من اليوم داك تاني العربية حقت الشاب م شفتها ونسيت موضوعها زاتوو ...مرة كنا قاعدين في المدرسة فسحة الفطور ...متلمين مجموعة وبنتونس ...جات بت بتقرا معانا اسمها منار...
-هي طبعاً م وريتكم يوم الجمعة الفاتت كانت خطوبتي ...
اي زول بقى يعاين للتاني ...منار دي اكتر وحدة بتحب الفشخرة والمظاهر ...استغربنا انها م كلمتنا بالتحديد موضوع زي دا كان فلقتنا بيه يومياً..وكان عزمت كل الفصل لخطوبتها خصوصي إنها من الطبقة البرجوازية ...ف بدت تساؤلات البنات ليها ...
-مالك م عزمتينا .
-لانو حصل فجأة والله ...لكن م تخافو الجمعة الجاية هأعمل ليكم حفلة تعويض عن حقت الخطوبة وكمان تشوفو حاجاتي الجابوها لي .
-ايوا لو كدا تمام ومبروك .
-خطيبك اسمو منو ومن وين؟ ..
-مقداد ولد عمي ..وزاتو هجمنا كلنا وكانت مفاجأة للجميع ..وطلع مكلم أبوي من زمان انو عايزني ..
-واي دا مقداد المز داك حظك والله .
-اصلاً احنا عائلتنا م فيها زول شين النصيحة .
-في النهاية يا منار هتتزوجي ولد عمك وكمان زواج تقليدي بتاع أُسر ؟!! ...على العموم مبارك ي حلوة ..
طبعاً دا كان تعليقي على موضوعها لانها من زمان بتقول لينا انا هأتزوج عن قصة حب وم من أهلي كمان وهسي هي بتتكلم وشايفة نفسها علينا... طوالي قالت لي ...
-والله يا حُور الشي دا قسمة وبعدين هو بحبني من انا صغيرة وانا م عندي مانع وهو زاتو قاليك هين .؟ ياخي دا دكتور في ماليزيا وبصرف بالدولار ..قاليك زي أولاد أعمامكم انتو ؟
-يا زولة ربنا يهنيك واطمنك زاتوو م عندي أعمام ..ولو كان عندي وشغال في الأمم المتحدة م بعرسو..دي شنو التقاليد القديمة دي ...
قلت كلامي دا وطلعت خليتها عايزة تطق من الزعل ...قلت كدا عشان حركاتها البتعملها لينا دي وعاملة فيها بت إمبراطور ياباني ...بنات الفصل عموماً بعملوا ضجة اذا وحدة إتخطبت ..لأننا كلنا أعمارنا صغيرة ...في منهم إتزوجو ومكملين معانا لسة وفي وحدات بعد العرس تاني م شفناهم في المدرسة ...فعلى العموم بنشوف الموضوع واو شديد ...
.....
لما رجعت البيت لقيت خالتي صفاء ونجود بتها بتكون قدري في العمر ..كانوا قاعدين مع أمي وبتونسوا ...سلمت عليهم ودخلت غيرت ملابسي وطلعت ليهم برا ...كانوا بحكوا في موضوع خلود ...ف طوالي دخلنا انا ونجود جوا وبنحكي عن الدراسة والمدرسة عموماً ...قعدو مسافة حتى طلعوا مننا ...
مشيت لأمي عشان تحكي لي لكن لقيتها م رايقة وأبوي زاتو جاء من الشغل ...
تاني أمي م جابت لي سيرة عن الحصل شنو ..
