أسرار قدس

إعلان

صيف ووكت ظهر والجو حار
فاتحة جامة السيارة وكاعدة بصفه بالصدر ولابسة النكاب
ما استجريت اغشعه لو ادحج بوجهه ، مدنجة والنكاب على وجهي وسموم تلهب من هوى الجو الحار. لاف سيارته وفات بشارع الكترين زرع ما اشوف بيوت اوادم

صف السيارة طفاها ونزل ..شلت البوشية الاولى من وجهي خليت بس الثانية عيوني تبين منهن ،اندار صوبي فتح باب السيارة ، كال : احدري على كيف بختج (انزلي بهدوء)

نزلت وكوات ادحج دربي .. اطمشت من برا السياج .. بيت بعيد وقديم وداير ما دايره زرع ، استحي اغشعه ضليت مدنجة راسي وامشي وراه، دحجت وهو يمشي جدامي لابس دشداشة بيضة وشماغ احمر لافه على راسه .. ممر من المزرعة ياخذك للبيت اللي بنص البستان .

وصلنا البيت .. عالي تصعد تلث بايات مجال زغير والبيبان مشرعة ع البستان .. طلع كدامي شاب شايفته كبل يمكنه جاي لبيتنا ، تلكاه : هلا ابو وهب

- هلا بيك خطاب ، بلغيت الربع ؟

-الحاجّة بانتظارك

يحجي ويا بس حسيت عيونه تتفكدني ما ادري ليش هيج حسيت
مدنج بس يرفع بعيونه يدحج عيوني ،كاله : حرمة رابعة بالخير ؟

حجه : قدس مرتي بأذن الله

الزلمة ما رد لا بحك ولا باطل ، حتى ما بارك بزواجته .. جنه اتصركع وابعد خاطر لا يشوفنا حاله ، دحك وراه .. حجه :اكربي اشوف اكربي ...
صاح .... حاااااجّة

دخلنا.. جهيل جثيرة اجبلت عليه تندهله ( اجا ابونا اجا ابونا )

فات على مكان مبين مطبخ
مرة كاعدة جدام جولة تطبخ ، والثانية جدام حوض تغسل الصحون وتجفيهن بصينية ، والثالثة مكمبصة اكبال طاسة اتكطع اعكود ريحان ، رفع صوته : السلام عليكم

كامن بسرعة : هلا وعليكم السلام

-الحاجة وين

-بغرفتها تذكر الله

-جل اسما ، زهب الغدا

-ناطرين جيتك خاطر نزهب

-عجل ازهبوا الغدا لجل الحرمة الجديدة
اندار يحاجيني : اعرفج حريمي .. عفاف مرتي الاولى والجبيرة
عواطف مرتي الثانية ام ايسر
واميرة حرمتي الثالثة

بلعت ريجي ماخذ ٣ واني الرابعة .. امي عليش ما خبرتني ؟ تطيني لزلمة ماخذ اربعة .. بعدني بصكعتي
اندارلهن وهو يتفاخر ويكللهن : قدس مرتي الرابعة وخاتمتجن بأذن الله

الجبيرة رحبت بيه : جثير الهلا ان شاءالله يجعلها مبروك ابو وهب تستاهل الخير