لم تتكلم أم ماجد طوال الطريق وظلت صامتة وحاول زين ان يعرف ماذا حدث ولكنها رفضت الكلام فى التاكسى وقالت: لما نرجع البيت هاتعرف كل حاجة,
كان وجهها مكفهرا وعيونها مليئة بالدموع ونظر لها زين بتساؤل ولكنها كانت عازمة على ان لاتخبره إلا فى البيت , طبعا لم يكن ماعرفت سيمر هكذا وفور دخولها البيت قال زوجها: مش هاتقولى لى فيه إيه؟
مصيبة, فيه مصيبة ياحاج زين..
ياساتر يارب مصيبة إيه؟ قلقتينى...
مش عارفة أقول لك إيه؟ إبنك عمل عملة سوداء
عمل إيه ماجد؟
دلوقتى تعرف .
فتحت باب حجرة ماجد ونظرت له وقالت: ماجد إنت فعلا كنت مع واحدة فى الشقة...
شحوب وجه ماجد وإرتباكه اكد ماقالت بدر فصاحت أمه : يالهوى.. إنت ياماجد؟ إنت تعمل كده؟ ليه يابنى ؟
سأل والده: انا مش فاهم حاجة ياسمية .
عارف بدر طلبت الطلاق ليه؟ لأنها ظبطت إبنك فى شقتها مع واحدة...
إيه الكلام ده ياسمية؟
إبنك قدامك اهو إسأله .. أنا رحت أعاتبها علشان شفت الواد مقهور طلع هو اللى غلطان مش هى, إبنك فضحنا ياحاج.
نظر زين لماجد بتساؤل وقال: ماجد !!
هى قربت منى وأنا ضعفت.. مكنتش عارف أنا بأعمل إيه و....
تلقى ماجد صفعة قوية على وجهه من والده ترقرقت الدموع فى عيون ماجد وقال: بتضربنى يابابا؟؟
عايزنى اعمل إيه بعد الجريمة اللى عملتها, إنت !! إنت تعمل كده؟؟ ليه؟ ده كان فاضل يوم وتتجوز وتعيش بالحلال...تزنى ياماجد؟؟ تزنى؟ ياخسارة تربيتى....
سمية : مين البت اللى كانت معاك؟
لم يتكلم ماجد , كان مصدوما من صفعة والده له وهو فى هذا السن وكررت سمية سؤالها
أحنى رأسه فأمسكته من ذراعه : إنطق مين البت اللى كانت معاك؟؟ إتلميت عليها منين؟
أصر ماجد على الصمت لايمكن ان يخبرهم بأنه كان على علاقة بإبنة خال عروسه ,
زين: إتكلم جبت البت منين؟
سمية : منين يعنى؟ جاب بت ساقطة من اى حتة ومن بجاحتك تآخدها الشقة الجديدة !! توسخ البيت بعملتك ؟ .إخص عليك. إخص..
لم يتحمل نظراتهم فخرج بسرعة من البيت وصفق الباب وتبادلت سمية النظرات مع زوجها وسالت دموعها وقالت: لاحول ولاقوة إلا بالله .. ليه كده يابنى؟
بعد أن كان الفرح يملأ بيت عبد العظيم خيم الحزن عليه وحبس كل واحد نفسه فى حجرته, بدر تبكى على سعادتها التى إنتهت وماتت بطريقة بشعة ولاتستطيع ان تنسى مارأت وعبد العظيم يعانى من القهر لإلغاء زفاف إبنته ومحمد يأكل نفسه من الغضب بعد خيانة من كان حبها يملأ قلبه,ومنيرة تشعر بالقهر على إبنتها وتحطيم آمالها وفى نفس الوقت تشعر بالأسى على إبنه اخيها وأخيها , خيم الحزن على الجميع.
أنت تقرأ
حكاية بدر
Romanceأصعب شئ أن تتعرض للخيانة من الشخص الذى تحبه ومن المقربين وقتها تفقد التوازن وتفقد أيضا الثقة بكل الناس والأكثر تفقد الثقة فى الحب فهل يمكن ان تستعيد بدر حياتها بعد تعرضها للخيانة .
