زينب بقلم / لولو_محمد ( كامله)

الحلقه الاولى

(((((( زينب )))))
#لولو_محمد
الحلقه الاولى
فى شقه فى منطقه متوسطه
(يحيي ) شاب عشريني واقف فى الصاله و فى عمال واقفين بيسدوا باب اوضه الضيوف والده ( محمود ) يطلع من المطبخ شايل صينيه شاى
محمود / الشاى يا اسطوات
العمال يروحوا يشربوا الشاى يحيي يدخل اوضته محمود يدخل وراه
محمود / ايه هتنزل الشغل بدرى كدا
يحيي يبص لابوه و يبتسم
محمود / زعلان منى ؟!
يحيي / دا حقك ... بيتك و فلوسك و حقك و كتر خيرك انك هتسبني اكمل عيش معاك 
محمود / يا ابنى انا كبرت و انت طول الوقت فى شغلك او دراستك او مع صحابك و انا لوحدى طول الوقت لوحدى من حقى فى شويه ونس مش طالب لا مال و لا جمال و لا فارق معايا حاجه
يحيي / و انا تهمني سعادتك و انا كدا كدا مش فارق معايا كتر الف خيرك انك سبتلى الاوضه اللى على الشارع بحمامها و هتقفلهالى عشان ما اقدرش ادخل هنا تانى غير باذن
محمود / يا حبيبي دا بيتك و تقدر تدخل و تخرج فى اى وقت و ما حدش هيقدر يمنعك عنه بس
يحيي / بس فى بنت صغيره هتيجي تعيش مكانى فى اوضتى و تنام على سريري و تاخد راحتها فى بيتي فلازم انا لانى الراجل اسيب لها كل حاجه انا فاهم كل ده و صدقنى مش فارق معايا المهم ان حضرتك تكون مبسوط و مرتاح و سعيد
محمود / لما تقابلها هتحبها
يحيي / و انا احبها ليه ما كفايا ان حضرتك بتحبها انا هستاذنك اغير عشان انزل و باذن الله لما ارجع هلم حاجتى كلها عشان اول ما اوضتى تتفرش ننقلها على طول
محمود / طب مش هتيجي معايا تتعرف عليهم
يحيي / للاسف مش فاضي بس ما تقلقش حضرتك الجايات اكتر دا الباب هيبقي فى الباب
محمود / يحيي
يحيي / يا بابا و الله عندى شغل مش فاضي للكلام ده هاخد اذن بحجه ايه رايح اتعرف على عروسه ابويا ؟!
محمود يتنهد و يهز راسه و يطلع بره محمود يفتح الدولاب و يطلع غيار و يقعد على السرير يتنهد
.....................
فى شقه فى منطقه شعبى
( زينب ) بنت فى تالته ثانوى قاعده محرجه فى شقه فيها عيال بتلعب قدام التليفزيون ( ساميه ) ست ثلاثينيه تدخل تحط صينيه عليها عصير العيال تقوم تهجم عليه
ساميه / عيب يا واد انت و هى ايه اول مره تشوفوا عصير دا بتاع الضيوف
زينب / لا لا مفيش مشكله خليهم يشربوه الف هنا
ساميه / كلمتى ابوكى قولتيله انك هنا
زينب / ايوه قالى فى الطريق
ساميه / يوصل بالسلامه ... بس ما تاخذنيش يعني هو مش لسه بدرى على اول الشهر ؟!
زينب / لا انا كنت عوزاه فى حاجه تانيه
ساميه / و الحاجه التانيه دى ما كانتش تنفع فى التليفون
زينب تبص لساميه بحرج
ساميه / ما تاخذينيش انا ما اقصدش البيت بيتك انا بتكلم يعني عن انك تضربى المشوار دا كله لوحدك رايح جاى
زينب تبتسم
ساميه / الفيلم ده حلو اتفرجى عليه و انا هقوم اخلص اللى ورايا انتى مش غريبه دا بيتك و دول اخواتك
زينب / تسلمى
ساميه تشيل الكبايه و الصينيه و تدخل جوه و زينب قاعده كاشه فى نفسها الولد يروح يقعد جنبها تبتسم له
الولد / ما تجيبي اتنين جنيه انزل اجيب حاجه حلوه
زينب / ماشي
زينب تطلع محفظتها مفيش جنيهات الولد يخطف خمسه جنيه و يطلع يجرى يفتح باب الشقه و يرزعه وراه ساميه تطلع تلاقي زينب لسه قاعده و ابنها مش موجود
ساميه / اخوكى راح فين يا بت
البنت / ما اعرفش اسألي زينب
زينب / نزل يشترى حاجه حلوه
ساميه / حاجه حلوه ايه دا دكتور السنان مانعه من الحلويات جاب فلوس منين
البنت / زينب ادتله
زينب / و الله ما كنت اعرف هو قالى هاتى اديتله
ساميه / صحيح و انتى يفرق معاكى فى ايه هو انتى تعرفى عننا حاجه على العموم انا كلامى مش معاكى
ساميه تدخل و زينب قاعده محرجه تطلع الموبايل و تتصل ب "بابا" يكنسل
..........
فى شقه يحيي
يحيي يفتح الباب و يدخل يلاقي محمود مستنيه
يحيي / هو حضرتك لسه صاحي لحد دلوقت !!
محمود / مستنيك اخبار الشغل ايه
يحيي / الحمد لله خير مستنيني ليه فى حاجه و لا ايه
محمود / محتاجك تيجي معايا بكره
يحيي / يا بابا مش اتكلمنا فى الموضوع ده
محمود / زينب مش عاوزه تيجي هنا
يحيي / و انا اللى المفروض اثنعها مثلا اعمل ايه ما طبيعي تبقي رافضه فى الاول بس ما تقلقش هتتقبل الأمر الواقع مع الوقت و البركه بقي فى حضرتك تجيب لها كام هديه كدا و تحتويها و تطبطب عليها و تفهمها انك هتكون ليها اب و كدا مش انا اللى هقولك يعني
محمود / راحت لابوها و قالتله عاوزه تعيش معاه و هو روحها و اتصل بامها و قالها تتكلم مع بنتها و الاتنين منهارين
يحيي / بابا يا حبيبي انا مش دكتور نفسي و لا مرشد اجتماعى انا حياله طالب فى كليه الهندسه و بروح اتمرن فى مكتب تلت ايام فى الاسبوع و بشتغل سواق أوبر على عربيه حضرتك التلت ايام التانين انا أقصي حاجه اقدر أقدمها لحضرتك فى الموضوع ده اوصلك ليهم و لو عاوزنى اعدى اجيب لحضرتك اى حاجه فى طريقي انا ما اتاخرش عنك
محمود / يحيي انا محتاجلك تقف جنبى
يحيي / ماشي يا بابا انا واقف جنبك بس معلش عشان حسيت ان الادوار اتقلبت فجاه اتمنى منك كاب تعلمنى اقف جنبك فى المواقف دى ازاى أصل اللى انا فاهمه آن الابن هو اللى بيطلب من ابوه يقف جنبه فى جوازه انما العكس دى جديده عليا لنج
محمود / دا كلام عمتك ده صح ؟!
يحيي / انا لا روحت لعمتي و لا كلمتها و لا ليا اى دخل بيكوا انتوا اخوات فى بعض انا ما اقدرش ادخل ... انا بكره يا بابا عندى شغل فى المكتب لو ما روحتش الدكتور ممكن يمشيني عادى دا عاملها جميله و حضرتك عارف... انا مش هقدر اجى  معاك بكره قولتلك لو ضرورى اجى اجلها يوم مش هيحصل حاجه انما بكره مش هقدر
محمود / ما هى عندها شغل بعد بكره
يحيي / يعني هى شغلها اهم من شغلى
محمود / انا اهم
يحيي / تصبح على خير يا بابا
يحيي يدخل اوضته و يقفل الباب بالمفتاح و محمود واقف حزين
......................
فى شقه زينب
زينب قاعده على موبايلها فى الاوضه ( دعاء ) والدتها تدخل شايله طبق فيه ساندوتشات
دعاء / جبتلك تتعشي
زينب / مش عاوزه اتكلم
دعاء / مش مهم اسمعى
زينب / انا مش عاوزه اسيب بيتي
دعاء / دا مش بيتك يا زينب دى شقه إيجار بيطلع عين اهلى فى الشغل كل يوم عشان ادفع نص مرتبى فيها و الباقي بين اكل و شري و مصاريف و مايه و نور و كهربا و كتر خيره ابوكى بيبعتلك خمسميه جنيه كل شهر بيسندوا
زينب / بكره اخلص دراستى و اشتغل و اساعدك
دعاء / و تخشي الجامعه و تحبى و تتجوزى و تسبيني
زينب / مش هسيبك وعد هفضل جنبك هشرط عليه لو مش عاوز امى معايا مش هتجوزه
دعاء تضحك و تلعب فى شعر زينب
دعاء / اديله فرصه و قابليه بكره فى العزومة عشان خاطرى
زينب / طب روحى اتجوزيه و انا اعيش هنا لوحدى خمسميه منك و خمسميه من بابا و انا هكفى نفسي
دعاء / إيجار الشقه دى كام يا زينب
زينب / هشوف شقه ارخص
دعاء / الله يعني هتسيبي الشقه اهو
زينب / مش هاجى ادخل الحمام الاقى رجاله خارجين منه يا ماما هاخد راحتى مش هفضل طول عمرى بالحجاب يعني
دعاء / محمود فصل يحيي و قفله اوضه بحمامها و هيفرشها و يحطله فيها تليفزيون و تلاجه صغيره و مش هيدخل الشقه عندك الا فى وجودى او وجود ابوه و لفتره محدوده و يرجع اوضته دا غير اصلا انه طول النهار فى الكليه و بعد العصر فى الشغل محمود ماكدلى انه بيروح على النوم بس ... حبيبتي انتى محتاجه دروس و انا تعبت و محتاجه ارتاح شويه انا بقالى سنين زى الطور فى ساقيه بربيكي لوحدى بالله عليكى ما نفسكيش فى اب
زينب تبص لمامتها و عنيها كلها دموع دعاء تاخدها فى حضنها
زينب / انا ما ليش غيرك و هو هياخدك منى
دعاء / ما فيش قوه فى الدنيا هتاخدنى منك يا قلب امك
زينب / اوعديني
دعاء / اقسم بالله ما هقدر اصلا يا بت دا انا ما ليش غيرك فى الدنيا اقسم بالله لو ما كنتش متاكده مليون فى الميه انه طيب و ابن حلال و هيصونك ما كنت اتجوزته
زينب تهز راسها موافقه بقله حيله
دعاء / ربنا يكملك بعقلك يا قلبي
......................
فى مكتب هندسي
يحيي قاعد بيشتغل على جهاز و جنبه زميله احمد بيكلمه و يحيي مركز فى الشغل بملامح جد
احمد / ابوك ده هيشلنى يا اسطى هو فى كدا
يحيي / حقه
احمد / طب و انت فين حقك يا صاحبى دا بدل ما يقولك اخطبلك و تبدأ حياتك انت عارف الجواز ده بيكلف قد ايه دا ان لقيت شقه اصلا اهو كان قعد هو فى الاوضه دى و اتجوزت انت مكانه
يحيي / انت قابلت عمتى؟!
احمد / و انا اعرف عمتك منين يا يحيي ... يا يحيي مش وقت استظراف انا دمى محروق هنا اقسم بالله
يحيي/ يا ابنى انا بشتغل عشان ما اخدش منه فلوس هخليه يجوزنى ازاى بس
احمد / يا عم انت اصلا انسان غريب و مريب و كئيب و حالتك حاله وفرتله فلوسه يا خويا اهو رايح يتجوز بيها اهو و مش بعيد يظرفك الخازوق الماتين و يجيبلك اخ يحدفك على الجيش عسكرى تلات سنين انما ايه عنب
يحيي / حد يكره يبقاله اخ صغير
احمد / ابن الشتيمه يتيم يا يحيي
يحيي / هبقي اربيه انا
احمد / مالك يا يحيي ردودك دى مش طبيعيه ابدا و لا حتى على أنها تكون هزار
يحيي / و انت مين قالك انى بهزر
احمد/ طب فهمنى اقنعك ازاى
يحيي / ما اقنعنيش انا ضيف فى بيته و كتر خيره انه سايبنى اعيش معاه لحد ما ربنا يكرمنى و اتخرج و اجمعله كل قرش صرفه عليا من يوم ما جيت الدنيا
احمد / دا عبط ده صح
يحيي / دا حقه
احمد / يحيي حبيبي دا ابوك
صمت
احمد / ايه مش ابوك!! ايه لقاك قدام المعبد اليهودي مثلا !! ايه يا ابنى ساكت ليه ليه الدنيا بينكوا كدا
صمت و صوت الطابعه يشتغل و يحيي يقوم يبص فى الرسومات المطبوعه احمد يروح وراه
احمد/ على فكره بقي الموقف ده بيحصل معانا كلنا ... انا بصرف عليك انت عايش فى بيتي تسمع كلامى انا كلامى هنا اللى يمشي انا ابوك ... و الله يا ابنى كلهم زى بعض بس مش معنى كدا اننا ناخد كلامهم جد يا ابنى ما هو لسه مكمل صرف اهو
يحيي / انا هروح للدكتور اسلمه الشغل على الله ما يعدلش حاجه زى كل مره عشان انا جبت جاز و عاوز اروح جدا
احمد / استنى يا يحيي انا بتكلم معاك
يحيي / صدقنى ما فيش كلام يتقال انت اللى واخد الدنيا على صدرك
يحيي ياخد الورق و يطلع بره و احمد متابعه
...................
فى شقه دعاء
دعاء قاعده هى و اختها ( ايمان ) و جوزها ( ممدوح ) و من ناحيه و محمود و اخته ( رانيا ) و جوزها ( على ) و على رغس الترابيزه زينب من الناحيه و الناحيه التانيه فاضي
ايمان / يعني ايه هتدخلوا سكيتي كدا
رانيا تبص لايمان باستغراب و تمصمص شفايفها
دعاء / ما لهاش لازمه المصاريف احنا اولى بيها فى حاجة تانيه
رانيا / جواز العيال مثلا الجيل الجديد اللى لسه ما جربوش حظهم فى الدنيا
محمود / ربنا يقدرنا و نجهزهم و نجوزهم باذن الله
ايمان / طب فكرتوا هتقضوا شهر العسل فين ؟
ممدوح / فى ايه يا ايمان الناس قالوا هيروحوا الماذون يكتبوا الكتاب و يروحوا
ايمان/ و الله فاهمه بس دعاء قطعت كل صورها بالفستان الأبيض من اللى ما يتس ... من نور
الكل بيبص على زينب بتلعب فى الاكل بالمعلقه
ايمان / على الاقل فستان سيمبل و صورتين عند اى حد مش هيكلفكوا حاجه
محمود / و ماله حد يكره
ايمان / و يا ستى لو على مصاريف شهر العسل نبقي نستلف مفتاح شقه المصيف من مريم اختي ممدوح مش هتقول حاجه صح يا ممدوح
ممدوح يزغر لايمان
ممدوح/ طبعا طبعا نقول لها و نرتب معاد ما تكونش ماجره فيه الشقه و لا وراها ارتباطات و لا حاجه بس بإذن الله خير نكلمها و نشوف الدنيا
دعاء / ما فيش داعى انا اصلا مش هقدر اسافر و اسيب زينب فى البيت لوحدها
رانيا / و دى تيجي خدوها معاكوا اهو تتفسح و تغير جو
ايمان / تروح معاهم فين دا شهر عسل
رانيا/ امال هيسيبوها تبات لوحدها مع يحيي ... انتى عارفه يحيي عنده كام سنه
محمود / يحيي فى اوضته بباب منفصل مش هيقرب من اخته و احنا بره
رانيا / مش اخته يا محمود تجوزله عادى
على / يحيي شاب مقدم و يعرف ربنا و بنتنا القمر برده بنت ناس و على خلق
رانيا / انا ما اتكلمتش و لا غلطت فى ده و لا فى دى انا بتكلم عن الناس الناس ما يعرفوش ان الباب اللى جوه اتسد و هيقولوا و يتكلموا و البنات سمعه زى ما كلكوا عارفين
محمود / كل الناس عارفه انى جبت الصنايعيه و قفلت الباب و فصلت الشقه عشان اتجوز انا اتكلمت مع الناس و زمانهم كلهم نشروا الخبر
زينب / عن اذنكوا اروح الحمام
زينب تقوم تروح الحمام و تقفل الباب و تقف قصاد المرايه و تتنهد الباب يخبط زينب تفتح الحنفيه و تغسل ايديها و تروح تفتح الباب تلاقى مامتها
دعاء / انتى كويسه يا قلب امك
زينب / هو انا لازم اكمل القاعده دى ما ينفعش ادخل اوضتى اعمل اى حاجه
دعاء / ينفع
زينب / شكرا
زينب تعدى مامتها و تروح اوضتها و تقفل الباب و تفرد ضهرها على السرير و تبص المروحه اللى فى السقف
.........................
فى اوضه يحيي فى البيت
يحي قاعد على السرير و محمود جنبه
محمود / التليفزيون اللى فى الصاله هنقله اوضتك و هنجيب التليفزيون اللى عند دعاء نحطه فى الصاله و هناخد سرير زينب نحطهولك هو متر بس كويس خشبه حلو انا شوفته خساره لو اتباع هتخسر فيه جامد و هنجيب بداله واحد مش بنفس جودته و بتلت اربع اضعاف تمنه دا غير انه مش هيعمل زحمه و الاوضه هتساعيه هو و مكتبك اللى بتذاكر عليه و كلمت النجار يعملك نص دولاب بتسريحه فى الجنب و يحطلى عليها رخامه عشان تحط فوقيها سبرتايه لعل و عسي تحتاج حاجه فى اى وقت و كوفى كورنرك و مزاجك بقي و عيش
يحيي / كتر خيرك
محمود / اكلك كدا كدا دعاء هتوضبهولك و تلفه و تحطهولك فى اوضتك قبل ما هى تنام لو ما لقيتوش معناها ان هى صاحيه خبط عليها هتسخنلك
يحيي / مفيش داعى لتعبها انا هبقي اتصرف
محمود / يا ابنى اكلها حلو جدا اكل بيتي من اللى على حق معمول بحب
يحيي / انبسطت يعني النهرده
محمود / انا مبسوط طول ما انت مبسوط
يحيي / ربنا يتملك على خير ما تشغلش نفسك بيا رتب دنيتك زى ما انت عايز و انا هبقي اوضب اوضتى و اكمل الناقص على مهلى
محمود / عليك نور ... براحه راحتك اى حاجه محتاجها اى حاجه نقصاك فى اى وقت انا اجيبهالك و بعدين دا وضع مؤقت انا مكلم لك واحد حبيبي يشوفلى شقه قريبه و تكون فى الحنين اجيبهالك تتجوز فيها
يحيي / كتر خيرك
محمود / شكلك تعبان
يحيي / و الله جدا و مصدع و هموت و انام
محمود / تمام يا حبيبي معلش سامحنى كنت متحمس احكيلك عملت ايه فى العزومة بس متعوضه باذن الله
يحيي / اكيد
محمود يقوم و يطلع بره يحيي يفرد ضهره على السرير و يفتح ايديه و رجليه
يحيي / متر !! الجته دى هتنام على سرير متر !! الحمد لله احسن من الارض احمد ربنا لتزول هى كمان ... الحمد لله الحمد لله
.................
فى شقه ايمان بعد فتره 
ايمان بتكوى هدوم فى اوضتها ممدوح يدخل يقفل الباب و يقعد على السرير و يبص لها
ايمان/ خير !! البصه دى عرفاها
ممدوح / هى زينب ارتاحت عندنا و لا ايه
ايمان / انت مضايق من وجودها فى حاجه ؟!
ممدوح / لا بس انتى عارفه ان عندنا بدل الشاب اتنين فى البيت و انا ما عدتش مرتاح
ايمان / مش فاهمه آن كانت زينب و لا عيالك فكلهم متربين ما شاء الله و لا انت شوفت حاجه انا ما شوفتهاش
ممدوح / لا ما شوفتش بس انا فعلا مش مرتاح مش عارف اخد راحتي
ايمان/ و هى البت فى الكام يوم دول أثرت على راحتك فى ايه بس
ممدوح / يعني هى هتفضل هنا على طول مش كدا ؟!
ايمان / لحد ما يرجعوا من شهر العسل
ممدوح / ما تفضل هناك لحد شهر العسل ده يا ست ايمان و لا هم يعني كانوا هيسافروا بكره و بعدين شهر عسل ايه و كلام فاضي ايه ما يوفروا الفلوس دى لحاجه احسن هم صغيرين على الكلام الاهبل ده
ايمان / انا اتفقت معاها قدامك و ما فتحتش بقك
ممدوح / انتى احرجتيني و دبستني و دبستي اختى فى حوار مفتاح الشقه ده انا بجد مش فاهمك
ايمان / انا لا دبستك و لا دبست اختك انتوا كدا كدا ما بتعملوش حاجه مش عاوزينها
ممدوح / اديني بعمل اهو
ايمان / معلش ... استحمل ما جاتش من اسبوع
ممدوح / تمام يا ايمان بس ابقي فتحى عينك انتى بقي
ايمان / ما تشغلش انت بالك بأفكار و خيالات ما لهاش اى علاقه بالواقع و ارتاح لا عيالك و لا زينب هيبصوا لبعض
ممدوح / يا ستي تابعى برده
ايمان / هتابع هتابع دا انت مريب
ممدوح/ انا برده
ايمان / خلاااااص انا اسفه ممكن اكمل كوى البلوزه دى عشان عندى شغل الصبح
ممدوح / اطلعى اكوى بره انا عاوز انام
ايمان/ هخلصها و اقفل و ننام احنا الاتنين انا مش لسه هقعد انقل الترابيزه و الفيلم ده ما جاتش من خمس دقايق استحمل
ممدوح ينفخ و يطلع الموبايل و يقعد يلعب فيه
........................
فى شقه يحيي
يحيي يفتح باب اوضته دعاء تفتح باب شقتها
دعاء / حمد الله على السلامه
يحيي / الله يسلمك ... عن اذنك
دعاء / اتعشيت ؟! تعال انا عملتلك المسقعه زى ما بتحبها ابوك قالى و انا وقفت و الله ساعتين كاملين اعملها مخصوص عشانك
يحيي / بتتاكل بايته عادى هستاذنك عشان راجع تعبان و عاوز انام
دعاء/ انا مستنياك ترجع عشان عاوزه اتكلم معاك ... لو سمحت ما تحرجنيش انت طول الفتره اللى فاتت بتتهرب منى
يحيي / انا ما بتهربش انا فعلا مش فاضي و دلوقت كمان مش قادر مره تانيه
دعاء / طب استنى دقيقه هجيبلك البرام و العيش كلهم وقت ما تحب
يحيي/ ما عنديش مكان فى التلاجه عنيهم عندك بعد اذنك
دعاء تبص فى الارض بحرج يحيي يفتح الباب و يدخل
يحيي/ عن اذنك
يحيي يدخل و يقفل الباب دعاء تدخل و تقفل الباب و تبص تلاقي محمود واقف تروح تحضنه يبوس راسها
........................
فى الملاهي
محمود / حجزتى الدروس اللى محتاجها و لا لسه فاضل مواد ؟!
زينب / ماما اللى بتحجز اكيد قالت لك انها حجزت و رتبت المواعيد هبدا من اول الشهر بإذن الله
محمود / يعني الواحد ما يعرفش يفتح معاكى مواضيع مثلا
زينب / لا نفتح عادى ... ايوه الحمد لله حجزتها كلها ..  شكرا
محمود يضحك
محمود / ممكن اتكلم معاكى
زينب / ما حضرتك بتتكلم اهو
محمود / صح ... اقصد عندك استعداد تسمعى يعني ... عاوز احكيلك حكايه
زينب / حكايتك ؟!
محمود / ايوه قصتى ... عندك استعداد تسمعى ؟
زينب / اتفضل
محمود / من عشر سنين مراتى ام يحيي كانت راجعه من السوق و شايله اكياس كتير اوى و كانت بتعدى للشارع و من تقل الاكياس كانت بتعدى ببطئ فمجيه عربيه بسرعه ما لحقتش تفاديها العربيه طيرتها و طيرت الاكياس كلها
زينب / الله يرحمها
محمود / لا لا ما هى هنا ما ماتتش
زينب تستغرب و تنتبه
محمود / خدوها على المستشفي و وصلوها بالاجهزه يوم اتنين تلاته اسبوع الحسابه بتحسب و انا راجل على قدى استلفت من طوب الارض و عرضت العربيه للبيع بس اى بيعه فى الدنيا بتاخد وقت و انا عشان مزنوق الكل كان بيبيع و يشترى فيا أقرب حاجه لايدي دهبها بعته حته ورا التانيه و بعت العربيه و كل ده و الدكاتره بتاكد ان ما فيش امل وفر فلوسك يا استاذ و ريحها و انا على كلمه واحده هتخف باذن الله
زينب/ و بعدين
محمود / ما كانش فاضل غير الشقه ... اخد شقه إيجار و انقل فيها و ابيع دى و اكمل يا تخف يا ما تخفش صليت استخاره و روحت ابيعها الشارع كان واقف و الدنيا كانت زحمه موت و اتاخرت على الراجل ساعتين كان مشي حددنا معاد تانى اتصلوا بيا من مدرسه يحيي قالوا انه كان سخن و بيرجع دا تانى يوم على طول خدته و وديته لاختى و كلمت الراجل و حددنا معاد تالت حلمت انى بجرى على سير متحرك بالعكس و انا اجرى و اجرى و اجرى و ما بوصلش لقيت ايد بتطبطب على كتفى ببص لقيتها ام يحيي حضنتني و باستنى و قالتلى ارتاح
محمود الدموع تنزل منه زينب تناوله منديل
محمود / اتصلت بالراجل و قولتله مش هبيع و اخدت يحيي و حكيت له الحلم قالى بتقولك هتخف و هتبقي كويسه هى تقصد ما تقلقش ... هى كانت تقصد ما تعافرش هى وقفتنى عن الجرى انا كنت مستعد افضل ... بس ما حدش بيموت قبل أوانه هى كان اجلها فى اليوم ده ... اليوم اللى فصلت فيه الاجهزه ... انا قعدت سنتين كاملين بعدها بشتغل بس أسد الديون اللى كانت عليا انا ما قتلتهاش و لا عمرى كنت استحمل عليها الهوى بس دا قدرى و قدرها و ما كانش فى ايدي اى حاجه انا كان المفروض اخد قرار مفيش اصعب منه و يا ريت كان عندى رفاهية الاختيار انا راجل ما حلتيش الا مرتبى اجيب منين اسرق ؟!
زينب / و بعدين
محمود / ابنى ما سامحنيش بالنسباله انا قاتل امه انا اخترت الشقه عن امه انا ... انانى و ما بفكرش غير فى نفسي مع انى ما كنتش بفكر غير فيه هو ... يحيي ابنى ... أنا بقالى عشر سنين عايش لوحدى طول اليوم من هنا لهنا بيروح على النوم و بس كلمه و رد غطاها حاولت كتير اكلمه حاولت كتير أقرب منه ما بينساش و ما بيسامحش عشر سنين و انا نفسي اتكلم مع حد و يسمعنى ... انا ما اتجوزت مامتك عشان انا عاوز اتجوز ... انا كنت عاوز ونس عيله ناس انزل الشغل و انا نفسي ارجع ليهم بسرعه عشان مستنيني ... ناس تجرى عليا تستقبلنى لما افتح باب الشقه ... هو اللى بطلبه كتير
زينب تهز راسها لا
محمود / انا و امك زمايل فى الشغل من سنين فى الاول ما كانتش بتكلم حد و الكلمه بحساب و خايفه من الدنيا بحالها و مع الوقت بدات ترتاح و تحكى و انا كمان ارتحت و بدات احكى و يوم ورا التانى بقيت احب الشغل و بقيت اضايق لو غابت و اضايق لو تعبت و ما قدرتش اروح فاتحتها و رفضت ... عشانك خافت ابوكى يعترض ... كلمته انا قولتله الوضع كذا كذا كذا و لاقيته راجل محترم و قالى دا حقها تتجوز انا اتجوزت و خلفت همنعها ليه رجعت لها طاير ما صدقتنيش كلمته و اكدلها كلامى تعرفى ... برده رفضت ... خافت ... خافت منى و عليكي و حتى على يحيي ... بس انا ما سكتش و فضلت اطلبها تانى و تانى و تانى لحد ما وافقت ... هى وافقت بس انتى لسه ما وافقتيش
زينب / أوافق على ايه ما حضرتك اتجوزتها خلاص
محمود/ ما وافقتيش انى اكون ليكي اب
زينب تبص له و ساكته
محمود / انا عارف ان عندك اب بس ..  هو مشغول و عنده بيته و حياته ربنا يعينه انا فاضيلك... اوديكي و اجيبك و اتابع معاكى الدروس و اخرجك و سنتين تلاته عريسك يجي يقعد معايا و اوصلك بايدي للكوشه
صمت و تبادل نظرات
محمود / مع بابا يعني .. سيبك من الامثله دى بس اكيد فى حاجات تانيه اقدر اعملها و لا ايه
زينب ساكته و بصاله
محمود / انا مش جاى اخد منك امك انا جاى اكمل معاها عيلتك و تكمل معايا عيلتى و نبقي اسره مع بعض انا و انتى و هى و يحيي
زينب تبص الناحيه التانيه
محمود / عاوزه تقومى تلعبي
زينب / انا كبرت على الحاجات دى
محمود/ اكيد فى لعب لسنك ما ولاد خالتك هايصين هناك اهو حد قالهم العربيات دى كبيره عليكوا الانسان بيعيش مره واحده خليه ينبسط ... ما دام ما بيعملش حاجه حرام
زينب تبصله و تهز راسها
ممدوح يدخل يقعد
ممدوح / هم الستات دول بيجيبوا الطاقه دى كلها منين ايه ده يا اخى ما بيزهقوش من الفرجه على المحلات
محمود يبتسم
زينب / هقوم اتمشي شويه
محمود / ما تبعديش الدنيا زحمه اوى و اخاف حد يضايقك
ممدوح / لو روحتى عند المحلات اللى هناك دى هتلاقى امك و خالتك روحي لهم
زينب تهز راسها و تتمشي
ممدوح / ها وفقتوا الأمور على بعضها
محمود / و الله الموضوع صعب و لا هى بتسمع و لا هو بيسمع بس الحمد لله هى اهون بكتير
ممدوح / صدقنى الدنيا مش هتظبط معاك غير لو مشيت بسياسه الأمر الواقع انما المحايله و المداديه دول تضييع للوقت دا جيل عنيد و انا عارفه
محمود / لا مش مساله عند
ممدوح / يا محمود يا خويا هم فى مرحله مراهقه و كل واحد عاوز يحس بالاستقلالية و ان ليه رأي و ان كلامه هو اللى بيمشي و عشان كدا رافض يسمع لاى حد غير نفسه حتى لو فى الحقيقه بياذى نفسه بيرفض يعترف انه غلطان
محمود / فاهم كلامك جدا
ممدوح / و الحل الوحيد هو الامر الواقع انت تاخدها من ايدها تقعدها فى البيت تتقبل فكره انك ابوها و ان ده اخوها و تخرج من فقاعه الاكتئاب اللى عايشه فيها دى صدقني زينب شقيه جدا مش هاديه و ناديه زى ما انت شايفها كدا خالص
محمود / انا اكيد مش معترض بس
ممدوح / طب فكر فيها بالعقل احتمال انك تقرب منها اسرع و هى فى بيتك و لا و هى فى بيتي
محمود / ما هى اكيد هتعيش فى بيتي طبعا
ممدوح / طيب ليه تستنى اسبوع بقي ما خير البر عاجله تلحق تقرب منها فى اليومين دول و هى كمان تطبع على البيت و تاخد عليه و تتاقلم بدل ما تبدا معاها من الصفر لما ترجعوا
محمود/ ما دى النقطه انها هتفضل لوحدها لحد ما نرجع
ممدوح / لوحدها ايه يا راجل اخوها موجود و احنا موجودين و بعدين ما انت اكيد هتبقي سايب لها كل حاجه ممكن تحتاجها و لو حصل اى حاجه برنه نبقي قصادها دا غير ان زينب شاطره جدا و امها معلماها كل حاجه صدقني هتعرف تتصرف مش زى ما انت فاكر صدقنى
محمود/ و الله انا مش معترض اكلم دعاء و نشوف
ممدوح / و كلم زينب كمان قولها انك عاوزها تيجي تعيش معاك بس خايف تسيبها لوحدها و انك هتسيب لها فلوس و اكل و هتكلمها كل يوم فى التليفون و انك عاوز تقضي اليومين دول معاها و تقرب منها و الكلام ده يا بنى انت زى اخويا و بكلمك من قلبي
محمود / انت معاك حق هم يرجعوا بس من هناك و افاتحها فى الموضوع على طول
ممدوح / و اتمسك بيه مش عزومه مراكبيه حسسهم انك شارى و تبت فيهم
محمود يهز راسه موافق
ممدوح / على البركه هتدعيلى
.......................
فى شقه محمود
محمود بيفتح الباب شايل شنطه هدوم و يدخل و وراه زينب وراها دعاء
محمود / طبعا انتى مش اول مره تيجي و عارفه اوضتك فين عاوزك بقي تقلبيها و تاخدى راحتك على الآخر انا بقي وقت المغربيه كدا فى التراوه احب اوى اشرب كبايه الشاى فى البلكونه كدا و انا بتفرج على اللى رايح و اللى جاى و بالنسبه بقي للمسلسلات الكورى بتاعتك فعندك واى فاى اربعه و عشرين ساعه ليكي لوحدك انا لا ليا فى النت و لا بعرف استخدمه و يحيي بيجي على النوم يعني الباقه بتاعتك و السرعه بتاعتك و البيت كله بتاعك
زينب تبتسم
محمود / ها يا ست البنات ناقصك اى حاجه اجيبها و انا راجع
دعاء / رايح فين بس دا احنا لسه داخلين
محمود / هروح اجيب شويه حلويات على تسالى على ساقع كدا يعني على ما تقولنا فيلم حلو كدا نسهر نتفرج عليه مع بعض انا بقالى سنين طويله اوى ما قضيتش يوم زى ده و هموت عليها
دعاء / يا سيدى ما فى هنا حاجات كتير
محمود / لااا بقي معلش انا عارف زوق ست البنات و هجيب لها كل الحاجات اللى بتحبها
دعاء / ربنا يسعدك و يروق بالك
محمود / لو عوزتي اى حاجه اديني رنه
زينب / شكرا
محمود يمشي و يقفل الباب وراه و يطلع الموبايل و يتصل
محمود/ ازيك يا يحيي يا حبيبي عامل ايه
يحيي / الحمد لله تمام خير فى حاجه و لا ايه
محمود / لا خير بإذن الله اصل انا اقنعت اختك يعني انها تيجي البيت عشان تقضي اليومين دول معانا نتعرف على بعض و عليك قبل ما اسافر و كدا و كان نفسي نعمل سهره من بتوع زمان لما كنا بنقى فيلم و نعمل فشار و شيبسي و نسهر نتفرج عليه سوا
يحيي / و الله و انا كمان يا بابا وحشنى اوى الحوار ده بس للاسف اللى كانت بترتبله راحت للى احسن منى و منك
محمود / ربنا يرحمها بس يا حبيبي الحى ابقي من الميت ادى لدعاء فرصه هى بتحاول تقرب منك
يحيي / انا سايق و الله يا بابا و خايف كاميره تلقطنى و لا اى حاجه استاذنك
محمود / هتفضل زعلان منى لحد امتى يعني لو جرالى حاجه هترتاح
يحيي / بعد الشر عنك يا بابا الف مليون بعد الشر و بعدين ليه الكلام ده مش حضرتك قولت هتتجوز عشان بتخاف تموت و انا بره ربنا يبارك فى طنط دعاء و بنتها بقي هم يونسوك و يتفرجوا معاك على الفيلم و انا ربنا يرزقنى و يكرمنى فى اكل عيشي حضرتك اكيد شايف كل حاجه غليت ازاى
محمود / الا خاطرى ... رخص
يحيي / يا بابا ابوس ايدك بلاش الكلام ده
محمود / عشان خاطرى يا محمود ... المرادى بس المرادى بس اخر حاجه هطلبها منك المرادى بس
يحيي / يا بابا انا كنت بذاكر و لسه بادئ ... تمام يا بابا انا جاى حاضر
محمود / ربنا يباركلى فيك يا ابنى و يهديك تحب اجيب لك اى حاجه على ما تيجي
يحيي / تسلم يا بابا انا مش عاوز حاجه
محمود / طب اكلت يا قلبي
يحيي / الحمد لله اه اكلت
محمود / اكلت ايه ؟!
يحيي / انا سايق يا بابا لما اجى نتكلم ينفع
محمود / تمام ينفع ما تتأخرش
…………………….
فى شقه رانيا
على / يعني مش هتروحى تصبحي عليه و لا تباركيله خالص يا شيخه اتقى الله
رانيا / انا قولتله رايي فى الجوازه و هو عارف و انت كنت شاهد التحايل عليا قد ايه اروح معاه العزومة بتاعه المحروسه و روحت و شرط أن دى تبقي اخر مره ادخل له فى حاجه حصل و لا لا
على / و الست ضيفتنا على أكمل وجه و كانت لذيذه و زوق جدا معانا ما حصلش حاجه
رانيا / انا قلبي بيتقطع على ابن اخويا يا على
على / و يحيي نفسه عاقل و مرحب
رانيا / ما حصلش يحيي مكسور يا قلبي خسر امه و دلوقت خسر ابوه
على / خسر ابوه ايه بس بعد الشر عنه ما اخوكى زى الفل اهو بالعكس كسب ام جديده و اخت جديده
رانيا / بقولك ايه سيبنى فى حالى ابوس ايدك ببرودك ده 
على / يا ستى اعملى الواجب و ارميه البحر عشان ما يزعلش روحى بكره نص ساعه صد رد باركى و امشي
رانيا/ يا على
على / عشان خاطر اخوكى يا ام البنات دا ما لوش غيرك
رانيا تتنهد
على / ربنا يكملك بعقلك يا ست الكل يا اصيله قومى بقي اعمليلنا كبايتين شاى من ايديكى الحلوين  دول
رانيا / طبعا و هى ست الكل دى تنفع من غير ما يلزق فى افاها طلب ما تعملوش حاجه لوجه الله ابدا
على يضحك رانيا تقوم
…………………..
قدام اوضه يحيي قرب الفجر
يحيي يفتح باب الاوضه دعاء تفتح باب الشقه يحيي يتنهد
دعاء/ اتاخرت ليه
يحيي / كان معايا زبون اول ما نهيت الرحله جاتلى رحله اسكندريه وصلته صد رد و جيت
دعاء / ما كانش ينفع تكنسلها؟
يحيي/ طلعلى فيها مبلغ كويس
دعاء / كام ؟ ... زعل ابوك و نومه متغلت بالشكل ده يساوي كام ... طب انت بتعمل كام فى اليوم طيب و انا ادفعلك
يحيي / هى مبارده لطيفه من حضرتك جدا بس انا مش مستنى فلوس من حد خصوصا لو الفلوس دى انا اللى سايبهاله
دعاء / بس انا ما باخدش منك حاجه يا يحيي و اللى انت ناسيه انى بشتغل مع ابوك و بقبض يعني ما كنتش جعانه قبل ما يتجوزنى
يحيي / امال اتجوزتيه ليه ..  انا مش قصدى اى حاجه وحشه بس هو بالنسباله عايش لوحده و محتاج ونس حضرتك بقي ربنا يباركلك فى بنتك فى حضنك اتجوزتيه ليه
دعاء / و هو انا عشان بنتى فى حضنى مش محتاجه لونس ما ينفعش احب و ارتاح لحد ... يحيي ممكن تيجي اتكلم معاك شويه
يحيي / انا راجع تعبان من السفر و مش قادر اقسم بالله استاذنك تخليها
دعاء / عشر دقايق بس يا يحيي اعملها على الاستوب واتش عشر دقايق بس مش طالبه منك اكتر من كدا
يحيي / تمام
دعاء تدخل يحيي يدخل وراها و يقعد دعاء تروح تقعد قباله
دعاء / انا مش جايه اخد مكان امك يا يحيي و لا بنتى عمرها ما هتاخد مكانك
يحيي يهز راسه
دعاء / انت عارف انا اطلقت ليه ؟
يحيي يبص لها
دعاء / عشان جبت بنت و حصلت مضاعفات بعد الولاده بسبب خطأ طبي و اضطريت اشيل الرحم و مش هينفع اجيب عيال تانى يعني ما تخافش انا مش هجيب لك حد يشاركك فى ورثك من ابوك و لا انا طمعانه في مليم منه
يحيي / انا عمرى ما اتكلمت فى الفلوس و عمرى ما فرقت معايا ربنا يديله الصحه و طوله العمر و يتهنى بفلوسه و عزه انا عمرى
دعاء / انا عارفه انا عارفه يا يحيي انا راجل متربي و ابن أصول بس هو محتاجك على فكره ابوك تعبان
يحيي يتخض
دعاء/ تعبان مش عيان ابوك حزين و وحداني ابوك كان بيتنشق على حد يسمعه باهتمام طول الوقت ما بيتكلمش غير عنك اصلا طول الوقت ما عندوش أهم منك ما عندوش غيرك اصلا
يحيي / البركه فيكي بقي
دعاء / انا مين ... انا مراته مش بنته انت ابنه انت روحه و عقله ... ابوك ما قتلش امك يا يحيي ابوك ما استخسرش فيها و لو كان معاه اكتر كان عمل ابوك سابها ترتاح هى كانت عاوزه ده صدقنى كانت بتتعذب على الأجهزة دى
يحيي / سهل الكلام لما يبقي الحوار ما يخصكيش
دعاء / يخصنى علاقتك بابوك تخصنى ... ابوك كان رايح يبيع الشقه يا يحيي بس هى كان اجلها فى اليوم ده و الحاجات اللى حصلت
يحيي / الكلام ده مش هيرجع أمى بس بيجدد وجع فراقها جوايا... اصلا العشر دقايق خلصوا انا قايم انام
دعاء / اسمعنى بس ... اسمعنى
يحيي / ابويا وقتها قال انه اختارني و اختار مستقبلى انى الاقى مكان اعيش فيه و قرش اتسند عليه مين اللى عايش فى الشقه يا طنط انا و لا حضرتك و بنتك ... انتوا انا امى ماتت عشان انتوا تاخدوا مكانها و تنامى فى سريرها
دعاء / عشان انا ما كنتش عاوزه اكلف ابوك جنيه فى فرش جديد ليا
يحيي / ما فرقتش و الله انا مش معترض انتى اولى من الغريب لانك لو كنتى طلبتى جديد كان هيبيع ده النتيجه واحده... امى ما بتنامش فى سريرها و فى واحده غريبه بتنام فيه النتيجه واحده
دعاء / عدى عشر سنين يا يحيي
يحيي / من غيرها عدى عشر سنين من عمرى من غيرها
دعاء/ انا عارفه ان عمرى ما هكون زيها بس اديني فرصه اعوضك
يحيي / على فكره بنتك اولى بطاقتك هى محتاجلك اكتر منى انا قادر اقف على رجلى و مش محتاج و لا مستني حاجه من حد لكن هى محتاجه
يحيي يشاور براسه ورا دعاء دعاء تلف تشوف زينب واقفه لفه طرحتها و مسكاها بايدها
دعاء / طب ما هى هتدي فرصه للباباك يكون لها اب هى هتحاول انت ليه رافض حتى تساعدني
يحيي / عشان هى ما قدامهاش بديل هى ما تقدرش تقول لا ما حدش هيسمع لها زى بالظبط ما انا ما حدش سمع لى زمان امر واقع و اتفرض علينا و الكل بيجبرنا نتعايش ... لا و بتلومونا اننا ما قدرناش نتخطى اللى حصل و نعيش زى باقي الناس ... انتى موافقه على الجوازه دى ؟ موافقه انى اشاركك انا و ابويا فى امك ؟
دعاء / يا حبيبي دى عيله كلنا مع بعض عيله
يحيي / العشر دقايق خلصوا من بدرى ... اتكلمى مع بنتك اولى هى محتاجه اللى يسمع لها   … عن اذنك
يحيي يمشي دعاء تقعد على الكرسي حزينه و زينب متابعاها فى صمت
..........................
فى شقه محمود تانى يوم
رانيا / بس انا كنت فكراه واخد الاسبوع كله اجازه
دعاء / هو قالى ورايا شغلانه مهمه عاوز اعملها قبل ما نسافر قولتله ربنا يصلح لك الحال
رانيا / يعنى ما تعرفيش راح فين !!
دعاء / اقسم بالله ما قالى و لا انا سالت
رانيا / امال ما بيردش عليا فى التليفون ليه و عمال يكنسل هو فى ايه انا بدأت اقلق
دعاء/ بالله عليكي ما تقلقيني هو باذن الله كويس ... هقوم اكلمه ثوانى
دعاء تقوم تجيب الموبايل زينب تطلع من الاوضه رانيا تعوج بقها و ترفع حاجبها
زينب / السلام عليكم ازى حضرتك يا طنط
رانيا / ما ليه حق يطفش و يهج من البلد كلها هو فى ايه يا دعاء
دعاء / فى ايه يا رانيا ليه بتقولى كدا
رانيا / فى انى مش فاهمه متسربعه على ايه انتى و بنتك مش المفروض كانت هتفضل عند اختك لحد ما ترجعوا من السفر و لا هى اختك ما قدرتش تستحملها يومين
دعاء / انا مش هرد عليكي لما يجي محمود ابقي اسأليه
رانيا / بصي بقي يا دعاء انا جايه اقولك كلمتين و ماشيه
دعاء / لما تكلميني بأسلوب كويس هسمع انما انا مش فاهمه نبره صوتك دى لازمتها ايه و لا مين ضحك عليكي و فهمك انى هقبل بيها دا انا لو بشتغل عندك و بتديني مرتب مش من حقك تكلميني بالطريقه دى
رانيا / انا اتكلم زى ما انا عاوزه بيت اخويا و ابن اخويا من بعده انما انتوا هنا ضيوف
دعاء / ادخلى اوضتك يا زينب و لا شوفى كنتى رايحه فين ... عن اذنك يا رانيا البيت بيت اخوكى خدى راحتك انا داخله اكمل الاكل
دعاء تسيب رانيا لوحدها مع زينب بتبصلها و تروح المطبخ
رانيا / اللفهالك فى ورقه !!
زينب / هى ايه دى
رانيا / خلقتى اللى مبحلقه فيها ... مالك فى ايه
زينب / ما فيش ... عن اذنك
زينب تروح الحمام رانيا تطلع الموبايل و تتصل تانى بمحمود ما بيردش
............................
فى الكليه عند يحيي
يحيي خارج من مبنى محمود يجرى عليه شايل ملف فيه ورق و ينادي على ابنه
محمود/ يحيي يحيي
يحيي يتلفت يمين و شمال بصدمه
محمود / انا محتاج اتكلم معاك
يحيي / انا فى الكليه يا بابا
محمود / و هتطلع منها على المكتب و مش هتيجي غير وش الصبح اكون انا سافرت يا بنى محتاج اتكلم معاك هو انا هشحتك
يحيي / الموضوع ضرورى اوى يعني ما يستناش خالص و لا حتى يتقال فى التليفون
محمود / اوعدك أن دى اخر مره افرض نفسي على حياتك اوعدك وعد اخر مره آخر مره
يحيي يتنهد
يحيي / فى قهوه شغاله جنب الجامعه هنا ممكن نقعد فيها لو تحب
محمود / يا ريت احب جدا يا ريت
يحيي و محمود يمشوا سوا
................