قمت اذان الصبح صليت ومشيت المطبخ ركبت الشاي وفتحت التلاجه طلعت حلل الملاح العملتهم امس بتاعت الاسبوع كلو سخنتهم ولحدي ما نظفت وشربت الشاي كانو بردو لمن الواطه فتحت كوركت لي خالتي صفية ورفعتهم ليها تختهم لي في الفريزر حقتهم.. طلال قبل يطلع قال لي خلي بالك وانتبهي على نفسك ربنا يوفقك يا اختي ويحفظك.. قلت ليهو امين ويحفظك يا اخوي الغالي... بعد انتهيت مشيت استحميت ولبست عبايه رماديه بابيض وطرحه بيضاء.. بحب الابيض شديد ولبساتي كلها لازم يكون فيها اللون دا.. لبست شبط اسود وشلت شنطة يد سوداء دخلت فيها التلفون وقروش المواصلات وكيس فيهو الفطارة الخاته فيها سلطة اسود وعيشتين للفطور.. بعد انتهيت مشيت لي طارق كان قاعد في العريشة وبحضر في التلفزيون الصغير الجابو ليهو ابوي امس عشان يتلسى بيهو قلت ليهو انا طالعه عايز حاجه؟.. ما رد ولا كأني واقفه بتكلم معاهو.. مشيت على ناس خنساء ووريتهم اني طالعه حتى مشيت الزلط ركبت ووريت الكمساري المكان المفروض انزل فيهو.. سرحت بالشباك في الشارع الناس كلها طالعه مع الصباحيه تفتش رزقها ربنا يفتحها على اي زول بتعب ويشقى عشان يأكل اطفالو لقمة حلال💙..اتذكرت والي قال لي لمن تطلعي كلميني فاتصلت لي ووريتو اني نص ساعه وحـاصل .. اول ما نزلت لقيت المكتب قصادي كان في النص يمينو في وكالة تانيه وشمالو بقالة كبيره، ركبت الخمسه عتبات حقات السلم وياداب قدرت اشوف الراجلين القاعدين في كرسين جمب الباب كان واحد منهم لاقيتو في الوكاله المره الفاتت اسمو غسان لو ذاكرتي ما خذلتني.. كان رافع رجلو الشمال فوق اليمين ومثبتها الشمال بي يدو اليمين ويدو التانيه ماسك بيها كباية قهوة بحكي للمعاهو حاجه ومندمج لدرجة لمن سلمت ما انتبه لي الراجل التاني رد السلام.. دخلت طوالي والمكتب كان نظامو نفس الفي العمارات، كان فاضي الا من بت قاعده في واحد من التربيزتين شكلها حتكون زميلتي فرحت وحمدت ربي انها بت كنت شايله هم لو طلع ولد حاتعامل معاهو كيف .. اول ما دخلت قالت لي اتفضلي بقدر اساعدك بشنو؟؟.. قلت ليها انا ميسم المفروض اشتغل معاك.. قالت لي اهاا ميسم اقعدي طيب انا حـانادي غسان من برا
لمن قامت ياداب انتبهت للبسها كانت لابسه اسكيرت اسود ضيق وبلوزه مورده بالوان كتيرة وطرحه باللون الفوشي .. قعدت في الكراسي المرصوصه بتاعت الانتظار بعد اقل من دقيقه جو خاشين سوا وكانو بضحكو البت قالت ليهو غايتو انت يا غسان .. مدا يدو وقال لي السلام عليكم ميسم.. قلت ليهو وانابصافحو : وعليكم السلام.. قال لي اتفضلي معاي في المكتب... طلع علاقة فيها مفاتيح كتيره شديد وبواحد فيهم فتح باب المكتب الجوا .. دخلت واستغربت جد المره دي، كأنو نقلو المكتب داك بنفس تفاصيلو هنا قعدنا وشبك يدينو ختاهم في التربيزة الكبيره القدامو قال لي طيب يا استاذه ميسم المفترض انك تنزلي كورس طوالي من اليوم لكن لقينا حل تاني أمثل، انتي طبعاً حتمسكي شغل التذاكر وتسويق العقود والي الدين وراك مش كدا؟؟.. قلت ليهو ايوه وراني.. قال لي ظريف أساساً التسويق انتي ممتازة فيهو - حسب ما شفت في عقد مندوب شركة stc- صراحه دي اول مره عقد مننا يتباع لاكتر من ١٠ انفار في فترة شهرين ودا الخلاني اوافق اشغلك معانا اول ما والي كلمني بيك.. المهم، كدا حيفضل شغل التذاكر ودا اماني بتعرف ليهو كويس، كانت ماسكاه في الوكالة الكانت شغاله فيها قبل تتوظف عندنا ف انا اقترحت عليها انها تدربك عليهو لحدي ما تتقنيه كويس.. اها انتي رايك شنو؟.... قلت ليهو ما عندي مشكله، قال لي تمام ابدو طوالي لانو حنعلن افتتاح الوكالة الاسبوع الجاي واول ايام الشغل حتكون ضاغطه شديد.. قلت ليهو طيب تمام..
