اقتباس♥️ أدهم وكاميليا ومراد الألفي 😂 من الجزء الثالث الورقي ♥️♥️
_______________
-أدهم لو سمحت أنا مش طايقة نفسي، يا ريت تقول جاي ليه؟
أمسك يدها رغمًا عنها ووضع هاتفها بكفها قائلاً بنبرة باردة كانت لها القدرة في تفجير إمارات الغيظ على وجهها الجميل:
-لقيته بالصدفة في عربيتي وجبتهولك.
ضحكت ضحكة ساخرة وهي تخلع نظارتها تبرز حدة عيناها له بقولها الشرس المستنكر:
-بالصدفة! على أساس إني واحدة هبلة وهصدقك ومعرفش إن دي من ضمن خطتك البايخة!
رفع جانب شفتيه بسخرية قاسية:
-وأنا هحط خطة ليه، عايز اوصل لأيه؟
هزت كتفيها بلامبالاة ظاهرية وبنبرة مترفعة أجابت:
-اسأل نفسك، بس قبل ما تستعبط اعرف كويس إننا عرفنا بكل اللي أنت عملته ومحاولاتك أنت ومراد أخوك عشان تطفش العريس، أنتم بجاحتكم وصلت إنكم تهددوه!
التحق العناد والغيرة بحروفه النارية:
-وماله طالما مش عارفة مصلحتك، يبقى الأولى إني اتحرك مكانك وامنع المهزلة دي!
صاحت فيه بانفعال ضاري:
-وأنت مالك إن كنت في مهزلة ولا لأ؟!
قبض على يدها التي كانت تلوح بها وقال بنبرة غلبها التملك النابع من فرط عشقه بها:
-لا مالي ونص.
ابعدت يده عنها بعنف وقالت باستياء فاض بها من جرأته في محاولة احكام قيوده حولها:
-بأي حق، حقك أنت زمان اتنازلت عنه لما ركبت دماغك وعاندتني لمجرد إنك تمشي كلامك عليا، ولما أنت بكل بجاحة نهيت كل حاجة ما بينا، يبقى ماتحاولش ترجع تاني وتقولي ليا حق!
قست نبرته بخشونة وفظاظة ارتعدت بسببها وكأن هناك وحش تلبسه:
-هيفضل طول عمري ليا حق فيكي غصب عنك وغصب عن عين أي حد يا كاميليا، ومفيش جنس مخلوق هيفكر يخطبك أو يتجوزك طول ما أنا عايش، اعتبريني عملك الاسود لغاية ما نشوف أخرتك أنتي وابوكي أيه!
ظهر والدها من العدم وهو يفصل بينه وبين ابنته بينما انطلق في إرسال كلماته المحملة بسهامه النارية:
-أخرتك سودا يا ابن زين، لو شوفتك قريب من بنتي تاني مش هيحصل لك طيب.
لم يتراجع أدهم بل وقف يناظره بقوة وتحدٍ بعد أن طفح الكيل به:
-وبرضو لو فكرت إنك توافق على خطوبتها من حد غيري، مش هيحصل لنا كلنا طيب، سلام!
ثم توجه نحو باب سيارته من الجهة الأخرى وقادها تاركًا إياهما ينظران في اثره بذهول من وقاحته بعد أن افشى بتهديده علنًا، فضغط مراد فوق أسنانه بغيظ وحقد:
-ده بيهددني هي وصلت لكدا؟!
ضاع صوتها في وسط الهياج الذي عاث بداخلها بعد أن استمع والدها لحديثهما، وترعرع الخجل بحبات ثماره في وجنتيها محاولة إبعاد نظراتها عن والدها الذي تشدق ساخرًا:
-احنا اخوات بس يا بابا، طلعتوا اخوات فعلاً!
كادت تفتح ثغرها محاولة استجماع فكرة للخروج من تلك الورطة ولكن مراد اوقفها بحدة سيطرت عليه وهو يدفعها نحو سيارته:
-امشي يا هانم حسابك معايا بعدين.
_______________
أنا شوفت مطلب جماهيري لظهور مراد الألفي حبيت بس اوريكم نبذة من اللي بيعمله في أدهم في الجزء ده♥️😂 حرفيًا جننهم كلهم بما فيهم زين 😍
ده اقتباس من وسط الاحداث وجديد ومش ناسية اقتباس عز وكارما من الجزء الرابع قريب جدًا ♥️♥️ أنا هكون موجودة في المعرض يوم ٢٧ يناير ويوم ٣ فبراير من ١٠ لغاية ٥ او ٦ هسنتناكم اشوفكم♥️♥️
ماتنسوش عشق الزين الجزء الثالث والرابع الورقي هيكونوا متوفرين من ٢٦ يناير لغاية ٦ فبراير في معرض القاهرة الدولي للكتاب ♥️♥️ صالة ٢ جناح ابداع B15 والاسعار الجزء الثالث والرابع الاتنين ب ١٥٠ جنية والجزء الاول والتاني الاتنين ب ١٠٠ جنية اما السلسلة كاملة هتبقى ٢٥٠ جنية
