طوبى ☕شارع القهوة☕

الجزء_السادس_والتسعين

#طوبى  "جنة طوبى"
#جمان_فريد
#الجزء_السادس_والتسعين"إنت عيدي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#التسبيح
قال ابن مسعود رضي الله عنه :
" ما كُرِب نبي من الأنبياء إلا استغاث بالتسبيح فأكثروا من التسبيح في الرخاء والشدة ".
الجواب الكافي للإمام ابن القيم رحمه الله ( 1 / 7 )

🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃عيدي هو أنت🍃
_______________________________________
حوش الصيد..
دار المعيشه..
وين ماكانوا متكيات نجمه وبناتها وكناينها..
نجمه كانت غافيه..وحداها سميرة كيف بادي ياخدها النوم..
ونجاح مقابلتهم لاهيه بولدها..
وعواطف وصفاء راقدات حدا بعض ولاهيات مع تليفوناتهم..
وقدامهم الشاشه مفتوحه ع قناة الرسميه لكن الصوت مطموس..
صفاء بإستغراب..
/شن هدا!؟ منزلين منشور قالوا في منطقه اسمها سمنو شافوا الهلال..
عواطف؛حتى اني نقرا في نفس الخبر شكله رسمي الصفحات كلها تدوي عليه..
نجاح؛سمنو؟! اول مرة نسمع بيها..
ناضت عواطف قعمزت وهي تقول بصدمه..
/والله حق توا دار افتاء نزلوا بيان قالوا اليوم العيد..
نجاح؛بري بري!..
صفاء بدهشه؛ايه حقه وحده توا قالت كتبوها في التلفزيون..
شافوا للشاشه..
لقوا الخبر محتل نص الشاشه بالشريط الأحمر..
🍃🍃🍃
"عليك عمله في زباين لتوا ماخدوش طلبياتهم"
طوبى وهي متفاجئة:الله المستعان كيف بيصير توا!؟
رن تليفون مطيره وصوته قلب الحوش كله..
مشوا الزوز بسرعه لدار المعيشه..خشولها..
لقوا مطيره فايقه وهي تقول بفجعه..
/إن شاء الله خير!.
قامت تليفونها وشافت المتصل قالت..
/هادي شن تبي متصله توا؟!
طوبى:مني عمتي!؟
مطيره؛خيريه اللي تسكن في الشارع اللي ورانا..
طوبى:اكيد عندها طلبيه تبيها..
مطيره؛اللطف تبيها توا!؟ متفاهمين ع اليوم في النهار مش الفجر..
طوبى وهي مبتسمه بأسف..
/ماهو اليوم عيد عمتي..
شافتلها مطيره بعدم استيعاب..
/تتسهوكي!
اريج بضحكه؛لاحقه عمتي توا توا اعلنوها..
مطيره بصدمه؛حي عليهم!!؟
🍃🍃🍃
نازل نضال يجري من داره لما قرب يوصل لاخر الدروج نقز4درجات وصل لوطا..
تلاقي مع عمر جاي بسرعه من المربوعه..
نضال؛فتحي فتحها المغسله؟
عمر:ايه توا توا..
وطلعوا الزوز يجروا...
🍃ع طلعة سميره من الجناح بلبس راجلها العربي وهي تقول..
/عليك عملة..
ومحمد شنيبه وراها وهو يقول..
/بلاد خاشة في حيط..
🍃فاتوا من قدام دار نوم مغليه اللي كانت تتكلم بالتليفون..
مغليه؛خش علينا نضال يصيح غدوة عيد غدوة عيد..
"اني ومحي كيف خدانا النوم بوه اتصل بيه وخبره  المشكله ستين حاجه ناقصتنا لازم توا نطلعوا نكملوهم .."
مغليه؛هالسمنو هادم كان رقدوا وريحونا
"وين تجي هادي سمنو"
مغليه؛قالوا في الجنوب..
🍃🍃🍃🍃🍃
"غير كان تقمعزي وتريحي روحك يام"
ام ربيع وهي تحوس في الكوجينه..
/خوتك كلهم بيجوا يعيدوا هني لازم ندير السبر اللي متعوده عليه..
تنهد ربيع وقال..
/براحتك..اني طالع ماتبي شي؟
قالتله: جيب حلوات..
ربيع:حاضر..
:شكل ونوع زمني وجديد وراك تنسى البكلاوة..
ربيع وهو ماشي للباب رد عليها بصوت عالي..
/حاضر حاضر..بعدين همسا قال..ربي يفوت هالأيام ع خير..
وفتح الباب وطلع من الحوش..
🍃ونسرين مقعمزة في دار النوم..
مخنوقه ومضايقه ع الآخر من الوضع..
"وينك يانسرين تعالي ضمي الحوش خيرك ركيكه هكي يامراة"
خدت نفس وطلعاته بعدين قالت..
/اللهم طولك ياروح..
🍃🍃🍃🍃🍃
"عيد وحب هاي الليله الناس معيدين
وانا وياك بهالليله العيد بعيدين"
تنهد وهو يحط يعلق في الزي التارقي ع مقبض الروشن بعدين قال..
/زعم العيد الجاي يكون بعيدين ياعبدالقيوم!؟..
ابتسم وقال..يارب وانت الأدرى باللي في القلب..
ويجيه اتصال..
مشي طول للطاوله خدي تليفونه شاف ربيع يتصل بيه..
فتح الخط ورد..
/اساروف..
"جوك مليح وامورك تمام وبادي تعيد من توا من زيك"
عبد القيوم؛اعوذ بكلمات الله التامه من شر ماخلق..
"توا تتزوج وتجرب ونتشمت فيك"
عبد القيوم؛يوم المنى يانصي وانت عارفني نراجي فيه بالساعه والدقيقه..
ضحك وقال..
"باهي انزل سايرني انزل خير مايفوتك نص عمرك حال الشارع تقول قامت فيه القيامه الناس يجروا ومايدروا.."
عبدالقيوم بضحكه..
/نازل..
نهي المكالمه ومشي طول بدل ع السريع..
ونزل يجري..
🍃طلع برا حوش المهدي..
جو عيونه ع محل جنة اللي كان مفتوح..
شافها طالعه مع وحده من الزباين تسقد فيها وابتسامتها الحلوة ع وجهها..
قال في نفسه..
"العيد انتي..وعيونك وبسمتك وطلتك ووجودك كله"
ومايندريش الا وربيع جابده من ذراعه وهو يقول..
/هيا وراي بلي مبلي..
عبد القيوم بإبتسامه هويام وهو يمشي معاه..
/غير امتى حتى انا يولي وراي بلا وبصاير..
ربيع ضحك بعدين غنى..
/الحب وناره..
ضربه عبد القيوم بقبضة يده ع ذراعه وهو يضحك..
🍃🍃🍃🍃🍃
وفي حوش علي الواعر.
اول ماسمعت اميمه الخبر..خشت طول لدار جدها طلعت لبسه العربي وحدداته وعلقاته..
وجهزت عطر جدها المميز متاع الشيشه الصغيره..وصابونه الخاص والشامبو متاعه حطتهم ع الزيانه...
بعدين طلعت من داره وهي تقول..
/وتوا بنجوا للمهمه الأصعب..
مشت بطريقها لباب الحوش وطلعت للجنان..
لقاته قاعد راقد زي ماخلاته..
قربتله..وقعمزت حداه ع ركابها ..حطت يدها عليه وبدت تفيق فيه..
/جدي..جدي.
فتح عيونه وضيقهم بعدين رخاهم..شافلها وقال..
/جيبي السحور هني..
اميمه بإبتسامة ارتباك..
/جدي اليوم عيد..
قعد يشوفلها وهو ساكت..
اميمه بنفس الابتسامه..
/قبل ساعه اعلنوا عليه قالوا شافوا الهلال في منطقه اسمها سمنو في الجنوب وتأكدوا من شهادة الشاهد واعلنوا ان اليوم العيد..
غير نظره عنها..ناض قعمز وقعد ساكت..
اميمه؛حددتلك لبسك العربي ونظمتلك امورك كلها..
شافلها وقال..
/البلاد هادي ماتبي الا قنبلة ذريه يابنتي..
اميمه بضحكه:الله غالب..يلاا كل سنة وانت طيب..وخدت يده وباستها..
هز راسه بعدين قال..
/قلتي سمنو!؟ هادي وين تجي!؟
اميمه؛في الجنوب قالوا!
علي تنهد وهز راسه..
اميمه؛نوض خش..
علي:خليني شويه بروحي..
اميمه عرفاته مازال مااستوعبش الحدث..ناضت وهي تقول..
/حاضر..وخشت للحوش تضحك..
🍃وفي جنبهم في جنان حوش طوبى..
مطيره بتعب؛اييه ياعرب سمنو شن درتوا فينا..
طوبى بضحكه؛خلوا البلاد كلها تجري وماتدري حتى جماعة الحرب لخبطوهم..
فردوس؛كان نعرف من هو المكسد هدا اللي قعد لهالوقت يراقب في السمي..
طوبى:الراجل دار اللي عليه مدام شافه لازم يقول..
مطيره فزت وهي تقول..
/حي السفنز!لازم نخش نعجن سفنز..ومشت تجري وهي تقول..الله يسامحكم ياعرب سمنو.
وفردوس وطوبى واريج يضحكوا عليها..
🍃🍃🍃🍃
سمنو...
واحة صغيره قريبه ع عاصمة الجنوب سبها..غالبيه الشعب الليبي ولا مرة سمع بيها وفي هديكا الليله اراد الله انها تنعرف ع طول البلاد وعرضها..
سمنو..سمنو..سمنو..مافي حد كبير ولاصغير ماقالش اسمها وماتكلمش عليها..الحدث اللي كانت وراه سمنو نسا الناس الحرب ومايجي منها..
ماعدا اللي فاقد عزيز وغالي..
🍃سميرة بعد ماسقدت راجلها وولاده وأحفاده لصلاة العيد
مشت للكوجينه..خشتلها..وقعمزت بهده ورا الطاوله ع واحد من كراسيها ونهارت بالبكي..
صوت بكاها وصل لدار مغليه..
رغم الكره الشديد اللي تكنه في قلبها لسميره لكنها حست بشي من الشفقه عليها..
🍃🍃🍃
طلعت سميره شويه من اللي قلبها..بعدين ناضت طلعت للحمام. غسلت وجهها وولت للكوجينه وبدت تعجن في السفنز..
خلت العجينه لين تخمر ومشت لدار الصغار..طلعت حوايجهم متاع العيد بتوابعها...
وقفت تتأمل فيهم جوري ومعاذ وتفكر كيف بيديروا في اليومين اللي بتغيبهم عنهم..
حمزة يلهى مع ولاد عمامه مش زيهم..هما حيقعدوا برواحهم حتى سدرة مش حتقعد معاهم لأنها بتمشي لحوش فايزة..
تنهدت بضيق بعدين مشت طلعت من حداهم وردت الباب وراها...
🍃🍃🍃🍃🍃
بعد صلاة العيد..
غرفه بإبتسامه حب..
/نجي وليداتي ياربي سلم وليداتي اللي يلبسوه يزيدوه حلاوة الله يبارك..
وهما مقعمزين قدام بزبوناتهم وع روسهم طواقي البسكل كانوا غاية في الجمال واللطف..
ع خشة بوهم اللي كان متأنق بالعربي..ابتسم لما شافهم وقال..
/ماشاء الله ماشاء الله..
التفتت غرفه شافتله بإبتسامه وتبعاته بنظرها لين وصل في فولادهم طبس عليهم وباس كل واحد من جبينه..
بعدين وقف ع حيله وشافلها..
هي خدت يده وباستها وحطت جبينها عليها بعدين وقفت حيلها..حطت يدها ورا راسه وقرباته ليها وباست جبينه وقالت..
/كل سنة وانت طيب..
هو ابتسم وضمها لقلبه وقال..
/كل عام وانتي بخير..وتي روحك بنمشوا نعيدوا ع ماليك بعدين بنتسقدوا لحوش السايح..
تباعدت عنه وقالت:حاضر..
قرب منها طبع قبله ع جبينها ومشي طلع من حداها..
وهي مشت طول للدولاب بش طلع حوايجها..
وولادها حداها يلعبوا بألعاب العيد..
☘☘☘☘☘
طلعت من الدولاب "الخزانه" أربعه فساتين اطفال كل واحد احلى من التاني..
وبنتها مقعمزه ع الأرض تشوفلها..
طوبى:توا ياحلوة اختاري شن تبي تلبسي..
رفعت اول واحد وهي تقول..
/متاع خالتو اميمه..ولا..
رفعت التاني وقالت.
/متاع خالتو نبيله..ولا..
رفعت التالت وقالت.
/متاع مامتك حبيبتك ولا..
سكتت..تبدلت ملامح وجهها للضيق والخوف وهي تشوف للفستان..صارلها زي لما شافاته اول مرة تفكرت وحده من ابشع الذكريات اللي مروا عليها..
بين عيونها..كيف شد بنتهم وهددها بيها..وفوق هكي كان حيفرط في ارواحهم هما الزوز في لحظه بدون مايرفله جفن..
برغم هدا كله هي عطاته عذر المرض وماقدرتش ترد اللي جابه  لبنته..
تنهدت وشافت لبنتها..ابتسمت وقالت..
/ولا قفطان..بابا...
نزلتهم شويه وقالت..
/هي اختاري ياحلوة..
جنه قعدت تمرر في نظرها ع الفساتين..
وطوبى تحركلها فيهم وهي مبتسمه ابتسامه طفوليه..
حطت جنة ايديها وركابها ع الأرض وقعدت تزحف لين وصلت في امها..ولت قعمزت..ومدت يدها ع واحد من الفساتين..
طوبى وهي متفاجئه..
/اوو..قفطان اميمه..خلاص بنتي تلبس ع ذوقها واللي يعجبها..
مشت حطت الفستان اللي اختاراته جنه ع السرير..وردت باقي الفساتين للدولاب..
بعدين مشت لدرج الزيانه وفتحاته وطلعت اكسسورات الفستان وهي تقول..
/بنوتي اليوم حتطلع اميرة الاميرات..
التفتت عليها ومشتلها رفعتها وهي تقول..
/خل نمشوا ندوشوا هي..
ومشت طلعت بيها من الدار...
🍃في هالوقت..
سميره دوشت لمعاذ ولبساته بدلته العربيه..مشطت شعيراته وعطراته وقرت عليه بعدين قالت..
/برا لعمو نضال..
معاذ:باهي..
ومشي يدب ع رجليه وسميره تقول عليه..
/اشي عليه اشي عليه ماشي يدب ع رجليه..
ع خشة جوري بعد مالبست بدتلها جت لسميره وقالت..
/ديريلي شعري..
سميره؛هي تعالي..
🍃🍃🍃
"شن رايك"
شافت سدره لشعرها بدهشه وقالت..
/يهبل! امتى تعلمت ديرها!؟
المهدي:لما نقعد مكسد نخش ع النت ونتفرج..
سدرة ضماته وقالت..
/نحبك هلبه..
مسح ع راسها وقال..
/واني نموت فيك..
بعدها وهو شادها وقال..
/بري البسي حجابك خل ننزلوا نعيدوا ع جدودك..
سدره:نقدروا نكلموا حنينه عتيقه..
المهدي:نحاولوا بنتي..
سدرة:بابا بعد ماتمشي سيما بنمشي لحوش خالتي فايزة طول..
المهدي:ع راحتك بابا..هي بري ديري اللي قتلك عليه..
ومشت سدرة طلعت من حداه وخلاته يفكر في جدتها عتيقه اللي انعدم الأمل من شفائها وممكن تكون قاعده تعيش ايامها الأخيره...
☘☘☘☘
عدت ساعه..
وطلعت سميرة مع راجلها لحوش بوها...
في الوقت اللي فيه رفع رؤوف غرفه لحوش اهلها بش تعيد عليهم..
☘لاقاها جدها اول ماخشت..
نزلت ع يده وكبت عليها..بعدين باست ع راسه لما جت بتعيد عليه بالكلام..هو دار حركه اول مرة يديرها لنساوين عيلته..
باس ع راس غرفه..
طوبى اللي كانت شاده اواب وين شافت الحركه ابتسمت ابتسامة اعتزاز تلقائيا..
وعبد الرؤوف اللي كان شاد مهاب نزل راسه لوطا وهو مبتسم بأسف..
اما غرفه دمعوا عيونها..وتأثرث لدرجة لاتوصف..اول مرة في حياتها يأثر فيها شي هكي..
تماسكت وقالت..
/ربي يطول في عمرك ويخليك تاج فوق رووسنا..
علي:ويحفظك انتي وعويلتك..
ابتسمت وقالت؛تسلملي يارب..
شافت لطوبى وقالت:ترا هاتيه طوبى حني بنمشوا توا..
قربت طوبى منها وقالت..
/لحوش اهل سميره؟
غرفه؛ايه..
علي:بتولي معاهم لما يجوا العشيه؟
غرفه؛ايه جدي بإذن الله..
قرب منهم عبد الرؤوف وقال..
/هاتيه طوبى..
مدت طوبى اواب لبوه خداه وهو يقول..
/نتلاقوا بعدين حاج علي...
علي الواعر:بإذن الله..
نزلت غرفه الخمار ع وجهها وطلعت ورا راجلها وسكرت الباب..
طوبى بإبتسامه..
/عندك علم ان مافيش منك اتنين؟
علي ابتسم وقال..
/عملة نادره..
ضحكت طوبى وقالت..
/يامتواضع انت..
ويدق باب الحوش..
علي بحركة الرأس:خشي..
طوبى طول مشت خشت داخل..
وين جت بتسكر الباب سمعت صوت حسين..ضحكت وجت بتطلع مرة تانيه..وقفت في مكانها في اخر لحظه لما سمعت صوت تاني خلا دقات قلبها تتسارع فجأه..
ولت خشت داخل والابتسامه تصارع في ملامح وجهها العاديه وسكرت الباب بهدوء..
🍃🍃🍃🍃
احاديث اول يوم من عيد الفطر غالبا تكون مختصره في امتى رقدنا وامتى نضنا وقداش لينا ساعه مش راقدين ومن كثر الكلام عن النوم بعد الغدي مباشرة يخشوا في حالة سبات عميق..
لكن العام هدا اللي كان مليان  احداث لعند اليوم خلت الروتين يختلف شويه ع المعروف..
☘زي حوش الصيد اللي التموا فيه الكناين ومن بينهم خديجه..
كان كلامهم كله عن مفاجأة سمنو واللي جاباته معاها من مواقف وحكايات ماتمش..
في وسط هاللمه العائليه الحلوة..
كانوا خديجه وابتسام ملاحظات قوة حضور صفاء وسميره اللي يبانوا وكأنهم شادات زمام الأمور حتى نجاح وعواطف ماداروا معاهم شي..كل شي بتنسيقهم وتحت اشرافهم..
🍃نجاح:وطول نوضت صفاء سميره وخشوا للكوجينه وبدوا يعجنوا ويوتوا وحني قعدنا نلودوا ع الحوش.
مرت واحد من خوتهم قالت..
/اني الحمد لله كله شي مكملاته من يوم 27ومريحه راسي..
نجمه؛لاانتي صحه ليك ديما تقري في النقص..
خديجه في نفسها..
"ماعندكم كان الإستعراض "
وابتسام حداها كان عندها كلام مع نفسها حتى هي..
"عرفت طبهم العيله هادي"
🍃ماهو اللمات العائليه في أي مناسبة لازم يكون فيهم من نفسه دنيئه وتفكيره خبيث يفسر ويأول كل شي يشوفه ع هواه...مقيوله..كل حد يشوف الناس بعين طبعه🍃
🍃🍃🍃🍃
والحالة اللي كانت فيها نسرين وسط لمة اهل زوجها حالة المنبوذ الغير مرغوب فيه..والأدهى والأمر انهم يتصرفوا في الحوش براحتهم وكأن حوشهم ومافي حد دايرلها اعتبار..
وهي زيها زي اي مراة ماصدقت استقرت في حياتها مع راجل كويس لازم تحاول ع قد ماتقدر تحافظ ع استقرارها وتتحمل كل شي في سبيل هدا..
🍃🍃🍃🍃
بعد العصر..
جو اهل اسكندر ومعاهم غرفه لحوش طوبى الواعر..
ولقائهم بأريج كان كله ألم وذرف دموع..
بكت اريج بكي وكأنها كانت داساته طول الأيام اللي فاتوا وبكت الكل معاها..
🍃اللي تمر بيه اريج صعب جدا..حتى لو حاولت تتعايش مع مصيبتها وتكتم أوجاعها حتجيها لحظه تنهار فيها وطلع كل المكتوم في قلبها..🍃
بعدهم ع طول يخشوا اهل بوها..
جدتها وعماتها اللي كانوا مقهورين ع حالها بالذات جدتها اللي ناض عليها جرح فقدان ولدها اللي مش عارفه لهاللحظه ان كان فوق الأرض ولاتحتها..
🍃🍃🍃🍃🍃
خداته في حضنها وهي تقول..
/سامحني يما..
معين بإبتسامه..
/مسامحك ماتخافيش..
ضرباته ع ظهره وقالت..
/ماتنعطاش وجه..
تباعد عنها وهو يضحك وطبع قبله ع جبينها بعدين قال..
/كل سنه وانتي طيبه..
فهيمه:كل عام وانت بخير..برا سلم ولدي دوش وتكم روحك واطلع شوف الناس وعيد عليهم..
هز راسه ومشي..وهي تبعاته بعيونها لين درق عنهم..
تنهدت بضيق بعدين مشت ولت للصاله وين مافي نساوين العيله..
🍃🍃🍃🍃🍃
وفي حوش صاحبه..
كانت مناسك ماشيه بطريقها للكوجينه..
وقفت فجأه لما سمعت دوة جايه من الممر اللي يرفع للديار..
كان حديث بين نساوين خوتها ع سلفتهم..
:شفتيها كيف دايرة الحوش حوشها!
:ريتها وخفت الحق..
؛ماعندك من شن تخافي مستحيل حد من خوته يتنازل عن حصته في الحوش..الورث وين تقسم ماجاب شي من اللي تخيلناه بوهم قبل ليموت كان وضعه المادي متأزم شويه..والحوش زي ماتشوفي ع كبره والموقع متاعه يجيب حوالي 3مليون مايقدر حد يفرط في نصيبه فيه..
:ان شاء الله..ايه حقه بنسألك ع حاجه نصيب مناسك من الوصي عليه..
؛قصدك لازم يكون في وصي ع حصتها؟
:مش عارفه هكي فكرت لأنها قاعده مافاتتش 18ع العموم سيورنا نعرفوا..هي تعالي نولوا..
ومشوا الزوز متوجهات للصالون ..
ومناسك ورا الكوجينه قالت بصدمه ودموعها ينزلوا..
/ياحقيرات ياواطيات!
🍃🍃🍃🍃🍃
في جنان حوش طوبى الواعر..
طوبى كانت تحط في ماكلة للقطاطيس والصغار حواليها يتفرجوا..
طوبى:حرام هادم حيوانات ضعيفه واليفه مادير شي علاش تضربوهم ربي يزعل منكم بعدين..
واحد من صغار حواء قال..
/أسف
طوبى ابتسمت وقالت..
/خلاص معاش تعاودها حبيبي باهي بش ربي يقعد ديما راضي عليك..
جوري:معاذ ديما يناشب في قطوستي..
سدرة بضحكه؛لما يشوفها يعيط عليها ويجري وراها..
طوبى بضحكه:ردوا بالكم مرات تولي عليه تخبشه..
تاله؛ااه من ماما كان تخليني ندير قطوسه حتى اني..
"السلام عليكم"
تاله وسدره حطوا وشاحتهم ع روسهم بسرعه..
وقفت طوبى ع حيلها وهي تقول بإبتسامه..
/أهلا..
معتز:كل سنة وانتي طيبه..
طوبى:كل عام وانت بخير..هدا معتز ولد خالتكم فردوس.
التفتوا شافوله..
سدرة شافتله بحده وقالت..
/هدا اللي مايبيش امه!؟
هو رفع حواجبه وشاف لخالته..
تاله جبدت سدره وقالت..
/وانتي شن دخلك!؟
سدرة وهي تمشي معاها..
/نكره االي يكرهوا امهم..
وخشوا الزوز داخل..
جوري:حتى اني بنخش..ومشت بسرعه لحقتهم
وقعد ولد حواء..
معتز؛مشهدرين بيا انتم!؟
طوبى بإبتسامه برود..
/علاش داير حاجه غلط انت!؟عادي ماتبيش تعيش مع امك
معتز:قالت نكره امي!؟
طوبى:مش صغيره سدره وفاقده امها وطبيعي تفكر ان اللي يسيب امه اكيد يكرهها..
معتز:انتم تقولوا قدامها هكي..
طوبى:مستحيل وانت عارفنا مانديروهاش..
سكت شويه بعدين قال..
/اهو قعدت ماسافرتش..
طوبى:وعلاش؟
نزل عيونه للقطوسه اللي تاكل بدون مايرد..
تنهدت طوبى وقالت..
/قعمز..
رفع نظره ليها وقال.
/ناديلي امي..
طوبى بإبتسامه؛باهي..
ومشت بتخش وولد حواء مشي معاها..
اول ماخشت للكوجينه شافت عمتها مطيره خاشه تجري.
طوبى بخوف؛خيرك عمتي!؟
صبت مغلي البردقوشه اللي دايرينه من قبل في طاسه وهي تقول..
/فردوس داخت..
ومشت بسرعه طلعت من الكوجينه وطوبى لحقتها تجري والعيل وراها..
🍃ومعتز واقف في الباب وهو مفزوع ودموعه عبوا عيونه..
☘داخل..
اميمه لبست جهاز قياس الضغط الالكتروني لفردوس وبدت تقيس في ضغطها..
وفردوس في حضن اريج كانت يدوب فاتحه عيونها..
والناس حواليهم يتفرجوا بترقب وقلق وشفقه..
اميمه هزت راسها وقالت..
/راقي شويه..
فكت الجهاز  وقالت؛عطيها تشرب عمتي..
مطيره عطت الطاسه لأريج وقالت..
/شربيها..
خدت اريج اللي كانوا دموعها في عيونها الطاسه وهي تقول..
/هيا يام..
عدلت فردوس جلستها وخدت الطاسه من بنتها وقعدت تشرب بروحها..
وطوبى واقفه تشوفلها بقلق وحزن..
بس اكثر من اثر فيه اللي صار سدرة..
طلعت من حداهم وهي تبكي..مشت للكوجينه..
خشتلها بش بتطلع للجنان تبكي ع راحتها..
طلعت برا وهي تبكي..
شافت معتز مقعمز وكان باين عليه القلق..
تبدلت ملامح وجهها للغضب وقالت..
/تو تشوف ربي كيف يعذبك زي ماتعذب في أمك.
شافلها ودموعه في عيونه..
سدره بغضب ونبره باكيه..
/وكان ماتت وانت تكرهها هكي معاش يسامحك لو تحج الف مرة..وخشت داخل وهي تبكي..
معتز:غير تعالي قوليلي شن صار فيها!؟..
شويه وولت مرة تانيه وقالت بغضب..
/توا تسأل عليها ياعاق!؟ والله ماني قايلتلك..
وولت خشت مرة تانيه..
هو غمض عيونه بتعب ونزل راسه لوطا..
🍃وتحسن حال فردوس بعض الشي بعد ماشربت مغلي البردقوش بعدين خدتها بنتها ورفعتها لدارهم وخلتها ترقد ع السرير وقعدت جنبها..
🍃🍃🍃🍃
بعد المغرب..
بدوا يعولوا نساوين العيله ع العشي..
حتى من عمات اريج وخوات اسكندر كانوا معاهم..
لكن سميره وهي تعول فقدت زوز متعوده بيهم ديما يكونوا ع راس العواله في أي لمة او مناسبه..
☘هادم الزوز كانوا واقفات حدا باب دار المعيشه من داخل يهدرزوا..
مطيره:تقول مرتاحه والحق باين عليها..
اخت سميره الكبيره..
/ماتبينش سميره بطبعها اختي ونعرفها درق اللي فيها بالضحك والبصارة..
وطب عليهم سميره وهي تقول..
/وينكم ياهرابات!؟
☘في هالوقت اريج كانت طالعه من الدار بش تعاون..
وين جت بتسكر الباب وقفت لما سمعت مطيره تقول..
/تنشد ع وضعك مع حوش شنيبه..
سميره:والله الا عرفتها باهي..
اختها:ياوخيتي بعد اللي سمعته عنهم كيف تبيني نصدقك وين تقولي مرتاحه بالذات مع هذا اللي كان راجل اريج تبيني نصدق انه يعامل فيك كويس!؟
سميره:مالا والله العظيم وربي يشهد عليا الا هدا احنهم واطيبهم..ريتي القفطان اللي لابساته هدا هو واخدهولي..
:قولي والله!
سميره:قاعده نحلفلك..والله من لما ريته ولا مرة شفت منه قلة احترام ولا سمعت كلمة وجعتني اكثر واحد يطفطف عليا ويدور فيا..وسوا هو ولاالمهدي اللي يبارك فيه عليك راجل محترم لين فايت فيه وحتى عمر كويس ويعامل فيا احسن معامله لين استغربت فيهم كيف هادم امهم مغليه ومخويتهم خديجه وهداكا وجه البرطالمبه خوهم..
اختها بضحكه؛يعطيهالك..
سميره؛والله العظيم..حتى نسرين كويسه ومحترمه شكلهم طالعين لبوهم..
مطيره بضحكه؛غير راك تبدي تتغزلي فيه..
سميره:لالا نتحشم من فطيمه اني..
ضربتها اختها وهي تضحك ومطيره تضحك معاها..
🌼واريج اللي كانت تسمع في حديثهم وين جت سيرة نضال وسمعت شن قالت عليه سميره حست بقلبها تحرك بقوة ناحيته..هي ضايقت هلبه من هالشعور حست وكأنها خانت راجلها طول هربت من غادي للكوجينه وهي تحاول تتجاهل اللي حست بيه..
🍃🍃🍃🍃🍃
ويروحوا الرجاله من الصلاة في الجامع..
وطول دفوا لحسين جنة وولاد عبد الرؤوف بش يعرفوا يعولوا ع راحتهم..
☘في الجنان..
عبد الرؤوف؛امهم قرت عليهم القرآن كله..
حسين:ارقي مرة وتنين وتلاته وان شاء الله يسلموا..
ابتسم عبد القيوم وهو يشوف لحسين كيف يرقي في الولاد وجنة معاهم..
عبد الرؤوف وهو يشوفله بطرف عينه قال..
/ايه قالولك غدوة طالعين للجردينه اللي في *****
حسين شافله وقال..
/ايه قالولي بيمشوا معانا حتى عويلة المراة النازحه..
عبد الرؤوف:حتى المهدي قال بيرفع صغاره وصغار خوته شاف للتارقي وقال..تعالى حتى انت ياتارقي
عبد القيوم عقد حواجبه وقال..
/وشن ندير حاشر روحي معاكم
حسين:شن يقول هدا!؟
عبد الرؤوف:مافهمتش!
عبد القيوم:انتم عائلات وانا عزابي ماتجيش
حسين:ع اساس بنقعمزوا مع النساوين حني!؟ هما بيقعدوا في تركينه وحني في تركينه..
عبد الرؤوف:تعالى ياراجل وماتعقدش روحك وبالمرة جيب معاك طرمس شاهي اخضر نكيفوا بيه..
حسين؛من غيره ماتجيش..
ابتسم وهز راسه بعدين قال..
/إن شاء الله..شاف لجنه لقاها تشوفله بنظرات تعجب واستغراب..ضحك وقال..حقوا جنه كيف تبحت فيا ماعرفتنيش..
شافولها لقوها تشوفله بنظرات غريبه..
حسين:ترا قولولها قولي عبدو..
🌼في هالأثناء كيف خشت طوبى للمربوعه الدخلانيه بش تفتح المكيف..بيعشوا فيها النساوين لأنها اكبر مساحه من الصاله
خدت الريموت وبتفتح المكيف وقفت لما سمعت
"هيا ياسمحه قولي عبدو..ياعبدو"
نزلت يدها بشي من البطئ وبدت ع وجهها شيئا فشيئا ملامح ابتسامة الخجل والقلب معروف حاله..
"شوف كيف ضحكت توا بس عرفاتك"..
بعد ماسمعت هالجمله جاها فضول تشوفه شن لابس..
مشت طول وقفت ورا الشباك ولأنه (PVC) ماتبانش وهي واقفه وراه..
شافاته لابس الزي المميز اللي يعطي لصاحبه طلة فريدة وكلها هيبه...اللون هالمرة كان مختلف بني..
تبعاته بعيونها وهو يقرب لجنة نزل عليها وخداها في حضنه ورفعها..
وجنه مدت يده لشاش متاعه"عمامة" وشداته وهو يضحك..
المنظر كان مغري للرسم بشكل كبير..
وفي لحظه..استاقظت طوبى لما سمعت صوت مروة خاشه وهي تقول..
/فتحتي المكيف.
التفتت وهي تقول بإرتباك..
/هيا هي..
مروة قعدت تشوفلها بإستغراب وهي تفرش في المفارش..
وطوبى وهي مرتبكه فتحت المكيف ولأنها خافت مروة تسألها عن وقفتها في الروشن التفتت قالتلها..
/مروة غدوة بتمشي معاها ولا؟.
مروة:ياعيني اكيد معقوله نفوت طلعه زي هادي!
ابتسمت طوبى وقالت..
/صح كلنا نبوها تغييرة الجو...
🍀🍀🍀🍀🍀
ويجي تاني يوم العيد..
وبعد العصر..
طلعوا سيارات حسين واميمه ووراهم عبد الرؤوف..
رافعين الصغار كلهم ومعاهم غرفه وطوبى وهاديه ومطيره وبنات فايزة..
وبعد ماطلعوا هما من الشارع..
طلعوا وراهم المهدي ونضال وعمر رافعين معاهم صغار المهدي وطاهر..
🌼🌼🌼🌼🌼🌼
وبعد ماقطعوا مسافه لابأس بيها وصلوا للمنتزه..
مشوا النساوين والبنات لجهة في طاولات وكراسي..
وحسين وعبد الرؤوف مشوا لجهة فاضيه مافيهاش كراسي وطاولات وكل واحد رافع واحد من التوأم...
فرشوا مفرش وقعمزوا عليه وخلوا الولاد يلعبوا براحتهم تحت مراقبتهم..
☘لكن جنة قعدت في الكروسه حدا امها..
طوبى:بري معاهم تاله وردي بالك يريحوا منك..
تاله:باهي..هي تعالوا..
ومشت مع صغار حواء جهة الالعاب..
هاديه:المكان قنين وواسع..
مطيره:وزحمة ماشاء الله..
غرفه:الناس جايه تغير جو فدت الحرب وهمها..
مطيره:ربي يشد فيهم ويخلوا هالأيام تمشي ع خير..
اميمه؛نقولوا ربي يهديهم وينهوها بكل..
هاديه بضيق؛مش باين بكل الكلام اللي يوصل من ***** مايخليكش تتفائلي..
مطيره:يلطف بينا ربي..
كلهم باصوات متقطعه قالوا..
"آمين"..
☘ومرت ربع ساعه..
انضموا فيها المهدي وولاده ونضال وعمر لحسين وعبد الرؤوف..
في البدايه الجو كان متوتر شويه بس بعدين هالوتر بدي يخف شويه شويه..
🍃لكن من جهة تانيه..
التوتر كان عالي عند تاله اللي راح منها ولد حواء الصغير..
قعدوا يدوروا عليه هي وسدره وجوري وخوته مالقولاش اثر..
تاله بخوف:حي عليا حي..بنمشي نقوللهم يدوروا معانا..
ومشت تجري للنساوين وهما وراها..
وصلت فيهم وهي تقول..
/الولد الصغير راح مني..
انصدموا ومطيره شهقت وقالت..
/غبارة!
طوبى ناضت وهي تقول بلوم..
/كيف راح منك مش قتلك انتبهي يا تاله..
تاله بضيق:اسفه مش عارفه كيف سهيت عنه..
مروة:خل ندوروا وين ماريحتوه مايقدرش يباعد..
اميمه بقلق:ايه صح..
طوبى مشت طول جهة العاب وهما وراها..
وقعدوا النساوين يراجوا فيهم بخوف وترقب...
🍃🍃
دوروا عليه في مكان الالعاب وحواليه مالاش اثر..
طوبى حست جسمها فشل وهي تقول..
/يارب يارب..
تاله بنبرة باكيه:كله مني..
اميمه شافتلها بحزن بعدين قعدت تمرر في نظرها ع المكان
وفجأه تشوفه وبنبرة راحه قالت..
/اهوا..
شافولها بعدين التفتوا بش يشوفوا وين تشبح..
☘لقوا الوليد في حضن عبد القيوم اللي لاقاه لما جي خاش المنتزه...
كان يكلم فيه وهو مبتسم ويشوفله بعيونه اللي مدرقتهم النظارات..
طلته كانت كاجوال هالمرة قميص ابيض رافع كمامه للمرفق ع سروال "بنطلون" جينز ازرق غامق..وشاد شنطه عمليه لونها اسود في يده التانيه..كانت متوسطه الحجم وتبان مليانه..
عبد القيوم؛اكيد مخليهم قالبين عليك الدنيا يامتاع المقالب..
🌼تاله براحه:الحمد لله..
مروة شافتلها بإبتسامه وحطت يدها ع راسها..
وسدرة وجوري كان يشوفولها بفرحه..وخوت الولد كانوا فرحانين وهما يشوفوا لخوهم...
بينما اميمه كانت مركزه بالنظر ع طوبى اللي تشوف لعبد القيوم بنظرات غريبه...
🌾طوبى في هديكا اللحظه..
وهي تشوف لعبد القيوم رافع الولد ويكلم فيه..
حست روحها شايفه الموقف هدا..حست وكأنه اللي صار مار عليها قبل...
وهي تحاول تذكر..ذاكرتلها جابتلها موقف المدرسه..بس مش هو اللي حساته يشبه هالموقف حاولت تذكر اكثر..
مكان تاني فيه زحمه ودوشه وصغار..والعاب..وعيل ضايع..
عيل ضايع!!؟
تجمعت مجموعه مشاهد في عقلها..ذاكرتها طلعتهم واحد ورا التاني..
ملاهي..وبنيه تبكي..وهي ماشيه معاها دور ع أهلها..
وفي واحد ساعدها وكان رافع البنت في حضنه وقاللها جملة بلغة غريبه...
توسعوا عيونها بدهشه وهي تشوفله لما طابقت ملامحه بملامح الشاب اللي تفكراته..تسائلت في نفسها بذهول..
"ياربي! معقول يكون هو نفسه!!؟"

#انت_عيدي
#طوبى

....يتبع....