عشق السلاطين {باللهجة العراقية}

الفصل الثاني بـ2

الكلمات تشرح تعلق سارة بعماد
_ عشق _ السلاطين _ بقلمي_ ياسمين
__________________________

اظلمت وانتي متانيه
وعينج تصد للساعه بكل ثانيه
دكات كلبك تنسمع
تبجين صنته بلا دمع
شمتانيه.. شمتانيه...؟؟
يبنيه دنية غروب
واتعطل المحبوب
ساعه ويجي الليل وتنام الدروب
ساعه وتهب الريح
والشعر يصعد فوق مثل المراجيح
من يكبل الليل دمع الندى يطيح
ملهوفه تنتظرين وبكلبك النار
تعبانه شمس الشوك نزلت للاشجار
ثار المواعيد ما تكتم اسرار
يمكن نسى موعده
لو.. عنده غير احباب والكلب شمعه وذاب
هم مثلج انه انتظر
خلينا نرجع سوة
وكل من بكلبه عتاب
باجر يجون بعذر وتبين الاسباب
دكات قلبج تنسمع تبجين صنته بلا دمع
شمتانيه..؟؟
_____________________________

عماد..
دموع غاسلة الوجنات والرموش ذبلانة، ضايعة شذرات السما بعيونها بحمرة مطعونة كد ماباجية بسببي.. كل الشرحته عنها مايجي ذرة لنظرة الخوف والخذلان بعيونها

رادت تعبرني وتطلع منعتها
_ وين تردين..؟؟

مالتفتت علية مستمرة تمسح بدموعها
_ أريد اروح لغرفتي

_ وهاي شنوو لعد..!!

_ هاي غرفتك وحدك .انت اخذ راحتك بيها واني بعد مااضايقك

رادت تزيح ايدي من ذراعها ماكدرت كد ماشاد عليها
باوعتلي عيونها تلالي دمع مبرطمة
_ اترك ايدي خلي اروح..

_ اني آسف...
وية اعتذاري نزلن دموعها مثل السيل بدون نفس

وغلاتج عندي صارت مشكلة واضطريت اتاخر.. راح عن بالي موعدنا

ابتسمت مقهورة
_ انت من انسجنت راحت من بالك امور هواي، اني راح اعفيك مني مو انت تكول خلينا طبيعين مثل المتزوجين وهاي اني راح انفذ كلامك

اني اصلا بلشت اتعود على تصرفاتك بقى عندي بس النوم عندي صعوبة بيه هم راح اعالجه واعلم نفسي انام بدونك.. بس خلي يكون بعلمك انت طلبت هالشي مو اني.. هسة تكدر تترك ايدي لان تعبانة ونعسانة اريد اروح انام

تركت ذراعها متجاوزها واني انزع بسترتي ناوي اقنعها
العندج حجيتيه واني اعتذرت يلة تعاي ننام وباجر اعوضج مكان موعد اليوم

مسحت دموعها تبجي
_ ماريد منك تعويض.. ااريد اروح لغرفتي انام بيها احسن

كعدت بشازلونج الجرباية انزع حذائي
متاكدة ماتردين التعويض حتى لو جان النوم بحظني

اندارت علية دموعها تلالي تثبت حقوقها ناسية الزعل مني
_ وشكد تخليني انام بحظنك..؟؟

نزعت ساعتي خليتها عالتسريحة اباوعلها من المراية
_ لحد ماكلبي يبلش معركته وراها اطلب العذر منج