بقلم هوس ريجا
بقيت شي 3ايام مزال فيا مفعول دوا النعاس والخمول نرقد بصح بعدها بدا يزول المفعول حاولت نرقد بلا بيه ماقدرتش رجعتلي نفس الحالة العشية غير جاو لبنات من القراية بعثتهم لفرماسية وقعدت نعس فيهم من البالكو شفتهم كي دخلو شرواو وجاو يمشو حبست قدامهم طوموبيل بقيت نركز شكون قريب صوطيت من البالكو بصح كي هبط عرفتو هذاك جارهم شفتو دخلهم معاه الحانوت وعاودو خرجو مانعرف واش شرالهم هازين الصاشات حل الباب ركبهم وجا ركب بقيت نتبع فيهم جابهم حطهم ديراكت قدام الباب خرجت نجري حليت الباب جيت نهبط سمعت صوتو يهدر معاه يا يما هذا واش رجعو ضك اليوم يقلب الدار على راسي كي خرجت البنات وحدهم بقيت نسمع في صاحبو يقولو لقيتهم يمشو وحدهم فالطريق جبتهم معايا كيفاه تخليهم يمشو وحدهم في هذا الشمس لمان مكانش علبالي حتى هما يدو طريحة معايا وليت رجعت خايفة بقيت ندور فالشمبرة حتى سمعتو خبط الباب البنات يبكو وهو يعيط واقيلا ضربهم _ انا واش وصيتكم قلت ماتركبو مع حتى واحد ولا ماقلتش علاه تركبو معاه ديجا واش كنتو ديرو فالحوانت هذا الوقت ماشي قلتلكم العشية كي تخرجو من القراية تجو تمشو مع لولاد ماتمشوش وحدكم فالطريق لاه جيتو تمشو وحدكم واش داكم لهذيك الجهة ياك الطريق المدرسة منا قاتلو مينا جينا روحنا وماما هي لي بعثتنا شرينالها دوا _واش من داو _هاهو فالصاشية سمعتو كي حل الصاشية بقا يشوف فيه لقاهم 3قرع تاع سيرو سمعتو كي كسرهم وضرب البنات وانا لداخل حليت الباب وخرجت لقيتهم راح يتغاشو بالخوف منو هما بلا والو يخافو منو غير يتخنزر فيهم يموتو قد ما دللهم قد ما دايرلهم رعب يخافوه في غيابو ولا حضورو رحت جبدتهم ورايا علاه راك علاه راك تضرب فيهم هما اضربني انا انا لي بعثتهم ماشي خرجو وحدهم هز يدو ويعطيني لوجهي جامي هزيت يدي عليك والف مرة قتلك ماتخلنيش نهز يدي ونضربك بصح انتي وجهك وجه ضرب ماتحبيش لي يحترمك تحبي لي يضربك ويعفس عليك حابتني نضربك هاني ضربتك وزادني دوزيام وهاهو دوزيام وكون ماجيتش بالكرش راني فلعصتك حطيت يدي على وجهي وبقيت نشوف مصدومة علاه راك تضرب فيا علاه تهز يدك علاااااااااه هي عيطة وهي انفجار كنت نستنا فيها هجمت عليه نضرب فيه بقا يتجنب في ضرباتي ويحوس يسيطر عليا كي ماحبيتش نحبس لوالي يدي ورا ظهري ذراعي نصلت طبست ورجعت وقفت همسلي في وذني يدك هذه تزيدي تهزيها في وجهي نقطعهالك ونعلقها في رقبتك حذاري تخمي في يوم من الايام تقللي من احترامي قدام الناس سورتو قدام بناتي حذاري ندفنك في بلاصتكالجزء60
بقيت نتلوى من الوجاعة حابة غير يطلقلي يدي حكمتني واحد الرعايشة تقول دارولي تريسيتي طلقلي يدي حكمت ذراعي وقعدت في لرض نرعش قعد عندي واشبيك حكملي يدي تسومة واشبيك بقيت على نفس حالتي حتى راحت الرعايشة نضت وقفت حكملي يدي راح يعاوني نوض نوقف طبعتو عليا بعددددد بعدها انهاريت انهيار عظيم نعيط ونبكي نصرخ نضرب في روحي جبد روحو بقا يتفرج فيا جات صباح عندي عيط عليها بعددددي خليها _شوف كيفاه دير كاش مايصرالها _ماعندو مايصرالها خليها ضك تهدى وحدها أدي لبنات عندك راهم خايفين فاتت داتهم بقيت على نفس حالتي حتى هديت وبداو ينزلو دموعي وحدهم قعد عندي حكملي وجهي خلاص عمري خلاص ماصرا والو ،خليني حابة نبكي حابة نفرغ قلبي من ليلة عرسك وانا هكذا ماقدرت نرقد ماقدرت نبكي وليت ناكل فالدوا باه نهرب منكم حظني بقا يمسمح على ظهري خلاص ابكي بصح ماتكثريش ماشي مليح ليك بقيت ساعة نبكي ونسكت الضغط لي في صدري ڨاع فرغتو جبدت روحي وجيت نايضة _وين ،راح نرقد نضت وقفت ودرت راح نمشي حسيت بموس دخل تحت ظهري حسبتو هو لي ضربني به حطيت يدي على ظهري وهزيت بعيطة لحيوط تهزو دورني عندو حكملي وجهي ويشوف فيا مصدوم واشبيك بقيت نحوس على الموس لي في ظهري شكون ضربني بموس انت عقد حواجبو واشنو واش من موس وينو طل ورا ظهري وينو هذ الموس مكان والوو زادتني نفس الضربة طحت عليه حكمني بقيت نعيط يا يماااا ظهري راح نمووووت سكرات الموت دخلتني طار بيا لسبيطار فوتوني ديراكت سيزرايان الطفل مات وبقات طفلة سمعتها صوتها بعد مادخلت غيبوبة فطنت على لسعة خفيفة في ذراعي حليت عينيا على ضو قاوي كلش بيض عاودت غلقت عينيا حسيت بيد حنينة على وجهي دورت وجهي لقيتها فرملية ودايرة بافات الحمدالله على سلامتك علبالك عندك يومين وانتي غيبوبة نضت قعدت حسيت بوجاعة في كرشي عاونتي قعدت بالشوية على روحك درتي سيزريان جبتي طفلة والطفل ربي يعوضك ،كيفاه نجيب مزال عندي غير 7اشهر _ايه جبتي فالسابع وبنتك راهي التحت لازم ترضعيها رضاعة طبيبعية بكيت كي قاتلي الطفل مات شحال وانا هزيت وتعبت وفلخر راح للحظة قلت كون غير راحت طفلة وبقا الطفل استغفرت ربي على واش راني نهدر شفت معاها تقدري تجيبهالي نشوفها _ماهيش هنا راهي التحت وانتي راكي الفوق اول حاجة لازم نعيط الطبيبة لي متابعة حالتك تشوفك وتفهمك خاطر كان عندك عرق مبوشي ممبعد نهبطوك التحت باه تروحي ترضعيها راحت خرجت زادت جات طبيبة قاتلي بعد ماتخرجي منا تروحي لطبيب تاع اعصاب ضك نكتبلك ورقة روحي عندو انتي كان عندك عرق مبوشي وستر ربي ورجعتي سالمة منها بصح من ضك نخبرك راح تبقاي طول عمرك تمشي بالدوا ممنوع ترميه حتى فالحمل راح يأثر عليك قبل تتخمي تحملي لازم تشاوري الطبيب تاعك ماشي من عندك بقات تفهمني وتعطيني فالنصائح قاتلي غير يخلاص الصيروم فيه دوا باه نهبطوك التحت راحت خرجت رجعت رقدت سمعت صوت الباب تحل دورت وجهي لقيتو هو سلام رجعتلو دخل وغلق الباب جا عندي قعد على السرير تكا على ذراعو هجم عليا يبوس فيا من كل بلاصة وجهي رقتبي شعري يديا ويتحمدلي بالسلامة ويباركلي ونفس الوقت يعبرلي على حبو وعشقو حطيت يدي على فمو واشبيك هجمت عليا هكذا خنقتني _لقيتي لي يبوسك وماعجبكش الحال قتلك انتي ماكيش نورمال كي ضحكت وجعتني بلاصة العملية حط يدو على كرشي وجعاتك ،شوية قولي شفتها _شكون قصدك رسيل ،سميتها رسيل_ماشي تقاهمتي انتي وبناتك اذا جبتي زوج بنات تسميها رتيل ورسيل الله غالب ماكتبش رتيل بقات رسيل بقا ثم عندي يضحكني ويلعبني وانا غير ساكتة وشوية تعبانة ولساني ثقيل على الهدرة هبطوني التحت داوني عندها غير شفتها طاح عليا البكا مانعرف علواه نبكي على روحي ولا على وليدي لي مات ولا مزلت كاتمة في قلبي حتى طبيبة قاتلي ابكي فرغي قلبي ترتاحي متزيديش تحكمي في قلبك وتضغطي على روحك وكاش مايصرالك بقيت يومين وخرجت ورسيل بقات شهر فالسبيطار كعاد جبتها فالسابع ماهيش كاملة داتني عجوزتي عندها حطتني في شمبرتو القديمة رحت لطبيب تاع الاعصاب عطاني دوا وحرم عليا الرضاعة والحمل ..
