من الصباح وانا بفتش في الملفات و لكن برضو م لقيت شي ...بالعصر كدا كنت شايلة علي وبهز فيه لأنو كان ببكي بطريقة فظيعة وكمان حرارته مرتفعة ...خفت عليه شديد ووديتو لأمي عشان تشوفه مالو ..
-لا حولا جسمو نار بس ..
-مالو يعني ؟ ودا من شنو .!!
-ي إما جاييه إلتهاب أو دا من التسنين ..
-نوديه الدكتور ؟ لانو بكاهو دا م طبيعي ابداً ي أمي ..
-كدا إتمهلي شوية ..الشفع ديل طبيعي حرارتهم بترتفع ...كدا جيبي موية وقطعة نعمل ليه مكمدات ...
طلعت بسرعة جبت موية وقطعة ...جا لاحقني أكرم ..
-يا حور ...خالي وعمر قالوا ليك الولد دا مالو ببكي كدا ..
-م عارفة ..وهو عمر جا متين .؟
-هسي جا ..
-قول ليهم انو حرارتو مرتفعة وببكي شكلو عيان ..
أكرم جرا الديوان وانا دخلت لأمي الحاجات ...عملنا ليه المكمدات ولسه نفس الشي مستمر في البكا وحرارته م نزلت ..
-أمي شكلها م هتنزل ..
-أي قومي أجهزي ودوه مع خالك الدكتور ..
-عمر ذاتو قاعد مع خالي ..
-خلاص من ابوه قاعد أمشو بيه طوالي ...
شلت علي ومشيت وديتو لعمر في الديوان لأنو ناداني ...
شالو وهبش جسمه ..
-سلامتك يا أبوي مالك !!
-معقول عايز يسنن ؟
-هم بسننوا من هسي ؟
-م عارفة لكن أمي قالت كدا ..
-طيب بسرعة أمشي أجهزي ..الولد دا جسمه مسخن شديد ..
-تمام ...حاول سكتو المسافة دي ..
دخلت الغرفة جهزت بسرعة وطلعت ملابس ل علي ومشيت ليه ...عمر مسك الملابس وغير ليه حتى طلعنا ...طول الطريق بحاول اسكت فيه لكن م سكت ..كنت خايفة عليه شديد ومن دون م أشعر لقيت دموعي نازلة وببكي معاه ...
-إنتي هسي بتسكتيه ولا بتبكي معاه ؟
-ببكي كدا أكيد موجوع شديد ..
-م تخافي م فيه إلا العافية ..
-ان شاء الله ..
وصلنا المستشفى وفحصوه ...طلع عندو إلتهاب في الدم الأبيض ..أخدنا الفحوصات ورجعنا ..وقتها كان نايم ..ي حليلو بكى شديد لما نام ..
في اليوم دا عمر إلا بات معانا ..لانو علي مسهرنا معاه للساعة 12 حتى حرارته انخفضت شوية وقدر ينوم وخلانا إحنا ننوم ...
بالليل حوالي الساعة 2 ولا 3 كدا ...صحانا صوت طلقة مسدس قريبة شديد ...صحيت مخلوعة ... لما طلعت الصالة لقيت أمي برضو طلعت من غرفتها ...
