( ٢٣ ) - قطة وفأر -
فسحب صديقه إلى النصف الآخر من الغرفة حيث مكتبه الوثير وما أن أبتعدوا عن طاولة الإجتماعات بمسافة معقولة بعض الشئ تمكنهم من الحديث دون أن يستمع إليهم أحد حتى هتف " عـاصـم " بنبرة هادئة محاولًا التحكم بالموقف.
- ممكن تهدأ يا مُـراد لأن الوضع ميسمحش باللي أنت بتعمله ده نهائي..
لازم تفصل بين حياتك الشخصية وبين الشغل وإلا كل حاجة هتبوظ أكتر ما أهي بايظة..!
" مُـراد " بغض وهو لا يُزيح عيناه عنها والتي تقابله ببلاده شديدة وهي تعمد إلى تجاهله إلا أن بسمتها المُتلذذه والمُتشفيه لا تخفوُ عنه.
- شايف يا عـاصـم بتضحك إزاي عايزه تفرسني..؟!
ثم أضاف وهو يحول بعيناه إلى صديقه.
- البني آدمه دي بتصطاد في المايه العكره وجاية عايزه تخلص اللي عملته فيها زمان دلوقتي بس وحيات رحمة أمي ما هديها الفرصة وهرميها بره حالًا..! قالها وهو يهم بالرحيل ليُنفذ ما هتف به للتو إلا أن" عـاصـم " أسرع في الإمساك به مرددًا بحكمة وتعقل.
- يا مُـراد أعقل وبلاش شغل عيال أومال..!
أصـالـة من الواضح أنها أقوىٰ من الأول بكتير ولازم منستهونش بيها متنساش أن معاها مـمـدوح وده يعرف كل كبيرة وصغيرة عننا ولحد الآن متأكدناش بشكل رسمي من تورطه ويا عالم النية فيها إيه..؟!
" مُـراد " وتلك الفكرة تُلمع برأسه والصدمة تبدو واضحة على تقاسيم وجهه.
- يا بنت الـ... أنا دلوقتي بس عرفت مين اللي ورا الملعوُب ده..؟!
ثم أضاف وعيناه تُغيم بغضب أعمىٰ.
- صـولا هي السبب في كل اللي بيحصل ده وراجعة تنتقم يا عـاصـم أوعي يخيل عليك الكلمتين اللي قالتهم من شوية دول..؟!
فنطق بفحيح أفعىٰ وعيناه تُغيم أكثر.
- دي حية يا عـاصـم..
حية وهتلف حوالين راقبتنا كلنا ومش هتحل عنا غير وإحنا مفرفرين في إيديها..!
" عـاصـم " برزانة وتعقل.
- حتى لو كلامك ده صح؛ دلوقتي الموجة عاليا وإحنا لازم نطاطي ليها بدل ما نروح في الرجلين..
ويعالم الدُنيا مخبيه لينا إيه تاني إحنا في أقل من شهر بعد ما كان وضعنا أقوىٰ من البنك المركزي بمراحل بقينا أضعف بكتير أوي من صندوق الزكاة اللي على باب أي جامع..
ومتنساش يا صاحبي أن أصـالـة دلوقتي صاحبة النسبة الأكبر في الشركة والمصنع يعني بقت قوة عُظمة إياك تستهون بيها..
وبالعربي كده هي دلوقتي جوه وإحنا اللي بره فلازم تحكم عقلك يا مُـراد لحد ما تقف على أرض صلبة وساعتها كل صاحب حق هياخده وهتدب صباعك في عين التخين ولا يهمك أي حاجة..
لكن دلوقتي خليك ماشي على مبدأ أن كان ليك عند الكلب حاجة قوله يا سيدي..
ودي مش كلب دي أصـالـة الـعُـمـرانـي وفاهمة هي بتعمل إيه دلوقتي كويس أوي..؟!
ثم أضاف بحكمة ورزانة.
- إن جيت للحق كمان كويس أوي أننا وقعنا في إيد أصـالـة المثل بيقولك اللي تعرفه أحسن من اللي متعرفوش على الأقل أصـالـة عارفينها وعارفين إيه نقط ضعفها وقوتها مش لسه هنتعرف عليها من جديد..!
