روايــــــــة: قــــيـــــــامـــة تــــنــــهـــــــار🖤
الجزء الثاني:🔱فِــتــنَــــةُ صَــغِــيــرَتِــــي🔱
🔥بأناملي: رباب نجمة Rabab Najma🔥
الفصل الثاني: حــب ســرمـــدي🔥
الجزء 72:
في مكان أخر وبالضبط في جناح خاص في غرفة الإنعاش.... كان آرسلان مستلقي على السرير مغمض العينين كيتنفس عن طريق الأكسجين مالابس والو غير أنه مغطي بغطاء طبي ومجموعة من الخيوط الطبية ملصقة في يديه وقلبو.......
بشرتو نقية وصافية وشعرو الأسود الكثيف غير مرتب......ظاهر عليه التعب إثر العملية العصيبة لي مر منها....ماكانش ساهل عليه كل لي مر منو ليلة البارح.......
خارج الغرفة كانوا أفراد العائلة مجتمعين ومخلوعين على حالتو الصحية.... ماقدروش يتيقو بلي آرسلان كان بين الحياة والموت.... مارجعات فيهم الروح إلا بعد سمعاهم لخبر أن العملية نجحات........
كان أعين مدمعة ومتعبة كتراقبو من خلال النافذة الزجاجية.....كتحسر على حالتو الحرجة...عمرها توقعات غايوقع ليه هادشي لي طرا كانت بمثابة صدمة كبيرة ليها لي خلاتها تقطع مسافة طويلة باش توصل لهنا وتشوفو ولو لمرة وحدة......
قلبها كان موجوع على حالتو وكيتقطع......حبها ليه كبير أكبر من أنها تسمح فيه وهو فهاد الوضع..... الحب صعيب ومغايحس بصعوبتو غير لي مجربو..... كيف ماكان الحال هما باقيين مزوجين مدام باقية في العدة ديالها ومزالة ماسالات.... ومن واجبها توقف معاه في محنتو.... كيفما هو وقف معها وساندها وخا كانت كتضايق من أفعال تلك الصبية الطائشة ولكن كتعتارف بلي آرسلان من ديما كان حنين معها وكيتعامل معها بطريقة زوينة بزاف.... مزالة مامصدقة أنهم وصلوا لهاد الحالة........
تحطات على كتيفاتها العريانة يد براءة لي حالتها تاهي متعبة ونطقات بخفوت وشفايفها مزينة بإبتسامة خالية من المرح.....
براءة: حبيبة فتون سيري للدار رتاحي ليك شوية راكي غاتكوني عيانة من السفر ضربتي مسافة طويلة....... حنا غانبقاو هنا مقابلينو وخا......
حركات راسها بامتناع وتكلمات بإنهيار واضح.....
فتون: لالا مانقدرش نرتاح غير لما شفتو مرتاح....أصلا أنا جيت فطيارة خاصة دغيا وصلنا وكنت مرتاحة ماتشوشيش عليا دبا المهم نشوفوا فاتح عينيه الصقرية ويشوف فيا كيف كان كيدير شحال هادي ويكون بخير كيفما عودنا.....
عنقات براءة كتبكي في حضنها....
فتون: إلا وقعاتليه شي حاجة غادي نموت هئ هئ مغانقدرش نتحمل فراقو أختي براءة......
ربتات براءة على ظهر فتون ناطقة بمواساة....
براءة: غادي يكون بخير بلاما تخلعي على والو كوني هانيا......
في هاد الأثناء كان الطبيب وقف عليهم ناطق بجدية....
الطبيب: شكون الزوجة ديال المريض؟
نطقات فتون بسرعة مخلية كلشي مستغرب من إندفاعها وأمال كتغلي بالأعصاب وحودها كيقلقها في جميع الأحوال.....
فتون: أنا......
نطق الطبيب قبل مايمشي ويخليها تبعو...
الطبيب: ممكن تجي معيا للمكتب......
دخلوا للمكتب وجلسوا...جبد الطبيب الملف الخاص بحالة آرسلان ونطق بتشكيك....
الطبيب: واش المريض كان كياخد شي دواء ولا كان كيعاني من شي مرض نفسي ؟
حرمات فتون راسها بالنفي متعجبة من هاد السؤال...
فتون: لا هو مكيعاني من حتى مشكل ومكياخد حتى دواء...... علاش أدكتور شنو واقع......
حرك الطبيب راسو بتعجب وتنهد بعمق ناطق بحزم......
الطبيب: ماعندي مانخبي عليك أمدام التلمسي من خلال التحاليل ديال الدم لي درنا لسي آرسلان اتضح أنه كان كياخد جرعات لا يستهان بها من واحد الدواء خطير بزاف وقليل فين كتسمح الصيدلية بأنه تعطيه للناس.... حيت كيحتوي على واحد المادة مهلوسة كتخليه يفكر بطريقة غير عقلانية وينفر گاع الناس لي كيحيطوا بيه..... والمشكل أنه مان كياخد هاد الدواء بشكل مستمر وبدون إنقطاع شي لي أثر على هرمون
الكورتيزول وهو هرمون التوتر، والمسؤول كذلك على ردود أفعال الجسم في "القتال أو الهرب"..... كيخضع إفراز هاد الهرمون لثلاثة دالمناطق متصلة ببعضها في الجسم دالإنسان، وهي منطقة تحت المهاد في المخ، والغدة النخامية، والغدة فوق الكلوية. وهادشي مغايأثر غير على صحتو النفسية والوظيفة ديال المخ وإنما غايفقد السيطرة على نفسو ألالة.......
إستغربات فتون من كلام الطبيب وقلبها بدا كيزدح بخوف كبير....
فتون: ولكن هو علاش غاياخد هاد الدواء إلا كان غايتسبب ليه فهادشي كامل.....
نطق الطبيب بهدوء...
الطبيب: ماغانقدروا نديروا دبا والو من غير أننا نتسناو المريض يفيق من البنج ونستجوبوه...ولكن مغانخلعكش بزاف هو قدر يتجاوز مرحلة الخطر وهادي حاجة تحسب له......
حركات فتون راسها بالإيجاب أو وقفات مصافحة الطبيب....
فتون: شكرا ليك بزاف أدكتور على مجهوداتك.........
خرجات فتون من تما واضعة يديها على فمها كتكتم صدمتها....مرجعة خصلات شعرها الحريري لوراء وديناتها الحمرين...كتحاول تربط الأحداث لي وقعات مؤخرا مع كلام الطبيب ونطقات بارتجاف.....
فتون: ولكن شكون لي من مصلاحتو يفرق بيني وبين آرسلان معقول تكون عبير! لالا مستحيل تكون هي حيت غابت علينا شهر كامل دوزاتو في أمريمت والفترة الأخيرة حتى هي مكانتش معنا فالدار والطبيب كيقول أنه كان كياخد الدواء بشكل مستمر... إذن الشخص معنا في الڤيلا مغانمشي حتى نعرفو.........
#يــ__ــتــ__ــبــ__ع..بأنامل: رباب نجمة 🔥🖤
أنت تقرأ
فتنة صغيرتي
Romanceرواية قيامة تنهار، الجزء الثاني: فتنة صغيرتي بأناملي: رباب نجمة قارئاتي الغاليات لي عاشوا معايا كل لحظة من لحظات الجزء الأول من الرواي"حبك أضاء ظلامي"نبغي نشكركم وحدة وحدة على وفاؤكم للرواية وعلى مدى تفاعلكم معها حيت فعلا كان تفاعل كيفرح. أما بعد، أ...
