HN (Hellishness)

Intro

🐺Unicode🐍

လေပြည်လေညင်းတို့ ညှင်းသွဲ့သွဲ့တိုက်ခတ်နေသည်။ မြို့တော်နှင့် အလှမ်းဝေးသည့် လူသူအရောက်အပေါက်နည်းရာ ကုန်းမြင့်လေးထက်ရှိ မိုးမခပင်အောက် သပ်သပ်ရပ်ရပ် ဝတ်စားဆင်ယင်ထားသည့် သက်လတ်ပိုင်းအရွယ် အမျိုးသားတစ်ဦးနှင့်အတူ နောက်လိုက်ဖြစ်ဟန်တူသည့်လူတစ်ယောက်တို့မှာ အတူပူးတွဲကာ မြှုပ်နှံထားသည့် မြေပုံမို့မို့လေးရှေ့ တိတ်တဆိတ်ပင် မတ်တပ်ရပ်နေကြသည်။ ဝတ်ဆင်ထားသည့် ဝတ်စုံနှင့် ပုံပန်းသဏ္ဌာန်အား ကြည့်ရုံမျှဖြင့် ထိုလူ၏နောက်ခံအဆင့်အတန်းအား လွယ်လင့်တကူ ခန့်မှန်းနိုင်သလို တည်တင်းသော မျက်နှာထား၊ အချိုးအစားကျနလှသော ကိုယ်နေဟန်ထားတို့ကြောင့် အထက်တန်းလွှာမှ မျိုးရိုးမြင့်တစ်ဦးဖြစ်ကြောင်းလည်း လွယ်လွင့်တကူ သိနိုင်ပေလိမ့်မည်။ ခါးထိရှည်လျားသည့် ဆံနွယ်တို့ကို သပ်သပ်ရပ်ရပ်ဖြင့် ခပ်မြင့်မြင့်မြှောက်စည်းထားသည့် ထိုအကြင်သူ၏ မျက်နှာမှာ ဘေးလူပင်အလိုလိုရှိန်သွားရလောက်အောင် တည်တင်းနေသော်ငြား မျက်ဝန်းအစုံမှာတော့ မှိုင်းညှို့၍နေသည်။ တိုက်ခတ်သွားသည့် လေပြည်လေညင်းတို့နှင့်အတူ ထိုသူ၏ စိတ်အစုံမှာလည်း နေရာအနှံ့ လွတ်လွတ်လပ်လပ် ပြန့်လွင့်နေသည့်အလား။

မိုးသားတိမ်လိပ်တို့ တဖြည်းဖြည်းမြင့်တက်လာချိန် တိုက်ခတ်လာသည့် လေပြည်လေညင်းထဲ မိုးနံ့ငွေ့ငွေ့ကိုပါ ရှူရှိုက်လိုက်မိသည့်နောက် တိတ်ဆိတ်သည့် ပတ်ဝန်းကျင်ထဲ ထိုသူ၏ သက်ပြင်းချသံက မတိုးမကျယ် ထွက်ပေါ်လာ၏။ ထို့နောက် လက်ထဲ ပွေ့ပိုက်ထားသည့် လာဗင်ဒါပန်းစည်းအား မြေပုံမို့မို့လေးနှစ်ခုကြား အသာချပြီး

"ဒီပွဲမှာလည်း မင်းပဲနိုင်ပါတယ်။ မင်းက အားလုံးကို အနိုင်ပိုင်းသွားခဲ့တာပဲ။"

ပြန်လည်ဖြေကြားခြင်း အလျင်းမရှိသည့် မြေပုံနှစ်ခုအား ကြည့်ရင်း ထိုသူ၏အတွေးအစုံမှာ တစ်ဖန်ပြန်လည် လွင့်ပြန့်သွားရပြန်၏။ မြေပုံပေါ် တင်ကျန်နေသော သစ်ရွက်ခြောက်များအား အသာဖယ်ရှားပေးရင်း သက်ပြင်းတို့ ထပ်မံချမိသည့်အခါ မလှမ်းမကမ်းတွင် မတ်တပ်ရပ်နေသော နောက်လိုက်ဖြစ်သူက ပုံမှန်အသံနေအသံထားဖြင့် သတိလှမ်းပေးလာ၏။