من يوم اتناقشنا في موضوع الشغل وطارق اخلاقو ٢٤ ساعه ضيقة من يجي البيت يشاكل ويكورك ويتنرفز.. اليوم دا طلال مفروض يرجع، كنت مبسوطه شديد وحاولت بقدر الامكان ما اخلي كلامو يخرب مزاجي كنت مكلمه ناس خالتو صفية اني حاعمل بليله واوزعها خنساء جاتني من الصباح فطرت معاي وبدينا بعد الفطور طوالي قالت لي سي السيد دا لسه ما شفا غليلو بالكواريك؟ قلت ليها لسه والله... طلال كان اتصل لي قال بجي العصر المهم بعد خلصنا ختيناها في جردلين طلس كبير شلنا انا وخنساء واحد والتاني شالوهو خالتو صفية وميساء.. شلنا برضو صحن وكمشة عشان نغرف بيهم، اغلب بيوت الحله ما كانو عارفين افتكروها صدقه لي امي ف لمن يسألو كنت بوريهم، وزعنا في حلتنا والحله الورانا وخلصنا مع اذان العصر اول ما رجعنا ميساء قالت واااي انا رجليني بنتحو عديل يلا راجعه انوم.. قعدنا نضحك خالتو صفيه قالت ليها غايتو عليك دلع .. قلت ليها تمشي وين اقعدي اتغدي.. قالت لي ما جعانه اكلت بعد رجعت من المدرسه.. خالتو صفيه قالت بري ما دايرين غدا نحن خنساء قومي سوي لينا شاي ظابط نشربو مع بليلة ميسم الظابطه دي.. قلت ليها خلاص خليك انا بسويه انتو تعبتو الليله.. قامت وقالت لي وانتي كنتي حايمه بعربية ولا شنو.. بعد خشت تلفونها ضرب شلتو وديتو ليها ابتسمت وصمتتو ودخلتو في جيب البجامه اللابساها بقيت بعاين ليها وهي بتتسم زي دا قلت ليها هي يا الاخت مالك؟ قالت لي انا؟؟ مالي.. همست ليها بي صوت واطي: الليله ما حتمشي من هنا كان ما وريتيني سر الابتسامات البتوزعي فيها دي شنو.. اشرت لي باصبعها عشان اسكت وهي بتعاين للباب قلت ليها سمح سكت... بعد خنساء جات قلت ليهم نادو اسراء تجي تشرب معانا.. خنساء قالت لي وقت الشغل ابت تجي ما بنناديها ولا شي.. ميساء قالت اصلا ما حتجي حتى كان ناديناها.. مشيت كوركت ليها بالحيطه قالت لي والله ما بقدر اجي عملت لي في كيكه ودخلتها الفرن.. رفعت ليها صينيه فيها كباية شاي وصحن بليلة قالت لي ما كان تعذبي روحك ياخ قلت ليها العفو ماف عذاب ولا شي.. قعدنا نشرب الشاي ونتونس وكل دقيقتين بتاوق اعاين للباب اول ما سمعتو بضرب جدعت المعلقه ومشيت جري عديل عشان افتحو مع كل خطوه كنت بحس ضربات قلبي بتذيد كأنها سنين ما شهر واحد، مشتاقه ليهو شديد وعايزه اضمو لي بكرا وما افكو .. اول ما فتحت الباب وشفتو دموعي اتجمعت في عيوني دخل وسلم علي بالحضن قال لي ميسم اختي.. طلعت مني تنهيدة طويله متقطعه ضميتو وبكييييييت بكا الشهر الفات الكنت كاتماهو كلو كان بطبطب على كتفي بدون ما يتكلم بعد مساافه فكيتو وبستو في راسو قلت ليهو بصوت متقطع من البكا: طلال اخوي وحبيبي الف الف مبروك ربنا يجعلو ربيع قلبك ونور صدرك ويرفعك بيهو اعلى الدرجات.. قال لي اللهم امين، امين يارب .. اتقدم بعكازو على خالتو صفية وبناتها الكانو واقفين ورانا خالتي حضنتو وبكت هي زاتا وبقت تبوس فيهو وتبارك ليهو.. خنساء وميساء برضو سلمو عليهو وباركو حتى دخلنا قلت ليهو اتغديت؟ قال لي ايوه الحمدلله.. جبت ليهو الشاي والبليلة لقيت خالتو صفية بتسألو من المركز.. خنساء جابت التربيزة قدامو ختيت الصينيه وقعدت جمبو قال ليها احلى ايام حياتي كانت الشهر دا بعيد عن ملهيات الدنيا وجوطتها حياة كلها روحانيات وحتى الونسه ما بتخلو من ذكر الله.. خالتو صفيه قالت ليهو يا سلااام يا سلام.. بقو بتكلمو وانا بعاين ليهو وحاسه قلبي طاير من الفرح ما مصدقه طلال حفظ القران في عمر زي دا.. عُمر اغلب الشباب فيهو همهم يقعدوا في مساطب الشارع وجمب الدكاكين ويشاغلو الماشه والجايه، عمر بتعمدوا يتهربوا فيهو من قعاد البيت عشان يشربو سيجارة ولا يسفوا ورا اهاليهم.. عمر بلبسو فيهو المجبص ويتعلموا الالفاظ عشان يثبتو انهم شفاته وماف زول بقدر عليهم... حقيقي انا فخورة بيهو شديد لأنو ما بفكر في افكار زي دي ولا محتاج زول يوريهو انو الحاجات دي غلط والصح شنو طلال اخوي عقلو اكبر من عمرو بمراحل ولو جينا للجد حتى انا مرات بحس انو اكبر مني بتفكيرو وتصرفاتو... قطع سرحتي صوت خالتو صفية وهي بتقول يلا نحن نمشي عشان عمكم بجي بعد دا.. قبل يطلعو ميساء شالت معاي سراير الحوش..
