ياسند هالحياة يا ضلع من ضلوعي

البارت الثلاثون

تركي:ياولد اهجد
وقف يمشي من عندهم :ولد عازمني و بتروح!
هتان:شويات و راجع
اخذ القهوه من المندوب يدخل البيت يشوفها بالمطبخ لسى : هذا البلاك و هذا الامريكانو الاندومي؟
دونا:حلو سلم تستلم شفه في القدر ، اخذ القدر يجلس على الكرسي ياكل بسرعه:بتغص ما هو طاير!
هتان:تركي ينتظرني بس والله ميت جوع
دونا:طيب انتبه لا تغص لان جد ما بستحمل حادثه مستشفى من جديد !
هتان:لا معليك ، هزت راسها تطلع من المطبخ تقابل عمها عند الباب:ماشاءلله يا عمي قهوه جايه قهوه طالعه!
دونا بـابتسامه:تعرف الادمان العائلي للقهوه عندنا
عبدالرحمن:اعرف يا عمي ، بخير انتِ ناقصك شي محتاجه شي؟
دونا:بخير عمي ما تقصر الله يطول بعمرك، ابتسم عبدالرحمن يطلع من البيت يروح للمجلس
-
غرفة الريم~
فتحت الملف اللي اعطاها اياه تركي تشوف صور لنواف و جادي و أديلا لكنه صور نواف دائمًا ما تكون ماهي واضحه او لاحد جوانبه فقط بسبب انه غالبًا ما يكون بالكمام ، وهالشي تستغربه و يخوفها لانها تشوف جادي و أديلا بدون كمامات و صورهم واضحه لكن هو ابدًا تحس وراه هالشي راح يصير شي كبير ، اخذت جوالها ترسل لتركي :من وين جبت الصور؟
تركي:تعرفين ما اقدر اصرح!
الريم:طيب تقدر تجيب لي معلومات ؟
تركي:مثل؟
الريم:ابي اثبات لـ ام جادي ، قدرت تجيب شعره منه مره تجيب ثانيه و هالمره لامه؟
تركي:ما اوعدك لكني بحاول!
الريم:يعطيك العافيه ، سطام كويس؟
رفع تركي جواله بخفيف يصوره لها ، متربع على الارض عرض اكتافه اللي ضمتهم و ما عاد صارت تخيفها ، على يمينه شريان و يساره ابوها بيده فنجان قهوه و الواضح من الصوره انه يسولف من ابتسامته الهاديه ، يعحبها السكون اللي يعيشونهم هم الاثنين و يعجبها كيف انه صار يخالط العالم الخارجي جالس مع اخوانها و ابوها ما تستغرب جلوسه مع تركي لانها شافت تطور علاقتهم في الايام اللي جمعتهم سوا لكنه الآن ياخذ و يعطي مع شريان و يحارش هتان يده رجعت تلامس يد البلاستيشن بعد سنين و الشي الوحيد اللي تنتظره يرجع علاقته مع ابوه و ينهي الخلاف اللي ما تعرف سببه ، رفعت انظارها للباب اللي وراه وعد و دونا تبتسم لهم من دخلوا بيدهم اكواب قهوه و حلى

كان جالس بغرفته يلعب بكره صغيره بدون اي هدف يدندن بـ "من عمر يومك عمر كل العمر او لانك دوم فيني عافيه " ابتسم داخله لانه يشوف كيف تفاصيلها تغلب على واقعه رغم بعدها عنه الاغنيه اللي يدندنها الان هي كانت تدندنها بـ اول مره شافها بالغلط بلوفره اللي بالون بالبني من اكتشف انها تحبه ، صار يشرب قهوه بشكل اكبر و كانه كل شي بحياته يترتبط فيها حتى الأشياء التافهه دخلت عليه شجن بدون تضرب الباب: بنت!
شجن:جيت اشوف لك حل لانه ما يصير تجلس تهوجس كذا!
رايف:شنو بتسوين مثلًا؟ ، البنت صغيره و غير كذا كيف بعترف لها انا؟
شجن:والله شف اخوي العزيز لازم تعترف ماكو حل ثاني بعدين انا احس يعني شوف احس حتى هي تبادلك الشعور! ، فز من مكانه:احلفي!
شجن:ركز معي اقولك احس !
رايف:ادق عليها؟ هزت راسها بـ ايه :بس رايف تكفى دفاشه ما ابي و غير كذا لا تنسى انها وريف و حيدة اخوانها و دلوعتهم بشويش على البنت طيب؟