وقعت في الارض وانا ببكي وحاسه صوتي حيروح: ورحمة امي ما عملت شي واقسم بالله العظيم ما عملت حاجه..
طارق دخل المطبخ وجا طالع وهو شايل سكينه ورافعها فوق: الليله بقتلكم الاتنين بقتلك انتي وود الحر*ام الفي بطنك يا مطلوقه... خالتي صفيه وقفت قدامو وفتحت يدينها قالت ليهو اوعى اوعى تقرب منها، عثمان قوم امسك ولدك دا قبل يعمل للبت دي حاجه... طارق لزاها لمن وقعت في السرير.. فجأة لقيت طلال واقع قدامي قعد على ركبو وضماني وهو بقول: لو داير تقتلها اقتلنا الاتنين.... بقى بقرا بصوت واطي ايات من سورة ياسين كنت سامعاهو انا بس وحاسه بجسمو البرجف وهو ماسكني.. طارق مسكو ولزاهو وقع على ظهرو في الارض صرخت وانا بنادي باسمو: طلال طلال انت كويس؟..... زحفت وانا ماشه عليهو.. ابوي فجأة كورك: طاارق ..... كلنا سكتنا وقبلنا عليهو.. ساعدت طلال عشان يقيف وبقيت واقفه جمبو وماسكاهو.. خالتي صفيه جات حاوطتنا بي يدها بقينا واقفين كلنا وبنعاين لي ابوي .. قام من الكرسي وقال اطلعو كلكم من هنا.. طارق قال ليهو ابوي خليها لي انا بأدبها.. ابوي قال ليهو بي حدة: قلت ليكم اطلعو.. خالتي صفيه قالت ليهو حنطلع لكن براحه عليها يا عثمان.. ساقت طلال وطلعو وطارق كان لسه واقف ابوي لمن عاين ليهو جدع السكينه وحمر لي بعد داك طلع... عاينت ليهو والدموع ماليه وشي قلت ليهو ابوي احلف ليك بشنو؟ والله العظيم انا ما عارفه دا حصل كيف، ابوي انت ما عارفني؟ ما عارف بتك، انا ممكن اعمل حاجه زي دي؟.. قال لي انا غلطت في شنو عشان توطي راسي كدا، من امك اتوفت انا كنت شايل الهم لأنك كنتي صغيره وفي عمر حساس كنت خايف يجي يوم زي دا وحاولت بكل الطرق احافظ عليك لحدي ما تعرسي وتمشي بيتك، ما كنت بخلي زول غريب يخش بيتنا ولا بخليك تطلعي حته براك حتى جوا الحله منعتك تمشي بيت غير بيت عمك، لمن نزلتي الشغل كنت خايف لكن قلت بتك يا عثمان بقت كبيرة ومسؤولة وعاقلة بعد العمر دا ما بتغلط وتجيب ليك السمعه لكن ثقتي طلعت ما في محلها.. قلت ليهو ابوي ان.... قاطعني وقال لي هسي بدون نقاش كتير دايرك توريني غلطتي مع منو.. قلت ليهو والله ما غلطت يا ابوي اثبت ليك كيف بس انت قول لي.. قال لي والطفل دا جا من وين.. قلت ليهو بحيل مهدود: ما عارفه ياخ واقسم بالله ما عارفه، دقيقه يمكن الود داك عمل فيني شي.. قال لي منو؟.. قلت ليهو محجوب مافي زول غيرو اي دا هو... قال لي بي نهرة: دا كلام شنو محجوب ما بعمل حاجه زي دي وحتى لو عمل انتي ما حسيتي بي شي ولا كان مغمى عليك؟.. قلت ليهو يعني انت بتثق في مححوب وما بتثق في بتك يا ابوي؟ الولد دا اخبث انسان على وجه الارض ليه ما قادرين تشوفو وشو الحقيقي... اداني كف ورفع سبابتو قال لي اوعك تتهمي ود الناس بالباطل، انتي الغلطتي الغلطه دي وشكلك ما حتقولي مع منو لكن انا حاعرف بي طريقتي... طلع وانا قعدت بتهالك على السرير ما فاهمه دا شنو الحاصل لي دا ولا لاقيه ليهو تفسير غطيت وشي بي يديني وبقيت ببكي بدون صوت.. سمعت صوت خالتي صفيه بتقول لي ميسم... جات قعدت جمبي وبقت تمسح على كتفي وتهديني قالت لي روقي يا بتي روقي كلو بتحل ان شاء الله.. قلت ليها شنو البتحل يا خالتي صفيه وريني ليه انا بحصل لي كدا اشمعنى انا يعني، كل ما تحصل لي مشكلة اقول اصبري يا ميسم اصبري حيجي يوم وربنا يعوضك صبر السنين الفاتت كلها لكن شكلو لحدي ما اموت ما حيجي اليوم دا.. بقيت بضرب رجليني وابكي بحرقة: يارب تعجل بي امري و اموت الليله قبل بكرة يااارب انا ما قادره خلاص الفيني كملت يا رب موتني وريحني من العيشه دي..... خالتي صفيه بقت تبكي معاي وتمسح على ظهري قالت لي يا بتي ما تقولي لي كدا العني الشيطان واستغفري دي كلها ابتلاءات من ربنا عشان يمتحنا، ربنا بريدك يا ميسم عشان كدا ببتليك كتير ما تضيعي الاجر بالسخط يا بتي استغفري والعني الشيطان استغفري يا بتي.... طلال جا قعد جمبي بدون ما يقول حاجه عاينت ليهو وشفت نظره انكسار في وشو قلت ليهو انت برضو ما مصدقني؟ .. قال لي نتكلم بعد تهدي.... خالتي صفيه قعدت معاي لحدي العصر بعد داك ساقتني معاها بيتهم.... ما عارفه قعدت معاهم كم يوم كنت بفضل اليوم كلو راقده ما بقوم الا وقت الصلاه والحمام.. حتى الاكل والادويه خنساء وخالتي صفيه كانو بدوني ليها بالعافيه عايشه حياة جسد بدون روح كنت بتمنى يجي يوم واعرف المعجزة الحصلت لي دي شنو كل يوم بنوم على امل اصحى والقى نفسي كنت في كابوس للحظه دي ما مستوعبه ولا قادره افهم دا شنو الانا فيهو دا.. خنساء كل يوم بتقعد تتونس معاي وتحكي لي بدون ما تلقى مني استجابه، ما سألتني عن الحصل ولا جابت لي سيرتو.... طلال كان بجيني كل يوم يسأل ناس خالتي صفيه من حالتي ولمن يجي يتكلم معاي ما كنت برد ليهو بس دموعي بتجي جاريه ما قادرة اصدق انو حتى طلال اخوي واقرب زول لي في الدنيا دي ما مصدقني.. لكن سكاتي دا ما كان زعل منو لأني لو كنت مكانو وشفت الحصل دا مع اختي ما كنت صدقتها.... يوم وانا راقده خنساء جابت لي التلفون قالت لي هاك دايرنك، بالي طوالي مشا لي غسان قمت بلهفة وشلتو منها، بعد ادتني ليهو طلعت طوالي.. قلت غسان؟... قال لي غسان منو كمان... سمعت صوت اكتر زول بكرهو في حياتي قال لي قولي لينا مبروك.. قلت ليهو داير شنو.. قال لي داير ابارك لينا مقدما، ماشي اخطبك من ابوك الليله... قلت ليهو ما تعذب نفسك ما حيوافقو... كنت عايزه اقفل لكن سمعتو بقول: عشان حامل؟.... قلبي بقى بضرب سريع رجعت ختيت التلفون في اضاني، قال لي: انا عارف طارق كلمني وهو الطلب مني اجي اتقدم... دموعي جات جاريه قلت ليهو وانا ببكي: انتو الاتنين كلاب ووسخين انا ما دايراك ما دايراك انت ليه ما داير تفهم بقتل روحي وما بعرسك ياخ انت ليه ما داير تفهم.... سمعت صوت الخط بقفل ختيت التلفون وقعدت ابكي خنساء جات جاريه قالت لي ميسم مالك؟ دا منو الاتصل دا قال ليك شنو... قلت ليها خنساء انا انتهيت انا حياتي خلاص اتدمرت💔💔..
