشوه سمعتها..
نجاح؛وانتي علاش ديري ماتبي اسما؟
ثويبه قعدت ساكته..
الاخصائيه؛اشبح بشني مهددتها..
ثويبه نزلت راسها ودموعها نزلوا مسحتهم طول..
نجاح غيرت نظرها عنها وشافت لإكرام وقالت..
/وانتي حتى انتي سمعتي كلام اسما ونفذتي؟
اكرام بخوف واضح..
/هددتني قالتلي كان مادرتش اللي هي تبيه تخلي بوها يلز بابا من الخدمه.
نجاح؛بوك يخدم عند بوها؟
اكرام بضيق..
/ايه مسلمه اداره محل ليهم..
نجاح ضيقت عيونها بعدين قالت..
/ابله كريمه جيبولي اسما هني..
:حاضر استاذه..
ومشت طلعت من المكتب..
ونجاح تشوف لثويبه واكرام وهي تقول..
/شن اللي خلاكم تجوني وتعترفوا ؟
ثويبه بتوتر:ضميري ماريحنيش استاذه..
اكرام بضيق؛حتى اني..
ونجاح تشوفلهم بشك ومش مقتنعه تماما بالاسباب اللي قالوها..
🍃في الدور الثاني..
دقت الاخصائيه فصل اسماء بعدين فتحت الباب وقالت..
/معليشي ياأبله..
:تفضلي ابله..
الاخصائيه مررت نظرها ع الفصل مالقاش راما ثبتت نظرها ع اسماء وقالت..
/اسما تعالي.
صاحباتها كلهم وجهوا نظرهم ليها..
وهي ناضت وقفت بعدين مشت طلعت للأبله وكانت في حاله استغراب..
الاخصائيه:شكرا ياابله..وسكرت الباب..
اسماء :خير ياابله؟
؛تو تعرفي في الاداره..
زادت استغربت اسماء وقعدت تفكر..
لعند مانزلت لوطا ووصلت للإداره..
خشت بيها الأخصائيه لحجره الاداره..
هي لما شافت ثويبه واكرام انصدمت بس مابينتش ودارت روحها عاديه..
اسماء:نعم استاذه؟
نجاح؛شن اللي بينك وبين مروة شن دارتلك بش ديري فيها هكي!؟
بتصنع لعدم الفهم قالت..
/مافهمتش ياابله شن درت لمروة وشن دخلي بيها؟
نجاح:اسما ماتحاوليش ثويبه واكرام قالوا كل شي واعترفوا انك انتي اللي خططتي وحرضتيهم بش تركبوا مروة تهمه وتشوهوا سمعتها وتخلوها تطرد من المدرسه..
اسماء بصدمه مصطنعه؛اني !!؟ علاش بندير فيها هكي شن في بيني وبينها اني مانعرفهاش بكل وعمري مااحتكيت بيها..
اكرام؛كذابه قبل صار بينك وبينها عركه..
اسماء:اني ياكذابه انتي!؟؟
اكرام؛ايه انتي..
الاخصائيه؛الولد اللي شفته مع مروة انتي اللي جبتيه ؟ والتليفون اللي شفته عند مروة ليك انتي؟
اكرام؛ايه مروة ماتجيبش معاها في تليفون للمدرسه..
نجاح بغضب؛وصلت بيك تكلمي ولاد بإسم البنت!؟ انتي شني بالزبط ماتربتيش بكل مافيكش حاجه تخاف من ربي؟
اسماء:ابله لوسمحتي..ماتغلطيش فيا..انتي اصلا ماعندكش دليل واحد يثبت ان كلامهم صح من قال مش هما متفقات بين بعض يديروا هكي في مروة ويحطوها فيا اني لأنهم عارفين ان في بيني وبينها مشكله زي مايقولوا..
نجاح؛معناها حقه صاير بينك وبين مروة مشكله قبل..
اسماء؛نقاش مش مشكله..
نجاح هزت راسها وقالت..
/خلاص كل شي ولى واضح توا..
اسماء:استاذه لوسمحتي..
نجاح بصوت عالي..
/سكري فمك واسكتي..وتوا تركبوا الثلاته تجيبوا شناطيكم وتنزلوا هني..
الاخصائيه؛هي اطلعي انتي وياها..
اسماء:الظلم هدا والله ماساكته عليه..
ومشت طلعت والبنات وراها وهما في حالة خوف..
الاخصائيه..
/تهدد الوقحه..
نجاح؛مش قتلك ان في شي غلط من البدايه واهوا بان كل شي..
الاخصائيه:لكن بنقولك حاجه استاذه اسما بوها راجل واصل مرات يضرنا..
نجاح بلامبالاة؛اعلى مافي خيلهم يركبوا..
🍃🍃🍃
اسماء بوعيد؛تو تشوفي ياثويبه صورك كلهم عند خوتك..
ثويبه مابتش ترد عليها..
اسماء:وانتي يااكرام شدوا الطريق انتي وامك وخواتك واشحتوا ياشحتات..تو نوريكم..وشبحت القدام وهي تقول بوعيد..تو نوريكم انتم ونجاح الكلبه هادي..
🍃وخدوا شناطيهم ونزلوا للإداره..
عطت نجاح لإكرام فصل اسبوع..
اما ثويبه فصل اسبوع مع استدعاء ولي الامر ماتدخلش المدرسه من غيره..
واسماء خدت فصل نهائي...
بعد ماخدت قرار فصلها وملفها قالت..
/نتواجهوا استاذه نجاح..ومشت طلعت من المكتب..
الاخصائيه وهي مصدومه؛سمعتيها!؟
نجاح بإزدراء:وقحه..
🍃🍃🍃🍃🍃
وطلعوا الثلاثه من المدرسه..
اسماء جاها الباص خداها بعد ماطلباته بجيها فورا..
اما اكرام وثويبه روحوا مشي..
ثويبه وهي ماشيه  مع اكرام كانت تكلم في صاحبها هاتفيا..
/قتلك هددتني بالصور..
"واني قتلك الصور مش حتاخدهم الا مني ووالله ماهي رايتهم ماتخافيش."
اكرام قعدت تنخص فيها..
ثويبه:باهي شن صار في صاحبك؟
"قوليلي للبنت متاعه ماتخافيش بوها تموله اموره في مكان احسن من اللي كان فيه"
ثويبه؛باهي طمنتني..
"مروحه توا"
ثويبه؛ايه..
"خلاص لما توصلي كلميني"
:تمام..نحبك..
"واني..تشاو"
؛تشاو..وسكرت..
اكرام؛شن قالك؟
:صاحبك قال بوك تموله اموره في مكان تاني..
ابتسمت وقالت:تو لما نروح نكلمه ونزيد نفهم منه..
ثويبه؛تعرفي ارتحت وين افتكيت من وجه الشر هادي..
بخوف قالت؛زعمه حق افتكينا منها؟
ثويبه؛ماتقدر ديرلنا شي توا خلاص..
اكرام تنهدت بقلق وقعدت ساكته..
🍃🍃🍃🍃🍃
الساعه 12:00قبل الظهر..
"قدام الطلبه في الاستراحه حكيت اللي صار كله يامروة"
مروة بفرح ودموعها ينزلوا..
/الحمد لله ياربي الحمد لله..عادي نحضنك..
ضحكت امها وهي تمسح في دموعها..
نجاح بضحكه؛مصح وجهك تعالي يافرخه..
وضمتها ومروة تضحك بفرحه مش مصدقه اللي صار...
شويه وبعدت عنها وهي تمسح في دموعها وتقول..
/ياربي..
نجاح؛الحمد لله ربك مايرضاش بالظلم يامروة..
خفتت ابتسامة مروة وهزت راسها وهي مضايقه..
تنهدت فايزة براحه وقالت..
/اللهم لك الحمد كما ينبغي لجلال وجهك وعظيم سلطانك..
ع جية الممرضه زاحت الستار الفاصل وهي تقول بإبتسامه..
/وهادي ورقة الخروج يامريوه والحمد لله ع السلامه..
مروة وفايزة وهما مبتسمات بإمتنان قالوا..
/الله يسلمك..
خدت فايزة الشنطه ومروة نزلت من السرير وهي تنزل في بلوزتها ع طولها..
ونجاح ناضت وقفت..
الممرضه:ربي يحفظك للي يحبوك يامريوة..
ابتسمت مروة وهي تقول..تسلمي مشكورة..
وماكانتش فاهمه قصدها صح..
فايزة؛بارك الله فيك تعبناك معانا..
بإبتسامه قالت..
/تعبكم راحه..
فايزة:تعالي نسلموا ع النساوين مروة..
مروة؛حاضر..
فايزة؛شويه نجاح..
نجاح؛سابقتكم..
ومشت بتطلع بس وين قربت توصل في الباب حست بدوخه خل تفقد التوازن ولولا انها شدت في سرير وحده من الحالات كانت طاحت..
كلهم في اللي في الحجرة قالوا بأصوات متقطعه..
/لاباس!..خيرك نجاح؟!
نجاح حاولت تتماسك وهي تقول..
/دوخه ليها فترة تجيني الممرضه بإعتبارها تخدم في القطاع الخاص استغلت الفرصه  اللي جتها بش تكسب من وراها وقالت لنجاح..
/كيف ساكته ع روحك هكي!؟ لازم تعرفي السبب وتعالجيها افرضي جاتك وانتي بروحك ومامعاك حد كيف يصير فيك..لازم ديري تحاليل..
فايزة بقلق؛ايه صح عندها حق نجاح من لما جيتي واني ملاحظه وجهك اصفر..
نجاح خافت وقعدت تقول..
/ان شاء الله خير وخلاص..
الممرضه:ان شاء الله..ومادامك قاعده في مصحه ديري تحاليل اطمني ع روحك..
نجاح:وين ديروا فيهم..
الممرضه:تعالي معاي..
فايزة؛نراجو فيك لوطا نجاح..
نجاح هزت راسها ومشت طلعت ورا الممرضه...
🍃🍃🍃🍃🍃
"مانبيش حاجه اوفر نبي طلتي تكون بسيطه من غير مبالغه"
خديجه؛علاش اللطف!؟
نسرين؛اني هكي نبي..
المزينه؛تمام ان شاء الله تطلعي كيف ماتبي..
خديجه:براحتك ياحنه..اما اني نبيك طلعيني جلطه تمام..
المزينه بضحكه:ديما جلطه انتي دوجه..
خديجه بضحكه:سلمها ياربي..
ونسرين تشوف لخديجه وهي مبتسمه بإستسلام..
راما:حتى اني نبي مكياج بناتي خفيف وتسريحه بناتيه بسيطه..
نسرين؛تسريحه مافيش باس لكن مكياج لا..
خديجه؛وعلاش لا البنت مازال صغيره مانبي شي يقعد في خاطرها..ديريلها حاجه بسيطه..
المزينه:حاضر..
راما قعدت تشوف لأمها بإبتسامه..وخالتها تشوفلها بعدم رضا....
🍃وبرا الدار  المعيشه اللي هما فيها..
امها وخالاتها يحوسوا ع موظفات شركة التنسيق اللي كان يجهزوا في الصاله..
روحت سدره وهي تشوف في الزحمه والحركه وتسمع في الدوشه..
حست بوجع في قلبها الصغير..اول مناسبه امها ماتكونش فيها..
هربت بوجعها ودموعها لدار المعيشه..خشتلها وسكرتها عليها وقعدت تبكي..
🍃🍃🍃🍃🍃🍃
في صالة الانتظار لمصحة القدس..
كانوا فايزة ومروة مقعمزات يستنوا في نجاح وفي عيون بعيده عليهم شويه وتراقب فيهم..
او بالاحرى تراقب في سكنات مروة وحركاتها..
شافوها وهي تشوف لنجاح لما جتهم بنظرات ترقب..
شويه هالنظرات تحولت لنظرات ضاحكه حلوه وبعدها وجهها كله ضحك..
وهو بدون مايحس ابتسم معاها..
🍃فايزة؛مبارك عليك وان شاء الله تحلي عويناتك ع خير..
نجاح وهي تمسح في دموعها قالت..
/آمين..حطت يدها ع فمها وقالت بنبرة باكيه..والله ماقادره نستوعب نزلت يدها وقالت..ماتوقعتش تصير حاجه زي هادي  واني في العمر هدا من غير مانجري عليها..
فايزة بإبتسامه؛ربك قال هو عليا هين..وانتي طيبه وتستاهلي كل خير وربي عطاك ع قيس نيتك..
نجاح بإبتسامه وسط دموعها..
/بارك الله فيك يافايزة..
مروة:مبارك ابله نجاح..
قرصت نجاح خد راما وقالت..
/الله يبارك فيك ياعسل..هي خل نطلعوا نبي نمشي لأمي طول نبشرها..
☘ومشوا مع بعض بيطلعوا من المصحه..
مروة وهي طالعه مع امها وشاده في يدها..
كانت موجهه نظرها قدامها..
ويجوا عيونها على واحد لابس تيشرت زيتي نص كم ع سروال ازرق غامق جينز وطاقيه زيتيه ع راسه..
لما شافت شكله عرفاته طول..
توسعوا عيونها ع الاخر بصدمه..
وهو ابتسملها ابتسامه خفيفه وغمز بعينه..
مروة من خوفها كانت حتقول لأمها عليه بس تراجعت في اخر لحظه بسبب الخوف حتى هو..
زادت شدت بقوة في يد امها لين وصلوا في السيارة اللي جابهالهم حسين الصبح...
ركبوها..
ومروة قعدت دور عليه تاني بعيونها معاش شافاته..
غيرت نظرها القدام والقلق سيطر عليها...
🍃🍃🍃🍃🍃🍃
القلق..اللي ولى رفيق ملازم لطوبى..
تحاول مرات تتنساه ودرقه..بس اليوم استحوذ عليها تماما..
في داخلها احساس مش مريح وقلبها مقبوض طول الوقت..
☘لعند ماروحت فايزة عليهم..
هي انشغلت بمروة وبإستقبال خوتها والجميع ليها...
بعدين خدتها ع انفراد بش تهدرز عليها..
طوبى بإبتسامه؛شن جو؟.
مروة بضحكه فرح:مافيش احلى منه..
طوبى:شفتي ربي..
اختفت ضحكه مروة..
طوبى:خيرك؟
مروة بضيق:مضايقه من روحي هلبه ع اللي درته..
طوبى:شن اللي خلاك ديريه؟
مروة بحزن:حسيت روحي سبب كل شي صار معانا وحسيت ماما خسرت شغلها بسببي ماتحلمتش الشعور اللي قعدت نحس بيه حسيت ان مافي شي يقدر يخلصني منه الا الموت..ودرت اللي درته
طوبى:كان شفتي شن صار في امك وخواتك..تاله خشت في حالة نفسيه..
نزلت مروة راسها وهي حاسه بضيق شديد..
طوبى:مافكرتيش فيهم شن يصير فيهم لو لاقدر الله صارتلك حاجه..كنتي حتق.تلي امك يامروة..
دمعوا عيون مروة بندم..
طوبى:تخيلي روحك متي وربي مش راضي عليك؟
نزلوا دموعها..
طوبى:تعرفي علاش ربي حرم ع البنادم يق.تل نفسه؟ اول شي لأنه مش ملك نفسه هو لله مايحقلاش يتصرف في نفسه زي مايبي...وتاني شي لأن الاسباب اللي تخلي البنادم يق.تل نفسه الهموم والمشاكل وضيقة في حياته المفروض في هالحاله يلجأ لربي ويدعيله يرفع عنه ويساعده ولا؟.
يعني لو في هداكا الوقت يامروة لجأتي لربي وكنتي تدعيله كان فوق اجابة دعائك كتبلك اجر ولا؟
مروة هزت راسها بحزن وهي ساكته..
طوبى بإبتسامه؛شوفي ربي قداش لطيف شوفي كيف ساعدك بدون ماتطلبي ومرات خلا الخيره في اللي صارلك كله..
مروة؛ وين الخيره في ان سمعتي تتشوه وماما تخسر شغلها؟
تنهدت طوبى بإبتسامه وقالت..
/تو تعرفيها مع الوقت وحتى كان ماعرفتيهاش بكل خلي عندك ديما حسن ظن بربي ان كل شي يصير معاك في حياتك مهما كان فيه خيره ليك..
مروة ابتسمت وهزت راسها بآيجاب وهي تمسح في دموعها..
🍃وطوبى تشوفلها وهي تفكر في الكلام اللي قالاته لمروة كانت هي بأمس الحاجه انها تسمعه من حد غيرها...
☘احيانا..نقدروا نعطوا لغيرنا جرعات تحفيز وايمان حني بأمس الحاجه ليها...
لكن فاقد الشي يعطيه بكثرة...وهكي ديما يكونوا الناس اللي زي طوبى...
يفقدوا في حياتهم الامان ويعطوه لغيرهم..
يفقدوا الحب ويعطوه بسخاء..
يفقدوا الثقه في انفسهم ويعززوها في غيرهم..
ديما يعطوا...
يعطوا اللي عندهم واللي ماعندهمش..
🍃طوبى بإبتسامه:توا حاولي تلوحي اللي صار معاك كله ورا ظهرك وابدي من اول وجديد لكن وانتي متعلمه من اللي صارلك..
مروة هزت راسها وهي تقول بحسره:تعلمت وهلبه..هلبه..
طوبى:معليشي في ناس يخشوا حياتك بش يكونوا دروس تتعلمي منها..
مروة:صح..
طوبى ابتسمت بعدين قالت..
/في حد حملني امانه ليك..
مروة عقدت حواجبها بإستغراب..
طوبى؛محمد يتأسف منك..
مروة بحده.:مانبي منه شي..
طوبى:عندك حق تحرجي منه لكن عطيه عذره..
مروة؛لانبي نحرج منه ولانعطيه عذر زيه زي بنت عمته بالنسبه ليا معاش يسووا عندي شي..
طوبى بضيق؛باهي خلاص نسكروا الموضوع هدا توا..
مروة بشي من العصبيه؛ومعاش نبيك تفتحيه بكل معليشي..
تنهدت طوبى وقالت..
/حاضر..براحتك..المهم توا قرايتك امتحاناتك قربت خلاص..
مروة هزت راسها وقالت بضيق..
/ايه..بس مشوبه من المدرسه الجديده مانعرف فيها حد..
طوبى:تو تتعرفي ع صاحبات جدد وتحبيها اكثر من مدرستك الاولى وقولي طوبى قالت..
ابتسمت مروة بقلق وهي تقول..
/إن شاء الله
🍃🍃🍃🍃🍃
"الحمد لله ياربي الحمد لله.."
نجاح وهي حاضنه امها قالت بنبرة باكيه..
/الحمد لله..
نجمه بعدت عنها وهي شادتها قالت ودموعها ينزلوا.
/ردي بالك ع روحك ماتجهديش نفسك وديما ارقي روحك ديما ومش لازم الناس كلها تعرف توا باهي..
نجاح هزت راسها وهي تساير في امها وقالت بإبتسامه..
/حاضر..رشفت بعدين قالت..عواطف مش مروحه توا؟
نجمه:بعد المغرب..
نجاح؛واشرف وين؟
نجمه؛قال متغدي برا..
نجاح؛باهي يام بنفتح معاك موضوع يخص اشرف.
نجمه بقلق: إن شاء الله خير!
🍃🍃🍃🍃🍃
"نك ليغ الزمن..ايلان ايوتيان..."
يدندن التارقي في كلمات اغنيته المفضله وهو يجهز في نفسه لحضور عقد قران صديقه المقرب"ربيع الباني"
وفي هالمناسبه ولأول مرة حيلبس عبد القيوم الزي التارقي..
ثوب  البازان "قزنر" باللون الأزرق وشاش طويل لونه اسود..
لبس عبد القيوم البازان وخدي الشاش ومشي طلع لمراية المدخل..
وقف قدامها وبدي يلف في العمامه ع راسه وهو يراقب في اللفات وحده ورا تانيه وكله حرص انهم يكونوا مساويات مافيهمش غلطه..
لف ع رقبته طرف من العمامه وهدا اللي يدرق بيه الرجل الصحراوي وجه كله ماعدا العيون..
وخلا طرف تاني طويل لفه ع كتفه..
ولبس خاتمه الفضه..وساعته الفضه..وتعطر بعطر رجالي مميز...وخدي تليفونه...
وقبل ليطلع..لبس الشبشب التارقي المميز اللي كان صناعة يد  اتقنت شغلها...
وفتح باب الشقه وطلع منها وسكر الباب وراه..
🍃وتحت في الشارع..
كان ربيع يستنى فيه مايبيش يمشي للجامع من غيره برغم ان عيلته وناسه واهل زوجته سبقوهم غادي..
بالزي الطرابلسي الجميل تألق ربيع العريس اللي مفروض يكون اكثر الناس تميزا اليوم.
بس التارقي بزيه الفريد واللي زاد قوة حضوره الباين حيغطي عليه..
ابتسم ربيع بإعجاب وهو عاقد حواجبه ويقول..
/الله يبارك الله يبارك..عريس..
عبد القيوم وصل فيه وهو يقول بإبتسامه..
/من بعدك ياربوعه اليوم يومك..
ربيع وهو يمرر في نظره عليه قاله..
/دبرلي في واحد مانعرفكش..
عبد القيوم بضحكه..
/ياودي باهي غير عدي اركب السياره العصر بيذن خلاص..
ربيع ضحك ضحكته المميزه ومشي ركب "اللاند كروزر"
وعبد القيوم ركب معاه شغل السيارة وتحرك .
ربيع؛شغل ايلان ايوتيان..
ضحك عبد القيوم وشغله الاغنيه وقعدوا يغنوا فيها الزوز مع بعض..
🍃🍃🍃🍃
خشت للدار بعد ماجت الحمام..
مشت وقفت ع الزيانه طول..فكت المنشف اللي ع راسها  وقعدت تنشف في شعرها..
ولما جت بتحول الفوطه شافت هلبه من شعرها فيه..
وجعها قلبها لين عيونها دمعوا..
لمت المنشف وحطاته ع تركينه..وشغلت مجفف الشعر وبدت تجفف في شعرها وهي تخمم "تفكر بقلق"..
تفكر في ردة فعل اهل راجلها ع عدم حضورها لمناسبتهم..
يمشوا عمتها واختها وهي لا...
اكيد هالمرة مش حيكون ليها عذر ومش حينسكت ع تصرفها  هدا زي ماانسكت ع اللي قبله..
طفت مجفف الشعر وهي تشوف لروحها في المرايه قالت..
/قداش بتهربي يعني سيورك بتواجي ياطوبى..
حطت المجفف وخدت المشط وبدت تمشط وهي تقول لنفسها..
/اللي كاتبه ربي بيصير خلاص اولها ع اخرها حتواجهي واللي درق حيطلع...
تمشط في شعرها بقلق ومش مهتمه لشعرها اللي ينزل مع المشط..
اللي هي فيه شويه شويه أفقدها الاهتمام بتفاصيل كانت تعنيلها هلبه..
وجهه اللي كانت مهتمه بنضارته وصفاء البشره متاعه وجمالها..
ولى لونه باهت وبشرته تعبانه جدا..
ايديها اللي كانوا اللي زي الحرير في ملمسهم ولوا جافات مليانات خطوط وتعرجات..
الشعر اللي من كثر الاهتمام بيه كثيف وناعم وطويل وفيه لمعه حلوة..
توا ولى تعبان متقصف خفيف والشيب غزاه بشكل غير طبيعي..
🍃كانت وردة بيضا مفتحه تفتح نفس اللي يشوفها ع الحياة.. انطفت وذبلت ويبسوا وراقها🍃
حط المشط ع الزيانه بعد ماكملت..وخدت "ستريتشه" لمت بيها شعرها فوق...
بعدين لمت الشعر كله ومشت طلعت من الدار للكوجينه..
🍃لقت فيها الاء واقفه تتفرج ع التورته بعد ماحطت في البوكس متاعها قبل لتغطيها..
طوبى وهي ترمي في الشعر في كيس القمامه:خيرك تشبحيلها هكي؟
الاء بحيره:زعمه حاجه تستر؟
طوبى قدمتلها وهي تشوف للتورته قالت..
/يابنتي خلي عندك ثقه في نفسك اللي درتيه ابداع راهو..
الاء:ماتجامليش فيا!؟
طوبى بغرور مصطنع..
/ماتنسيش الفكرة فكرتي..
ضحكت الاء ضحكه خفيفه..
طوبى بإبتسامه؛قوي قلبك وخليك واثقه من روحك لو مش عارفين ان شغلك حلو ماكانوش طلبوها منك..
ومشت طلعت من حداها..
الاء وهي تشوف للتورته بإبتسامه ثقه..
/صح..كان مش واثقين في شغلي ماطلبوهاش مني...
وتسمع صوت آذان العصر..
غطتها وحطتها في الثلاجه وطلعت طول للحمام...
🍃🍃🍃🍃🍃
"انقرت الفاتحه ياعويله"
بعد مابلغتهم خديجه..صدح الحوش كله بأصوات الزغاريد..
الخالات وبناتهم ونساوين الخوال...
بس العمات ونساوين العمام ومعاهم نجاه اللي جت بطلب من عمها محمد شنيبه اكتفوا برسم ابتسامه مجامله ع وجوههم..
ونسرين في وسطهم مش قادره تخفي فرحتها..
فرحة عروس حقانيه مش نفاق او مجرد مظاهر قدام الناس..
تهافتوا عليها وبدوا يهنوا..
وسدرة المهدي كانت تتفرج عليهم وملامح البؤس كانت باديه ع وجهها..الملامح اللي قليل من الحاضرين لاحظها...
اخر من هنى نسرين بالأحضان امها واختها..
وبدوا خالاتها يشتوا وهما يصفقوا..
واصوات شتاواتهم كان واصل لحوش عتيقه اللي مقعمزه في جنان حوشها بروحها وهي تبكي ع بنتها اللي فيسع نسوها وداروا من بعدها الافراح..
🍃بس راجلها وولادها لايمكن ينسوا..
اللي يشوف المهدي ومحمد ويزن يعرف انهم حضروا مجبورين بعد ماهنوا ربيع خداهم بوهم ورفعهم بعيد عن اجواء الفرح اللي تزيد من وجع قلوبهم وتكبر حزنهم...
بينما خوته نضال وعمر وباقي شباب الشارع لحقوا ربيع للمنطقه اللي فيها حوش اهله بش يحتفلوا غادي براحتهم..
☘☘☘☘☘
الساعه 6:30مساءا..
وصلت الاء بسيارتها للفندق..
درستها في المكان المخصص ونزلت منها بعدين نزلت بوكس التورته..
سكرت السيارة كويس ومشت بطريقها للباب اللي يخشوا منه لمطبخ مطعم الفندق..
قبل لتوصل غادي لقت واحد من الشغالين في المطعم يراجي فيها..
خدي منها البوكس ومشي قدامها وهي وراه..
~~~~~~~
مدير المطعم وهو مبتسم بإعجاب..
/يعطيك الصحه والله حاجه صح..
الاء وهي مبتسمه..
/ان شاء الله يعجب صاحبة المناسبه..
"السلام عليكم"
وجهوا نظرهم الزوز لباب..
شافت الاء مراة خمسينيه محجبه وانيقه باين عليها الوقار من الوهله الاولى تفرض احترامها ع اللي تجي عينه عليه..
ردوا عليها..
/وعليكم السلام..
هي بإبتسامه قدمتلهم تقول..
/وصلت التورته استاذ منعم؟
:وصلت مدام..
وقفت عليها وهي تتفحص فيها بنظرها..
والاء تشوفلها بترقب..
هزت راسها وقالت..حلو..
:شغل ابله الاء التاجوري..
وجهت المراة نظرها لآلاء وقالت بإبتسامه..
/عطيك الصحه بنتي..
الاء بإبتسامه توتر:سلمك المهم راضيه؟
هي قالت؛مازال لين ناكلوها قبل بعدين نعطيم تقييمي نهائي..وضحكت ضحكه خفيفه..
الاء بضحكه مرتبكه:مزبوط
شويه رن تليفونها..قاماته وشافت المتصل بعدين ردت..
/ايوه امي وصلت؟
"ايه وينك توا"
هي قالت..تعالى للمطعم متاع الفندق نشربوا قهوة وحني نهدرزوا..
"Ok"
سكرت وقالت..
/طلعوها بسرعه استاذ منعم..وشافت لآلاء وقالت..ماتروحيش قبل لنعطيك رأيي النهائي فيها ..
ومشت طلعت من حداهم..
:بسرعه طلعوا الطورطه ياشباب وردوا بالكم عليها..
ورفعوا التورته طلعوها برا..
المدير شاف لآلاء وقاللها..
/تعالي معاي آلاء..
هزت راسها بإبتسامه ارتباك..
وهو مشي بيطلع وهي وراه..
🍃وفي المطعم..
كان في في طاوله طويله في الطرف مقعمزين حواليها شباب وشابات في اعمار مختلفه...
والمراة صاحبه المناسبه جتهم وقفت عليهم وهي تقول..
/خاش توا..
☘وبعيد عليهم في طاوله تانيه..
كان مقعمز مهند مع زملائه الشباب المشاركين معاه في اعداد واخراج برنامجه الاسبوعي كل خميس في الليل..
كانوا منشغلين في الكلام عن البرنامج متاعهم..
لين عيون مهند اللي كانت تمرر في نظراتها العابره ع المكان شافوها...
كانت واقفه بعيد جنب المدير تشوف في التورته متاعها وهي تنحط في نص الطاوله والموجودين عيونهم عليها وكان باين عليهم الاعجاب باللي شافوه..
شويه وشافتلها المراة اشرتلها بيدها تجي..
المدير قال؛تنادي فيك بري..
مشت آلاء طول للمراة وعيون مهند معاها..
:شغل الحلوة هادي..
نظرات الاعجاب حاصرت الاء وكذلك عبارات الثناء والشكر وهي كانت في قمة الفرح بس حاولت
تبان عاديه ومتعوده قدامهم..
ع جية واحد قاللهم..
جي جي...
ناضوا كلهم وقفوا.وهما يشوفوا لمدخل المطعم..
وعيون مهند توجهت بنظرها لمدخل المطعم حتى هي..
ويخش منه شخص...
صدمهم الزوز لما شافوه...
آلاء ومهند...
والشخص هدا كان مصدوم حتى هو باللي شافه لما خش..
واصوات التصفيق انتشرت في المكان كله بعد خشته..
الاء غيرت عيونها عنه وهي متفاجئه ويجوا ع مهند..
تلاقوا عيونها بعيونه..
نظراته ليها كانت حاده...ونظراتها هي فيها خوف..
ماكانتش تعرف ان مهند عنده علم بموضوع "عزيز" لكنها خافت وارتبكت هلبه وانسحبت من حداهم وولت وقفت ع مقربه من المدير..
وقفوا تصفيق وبدوا يقولوا في عبارات التهاني..
"مبروك عزو...وحش ياصاحبي..مبروك عزيز"
هو بعد استوعب اللي شافه ضحك بإستسلام ومشي طول لأمه اللي كانت تشوفله بحب وفي عيونها لمعة الدموع..
وصل فيها خدي يدها وباسها..
وهي طبطب ع كتفه..بعدين قعد يسلم ع اقاربه وصحابه وهما يهنوا فيه...
🍃آلاء كانت تشوفلهم وهي مضايقه ع الاخر ومتوتره وكان تلقى تروح وعيونها يتجنبوا يشوفوا لمهند..
وهو كان قاعد بعيونه معاها..
وزملائه ركزوا عليه وهما يمرروا في نظرهم بينها وبينه..
واحد منهم بس كان عارف من تكون الاء حط يده ع ظهر صاحبه وقعد يطبطب عليه عله يهون حتى شويه من اللي قاعد يحس بيه..
موقف كان صعب هلبه عزيز ماعنداش ادنى فكرة عنه..
🍃أم عزيز؛قلت مدام مش جايني بش نحتفل بيه اني نمشيله..
عزيز بإبتسامه؛والله قبل الاثنين الجاي بنكون غادي..
واحد منهم قال..باهي اللي خالتي جت وخلتنا نكسبوا شوفتك جياته الاخيره كلها خدمه بس ياخالتي..
ام عزيز؛لاهو خلاص قرر ينقل جزء من خدمته برا هني بعني حتشوفوه هلبه القدام ان شاء الله..
؛اووو كبيره هادي عزيز بيعيش هني!؟
ام عزيز قالت..
/حتى هي احكام القلب ياولدي..
هو فنص في امه وصحابه بين اللي يضحك وبين اللي يصفر واللي يصيح...
:معناها عندنا عرس قريب..
؛بعد كاس العالم ارجوك..
عزيز؛هدوا هدوا ياهييه هدوا .حك رقبته من الخلف بشي من الاحراج وقال..
/مازال ماصار شي...
امه قالت بضحكه؛باهي قص التورته قص كلنا متسهفين نذوقوها..
هو قدم للتورته وخدي الموش وقالت بضحكه..
/حاضر..وقصها بالنص وهو يقول..هاه..
جاته امه وقالت؛ترا هات شويه..
مدلها الموس وهي قصت طرف وقالت..
/اول واحد انت...
ضحك وقال..
/ناويتني الحاجه..
:مازال لين تتزوج يبدا جو العزايز..
مدت لولدها الصونيه وهي تقول..
/زعمه نديره جو العزايز!؟ ان شاء الله لا ياكبدي..
هو خدي منها الصونيه وقال..
/لاحبي قلبها حنين وعقلها كبير مش حتنكد ع وحيدها ولا يام!؟
هي بضحكه قالت؛كول كول..
واحد من اقاربه قال مازحا..
/قالتلك كول كول..تي حي عليك حي
ضحكوا الموجودين وامه منهم..
وهو قعد يشوف لأمه بريبه وكلي كشيك من التورته..
امه قالت؛هاه شن رايك؟
هوقال..امم..رغم اني ماندورش في الحلو هلبه بس تمام كويس..
امه:كويس هلبه ولاشويه..
هو قال..تمام يعني..وحط الصونيه ع الطاوله..
امه شبحتله بطرف بعينها بعدين قالت لوحده من البنات تجي تقص للباقي..
وهي خدت الصحن متاع ولدها وذاقت من التورته عجبتها هلبه..وقعدت تشوف لولدها كيف منشغل في الهدرزة مع صحابه..
قالت:عزيز..طعمتها خيال..
:ايه والله فضيعه..
:نايس هلبه..
امه قالت؛انت بس اللي ماعجباتكش..
هو قال؛ماعنديش ع الحلو هي هادي..
امه قالت؛وينها البنيه اللي دارتها خل نعطيها تقييمي الاخير..
وقعدت دور عليها بعيونها لين شافتها وقالت وهي تأشرلها..
/تعالي
هو  عقد حواجبه وشاف امه من تكلم...
ارتسمت ع وجهه ملامح الدهشه...
وقلبها قعد يدق..يدق..يدق...بقوة..
والاء جايه ناحيتهم وهي حاسه ان رجليها حينعقدوا وحطيح من كثر التوتر والارتباك بسبب وجود مهند..
اللي يراقب في كل شي بالتفصيل..
وصلت فيهم الاء وقالت وهي تتجنب تشوف لعزيز..
/شن رايك مدام؟
ام عزيز..
/يعطيك الصحه شكلا ومضمونا وكل الموجودين هني عجبتهم..ماعدا ولدي حسيته عنده عليها ملاحظات..
عزيز بسرعه قال وهو مرتبك..
/لالاملاحظات شني!؟الله يبارك حاجه فوق التقييم بهلبه..
الموجودين تفاجئوا بيه كيف غير رايه بسرعه قبل ديما ثابت ع ارائه ومايحبش يجامل نهائي..
وامه تشوفله بإبتسامه..
الاء ابتسمت بتوتر وقالت..
/تمام المهم عجبتكم..توا نستأذن لازم نروح قبل ظلم الدنيا..
ام عزيز وهي تشوفلها بإبتسامه..
/في امان الله بنتي..
الاء هزت راسها وهي مبتسمه مجامله وقالت..
/السلام عليكم..
ومشت طول طلعت من المطعم وكأنها هاربه..
وعيون عزيز معاها..شويه شاف مهند طالع وراها طول..
🍃🍃🍃
وصلت لباحة الفندق وهي تمشي بسرعه وكأنها حاسه ان مهند يلحق فيها..
وهو بسرعه اكبر لحق عليها ووقف قدامها.
فجعها وقفت في مكانها وهي تشوفله بخوف وعيونها تعبوا دموع..
اما هو ابتسم بسخريه..
/صحه ليك والله صحه ليك كيف بسرعه هكي لقيتي ضحيه جديده طاح بسرعه في الفخ مسكين..
الاء بدموع؛لالامش زي..
قاطعها وهو يقول..
/تعرفي خاطر في بالي نخشله ونفضحك قدامه نخليه يعرف حقيقتك بكري بكري
جت بتتكلم مرة تانيه سكتها وهو يقول ساخرا..
/ولا نقولك خلي نزيد نعطيك وقت معاه بش تلمي منه اللي تقدري تلميه..
الاء حطت يدها ع فمها وهي تشوفلها بألم ودموعها ينزلوا..
حست لسانها انشل مش قادره تحركه ودافع بيه عن نفسها..
ع جية عزيز شافهم مع بعض وركز ع حالتها ودموعها اللي ينزلوا زي السيل..
ومهند يقول..
/تبكي!؟ امسحي دموع التماسيح متاعك امسحي شكالك انتي عمرهم مايبكوا الا ع خاطر الفلوس بس..
غمضت الاء عيونها بألم..
مهند وهو يشوف فيها تبكي..
قلبه ينوجع..وكل مايحس انه قلبه ينوجع ع خاطرها يزيد غضبه وانفعاله..
/ياريتني زيك عديم احساس وانتهازي راهو مش هدا حالي..
"معليشي شن في؟"
شافوا الزوز لعزيز لقوه يشوف لمهند بنظرات امتعاض..
مهند شاف لآلاء وقال بإبتسامه ساخره..
/نقوله؟
الاء قعدت تشبحله بصدمه..
عزيز وهو يشوف لحالة آلاء قدملهم قال وهو يحرك في يده..
/توكل توكل..توكل ع حالك..
مهند وين شافه جاي بيوقف بينها وبينه وكيف قعد يكلم فيه وباين عليه مش راضي فيها..
من الغيره عقله مااستوعبش ووقف عن التفكير وقال بضحكه ساخره وهو منفعل..
/والله مسكين بالله..اسمع مني وخودها نصيحه البنت هادي فوتها مدايرتك شكورطه راهو..
الاء حطت يدها ع صدرها وهي مصدومه فيه لأبعد حد..
وهو متابع يقول..
تلقاها تكلم فيك انت وواحد تاني ومدايرتكم مضحكه الزوز.
ويجيه بوكس من عزيز ع فمه من قوته لين وخر خطوه للخلف وهو حاط يده ع فمه..
عزيز وهو يشوف لمهند بغضب:بري روحي ...
مهند وهو يشوف في الدم في يده قال بضحكه..
/معليشي معليشي من الصدمه مش رادهولك..
ويقدمله عزيز ويضربه مهند هالمرة يرد عليه..
وقعدوا يضاربوا وامن الفندق جوهم طول ..
الاء بعد ماكانت جامده في مكانها من صدمتها القويه في مهند..
هربت تجري من المكان وهي تبكي..
وهما الزوز حزهم الأمن عن بعض وخدوهم الزوز وعيون مهند تشوف لعزيز بحقد وغيره شديده..
🍃🍃🍃🍃🍃
الساعه 8:00مساءا...
صالة حوش شنيبه كانت معبيه بالمعازيم من الاقارب بس..
من ضمنهم نجمه وبنتها عواطف اللي كانوا عيونها ع نسرين وهي تتخيل في روحها مكانها ومتفائله هلبه بقرب هاليوم..
ومطيره وفردوس اللي احرجتهم اسئله الحاضرات عن طوبى..
جوابهم وتبرريهم لغيابها ماكانش مقنع هلبه للناس..
لهالسبب مغليه وخديجه كانوا واخدات موقف منهم ومابوش يجوا ناحيتهم نهائي..
🍃في جهة تانيه من الحوش كانت راما تاخد في صور لروحها بش بعدين تبعتهم لأسماء تشوفهم..
وفي نفس الوقت كانت عاطيه مهمه لجوري بنت طاهر..
جتها جوري تجري وهي تقول..
/توا خش خش..
شافت راما لشكلها في المرايه بعدين ابتسمت ومشت بتطلع زهي لابسه عبايه مفتوحه وحاطه الوشاح حط وقالت لجوري..
/اسبقيني بسرعه..
طلعت جوري قبلها وهي بعدها..
وعيون سدرة بدون مايدروا عنها تراقب فيهم..
🍃برا..
محمد كان خاش للحوش وقف في الجنان وهو لاهي بتليفونه يراسل في واحد من صحابه ع القرايه..
شويه سمع صوت راما وهي تقول..
/انتي وين كنتي مقعمزة؟
جوري وهي تأشرلها ع مكان..
/هني وكانت في ودني..
وراما مشت وهي دور في المكان..
محمد عقد حواجبه وقال..
/شن عندك هني انتي وياها؟
وقفت راما ع حيلها وشبحتله وهي مرتبكه وقالت..
/خرصة"حلق" جوري طاحت هني..
محمد بحده:امشي خشي داخل انتي اني تو ندورها..
هي قالت..حاضر..
ومشت خشت وايدها ع قلبها..
محمد بهدوء:خشي جوري تو ندورهالك كان لقيتها نبعتهالك مع حمزة..
جوري بإرتباك؛باهي..
ومشت طول خشت..
تنهد محمد بملل..حط تليفونه في جيب سرواله العربي ومشي يدور في حلق جوري اللي ماكانش رايح اصلا..
🍃🍃🍃🍃
وفي حوش لطفي الواعر..
كانت طوبى مقعمزه في الجنان وهي تشوف للباب بقلق..
عقلها كل مرة يصورلها في موقف شكل..
مرة تتخيل في فردوس طلعت عن طورها ودارتلهم مشكله..
ومرة تتخيل في مغليه نازله فيهم قدامهم وهما يردوا عليها..
وكل مرة تتخيل في موقف وتزيد تخاف اكثر واكثر..
فجأه..
دق باب الحوش..
فزت من الخوف ومشت بتفتحه وع بالها ان عمتهت واختها مروحات بعد ماداروا مشكله كبيره في حوش شنيبه..
وصلت في الباب وقلبها بيوقف من الخوف..
وفتحاته طول..
وتتجمد في مكانها..
زي ماهو تسمر ف مكانه وقعد يشوفلها..
استاقظت لنفسها فيسع وجت ورا الباب وهي تقول..
/تفضل خوي
هو حاول يدير روحه عادي قال..
/الحاج لطفي قاعد؟
طوبى بربكه..لا والله ماروحش لتوا..
هو قال..
/تمام...السلام عليكم..
هي سكرت الباب من غير ماترد وقالت بإحراج..
/عليك موقف..!
🍃وهو مشي بإتجاه لحوش شنيبه وكان قلبه في حاله يرثى باله وكل مافي مقلوب رأسا على عقب...
شويه وقفه صوت المحجوب وهو ينادي..
"تارقي"
وقف في مكانه والتفت شافه بعدين مشاله..
والمحجوب قدمله..وصلوا في بعض تصافحوا وقاله..
/لطفي ماجاش شكله؟
عبد القيوم بلع ريقه وعقد حواجبه وهويقول..
/ايه..
المحجوب؛تمام تعال معاي نستنوه في حوشه لين يجي..
عبد القيوم هز راسه بدون مايتكلم..
المحجوب؛تفضل..ومشوا الزوز لحوش لطفي..
المحجوب:وين ع التارقي اليوم
عبد القيوم بإبتسامة مجامله..
/فاتحة ربيع الباني اليوم..
المحجوب وصل في الباب وجي بيدق وهو يقول..
/ايه عندي علم ربي يهنيه..
هز عبد القيوم راسه وهو ساكت بعدين استاقظت لنفسه وتباعد عن الباب قبل ليدق عليه المحجوب..
دق الباب وجاهم صوتها وهي تقول..
"مني"
عبد القيوم لف وجهه عن المحجوب وشد ع قبضة يده بقوة.
وقلبه من قوة الدق حسه بيطلع من مكانه..
"افتحي خالو"
فتحت طوبى الباب..
المحجوب:معاي راجل..
طوبى هزت راسها ومشت خشت طول من غير ماطلع الصوت..
بعد ماخشت المحجوب شاف لعبد القيوم وقاله..
/تفضل..
عبد القيوم:يزيد فضلك..وخش..
والمحجوب خش بعده وسكر الباب..
🍃🍃🍃🍃🍃
"اقطعي فية امه الفندق هدا معاش تمشيله بكل"
الاء ببكي؛حاسه روحي بنموت ياخالتي..
غرفه ودموعها في عيونها قالت..
/بعيد السو عليك حبيبتي معاش تقولي هكي..
ع خشة طوبى عليهم كيف جت بتتكلم شافت حالة آلاء قالت بخوف..
/خيرك توا ماكان فيك شي!
والاء تبكي بحرقه..
وغرفه تشوفلها بحزن..
طوبى مشت قعمزت جنبها وهي تقول بقلق..
/احكي للوشه شن صار معاك غادي!؟
ع خشة اريج اللي كانت جايه من الحمام مررت نظرها عليهم وقالت..
/خيركم اللطف..انتي خيرك تبكي شن دارلك هداكا تكلمي؟
هدت آلاء بكي وبدت تحكيلهم..
🍃🍃🍃🍃🍃
"من امتى تضرب وتتصرف بهمجيه"
عزيز بإنزعاج؛مش ارعن اني بش نضرب بلا سبب..
:باهي شن هو السبب؟
عزيز تنهد وقال؛التافه هدا كان خطيبها..
هي قالت؛كان خطيبها حاجة فاتت ع حالها..
عزيز؛هو مش مخليها في حالها..
؛علاش شن يبي منها؟
عزيز:واحد متخلف تفكيره مريض يام شن تتوقعيه يبي من وحده فسخ خطبته منها..
امه وهي تفكر..
/ربي يكفيها شره..بس ولدي يعني انت سألت عن البنت هادي كويس؟
عزيز؛اكيد ونعرف عنها كل شي اطمني البنت محترمه وبنت عيلة كويسه الناس تشهدلهم بكل خير..
:باهي نبي نخطبهالك..
عزيز؛امي اهدي شويه بالله عليك اني راسم في راسي الموضوع ومخططله نكمل البرنامج اللي دايره وتمشي اموره بعدين نقولك اخطبيهالي..
ابتسمت امه وقالت..
/فرحانه بيك اللي اخترت وحده ليبيه وشاد فيها هكي خير ماتاخد وحده غريبه عليك حتى في دينك مرات تاخدك منه..
عزيز بإبتسامه..
/ادعي انتي ربي يوصلني للي نبيه بش فرحتك تكمل بعدين..
هي دعت من قلبها وقالت..
/ياربي ياولدي ينولك اللي في بالك ويفرح قلبك وقلبي يارب..ابتسمت وقالت..البنت الله يبارك عليها زينها ماريتش زيه..
غير عزيز عيونه عنها وهو مبتسم بشي من الاحراج وامه تشوفله بإبتسامه حب..
🍃🍃🍃🍃🍃
"مهند معقوله!؟"
الاء ببكي:اني بروحي لتوا مش مستوعبه..
اريج بغضب:الحق.ير  طاح من عيني والله مايجي راجل..
الاء بنبرة باكيه..
/ماتقوليش هكي اني مادرتش فيه باهي ..
طوبى بضيق..
/تمام انتي غلطتي ومش ساهل اللي صار وعنده حق ياخد منك موقف لكن ماتوصلش بيه لهني حتى كان قبل عنده عذر  توا ركب روحه حق بتصرفه الغبي هدا..
غرفه:يمشي ودرة فسخ الخطوبه وفاتك ولا؟ شن مازال يبي منك الندل؟
اريج بغضب..
/حرقلي دمي كان يطلع قدامي توا نمسح بيه الارض..
والاء تسمع فيهم وهي مش راضيه فيه اللي داره ع قد ماوجعها بيه بس كانت عاطياته عذر..
🍃🍃🍃🍃
الساعه 10:00 ليلا..
ربيع كان واقف في جنان حوش شنيبه يراجي ع نار..
شويه طلعله المهدي وهو قام بين ايديه يحيى اللي لما شافه ربيع قلبه لهفله..
وصل فيه وقاله..
/هيا استلم...
سما بالله وخداه لحضنه..
حس بشعور غريب وحلو اثر فيه هلبه وخلا عينه تدمع..
المهدي..
/في حكم اليتيم هدا راهو امانه في رقبتك من توا ياربيع..
ربيع بإبتسامه؛واني نشوف فيه نعمه من ربي عوضني بيه..
ابتسم المهدي وهز راسه بإيجاب..
شويه سمعوا اصوات زغاريد..
المهدي مشي فتح الباب وطلع..
ونساوين عيلة الباني طلعوا نسرين وهي لابسه كاب ابيض ساترها..
وصلوهاله واخته قالت؛هات الوليد الجاي..
ربيع؛لالا ساعديها لين تطلع برا وتوا خوها يفتحلها باب السياره..
ابتسمت نسرين..
اخته قالت:باهي..
وساعدت نسرين وقعدت تمشي بيها لين وصلوا في الباب فتحاته..
ربيع:مهدي..
قدم المهدي طول لأختها حاوطها وطلعها للسيارع وركبها وسكر الباب..
وربيع مشي طول ركب بيحيى..
ربيع؛ياام يحيى خودي يحيى..
نسرين مدت ايديها عطاهوله وهو يقول..
/الحنه فضيعه..
ضحكت نسرين..
هو ابتسم وشغل السياره وقعد يغني..
/محلاها الدنيا لما تبي تجمع بيهم..
ونسرين تسمع فيه وهي تضحك..
وهو تحرك بالسياره وقال..
بندير بيكم لفه بعدين نمشوا لحوشنا..تمام افندم؟
نسرين بضحكه:تمام..
ابتسم ومشي طلع بيها من الشارع...
🍃وفردوس ومطيره طلعوا من حوش شنيبه..
مطيره؛ريتي الكل.به خديجه كيف طنش؟
فردوس:ودرة وسيل حدرة..
مطيره؛قسما بالله لولا هالعيل راهو...وسكتت..
فردوس تنهدت بضيق وقالت..
/خلاص ديري روحك عاديه مرات نقابلوا بوي وحني خاشين..
تنفست بعصبيه بعدين هزت راسها وقالت..
/باهي..باهي..
🍃🍃🍃🍃
"عمك شد فيكم تباتوا بتكسري كلمة عمك؟'
نجاة وهي متصنعه الضيق ؛والله ماعارفه شن نقول..
مغليه؛بري لجناحك انتي وصغويرتك بري وكانك ع الجالي تريحي بيروح الاسبوع الجاي ان شاء الله

نجاه هزت راسها وقالت:باهي..تصبحوا ع خير..
مغليه:قدامك كل خير..
ومشت نجاح بصغارها للجناح متاعها..
ومغليه ولت خشت للصاله...
🍃🍃🍃🍃
الساعه 11:30 ليلا..
في جنان كوجينة حوش لطفي..
فردوس؛بكل وقاحه وحقاره جايه ومغليه كل شويه نجوته ونجوته..
طوبى بكره:وهديكا خديجه شن جوها معاها؟
فردوس:لاحظتها ماجتش جيهتها بكل ولاعبرتها..
هزت طوبى راسها وهي تفكر..
فردوس؛لكن بنقولك الباين مش حيفوتوها المرة هادي..
طوبى خدت نفس وقالت..
/عارفه..
فردوس بقلق..
/شن بديري توا؟
طوبى تنهدت بضيق وقالت..
/ماعندي ماندير..اللي كاتبه ربي بيصير يافردوس..

#عابي_على_ربي
#طوبى

...يتبع....