تاني يوم سمعت صوت طارق بي برا بكورك وخنساء بتقول ليهو انا جيت وجبتها معاي عشان ما اكلت ولا اخدت ادويتها.. جاني خاشي معصب قال لي قومي قدامي.... مشت معاي خنساء نظفت وبعد ناس ابوي طلعو جات قالت لي ميسم انتي كنتي وين امس نص الليل؟.. قلت ليها وانا سرحانه في نقطه معينه: مشيت شفتو.. قالت لي منو غسان؟؟ الساعه ١ يا ميسم.. قلت ليها حيعقدوا لينا بعد بكرا يا خنساء.. قالت لي باسى: ابوي كلمنا امس.. مطيت شفايفي ورفعت كتفي قلت ليها حتى غسان خلاني مع اني وريتو اني حاكون لي غيرو برضو اتخلى عني.. شهقت وقالت لي انتي كلمتيه؟.. قلت ليها ايوه.. قالت لي وهو عارف دا ولدو وخلاك ومشى..... ما اتصدمت من كلامها، قلت ليها ببرود: دا ما ولد غسان.. نطتت عيونها وقالت لي شنو؟ ك كيف يعني ما ولد غسان طيب ولد منو.. قلت ليها لو عارفه كنت حاسكت وحاكون بالحاله دي؟... جات قعدت جمبي وقالت لي ميسم انتي بتدسي مني انا؟؟ انا خنساء صحبتك واختك واقرب زول ليك، انتي فاكرة اني ممكن اكلم زول يعني؟؟.. قلت ليها لو ما عايزه تصدقي على كيفك لكن الولد الفي بطني دا ما ولد غسان انا غسان شفتو اخر مره قبل نسافر، وانا هسي حامل في الاول ياداب... قالت لي ميسم انا ما فتحت معاك الموضوع دا لأني افتكرتك.. يعني انتي وغسان.. افتكرت انو ولد غسان وانتي بتقولي ما عارفه عشان خايفه لكن كيف ما عارفه ولد منو؟... انتهدت بضيق ما عايزه ابدا تاني في محاولاتي المستميته في إقناعهم.. قالت لي طيب ما حاضغط عليك......طلال بعد جا حتى خنساء رجعت بيتهم، خت الاكل وجا قعد جمبي قال لي قومي اكلي معاي.. قلت ليهو اكلت قبيل مع خنساء... قعد ياكل ويحكي عن المدرسه وامتحانات الفتره الاولى القربت.. بعد دخل الصينيه جا قال لي قومي معاي.. قلت ليهو وين.. قال لي قومي بس... قمت ومشيت وراهو لحدي ما وصلنا للماسورة الفي الحوش اتوضى وقال لي اتوضي.. اتوضيت وهو كان دخل لمن دخلت العريشة لقيتو فرش مصلايتين قريبين لبعض وختا كرسيهو جمب مصلايتو قال لي تعالي نصلي ركعتين، دقيقه جاي ما تسبقيني... دخل الغرفه وجا وهو شايل مصحفين ختاهم في التربيزة وقال لي ما تخلصي الركعتين ديل كان ما قلتي لي ربنا كل الفي قلبك... صليت وفي كل سجده كنت بنزل كل الوجع الفي قلبي وانا بحكي الحصل لي وبدعي ربنا يكشف ليهم الحقيقه دي قريب ويكشفها لي اول
" يارب انت الوحيد القادر تحس بالوجع الجواي يارب تجبر كسري وتريح قلبي يارب تكشف الحقيقه قريب لأني خلاص تعبت.. يارب زول واحد وااااحد بس يقيف جمبي ويطمني زول واحد يقول لي انا مصدقك وحاعرف ليك الطفل دا من منو، يارب ليه الحوليني كلهم ما قادرين يفهموني، طلعو كلهم ما بعرفوني كلهم ما بثقو فيني لا طلال لا خنساء لا خالتي صفيه ولا حتى غسان💔.. غسان الوثقت فيهو وافتكرتو بحبني خذلني.. انا ما لي غيرك يا ربي قويني"
بعد سلمت لقيت طلال رافع يدينو وبدعي بعد خلص شال مصحفو واداني التاني قال لي اقري سورة البقره فعلاً بديت اقراها ومع كل ايه كنت بحس قلبي ارتاح شويه، ما قمت لحدي ما خلصتها قفلت المصحف واتنهدت تنهيدة طويله قبلت على طلال لقيتو لسه بقرا.... العصر كان بأذن في مصلايتي دي زاتا صليت العصر وقمت، طلال قام وراي وقال لي ميسم انتي قبل تكوني اختي كنتي امي صدقيني انا بريدك وما اظن في زول بريدك اكتر مني، انا من وقت حصل الحصل دا ما عارف اعمل شنو واتصرف كيف لكن داير اقول ليك حاجه واحده كل ما تحسي نفسك ضعفتي اول شي الجأي لي ربنا ماف غيرو حيحفف عليك ويقويك.. اشر على المصلايه وقال لي دا المكان الوحيد الحتحسي نفسك فيهو انك قويه وعندك سند وحيطه تتكلي عليها.. عارفه انا هسي الساندني شنو؟ العكاز دا؟ ابدا ربنا هو الساندني.. بعد دخلت المركز وعلاقتي بربنا بقت قويه اتغيرت فيني حاجات كتيره اهمها اني بقيت ما بضعف او احس بالعجز لمن زول يعايرني بالابتلاني بيهو ربنا... وانتي حيحصل ليك نفس الشي لمن تلجأي ليهو وترمي همك كلو ليهو وانتي متأكدة انو ما حيخذلك.. ختا يدو فوق يديني الكنت شابكاهم وخاتاهم فوق رجولي وقال لي وانا دائماً معاك يا اختي تعالي اشكي لي انا برضو حتى لو ما قدرت اهون عليك حاسمعك... لاول مره من فتره احس اني مرتاحه كدا ووقتها اقتنعت انو احساس الاطمئنان دا نعمة مفروض الواحد يحمد ربنا عليها صباح ومساء.. مسحت دموعي وابتسمت وهزيت راسي... قال لي اشتقت للوش المبتسم دا والله ماف شي في الدنيا دي بستاهل تزعلي للدرجه دي عشانو..
العصر خالتي صفيه جات وهي شايله كيس طلح قالت لي جايه من الزريبة وغشيتك قبل اخش بيتنا، ارحكي معاي البيت.. قلت ليها لشنو.. قالت لي يا بتي انتي عقدك الجمعه الجايه وابوك حيعمل المناسبه في الاسبوعين ديل دايرة الناس تشوفك بحالتك دي وتشك؟.. قلت ليها انا ما حاعمل اي شي.. اتنهدت وقالت لي انتي قايلاني فرحانه وبعمل كدا؟ طارق وابوك هم القالو لي اجهزك لو جو لقوني ما سويت شي حيشاكلوني انا .. قلت ليها انا بتحمل المسؤوليه.. قالت لي ميسم الله يرضى عليك ما تخليني اتكلم كتير انا والله تعبت من تصرفاتك دي.. العبرة خنقتني لمن قالت كدا لكن كان معاها حق لمتين حتستحملني؟ قمت لبست التوب وطلعت معاها
______ ________
