بقلم هوس ريجا
لابسة قفطان ڨرونة وعندو ذيل طويل سبسيال للحوامل كرشي خارجة فالشهر السادس متاكدة عندي توأم لانو انا كرشي جيناتها تومية نهز غير بالتوأم مي ماعلباليش واش عندي مزال مارحت لطبيبة شعري درتلو بابليز ودرت جبين مكياج صارخ علقت ذهبي الانظار ڨاع عليا وعلى لبستي وذهبي والحطة تاعي رايحة وجاية ونوصي ونأمر أنا الامر الناهي ضحكة على وجهي واقفة بكل جبروت وبرود جبل مايهزك ريح كشغول هذا ماشي عرس راجلي وقفت في عرسو وماقصرت بحتي حاجة لي تشوفني تستغرب هذا الشي وتحسدني على قوة الشخصية لي عندي لكن داخليا منهارة ماتوقعتش يجي هذا النهار ويدير هدرتي ويسمعلها جامي عطا اهتمام لهدرتي ودار عليها غير هذه المرة قتلو اتزوجها وراح صح تزوجها ماعلباليش انتقاما فيا ولا كان يستنى فالفرصة يتزوجها بقيت ندور فالدار بين المعاريض ونستقبل فالضياف بكل ترحاب حتى بالغت في هذا الشي مثلت تمثيلية وماقدرتش نكملها لكن مجبورة نكملها مكرة فيه هو حاب يكسرني ولازم نثبتلو بلي مايقدرش يكسرني دخلت ام ايمان ايمان رجعت بعد ماخرج راجلها من السبيطار راح الشيخ رجعها مي لضك مزال مايهدروش مع بعضاهم وهو حاب يعاود الزواج وراهم يحوسلو على عروس رحت عندها استقبلتها سلمت عليها شافت معايا من الفوق للتحت ماينة عليك خرجتي سبعة بنت سبع وقفتي في زواج راجلك وتستقبلي فالغاشي ،وعلاه ما نوقفش في عرس راجلي لازم انا اول الناس نوقف في زواجو ،بصح والله تقهرنا عليك كي تزوج عليك علبالي راهي تستشفى فيا حتى هي كي بنتها تكرهني ضحكت مكلاه تقهري روحك خبي طاقتك لعرس راجل بنتك مابقالوش واقيلا بعد عرس راجلي وجها تبدل راحت تمشي بعد ما سمعتها تهدر علابيها تزوج عليك راجلك تستاهلي حملت حملت وكي ماقدرتش وشفت روحي راح نبكي دخلت لشمبرة وخبطت الباب نهدي في روحي حبست دموعي ممنوع نبكي رحت التاقة لقيت الطوموبيلات بداو يتلمو راح يروحو يجيبوها ڨاع يضحكو وفرحانين عكس الدمار لي داخلي لحد الان مانيش مستوعبة كيفاه كنت نقنعو يتزوجها بقيت نمروح على وجهي مانيش حابة نبكي إذا بكيت مراحش نسكت سمعت الباب تحل جاني صوتو تسومة درت ورايا لابس سروال ايطوال بلونوي قمجة بيضة فاست بلونوي مخفف اللحية شوية شعرو يلمع بالجال معلق نواظر فالقمجة كي درت عندو حسيتو متفاجأ من طلتي شهور وانا هجراتو مانخليهش ڨاع يلمح خيالي حتى السكنة وليت نسكن هنا جا يمشي عندي وقف قدامي حكملي يديا شاف معايا ياعمري خرجتي عروس ديتي العين والقلب والروح من اول نظرة كل ما كبرتي كل ما حليتي علبالك راني متمني نعرس عليك من جديد ونرقد في حظنك انتي هي عروستي علبالي يلعب على اعصابي ويستهزء بيا حكمهالي من نهار قتلو مانحبكش وماتهمنيش رجع هذاك مولود القديم جبدت يديا روح جيب عروستك راهي تستنى فيك _جيت نقولك حاجة قبل ما نروح ،وشنو هي _بلي والله ماحبيت وحدة كيفك انتي الدوا لروحي انتي عشقي لول والاخير ،علاه راك تتمسخر ناض يضحك واشبيك خليني نطيب خاطرك لابغا بالكذب ،كذبك احكمو عندك شبعت منو _انتي اصلا ماكيش تاع رومانسية انتي تاع ضرب وكسر الراس دللتك شوية تفرعنتي تموتي على الذل ابقاي فيه غارقة بقيت نشوف معاه قرصني من خدي حابك انتي تستقبليي كي ندخل انا وياها ،على عيني و راسي بقا يشوف معايا وراح حل الباب خرج درت شهيق وزفير وخرجت وراه رحت قعدت مع يما والعينين يتبعو فيا ويما تاكل في روحها ماكلة كيفاه تقعني راجلك يتزوج جاو لعبو في راسك وخربولك دارك اصبري توصل اصبري يومين وهي حاوزاتك من دارك بقيت ساكتة مانيش معاها بصح حاسة بيا دارت عندي روحي لشمبرة وريحي شوية كاش مايصرالك ضحكت علاه واش يصرا كثر من هكذا قالي استنايني حتى يجيب عروستو راني نستنا _علاه ديري في روحك هكذا حكمت يدها يما مانيش حابة نضعف ونبكي قويني .....سمعت صوت لاصونات كي جاو ملا جابوها نضت وقفت ولبست قناع القوة والبرود ونضت وقفت للباب دخلو هما في زوج نحاو عليها لفوال وبدات همسات النسا من ورايا والمقارنة بيناتنا واشبيه هذا مولود خلا العذرا هذه وراح جاب مطرڨ شوا.... واش خاصها مرتو حتى يتزوج عليها.... شكون لي عندو مراة كيما ابتسام ويتزوج عليها .... والله غير ابتسام خير منها وصغيرة عليها شوفيها تقول هي العروس ..ايه هذو هما الرجال كلاب ما يملى عينهم غير التراب.... هزو راسهم لقاوني اول وحدة واقفة رحت استقبلتها سلمت عليها وحظنتني همستلها مرحبا بك في دارك هو شاف معايا وراح خرج في الفترة لي فاتت تصالحت معاها وانا لي رحت خطبتهالو هدرت معاها وحدنا وفتحتلي قلبها وصارحتني بلي تعرضت لاغتصاب كي كانت صغيرة من صاحب باباها وماقدرتش تهدر حتى هو حكاتلو بلي هو اللول في حياتها بصح ماصدقهاش و ماحبيتش ندخل بيناتهم لي يهمني انو ضميري مرتاح مالغري ماعلباليش اسكو هذا الشي صحيح ولا غالط لكن اهم شي مرتاحة حتى هو حسيتو مرتاح وحاب يصحح غلطو معاها
ماعلباليش كيفاه فوت هذاك العرس وخلاص ل 12 جا وقت يديها نضت دخلت الشمبرة وغلقت الباب بالمفتاح ماقدرتش نزيد نحمل بقيت نسمع فالزغاريت روحي طارت حطيت يديا على وذنيا حتى راحو خرجو هذيك الليلة فاتت عليا جحيم بقيت نتقلب في فراشي حتى طلع النهار ماقدرتش نغفى دقيقة حتى البكا ما بكيتش زعما اختليت بروحي باه نبكي بصح ما بكيتش حكمتني حالة ارق غير طبيعية جيت في شمبرتي وقاعدة حتى سمعت صوت زغاريت شفت مع الساعة ال9 يعني جات طبطب الباب الف مرة وماحليتش سمعت صوتو ورا الباب يطبطب كي ماحبيتش نحل بقا يعيط تسومة حلي واشبيك سمعتو يهدر مع يماه من البارح ماخرجت ما طليتو عليها _طبطبنا عليها شحال من مرة بصح ماحبتش تفتح _يما واقيلا كاش ما صرالها بقاو يطبطبو كي ماحبوش يحبسو وليت نضت فتحت عليهم وتخبيت ورا الباب كعاد لابسة غير فوندروب قصيرة دخل لقاني واقفة ورا الباب دار عندهم روحو برك خلاص _خلينا نشوفوها واشبيها _مابيها والو روحو _خليني ندخل نشوفها برك _يما ممبعد وشوفيها ماشي ضك روحي برك غلق الباب رحت رجعت لفراشي جبدت الغطا عليا غطيت راسي درت روحي راقدة جا قعد ورايا نحا الغطا على راسي زعما قدرتي ترقدي صح بقيت ساكتة ومغمضة عينيا نوضي مراحش تباركي لعروستي راهي هنا ،مولود صبح عليا خليني نرقد _اوو ماشبعتيش نوم ،ماشبعتش و من اليوم راح نعوض ڨاع ليام لي مارقدتهمش وانت مدام عندك مرتك هي تتولي مسؤوليتك انا مسحت يديا منها من مسوؤلية بناتي ماني مسؤولة على حتى حاجة تخصك بلاك جي عندي وتقولي ديرلي حاجة ولا اعطيني حاجة حتى الرقاد ماتزيدش تساميني _علاه ،ملخر خاطر عيفاتك _عايفتني؟ انا لي عفتك من ليلة البارح وانا عايفك مانعرف كيفاه كنت نرقد معاك الرقدة مع صباح بينتلي بلي ماكنتش نرقد مع مرأة البارح وين حسيت روحي راقد مع أنثى طراوة وحلاوة ودلال انتي نورمالمو يصنفوك مع الشوكيات ماشي مع النسا ،مولود نوض عليا خليني نرقد روح عند مرتك لاه جاي عندي ضرب الغطا وناض ارقدي رقدة بلا نوضة نشالله وجه الهم خبط الباب وخرج غطيت راسي باه نرقد شوية والو تقلبت تقلبت ماقدرتش غصة كبيرة في صدري قلبي حسيتو راح يوقف من كثرة القهر والضغط تحل الباب دخلت عجوزتي وسلفتي نضت قعدت جاو قعدو قدامي هاه واش صبحتي حطيت يدي على قلبي ماعلباليش بصح حاسة بقلبي راح يحبس رجعت تكيت على الحيط نرد فالنفس بقاو يهدرو معايا عقلي غاب فقدت الادراك نسمع غير في عحوز تعيط على بنتها احري جيبي الما المراة راح تموت حكمتلي وجهي ابتسام ميمة شوفي معايا واشبيك نعيط مولود يجي يديك لسبيطار درتلها براسي لالا جابت سلفتي الما عطاتني شربت غسلتي وجهي ورقبتي ويديا جابتلي روبة لبستهالي نوضتني داتني الكوزينة حطتلي فطرت نضت خرجت بدلت جبة عراسي مكيجت طابلو ورحت لصالو لقيتها قاعدة على الفوتاي لابسة كاراكو حالتها كثر من حالتي وجها سيف مايقصوش الحزن طغى على ملامحها بقيت نشوف معاها ماعندي حتى مشكل معاها هو السبة كون من نهار تزوج ليكيداها من حياتو مرة ولا زوج راهي راحت خلاتو بصح هو فتحلها المجال ودخلها لحياتو ولحياتنا ديما نلومو المراة لي تبع الراجل المتزوج بصح فالحقيقة اللوم الكبير على اراجل هو لي فتحلها المجال ودخلها لحياتو حتى ولو هي لي تبع فيه كون جا يرفضها مرة وزوج وثلاثة ويغلق عليها الباب ويحبسها عند حدها راهي حبست وراحت خلاتو لكن هو مادارش هذا الشي فتحلها المجال وفتحلها الباب ودخلها لحياتنا وخلاها تصير جزء منها المذنب الكبير هو مولود هي خاطية فلخر هي ولية ومراة ضعيفة كيف اي انثى كلمة حلوة جيبها حتى الحب تبان بلي صح تحبو وضعيفة من جيهتو 5سنين وانا نشوف معاملتو الجافة ليها فالتليفون يسبها يقميها ينشعها يضحك عليها لكن جامي تزعف منو تحوس غير على رضايتو الضحية الوحيدة في هذ العلاقة هي انا هما حبو بعضاهم وداو بعضاهم حتى كي غلطو غلطو مع بعضاهم وصلحو غلطهم مع بعضهم من بكري هما مع بعضاهم وبقاو مع بعضهم انا الدخيلة وسطهم واقيلا انا لي راح نخرج دخلت صبحت عليهم وفت ديراكت عندها ناضت عندي سلمت عليا باركتلها برك وخرجت
نار شبت في ضلوعي ماشي غيرة لا والله ماهي غيرة خاطر شعور الغيرة مات عندي من زمان وهو لي قتل هذا الشعور فيا من كثرة مانشوفو يخون فيا ويخدع ولات عندي عادي نشوفو مع غيري انا درو الحبيبة والزوجة صاي مات فيا حاليا عايشة شعور الام فقط تهمني راحة ولادي فقط عييت نبقى فالدار لبست عبايتي درت خماري هزيت صاكي تلاقيت بعجوزتي ابتسمام وين رايحة ،لدار_ مع من مولود مكاش هنا ،رايحة وحدي نمشي _كيفاه تروحي وحدك والله يسمع مولود يقتلك ،وليدك قتلني من 5سنين عمتي ماعندو مايقتل فيا حليت الباب وخرجت تلاقيت بجارهم راكب فالطوموبيل نعرفو موالفة نشوف مع مولود حتى هو فاسد كثر منو ومن الفوق لحبوسات عايش ثم وتقابض حتى خطرة مع مولود هما ماشي طرونكيل مع بعض يداوسو ويعاودو يرجعو
