بقلم هوس ريجا
أما انا خلاصت عليا بالطلاق لكن انا لي طلقتو تقبلت من مولود كلش الخدع والخيانة والزنا والسكر والرخس والذل المعاملة الجافة والباردة تحملت وصبرت فوق جهدي حتى اغلاطو صححتهالو ورحت زوجتو وجبت ضرة ليا غير باه تكون توبة تاعو صحيحة وكاملة و الفترة اللخرة كي برد قلبي عليه ضغطت على روحي وصلحت علاقتي مالغري ماكنتش حابة هذه الشي لكن قلت معليش الوقت يداوي الجروح حتى كي سبني وقالي بنت حرام وملڨطة كنت مستعدة نسامحو بصح كي وصلت به اتهمني في شرفي لدرجة قالي ممكن هذو ماشي بناتي صاي ماشي غير دخل بياتنا حاجر لا تبنات بيناتنا جبال وجبال ومراحش يتلاقاو هذا الجبال ولا يتهدو واذا تهدو نزيد نبني ونبني حتى ندخل تراب ولا يدخل هو جامي في حياتي كرهت انسان كيفو ولالي هو و اسمو عقدة حياتي جامي نغلط فيه الشي لي دارو فيا مهما انتقمت منو مراحش ندي حقي وممكن اذا تبعت طريق الانتقام راح ننهي روحي لذلك افضل شي لقيتو اني نخلعو ونخرجو من حياتي لانو اذا قبلت نزيد نكون في رقبة انسان كيما هذا نكون صح بلا شرف وبلا اخلاق غير خرجت من سبيطار بعد ما عاودو خيطوني ديت بناتي ورجعت لداري ورفعت عليه دعوة خلع ودرت سرتفيكا ودرت محامية ماطولتش ڨاع في قضيتي وتطلقت وافضل انتقام هو النجاح عاودت بنيت حياة جديدة واسستها من زيرو وعمرت داري من جديد حتى الحضانة ديتها وحطيت ڨاع عيوبو عند القاضي باه مكلاه يخمم كي يخرج يديهملي لانو هددني كي يخرج يديهم شوهتلو صورتو بانو اب غاير مؤهل لتربية بناتو لميت بناتي عندي واسستلهم حياتهم ونظمتها كيما يلزم ولي معاوني في انهم ما يتأثروش هو حفظ القرآن سجلتهم عند وحدة تحفظ القرآن غير يخلصو قرايتهم نبعثهم عندها تعلمهم حفظ القران احكام التجويد حفظ الاحاديث ولا شغلهم الشاغل حفظ القران عادو يتنافسو هي ختها شكو تحفظ كثر وبعدتهم على اي مشكل يأثر على نفسيتهم و خرجت من هذا المشكل ونفسية بناتي سليمة اما انا لي فالقلب راهو فالقلب لكن ماخليتش روحي نبكي لانو دموعي غاليين باه يهبطو على حاجة رخيسة تاكدت هذاك الشخص مايستاهلنيش انسان سام سممني ومرضني وقتلني وعدملي عافيتي
بعد ما خرج من الحبس في بالو راح ينتقم مني عاود رجع صباح لحياتو وحطها في داري وجاب معاها طفل ورجع لفعايلو القديمة الشراب والسهرات والنسا كان ظنو انو راه ينتقم مني بصح بعد ما تاكد بلي محيتو من حياتي ورميتو عاد يحاول فيا محاولة باه نرجع عندو ونصفح عليه يتمنى يلمح خيالي ومراحش يشوفو اولا انو جامي نخرج حاكمة داري لانو العين مفتحة عليا ومستهدفة من امراض القلوب والطماعين نادرا مانخرج حتى بناتي كي يروحو يقراو يفوتو خواتاتي ومحمد يدوهم معاهم ويرجعوهم معاهم كي نشري سلعة كيفكيف نمد ليما ولا خواتاتي القضيان كيفكيف واذا تحتمت وخرجت برا حتى وإذا فت عليه مراحش يعرفني خاطر درت نقاب وستار اللهم اذا كانو معايا لبنات يعرفني مالقا حتى طريقة باه يوصلني وغلقت عليه كلش حتى البنات ماخليتوش يستغلني منهم غير خرج بعثتهملو مع يما في ثلاثة هما بالبكابات تاوعهم داتهم لعجوزتي قاتلها هاكي بناتكم وقولي لوليدك احكم بناتك بنتي راح نزوجها وراجلها ما قبلش بناتك قالها مانربيش بنات الناس هاك احكم بناتك ودبر راسك معاهم بنتي مزالها في بداية العشرينات ونتاجها مزالو يقراو مانقدرش نضيعلها حياتها حابة نزوجها ونتهنى عليها غير وصلت لدار جا وراها جابهم في ثلاثة وجا كسر علينا الباب خرجت عندو يما عطاهملها ماحبتش تحكمهم قاتلو مانقدرش نحكمهم عندي يماهم راح تتزوج وراجلها ماقبلهمش وانا ماعنديش باه نعيشهم قالها بناتي يبقاو مع يماهم ويترباو عندها واذا على المصروف انا نصرف على بناتي وكل وحدة نديرلها شهرية دورو مايتصرفش عليهم من جيبكم وقبل مانروح قوليلها قالك مولود قبر يلمك ولا غيري يمسك فهمتو هددني اذا عاودت الزواج لكن أنا مستحيل نعاود الزواج أولا نفسي ماتقبلش راجل جديد كشغول تبرمجت على مولود وبس ثانيا ماعنديش طاقة نتزوج ونحمل راجل اخر ونصبر على هبالو وعيوبو وعياطو مانقدرش وليت نعاف جنس الرجال ومانطيقهمش ونشمئز منهم ولات عندي حالة اشمئزاز وقرف من الرجال ثالثا مانقدرش ندخل راجل غريب على بناتي حتى بناتي مايقبلوش هذا الشي غير يسمعو يما تهدرلي على سيرة زواج يتقلقو ويهددوني يروحو عند باباهم مرات حتى يقولولي اذا تزوجتي مع راجل غير papa نقتلو رواحنا مالغري هما لحد الان ماستوعبوش معنى الطلاق كل ظنهم انو حنا متخاصمين وانا غير زعفانة منو كي ضربني وماحبيتش نهدر معاه علابيها ماتأثروش بزاف خاصة انهم على تواصل دائم معاه ومع جداهم وعمومهم وولادهم ماتبدل والو في حياتم هو كل صباح يروح عندهم للمدرسة يشوفهم العشية يديهم معاه مرات يباتو عندو وماخليت حتى حاجة تأثر عليهم ولا نعمرهم على باباهم عكسو هو ديما يعمرلهم راسهم عليا ويجو عندي يقولولي هيا نرجعو لدارنا وسامحي papa واهدري معاه وما خلا شكون يبعثلي باه يرجعني رفضت اي واسطة بيناتنا وقطعت اي وسيلة تخليه يوصلني مانيش مستعدة نرجع للماضي الاليم ونهدم واش بنيت على جالو وكي مالقاش كيفاه يوصل عندي وعجز عاد يديرلي فالمشاكل كل ليلة يجيني سكران و يطبطب بابي فضحني وسط الجيران الناس ڨاع علابالها بقصتي وحاسبيني مزلت مرتو مرات توصلني الهدرة على حياتو مع صباح الشي لي عشتو معاه وعيشهولي وشربهولي راه يديرو معاها السهرة والشراب والنسا ومن الفوق الضرب مافهمتش لاه باقية معاه هي ماهيش كيما انا انا كنت ماعنديش وين نروح بصح هي عكسي تماما ايقنت بلي صح تحبو ولا كيما تدين تدان واش دارت فيا راه يتندار فيها جاتني مرة من المرات عندي بعد ما سمعت بلي يجي لداري حاسبتني انا لي نجري وراه قاتلي مدامك طلقتيه بعدي عليه واخرجي من حياتو خلينا نعيشو طرونكيل ماحبتش تقنع بلي انا محيتو و رميتو من حياتي لحد الان تتهمني بلي مزالني معاه وديتو عليها وانا سبب في مشاكلها حتى بناتي قاتلي ماتزيديش تبعثيهملو يشوفهم ويتواصل معاهم لازم تقطعي اي حاجة بيناتكم تغير عليه مني وعندها الحق في راجلها بلاك انا كون زيرت عليه فاللول كيما هي وقطعت الطريق على اي وحدة ممكن ماوصلناش هنا لكن شاء الله ماقدر فعل والطلاق ماشي نهاية الحياة بالعكس انا كان لي بداية جميلة تخلصت من كلش واسست حياة خاصة بيا وفيها غير بناتي وعايشة في سعادة لكن متجيت نجوز هذيك النكسة دفعت الغالي وهي صحتي هذا الزواج خرجت منو وانا معلولة حاليا راني مريضة بجميع الامراض كل مرة يخرج فيا مرض العرق مبوشي لاطونسيو القلب السكر وليت نمشي بالدوا حتى الرقاد والماكلة لازم ناكل الدوا باه ناكل ونرقد كالناس حتى الطبيبة نفسانية وليت متابعتها ولحد الان مزالني نتابع فيها ونمشي بالمهدئات ودواء الاعصاب مزية عندي حرفة في يدي ونخدم غير على صحتي لكن في نهاية المطاف قدرت نتجاوز كلشي رميت الماضي ورا ظهري وبديت من جديد وعايشة حياة خالية من المشاكل جات فالصحة معليش نعتبرها زكاة النفس كي يحب ربي ضك يرفع الضر وحدو وهذه هي حكايتي وماتنساونيش من دعائكم لي بالشفاء
النهـــــــــايــــــــة
