طوبى ☕شارع القهوة☕

الجزء الثمانون

طوبى  "جنة طوبى"
#جمان_فريد
#الجزء_الثمانون "جنة قلبي "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
🌙رمضان مبارك🌧رمضان الدعاء🌙
‏إذا دعَوتُم فألِحُّوا؛ فقد قال الأوزاعي: "كان يُقال: أفضل الدُّعاء؛ الإلحاح على اللَّه، والتَّضرع"، وتتجلَّى دعوات المُلِحِّين في لزومهم لها، وتكرارها، وحضور قلوبهم فيها، وإظهار ضعفهم وحاجتهم لربهم، وتجديد الآمال بحصولها ولو تأخر وقوعها.

- الشيخ صالح العُصيمي.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃بنتي..هي مني واني منها🍃
__________________________________________
في الطريق ماشي وراهم وهو متوتر وباله مشغول...
وهي في سيارة بنت اختها  كانت في حالة استغراب تقول..
/معاش في وجع..
اريج وهي تشوفلها من المرايه:كيف؟
فردوس:عادي تصير الوجع يمشي ويجي انتي هكي ولاهكي اليوم موعدك
طوبى بقلق:مانحسابش الوجع متاع الولاده واعر هكي كنت نتوجع الايام اللي فاتوا لكن اليوم حسيت روحي بنموت..
فردوس:مالا تحسابي قولت امي ساهله ياطوبى..
طوبى قعدت ساكته وهي تفكر في كلام اختها اللي لمس قلبها..وجع المخاض يعتبر اصعب وجع يتعرضله البني آدم
تحديدا المرأة..بس الغريب فيه ان كل الاوجاع تسيب اثر سلبي في نفوس صحابها ماعدا هالوجع اللي يزيد يعلق الام بجنينها اكثر واكثر..
🍃اتصلت بعدين  بالدكتورة اللي تابع عندها وتأكدت انها موجوده في المصحه..
ووصلت اريج للمصحه..وكانت في استقبالهم دكتورة طوبى ومعاها كرسي متحرك..
خلوها تقعمز عليه وخشوا بيها داخل..
🍃وقعد التارقي برا في سيارته..
اتصل بالحاج علي وطمنه..بعدين قعد يستنى في جيتهم ومازال متوتر وباله مشغول...
🍃🍃🍃🍃🍃
"صباح الخير غرفه"
غرفه وهي لاهيه بتليفونها قالت..
/صباح النور..
نبيله لاحظت عليها التوتر وقالت:خير شن في!؟
حطت التليفون ع وذنها وقالت..
/كلمتني الاء توا قالت رفعوا طوبى حالة ولاده..
نبيله:اها..ربي يسهل عليها..
غرفه:إن شاء الله يارب...ايوه اريج شن صار في خالتك..
"طلع تساهيل"
غرفه؛تساهيل!؟
"ايه هكي قالت الدكتورة وقاللتها تتمشى توا"
غرفه:بإذن الله تجيب اليوم طبيعي وتفتك من العمليات..
"يارب"
غرفه؛حداك هي؟
"توا طالعين لحديقة المصحه نتمشوا معاها"
غرفه؛عطيهالي ترا..
"لحظه بس"
غرفه شافت لنبيله وقالت..
/تساهيل مازال ماجابتش..
نبيله:ربي يسهلها عليها..
غرفه؛ايوه بيبو شن جو..
"تمام الحمد لله شن جوك انتي والصغار"
غرفه؛الحمدلله كويسين..المهم انتي شني توا..
"شي..قالت الدكتورة تمشي شويه"
غرفه:يعني ماعطتكش احتمالات؟
"لالا قالتلي بإذن الله ولاده طبيعيه"
غرفه بإبتسامه:يارب..ربي يسهل عليك وتجي جنونه ونفرحوا بيها..
"آمين يارب العالمين"
غرفه؛هي مالا نخليك تتمشي..
اشرتلها نبيله بأنها تسلم عليها..
غرفه:تسلم عليك نبيله..
"عليك وعليها السلام"
غرفه؛ترا عطيني اريج..
"شويه بس"
قعدت غرفه تشوف في نبيله وهي واقفه ع سرير الصغار وتتأمل فيهم بإبتسامه حب..
ابتسمت بعدين قالت..
/ايوه اريج اي جديد يصير بلغيني بالله
"حاضر خالتي"
غرفه:سلام توا..
"سلام"
سكرت غرفه وهي تدعي..
/يارب سهلها يارب..
شافتلهل نبيله وقالت..
/ماكلمكش رؤوف؟
غرفه؛كلمني قبل الفجر بشويه قالي الرحله تأجلت للظهر يعني العصر ان شاء الله يكون هني..
نبيله:يوصل بالسلامه ان شاء الله..
غرفه؛ان شاء الله..تشربي قهوة؟
نبيله؛ياريت..
غرفه؛تمام..ومشت طلعت من الدار..
ورجعت نبيله تتأمل في صغار خوها..
🍃🍃🍃🍃
وطوبى تتمشى في باحة العياده..
ووراها فردوس واريج..
وهي تمشي شافت وحده زي  حالتها كانت تتمشى بس ماكانتش بروحها...كان معاها واحد واضح جدا ان زوجها من شدته ليها وابتسامته وهو يهدرز معاها..
للحظه تخيلت الجالي جنبها..شادها ويتمشى هو وياها ويهدرز عليها بش يسليها ويهون عليها..
هكي كانت تتمنى لو كان زواجها طبيعي و الجالي زوج صالح يحبها بصدق وهي وياه يستنوا في جية بنتهم مع بعض..
قداش حتكون اسعد انسانه في الدنيا..
نعمة الاستقرار اللي تكون عند هلبه ناس هما مش حاسين بيها..
طوبى انبلت بفقدانها وراح معاها الامان..
وقعدت فرحتها بجيه بنتها ناقصه وسط هالاحزان والمصائب..
وكأي نفس بشريه تضعف احيانا ويصيبها شي من الاعتراض ع قدرها وتقعد تسأل علاش اني يصير فيا هكي ياربي!؟
لكن الارتباط القوي بالله تعالى والايمان الراسخ بيه وبقضائه وقدره خيره وشره خلاها تستغفر في نفسها وتبدا تذكر فيه بهمس وتغير نظرها عن المراة وراجلها وتسكر باب الشيطان..
شويه ورجع ألم المغص من جديد..
وقفت في مكانها وشدت بطنها وفردوس وبنتها جوها طول..
فردوس:هاه طوبى!
طوبى بوجع؛رجع يافردوس..
اريج:خل ندخلوها داخل يام..
شدتها فردوس وقالت:هيا تعالي..
واريج شدتها من الجهة التانيه وقعدوا يمشوا فيها وهي قاعده تحس بالوجع يزيد شويه شويه..
🍃بانوا ع حسين وجدهم اللي كانوا جايين بسرعه بإتجاه المصحه..
وشافهم عبد القيوم اللي قاعد مقعمز في السيارة..
فيسع غير نظره عنهم وقلبه موجوع ويجوا عيونه ع الحاج علي وحسين..
يفتح باب السيارة طول وينزلهم..
🍃🍃🍃🍃🍃
في غرفه الصالون ع الكرسي الجلد كان متمدد..
سرحان وع وجهها باديه ملامح الضيق..
دقت الباب دقتين..
هو اشرلها بيده تخش..
خشت وهي تقول:فايق بكري!
هو قال:مارقدتش..
قعمزت وهي تقول؛حتى اني ماجانيش نوم..
قعدت ساكت وماعلقش..
وهي سألاته..
/شن اللي مقلقك هكي؟
تنهد مختار وقال..
/مش عارف..في شي هكي..حط يده ع صدره وهو يقول..
مضايق..
صابرين:مضايق من شي عارفه؟
مختار:مضايق وقلقان..ومش عارف كيف نوصفلك..
صابرين: تصير..لكن اني اللي قلق نومي عارفاته شن هو..
ماباش يسألها..
هي قالت؛عرفت ان نجاة شدت الشركه بعد الجالي..
وهو ساكت ماابداش ردة فعل..
صابرين؛انت وراها صح؟
تنهد وقال:ماعنديش خلوق لشي بري لدارك..
عصبت وناضت وهي تقول..
/غلطت هلبه راهو نجاة بالذات ماتستاهلش منك دير فيها خير حتى لو كنت قاصد تقهر من وراه الجالي..
ومشت طلعت من حداه وهو تبع بعيونه وقعد يفكر في كلامها...
🍃وهي مشت طلعت للفيرندا بش تشم هوا وتهدا..
وتحت كان رضا فايق مداير تقعميزه ويشرب في القهوة..
رفع عيونه بنظره عابره للفيرندا شافها..
قعدوا عيونه عليها وهو يشرب في القهوة..
وهي مررت نظرها قدامها بعدين نزلت عيونها تحت لقاته يشوفلها..
رفعت حاجبها وهي تشوفله بحده..
نزل عيونه بكل هدوء وقعد يرشف في قهوته برواق..
وهي مشت خشت داخل..
🍃🍃🍃🍃🍃
"اللهم لاسهل الا ماجعلته سهلا اللهم لاسهل الا ماجعلته سهلا..
ياربي ياربي..ياالله"
طلع منها النداء الاخير بصرخه من قوة الوجع..
والممرضات يساعدوا فيها بش تركب ع السرير ووحده فيهم تقول..
/شويه وترتاحي شويه وترتاحي..
خشت الدكتوره ومعاها القابله..
طوبى بوجع:
/ياربي ارحمني ياربي ارحمني..ياربي..
وكانت تصرخ من الوجع..
والدكتورة تقول..
/معليشي معليشي..هي كلها شويه وتشوفي جنونه قداش ليك تراجي فيها..
كانت تبي تبتسم من حلاوة ماسمعت بس الألم كان اشد..
/وووه عليا ياربي..معاش نقدر..!ياربي ارحمني...
🍃برا..
فردوس بقلق:ياربي هونها عليها ياربي كون معاها..
واريج تردد في الصلاة الابراهيميه وهي ع نار..
🍃وقدام مبنى المصحه..
حسين:بارك الله فيك وسامحنا ع تعبك..
علي؛ايه بالله عليك سامحنا ياولدي..
هو هز راسه وقال: شن بنقول الله يسامحكم وخلاص..
ضحك حسين ضحكه خفيفه..
عبد القيوم بإبتسامه:ماتبوا شي؟
علي:لابارك الله فيك كفيت ووفيت..
عبد القيوم؛تمام..السلام عليكم..
هما ردوا عليه السلام..
وهو مشي لسيارته ظاهريا يبان عادي بس من داخل كان  يجر في نفسه جر..
ركب السياره وهو يقول..
/لاإله إلا انت سبحانك اني كنت من الظالمين..
وشغلها وتحرك طول...
🍃🍃🍃🍃🍃
بنتي 💖
أسعد ليالي العمر .. يا عمري💖ويَّاك
لمَّـا عـلينــا تــطل.. ونـــقول حـيــــاك
مرحبا بكلِّ العِشق .. و بنشوة أفــراحي
أهــلاً هـلا بـالزَّيـن .. تفــداك جـراحـي 
وإن شافتك روحي .. بجيتـك تـدانيهــا
قربك ياأغلى النَّاس.. نـــوَّر  ليــالـيهـــا
🌼🌼🌼🌼
ونورت الاقحوانه الصغيره دنيا امها..
اللي كانت وهي منهكه تماما وفي قمة التعب ومن جبهتها يتصبب العرق مختلط بالدموع مبتسمه بحب..
مبتسمه وهي تسمع في صوتها تعيط...لكن ماكانتش قادره تشوفها...
لعند مانظفوها وجابهولها..
قعدت تشوفلها بلهفه شوق عارم..
ووين حطوه في حضنها انطفت لهفه هالشوق..
غمضت عيونها وكل شعور حلو في الدنيا تجمع بين ضلوعها وهي ضامتها...
زاد الحب اضعاف واضعاف مضاعفه..
من قوة شعورها بيها قعدوا دموعها يصبوا صب...
مافيش وصف في الدنيا للشعور اللي كانت تحس بيه طوبى وقتها...
🍃وفرحة خواتها وكل عيلتها بجية جنة كانت كبيره..
وكلهم كانوا متشوقين لشوفتها..
🍃🍃🍃🍃🍃
"الله!؟:
فايزة وهي دمع بإبتسامه؛توا توا كيف سمعت وقلت نخبرك..
"ياروحي ياعمري..في مصحة القدس هي ولا؟"
فايزة:ايه..بتمشيلها؟
" اكيد بنشوف بنت خوي"
~~~~~~~~
مغليه وهي تتكلم بالتليفون..
/توا جابت؟
"مالهاش هلبه يام ع حسب ماقالتلي فايزة"
نزلوا دموع مغليه مسحتهم وقالت..
/عطيتي خوك علم
"مسكر النت يام ماحصلتاش كان اتصل بيك خبريه"
مغليه رشفت وقالت
/من غير ماتقولي بنته هادي....
🍃والخبر من مغليه لخديجه..
اللي كانت مشغوله بالتجهيز لحفلة حماتها..
خديجه:خبروا الجالي لازم يعرف..
"قلت لنضال يتصل بيه يقوله"
خديجه بحسره:حسبي الله ونعم الوكيل فيها غصصتنا في فرحتنا بذرية وخيي..
"اااه يابنتي كبدي مسحونه خايفه مايخلوشي يشوفها"
خديجه: غير يعبوا..لما تولي بنتها بروحها..هدا بوها بوها احق منها هي نفسها ببنته..
"ناري عليه وليدي وخلاص"
🍃🍃🍃🍃🍃
والجالي في هالوقت..
في البلاد الاوربيه اللي قاعد فيها...
كان لاهي بالخدمه ع جهاز اللاب توب يدير في تعديلات انطلبت منه ع التصميم..
قطع عليه اتصال جاه..
بعدم انتباه خدي التليفون وفصل المكالمه..ووين جي بيرده ع الطاوله قال..
/خل نسكره بكل..وسكر التليفون ورده لمكانه ورجع لهي بشغله..
🍃🍃🍃🍃🍃
"جابت بنوته بعتتلي اريج صورتها زي العسل"
مختار وهو يتكلم بالتليفون..
/حالها باهي؟
"هي وخالتي حالهم باهي وصحتهم تمام "
هو قال:كويس كويس..خلاص بنتي بنسكر توا مشغول..
"باهي..سلام خالو"
هو قال؛سلام حبيبتي..
وسكر وع وجهها كانت باديه ملامح الاستياء وهو يشوف للتيلفون..مستاء ان اخته جابت عيل من واحد زي الجالي..
بس بعدين قال..
/يللا رب ضارة نافعه مرات القدام تخدمني..
وين جي بيحط تليفونه ع طاولة المكتب وبيمشي يطلع لداره بش يوتي روحه...
جاته رساله..
رفع التليفون وفتحها..
كانت صورة ليها..جنة...
وين شافها ارتخت  ملامح وجهه..وحس بشعور غريب جدا اجتاح قلبه..وبانت في عيونه لمعة الدموع..
عقد حواجبه بشي من الاستغراب..بعدين طلع من الصورة وحط تليفونه ع الطاوله ومشي طلع من الصالون...
🍃🍃🍃🍃🍃
الساعه 11:00صباحا..
في المصحه..
اميمه كيف خشت وفي حالة من الضيق..
تبي تمشي تشوف طوبى وبنتها بس خجلها من اللي داراته معاها منعها...
وهي ماشيه بإتجاه الحجره متاع فريق الدكتور خالد تلاقت هي وقصي تجاهلاته تماما وكملت طريقها..
وهو كان ماشي وهو ملتفتلها ويشوفلها بحقد..
لقاها تلاقت مع الدكتورة هناء طليقة خالد..
ابتسم بمكر والتفت القدام مكمل طريقه..
🍃وقفت هناء اميمه وقالت..
/صباح الخير..
اميمه:صباح الخير دكتورة..
هناء بإبتسامه فيها شي من الكبر..
/قريبتك الفجر كانت حالة ولاده وجابت استغربت لما ماشفتكش معاها..
اميمه حاولت تجاوب عادي برغم ارتباكها وقالت..
/كنت راقده وقتها مش مستاقظه..
هناء:اممم..جابت بنوته زي العسل شفتيها؟
اميمه بإستغراب؛خشتيلها؟
هناء:ايه مع الدكتورة امل الدكتورة متاعها..
رفعت اميمه حاجبها وهي متعجبه..
هناء:تمام مانعطلكش كملي طريقك..
ومشت واميمه تلحق فيها بعيونها وهي مستغربه..
بعدين غيرت نظرها القدام وكملت طريقها..
🍃🍃🍃🍃
وفي حجرة فيها نساء جايبات حديثا بين اللي قيصريه وولاده طبيعه..
كانت طوبى وبنتها في حضنها تشم في ريحتها وتقول...
/ياروحي ياعمري..محلاها بنيتي..
فردوس بضحكه:خلاص هاتيها خليها ترقد..
طوبى بحب:مش قادره نبعدها عليا..
فردوس:مازال العمر قدامكم تو تلصق فيك لين تفدي منها هاتيها..
مدتهالها وقالت..
/اني نفد من جنونتي مستحيل..ياعمري اني..
وخدتها فردوس وهي تضحك وحطتها في السرير..
وطوبى تشوفلها بحب وعيونها مدمعات..
فردوس:ربي يحفظها ويخليهالك..
طوبى من قلبها وهي تشوف لبنتها:اللهم آمين..
بعدين شافت لفردوس وقالت..
/مانقصوش عليك فلوس؟
فردوس:لالا المبلغ اللي عطيتهولهم هو نفسه اللي طلبوه مازادو عليه شي..
طوبى:متأكده مافي حد حط شي بكل؟
فردوس:لا والله مافي حد زاد قرش لاجدي ولاحسين..
فجأه انفتح الستار اللي كان مغطي عليهم...
شبحوله الزوز...
شافوا نسرين ومعاها ممرضه..ابتسمت بربكه وهي تقول..
/السلام عليكم..
الزوز ملامح وجوهم تغيرت وردوا عليها السلام بالغصب..
نسرين للممرضه:شكرا..
هي قالت؛عفوا..ومشت وسكرت عليهم الستار..
نسرين قدمت وفي يدها كيسة هدايا وهي تقول..
/حمدلله ع السلامه..
طوبى يدوب ردت..
/الله يسلمك..
حطت نسرين الكيسه ع الكامدينو اللي جنب طوبى ومشت تشوف بنت خوها وهي تقول..
/ياعمري ياعمري...وقفت ع سريرها وقالت..عسولتي ياروحي عليها..ربي ينبتها نبات حسن ويفرحك بيها..
هزت طوبى راسها بدون ماترد ولاتشوفله..
ابتسمت نسرين بأسف بعدين قالت..
/خل نصورها..
رفعت تليفونها ودارت وضعيه التصوير وقعدت تاخدلها في لقطات..
وطوبى وفردوس مش متحملين وجودها..
هي بعد ماصورت بنت خوها شافت لطوبى وقالت..
/من دفع مصاريف مصحه؟
شبحتلها طوبى بنظرة حاده وقالت..
/مني ومن بوها..
استغربت نسرين من اللي سمعاته..
طوبى:هو قبل عاطيني فلوس دسيتهم وقعدوا لليوم هدا..
حست نسرين بشي من الاحراج وقالت..
/ماتزعليش مني اللي نقصده ان مهما صار يقعد بوها وهو حي يرزق وربي عاطيه مايتكفل ببنته حد تاني غيره..
فردوس قعدت تشوف لطوبى بضيق..
وطوبى قالت:عنده علم؟
نسرين:اكيد خبروه..
غيرت طوبى عيونها لبنتها وهي تشوفلها بشي من القلق..
نسرين:ربي يصلح الحال..المهم توا حمد لله ع سلامتكم مرة تانيه ولما تطلعي بنجي نشوفها تاني..
ماعلقوش ع كلامها التزموا الصمت..
هي تنهدت وقالت:بالسلامه توا..
ومشت فتحت الستار وطلعت بعدين سكراته وراها..
طوبى:جاية بش تقول هالكلمتين..
فردوس:خليها تقطف مادوريهاش..
طوبى وهي تحاول تغلب خوفها قالت..
/حتى اني مش معدله عليها..
وتمددت ع السرير وحطت راسها ع المخده وغمضت عيونها..
وفردوس في نفسها تقول..
"جت بالشيح والريح سحيقتها هي وماليها"
🍃🍃🍃🍃🍃
بعد العصر..
كانوا مطيره وآلاء وغرفه في المصحه حوالين طوبى..
🍃غرفه:وخالتها غرفه اول من يلبسها ذهب..
وعلقت في حوايجها بروش ع هيئه فراشه..
طوبى بإبتسامه..
/سلم خالتها ياربي..
غرفه ابتسمت وهي تلبس فيها بهدوء بعدين قالت..
/ربي يحفظها ويفرحك بيها.
آلاء:باينات طشة شعيرات صفر..
طوبى بضحكه:ايه..
مطيره؛توبعدين وين تكبر تبان مش توا..
فردوس:تتفكر اريج اول ماجبتها جتني زي الشقرا ووين كبرت تغيرت..
طوبى:تجي كيف ماتجي المهم صحتها كويسه وخلقتها تامه الحمد لله..
مطيره:صدقتي هدا اهم شي..
سكتوا شويه بعدين قالت غرفه..
/هيا الاء..
طوبى:خيرك؟
غرفه؛عبد الرؤوف مظنه وصل للحوش ونبيله حايسه بروحها مع الصغار ماتقدرش عليهم..
مطيره:ايه صح روحي لصغويرتك..
طوبى:خالي عندك؟
غرفه:جي واني طالعه..
هزت طوبى راسها بصمت..
غرفه سلمت عليها بالخد وقالت..
/نشوفوكم غدوة..بالسلامه توا..
ونزلت خمارها ع وجهها ومشت بتطلع من ورا الستار.
الاء مررت نظرها عليهم وقالت:سلام....
فردوس:ردي من الطريق..
آلاء:حاضر..
🍃وطلعت وسكرت الستار وراها..
ومشت مع خالتها طلعوا من الحجره..
وكملوا طريقهم وهما يهدرزوا لين طلعوا من القسم..
ووصلوا للمستراح اللي يرفع للمصعد..
ويشوفوا اياد ومعاه ولده مهند وخطيبته آرام..
كانت ارام تهدرز ع اياد والزوز منسجمين فهالهدرزة..
ومهند يشوف لآرام بإبتسامه..
والاء كل ماتحساب روحها نست تشوف موقف يهزها ويقولللها..
مازال مانسيتي شي..
غرفه شدت يدها وقالت..
/هي تعالي..
ومشت بيها وآلاء شاده دموعها بقوة..
ومافي حد منهم شافهم...
🍃🍃🍃🍃🍃
واريج فهالوقت في الخدمه..
واقفه حدا منيه اللي قاعده دير في تلبيس لسن اسكندر..
كملت شغلها وعطاته نصائح يمشي عليها..
وهو يسمع فيها وعقله مع اريج..
منيه:قول لابله سميره تجي تقلع السوسه خيرها..
ضحكت اريج..
هو هز راسه وكان يضحك في ضحكه خفيفه..
بعدين نزل من الكرسي ..واشر ع طاقيته لأريج..
مشت طول خدتها وعطتهاله..
وهو خداها منها وكان يشوفلها بإبتسامه وهي هربت بعيونها عنه..
ابتسم ولبسها..بعدين حياهم بحركة اليد ومشي طلع من الحجره..
منيه بضحكه:تو يدير حاجه في سنونه ويولي مرة تانيه..
اريج شدت ابتسامتها وقالت..
/خلاص اليوم ولا؟
منيه:ايه خلاص..ضمي الدنيا وبعدين بري..
🍃🍃🍃🍃🍃
طلع من الحمام وخش للدار..
تلاقى هو وياها وهي طالعه..
بخ وجهها بالميه من ايديه..
غرفه:تي لايابارد..
عبد الرؤوف مشي يشوف ولاده وهو يقول..
/توقعت نروح نلقاهم يزحفوا..
غرفه؛شن يزحفوا هادي مفروض يجروا..
قعمز ع السرير وقال..
/جديات خيرهم قاعدين زي ماهما ابدا هكي يتحركوا ويلعبوا بإيديهم ورجليهم ويناغوا..مافيهمش جو وهما هكي بكل..
غرفه؛تي غير على شني مستعجل تو يكبروا ويشيبوك..
عبد الرؤوف تنهد وقال..
/اطلعي قعمزي معاهم شويه وجاي..
غرفه؛ايه جيت بنطلع حتى اني..
ومشت طلعت..
وهو ناض ومشي وقف ع المرايه خطي العطر متاعه وحط منه بعدين سرح بتفكيره وهو يشوف للمرايه..
🍃وفي الصالون..
كانت غرفه مع خالها ومرته يهدرزوا لين هو طلع عليهم..
عبد الرؤوف:انستونا..
المحجوب ونبيله:الله يأنسك..
عبد الرؤوف؛حني في المربوعه نبي فنجان جنة يعدل الدماغ ديره نبيله طبعا..
المحجوب:وعلاش مش غرفه!
رفع حاجبه اليسار وقال..
/خليني ساكت..
غرفه؛اني اللي بنسكت وبنحتفظ بحق الرد.
ضحكوا خالها ومرته..
وعبد الرؤوف؛هيا تعالى يامحجوب..
ناض المحجوب ومشاله..
بعدين مشوا مع للمربوعه وعبد الرؤوف يقول..
/نراجو في القهوة..
نبيله؛ياودي باهي..
بعد ماادرقوا من قدامهم غرفه قالت..
/اشبح شن في بيناتهم..
نبيله شافتلها وقالت..
/خالك تأكد من المعلومه اللي قالها يوسف مختار تكفل بعلاج سدره..
غرفه بضيق وانزعاج..
/مش عارفه لوين يبي يوصل..
نبيله؛ربي يكفيكم شره..
غرفه:يارب..والله مانا ناقصين سادنا بلي عيت شنيبه..
ناضت نبيله وقالت..
/اشبح توا شن بيديروا بعد ماجابت طوبى..
غرفه ناضت وهي تقول..
/من بكري واني نخمم ربي يستر وخلاص..
ومشوا الزوز للكوجينه وهما يحكوا عن وضع طوبى..
🍃🍃🍃🍃🍃
وفي جنبهم..
في حوش الصيد..
كانوا كلهم متجهزين لحفلة زواج عواطف..
🍃في دار المعيشه..
كانوا الكناين مقعمزات يحطوا في اللمسات الاخيره ع طلتهم..
وحده فيهم قالت..
/لولا هالمولد راحت ليل لامكياج يقعد ولاشعر يثبت..
وخديجه حداهم تشوف لوجهها في مرايه صغيره..
ع خشة سميره وهي تقول بإيتسامه..
/شن رايكم ؟..
توجهت انظارهم ليها وكلهم منبهرات..
بالفستان المغربي اللي لابساته وطقم الذهب اللي مزين طلتها..
ناضت وحده فيهم وجتها وهي تقول..
/الله يبارك تهبلي..الطاكم جديد!؟
سميره بإبتسامه:ايه امس بس جابه عبدو وفاجئني بيه..
:الله يبارك تحفه الحق..
سميره؛مافي شي مفسد التسريحه المكياج..
وحده تانيه قالتلها..
/الله يبارك عليك زي العسل..
:يعيش ويجيبلك..
سميره:سلمكم يارب..هيا بسرعه سقدوا ارواحكم الناس بدوا يجوا..
وفاتت من قدام خديجه وطلعت وهي معاها بعيونها الحاسده..
التفتت لسلفاتها لما قالوا..
/سعد الناس من ذهب عرسي معاد خش عليا ذهب..
:احمدي ربك انتي عندك اني بعته كله يش نكمل الحوش..
:سعود وبخوت..وسميره حظها جايها لعبد الفتاح اكثر واحد ربي عاطيه في خوته وبنداق وقلبه كبير..
:حتى اني راجلي ربي عاطيه لكن ماريتش منه مارت سميره لعبد الفتاح ياريت يدعي خوه شويه..
خديجه:بعيد وبر عليك..
استغربوا كلامها..
خديجه:تبيه يولي زيه بش ياخد عليك!؟
تبدلت ملامح وجوههم للصدمه وعدم الاستيعاب..
؛شن تقولي خديجه!
تنهدت وقالت:ماقلت شي انسوا..
:لا والله لما تقولي..قصدك عبد الفتاح واخد ع سميره! اني لاحظتك من يومتها تلقحي وكأنك عارفه شي..
خديجه؛مانعرف شي..
:لا والله تعرفي..
:خلاص كلامك حطيتيه ياخديجه معاش في مادرقي..
خديجه برفعة حاجب..
/معاش تخلوا المظاهر تغركم هالدلع والصرف مش حبا فيها ولاع خاطر سواد عيونها قاعد يضحك عليها مسكينه وع ضميره..
:معناها حق واخد عليها جيرانهم اللي حكيتي عليها يومها!
خديجه:ايه وليها سنين بنيتها منه عمرها 6سنين..
كلهم انصدموا ووجعتهم سميره..
:لكن معقوله ماتعرفش !؟
خديجه:سميره ع نياتها لو ياخد عليها 3ماتجيب علم حاجه..
:انتي من قالك مرته التانيه نفسها!؟
خديجه:اللي قالي يعرفها كويس كويس..
:وواك ياربي مشناها الحق..تو لو خدي وحده عاديه فيها ومافيها لكن حبه القديم موعرها..
خديجه؛هدا علاش نقوللكم احمدوا ربي ع اللي عندكم..
ع خشة نجاح وهي تقول..
/شن ديروا مقعمزات هني نوضوا اطلعوا الناس جو..
:هيا هي طالعين..
نجاح؛سقدوا ارواحكم..
ومشت بعد ماكانت عيون خديجه تتفحص فيها شويه قالت..
/ملاحظين نجاح فيها حاجه متغيره..
:قصدك ماتعرفيش! حامل راهو..
خديجه برفعه حاجب ونظرة حاده..
/من قالك؟
:بكري قالتلي خاشه الرابع..
خديجه بتهكم؛اكيد سميره اول من يعلم..
:مش عارفه الحق..
خديجه:تعرفوا نقطع ذراعي من منبتها كان ماطلعوش كلهم عارفين ان ولدهم واخد عليها..
وناضت وهي تقول.
/اللهم لاتجعلني غافله مغفله..
ومشت طلعت من حداهم بعدين مادارت اللي تبيه..
🍃وطلعوا كلهم للمعازيم اللي كانوا من الدائرة المقربه جدا اقارب وجيران..وع راسهم مغليه...
وسط هالزحمه كانت عواطف بفستانها الحلو البسيط مقعمزه والفرحه باينه ع وجهها مش قادره درقها..
🍃في الكوجينه..
كانت سميره واقفه ع الوقفات وهما برتبوا في الضيافه..
خشت عليهم وحده من سلفاتها وقالت..
/مازال؟
سميره:شويه ويطلعوا..
وقفت جنبها سلفتها وهي ساكته..
بعدين قالت..
/سميره نبيك في كلمين معليشي..
سميره؛ان شاء الله خير..
:تعالي معاي..
سميره شافت للوقفات وهي باديه تتوتر بعدين قالت..
/شويه ونجيكم يابنات..
وبعدين مشت طلعت مع سلفتها اللي خدتها لدار المعيشه..
🍃🍃🍃🍃🍃🍃
"من اللي قالك الكلام هدا!؟"
:خديجه الحق اني شكيت في كلامها وقلت في عقلي مستحيل حاجه زي هادي تغيب عليك..
سميره وهي شاده روحها بقوة قالت..
/باهي اطلعي توا للناس..
ومشت طلعت وخلتها وهي متأكده من صحة كلام خديجه..
وسميره كانت في حالة غضب من خديجه تحاول تكبته ع قد ماتقدر..
بس وين وصلت للكوجينه..
لقت خديجه توجه في الوقفات يطلعوا بالضيافه..
خديجه؛بالترتيب راكم تنسوا..
وماحستش الا وسميره واقفه جنبها وهي تقوللها..
/تعالي نبيك شويه..
شافتلها خديجه شويه بعدين قالت..
/باهي بري..
مشت سميره خشت للكوجينه وخديجه وراها وسكروا الباب..
فاتت سلفتهم من قدام الكوجينه وهي تقول..
/حي ياحي شكلها بتولع!
~~~~~~~~~
سميره:شن في بيني وبينك شن ريتي مني ياخديجه قوليلي عمري غلطت فيك ولاسمعتي مني كلمة زعلاتك عمري وجعتك ولاضريتك!؟ علاقاتنا ببعض طيبه علاش تبي تخربيها؟
خديجه؛وعلاش الدوة هادي كلها شن ريتي مني بش تقولي هكي!
سميره بغضب ودموعها في عيونها..
/عرفتي حاجه عليا اني وراجلي علاش طلعي فيها !؟
خديجه:قصدك انتي عارفه ان راجلك واخده عليك!
سميره بعصبيه..
/نعرف ولامانعرفش مش موضوعنا..اني هني ندوي عليك انتي اللي تتقصدي توجعيني..
خديجه؛وطي صوتك ماتعليشي عليا..بعدين اني مانندريش عليك تعرفي وكان نندري ماوجعني حالك..
سميره:يوجعك حالي تمشي تهدرزي بيا وطلعيني درويشه وهبله مضحوك عليها!
خديجه؛اني ماقلت لحد شي هما اللي قعدوا يقصقصوا ع دوة يومتها واني قلت اللي نعرفه..وبعدين مادام عندك علم شن اللي واجعك! ماتبيش يقولوا واخد عليها حبيبته وفايتها! حاجه زي هادي مهما درقت اهي طلعت في الاخير كان ماطلعتهاش اني غيري يطلعها..
سميره قعدت ساكته وهي تشوف لخديجه بحده..
بعدين هدت نفسها شويه وقالت..
/ايه بعلمي..جاني و حكالي كل شي واستأذن مني وقالي لو انتي تقولي والله ماناخدها..واني كنت عارفه انه حيمشي ويديرها من وراي..خليته ياخدها بعلمي وع عيني وقدري عنده زاد كبر..والحمد لله عندي راجل مقدرني ولاعمره خاني ولاطيح من قدري..حتى لو ماكانش في بينا حب في احترام وتقدير والعشره طيبه اللي خلاته متمسك بيا لاقاعد معاي لمصلحه ولامسكتاته بفلوس بوي....
ومشت وهي معصبه فتحت باب الكوجينه وطلعت وخلتها بعد ماقهرتها بكلامها..
قعدت للحظات واقفه في مكانها وهي مازال تسمع في كلام سميره..
غمضت عيونها وتنهدت بغيظ وقهر..
بعدين فتحتهم وقالت..
/باهي ياسميره..
مشت خدت طاسة ميه معدنيه شربتها فتحتها وشربتها..
وبعدين طلعت من الكوجينه للصاله..
وين خشتلها..
لقت سميره واقفه جنب عواطف ونجاح واقفه من
الجهة التانيه وهما يهدرزوا ومنسجمات.
قدمت بالخطوه لين جت واقفه جنب عزوزتها..
وفجأه..
تجي طايحه من طولها ع الأرض...
🍃🍃🍃🍃🍃
وفي بلاد بعيده..
جهز نفسه بش يطلع لمكان عمله...وهو طالع فتح تليفونه..
وبعدين فتح النت..
ومشي طلع من الشقه...
🍃وهو نازل من الدروج..
جوه اشعارات ع هاتفه..
بمجرد ماطلع من البرج..
قام تليفونه..وشاف الاشعارات..
منهم رسائل ماسنجر من نسرين..
فتحهم...
كانوا زوز ورساله مكتوب فيها..
(جاتك جنة)
جمد في مكانه...قعد يشوف للصوره..بعدين فتحها وقربها..
صاباته قشعريره حسها في قلبه...
ودموعه ماقدرش يشدهم...
مسحهم وقال بنبره مخنوقه..
"بنتي"
وفجأه ضحك وقال..بنتي..مرة تانيه وهو يمسح في دموعه..
خدي نفس عميق بعدين غمض عيونه وفتحهم..
واتصل بنسرين...

#جنة_قلبي
#طوبى

...يتبع....
💐اللهم انك عفو تحب العفو فأعف عنا💐

#جنة_قلبي
#طوبى