آخر يوم في الإجازة انا وعمتي والبنات قلنا نمشي لناس أمي ...عمتي كلمت عمر ووافق طوالي ...
شلنا معانا فطور وجهزنا ومشينا ليهم ...
بعد فطرنا جونا ناس رؤى وامها وكم جارة كدا بالجبنة ... قعدوا يظبطوا فيها والونسة والدنيا عامرة ...
أمي قعدت جنبي وبتتونس معاي ..
-اها كيفك ي بتي ..
-والله تمام ي أمي ..
-وكيف مع القراية .؟
-الحمد لله ..
-ان شاء الله قدرتي توازني بين قرايتك وشغل البيت وإهتمامك براجلك ..
-النصيحة ي ماما صعب الموازنة لكن بحاول ..
-اي حاولي ي بتي أوعك تهملي بيتك وراجلك تمام ؟
-ان شاء الله ...
-كمان قرايتك م تنسيها خصوصي انك ممتحنة ..وتالتة دي م فيها لعب ..
-لا لا بقرا والله ...لكن تالت ضغطة شديدة ..
-شدي حيلك وربنا يوفقك ويسدد خطاك ي ماما ..
-أمين يا رب ..
جابوا القهوة مع اني م بشربها لكن قلت ليهم فنجان واحد م بضر ...
الجارات كانوا وناسات واليوم دا كان كلو ضحك وآخر إنبساطة ..نسانا كل الهموم والضغوطات حقت الحياة ...بعد الغداء حتى رجعنا البيت..
عملت أكل لعمر بس ..وشلت كتاب الفيزياء ومشيت لشفق عشان أقرا معاها ...
-عارفة يا حور ...إحتمال بكرة يوزعوا لينا ورق الامتحانات ..
-وبعلي يا شفق م تذكريني ياااخ ..
-لا لا إن شاء الله خير ...بعدين مهما كانت النتيجة دا إمتحان شهري ساي ..ولقدام هيكون الشغل أحسن ..
-ان شاء الله ياخ ...المهم تعالي نقرا فيزياء لأنها ذاتها م هينة وخداعة ..
-(ضحكت)..اي والله هسي انا مشكلتي الفيزياء دي اصلي م بتفق معاها ..
-انا بحبها لكن هي م بتحبني..(ضحكت).
-خلاص خلينا نبداها من البداية ..
-ممكن ..
طلعنا برا الحديقة ...الجزئية اللي هي فاهماها بتقوم تشرحها لي ..والعكس ...
لما جات جزئيتي ..وقفت قدامها وختيت الكتاب جنبها ...
-م هأشرح ليك من الكتاب ..عشان أقيس مدى إستيعابي للنقطة دي ...المهم إتخيليني أستاذ أبو القاسم ...تمام ..
طبعاً أبو القاسم دا مدرس الفيزياء في مدرستنا ...هي كانت بتضحك وانا بحاكي ليها في الأستاذ ..
-اسكتي يا طالبة..م عايزة اي نقاشات جانبية ...
-م عايزة ؟ انتي أستاذ ولا أستاذة ؟
