حور الجناد

35

عمر بحبني انا ؟ ...توتر ..خجل..تسارع في ضربات القلب وكنت ملخبطة شديد ..إحساس أول مرة أشعر بيه ..لكن إحساس جميل ومميز والزاد تميزه انو الاعتراف كان من عمر بذات نفسه ..

من الحاجات البتميز عمر ..صفة الوضوح ...انو إنسان واضح شديد وم بحب التلميح ...لما أتأكد من مشاعره وانها حب ..جا وببساطة اعترف لي ...اعترف بطريقة خلت قلبي يدق بعشقه للمرة الألف ..

-بتحبني ؟

-ايوة بحبك ..ولو الكلمة م بتعبر عن الحاسي بيه ولكن بتمشي الحال ..

-معقول عمر بذات نفسه يحب حور العادية دي ؟

-ومين قال ليك انك عادية ؟!! ..لأ ي ماما انتي م عادية أبداً ولا في يوم هتكوني عادية بالنسبة لي ...ويا بخت عمر انو في حياته حور ..

-عارف يا عمر اني ولا يوم افتكرت انو ممكن اسمع منك كلام زي دا ..

-ليه كنت شرير وقاسي للدرجة دي؟

-مش كدا لكن كنت مبهورة بشخصيتك شديد وهأفضل مبهورة بيها ...لما جيت وخطبتني قلت هل انا هأتزوج الشخصية الرهيبة دي..فهمت ! تفكيري وقتها كان محدود شديد ..دا غير تقديس الزواج بالنسبة للمراهقات ...زوج وسيم ..سيارة فخمة ..شغله ممتاز ..حاجات الشيلة والتلفون الجديد ...هي شكليات ولكن كفيلة انها تخلي اي مراهقة توافق بالزواج بدون النظر لشخص العريس المتقدم ..وانها ممكن تندم لو طلع شخص سيء وعكس توقعاتها ...م بنكر اني في بداية زواجنا كنت ندمانة شديد وكرهت تفكيري الشكلي للزواج وقتها ..ولكن بعد اليوم ولو رجع بي الزمن لقبل الزواج وطلبت يدي من جديد هأوافق تاني اخوض معاك نفس التجربة ..لمجرد انك رفيق المشوار وليس عشان شي تاني ..

-ما شاء الله ..هي حور كبرت وبقى يطلع منها كلام واعي وزي العسل كدا !!

-(ضحكت)..عمر بطل ..

-بعدين دا شنو مراهقات دي ؟ انتي ناسية نفسك انك لسه منهم ولا شنو ..؟

-هنرجع لشخصية عمر المتغطرسة تاني ؟

-طيب سكتنا ... وحالياً انا شاكر جداً لعقليتك المراهقة زي م قلتي ..وانو بسببها وافقتي تتزوجيني ..عارفة اني بحترمك شديد ..؟

-انا ..؟

-ايوة ..لأنك إنسانة صبورة وواعية شديد رغم عمرك الصغير لكن نجحتي في انك تكوني بنت بارة وأخت حنونة وزوجة وفية وكمان أم حنونة ..كل صفة فيك كفيلة بإنها تخليني فخور بيك شديد ..وكل مرة أحسبك من النعم اللي ربنا أكرمني بيها ..بفضلك قدرت أصل لحاجات كتيرة ..كل يوم بتبهر بصفة مميزة فيك ...وانا متأكد إني لسة هأتبهر أكتر ..

-ياخي بحبك والله ..م ممكن كمية اللطافة دي كلها ..

-دا نعتمده اعتراف ولا من سياق الحديث بس طلعت معاك الكلمة دي !!

نزلت راسي بخجل ...بأصابعه رفع لي راسي ...

-طلعت فصاحة ساي ..من قبيل شابكاني كلام حلو ومبهورة بشخصيتك وبتاع ..هسي من كلمة وحدة منزلة راسك وعاملة فيها خجلانة !!...عايني خدودك إِحْمرت كيف ..(وإبتسم) ..