أسرار قدس

الحلقة 16

‎اسرار قدس

‎((( بقلم زينب ماجد )))

‎الحلقة _١٦

‎هَذاك انتَ وهَذا عُمري
‎لا حَويتة ولا حَويتك .

‎حطت السم بيدي ومشت عني
‎ضليت ادحك وراها ، لو اجتل روحي لو يجتلوني
‎شلون بيه ؟ وين انطي وجهي ووين اروح

‎ظليت كاضبة السم بيدي وواكفة بالمطبخ ادحك ، انطبكت الباب وراحت .. كمت ابجي من كل كلبي وادعي ربي يطلعني من هالمصيبة
‎ادري قلطت ادري سويت مو زين فد ما اريد اموت اخاف ..

‎اجت الكهرباء فد اني بالبيت
‎كمت من المطبخ كعدت بالهول فد صوت المروحة بالبيت السم جدامي ودموعي تهل

‎انطبكت الباب .. فزيت شلت السم وكمت
‎حسبالي هي ردت .. ماكو احد فات
‎عجل ياهو الطبك الباب

‎دحكت بالكراج ماكو احد
‎رديت حطيت السم بوطرة يصير يمكن مال فيران مدري مال بريعصية .. ورديت وكفت بالمطبخ

‎عليش تريد تجتلني
‎عليش ما فكرت تنزلة من بطني
‎مرت اخوي مرة سكطت جاهل كالتلها امي هاي من شيلة المحفوغة، عليش ما اسكطه اهونلي من الموت .

‎واكفة وادحك الهول جدامي
‎فات خطاب على الهول .. باب قرفتي مفتوح دحك بنص القرفة ما لكاني .. كعد بالهول وشعل اقنية بتليفونه وكعد بالكاع مد رجل وثنى رجل

‎اني جدامه فد ما انتبهلي ضوا المطبخ مطفي والهول مشتعل .. مشيت من المطبخ دخلت الهول صدت عينو بوجهي .. حجه : ليش وحدج بالبيت

‎- عدك رقم امي

‎-شرايدة بيه

‎- كلهم راحو لاهلهم فد اني ضليت اريد اروح بس الحاجة ما ترضى

‎-ورجلج الافندي وينو

‎- راح يضل عد وحدة بالعرب تداوي وعب والحاجة راحوله

‎- وتظنين امج تجي هسه خاطر تاخذج ؟

‎- اريد امي ما اريد اضل هينا

‎-شجاريلج عيونج باجية

‎من كال هيج بجيت بالزايد .. لم رجلو وكعد : شبيج يولي بجيج هذا منين ؟

‎- فد اريد امي

‎- رايدة اخذج الها

‎- لو خذتني انت ابتلي

‎- ياهو اليبليج اكص راسو

‎-اي انت تكص اني اخاف

‎- اخبرها اخذ العنوان وانت جهزي روحج ومن اوصلج غاد عود كولي امي اجتني

‎ضليت ادحك عليه : ماشي خوش

‎-دبدلي عجل بين ما اجيب سيارة واجي

‎ركضت بسرعة جريت العباة وخذيت الاعتازة بسرعة وطلعت كبل لا تجي وتنفرد بيه خل اروح لامي تجاريها، هي عسرة وامي عسرة يتجارن اني ما بكدهن.