زينب بقلم / لولو_محمد ( كامله)

الحلقه الثانيه

((((((( زينب )))))))
#لولو_محمد
الحلقه الثانيه
يحيي خارج من مبنى محمود يجرى عليه شايل ملف فيه ورق و ينادي على ابنه
محمود/ يحيي يحيي
يحيي يتلفت يمين و شمال بصدمه
محمود / انا محتاج اتكلم معاك
يحيي / انا فى الكليه يا بابا
محمود / و هتطلع منها على المكتب و مش هتيجي غير وش الصبح اكون انا سافرت يا بنى محتاج اتكلم معاك هو انا هشحتك
يحيي / الموضوع ضرورى اوى يعني ما يستناش خالص و لا حتى يتقال فى التليفون
محمود / اوعدك أن دى اخر مره افرض نفسي على حياتك اوعدك وعد اخر مره آخر مره
يحيي يتنهد
يحيي / فى قهوه شغاله جنب الجامعه هنا ممكن نقعد فيها لو تحب
محمود / يا ريت احب جدا يا ريت
يحيي و محمود يمشوا سوا
................
فى شقه محمود
دعاء تطلع من المطبخ رانيا قاعده فى الصاله لوحدها تبصلها بطرف عينها و تبص قدامها
دعاء / انا خلصت الاكل اغرف لك
رانيا / مش جعانه تسلمى
دعاء / اعملك شاى او قهوه
رانيا / مش عاوزه لو عاوزه حاجه هقوم اعملها
دعاء تقعد و تبص لها
رانيا/ انتى لازم تفهمى حاجه واحده
دعاء / انتى اللى لازم تفهمى حاجه واحده انا مش واحده جايه من الشارع انا مرات اخوكى و زميلته فى الشغل و اللى فى الاوضه دى بنتى و اللى عايش فى الاوضه دى ابنى
رانيا / لا يا شيخه دا باماره ايه طب دا الاوضه اللى بنتك نايمه فيها دى
دعاء / محمود اللى
رانيا / بنتك
دعاء / محمود اللى جابها محمود اللى اتحايل عليها و راح معاها جاب حاجتها من عند اختى و سهر معاها امبارح يتفرجوا على فيلم و ياكلوا فشار و انا فضلت مستنيه يحيي طول الليل كل يوم عشان أقرب منه انا بحاول و اخوكى بيحاول عشان نعمل عيله يا تحاول معانا يا على الاقل يا نحله لا تقرصينى و لا عاوز منك عسل انما انك تخسريني و تخسرى بنتى فى اول يومين دى ايه لزمتها
رانيا / انى بدافع عن حق ابن اخويا اللى بيحصل ده ما يرضيش ربنا
دعاء / ليه عايشين فى الحرام و لا ضاربين ورقه عرفى ؟! ما يرضيش ربنا ليه ؟! و لما هو ما يرضيش ربنا جايه تتكلمى بعد ما حصل ليه ؟! ما وقفتيش لاخوكى قبل ما يجي يطلبنى و ابيع عفش بيتي و اسلم شقتى و اجى هنا ليه ... و بعدين انتى جايه تقولى الكلام ده لواحده جايه تحاول تبقي ام لابن اخوكى و لا كنتى عاوزه اخوكى يترهبن لباقي عمره و لا انتى ايه مشكلتك بالظبط
رانيا / يحيي هيتخرج السنادى و لا له جيش و لا دياولو و زيه زى اى شاب من حقه يتجوز
دعاء / و ماله و انا فى ديك الساعه دا انا هزفه بايدي و اعمله الحلو كله دا ابنى زيه زى زينب بالظبط
رانيا / فين بقي ان شاء الله
دعاء / و احنا لحقنا ما تصبرى يمكن اطلع عدله و ابهرك  انتى مقدره البلا قبل وقوعه ليه
رانيا / بقولك فين هيتجوز فين ما انتوا احتليتو الشقه
دعاء / يا ستي يتخرج و يلاقي بنت الحلال و يفرجها ربنا نأجرله شقه جنبنا و لا ناجر احنا شقه و نسيب له دى يا ستى بس هو ربنا يفرجها عليه السنادى و يتخرج و يلاقى بنت الحلال و ساعتها نتصرف ... المهم دلوقت اجيب لك تاكلى و لا اعملك حاجه تشربيها غيرى مودك كدا مش هنتخانق من اولها و نمسك فى بعض دا احنا المفروض اهل
رانيا تبص الناحيه التانيه و ترجع تبص لها
رانيا / شاى بلبن لو عندك لبن
دعاء / عندى و عندى كيكه هجيب لك
دعاء تقوم و رانيا تحاول تتصل باخوها غير متاح تنفخ
.........................
على القهوه
يحيي / انا شوفت الورق ده قبل كدا ليه حضرتك مصمم تفتح فى اللى فات انتوا ليه مصممين تنكدوا عليا كل يوم ما خلاص ماتت و خلصنا
محمود / لا ما خلصناش عشر سنين و لسه ما خلصنا
يحيي / تمام يا بابا ... خلصنا ... أنا ايه المطلوب منى عشان اثبت لحضرتك اننا خلصنا بس بعد اذنك بعيد تماما عن طنط دعاء و بنتها لانى مش ملزم ناحيتهم باى حاجه
محمود / انا ما طلبتش منك حاجه بس دول
يحيي / يا بابا يا حبيبي صدقنى انا لا مضايق انك اتجوزت و لا انك قسمت الشقه انا حياتى متسستمه على نظام مخليني فعلا مش فاضي طول الوقت انا كدا مطمن على حضرتك و يمكن ربنا يكرمنى لما اتخرج بفرصه شغل بره ابدء بيها حياتى و اكون نفسي فانا سعيد جدا أن حضرتك مش هتكون لوحدك لانى ما كنتش هقدر اسافر و اسيبك صدقنى انا مرتاح جدا باللى حصل
محمود / بس دعاء
يحيي / انا انسان متوحد و بحب اكون لوحدى سيبوني على راحتى هو انا لازم اكون زيكوا انا مش فاضي يا جدعان
محمود / على الاقل عاملهم حلو
يحيي/ و انا غلطت معاها فى ايه انا كل اللى قولته انها تهتم ببنتها لأنها ما لهاش غيرها بدل ما تقسم مشاعرها بيني و بين البنت البنت اولى بيها تاخدها كلها اكيد ما كنتش هبقي مبسوط لو ماما الله يرحمها راحت اهتمت بحد غريب يعني و انا موجود... عادى دا رايي
محمود / طب ممكن لو سمحت تروح تتغدى معايا
يحيي / اقسم بالله ما هينفع
محمود / دا آخر طلب اطلبه منك نتلم مره واحده بس
يحيي / يا بابا
محمود/ عشان خاطرى دا انا جايلك لحد عندك هترجعنى مكسور يعني يا سيدي انت مش محتاجنى حقك كبرت و بقيت راجل و مش محتاج ابوك انا ابوك بقولك محتاج لك
يحيي / هستاذن الدكتور و اشوف الدنيا اقسم بالله ورايا شغل ما بيخلصش
محمود/ عشان خاطرى عشان خاطرى
يحيي يتنهد و يقوم يطلع الموبايل و يتصل و محمود مبسوط
.........................
فى شقه محمود
محمود يدخل و وراه يحيي
محمود/ زينب ... يحيي هنا
دعاء تطلع من اوضتها فرحانه
محمود / يحيي لغى شغله النهرده عشان يتغدى معانا
يحيي / لا انا استأذنت انى اتأخر بس لازم اروح والله ورايا شغل
دعاء /الاكل اصلا جاهز على الغرف على ما تغير
يحيي / هاكل كدا
دعاء/ ثوانى
دعاء تجرى على المطبخ محمود يروح يخبط على باب زينب و يفتح الباب بالراحه يلاقيها حاطه الهيد فون على ودانها و بتذاكر فى التابلت يطفى النور و يقيده زينب تبصله و تشيل السماعه
محمود / اللبسي الاسدال و تعالى يحيي بره عاوزين ناكل كلنا سوا
زينب / طنط رانيا جت سألت على حضرتك و حاولت تتصل كتير و بعدين جوزها اتصل فمشيت زعلانه
محمود / ناكل و بعدين اكلمها
زينب / تمام
محمود يسحب الاسدال من على شماعه و يناوله لزينب تلبسه فوق البجامه و تطلع تلاقى امها شايله طبقين و طالعه من المطبخ
دعاء / تعالى ساعديني
زينب تروح تساعد امها محمود يقعد جنب يحيي و يطبطب على ايده يحيي يبص له و يبتسم  زينب تطلع شايله صينيه بطاطس بالفراخ تحطها فى نص السفره و دعاء تطلع وراها شايله طبقين
محمود / سخنه عليكى يا قلبي
دعاء / ما يغركش دا زينب فى المطبخ اشطر منى بكتير
محمود/ هى قمر فى كل حاجه
دعاء / رانيا جت تبارك لنا و لما ما لقتكش مشيت
محمود / هبقي اكلمها خلينا ناكل دلوقت
دعاء تغرف ليحيي ياكل و محمود مبسوط باللمه
.....................
فى شقه والد زينب
ساميه قاعده مع زوجها ( سعيد ) و أولادها بياكلوا
ساميه / ليه انت مش اتفقت مع الراجل انك موافق بس مش هتدفع الخمسيه جنيه انا اولى بيهم
سعيد / يا ستي ما اعترضناش بس انا كنت بقول احطهم فى قسط العربيه
ساميه/ البيت اولى انت كدا كدا كنت ممشي نفسك و مرتب لقسط العربيه الخمسيه جنيه دول يلزمونى انا العيال محتاجين دروس و مصاريف هدبقها انا بالخمسميه دول شهر فى التانى
سعيد / يعني الواحد مش هيقدر ياخد نفسه شويه
سامية/ يا راجل احمد ربنا احنا كنا فين دا انا سعيده بالجوازه دى بشكل  ... و الله لو كنت اعرف كنت سعيت لها فى الموضوع و جبتها عريس من زمان
سعيد يبص لها و يكمل اكل
.....................
فى شقه رانيا
رانيا بتتكلم فى التليفون
رانيا / لا لو كدا مش زعلانه خير ما عملت ... لا بقي لما ترجع بالسلامه من السفر ابقي اجيلك تانى ... لا يا حبيبي و لا يهمك ... فى حفظ الله مع السلامه
رانيا تقفل و تروح تقعد و هى بتفرك جنب جوزها
على / ايه تانى ؟ مش الراجل كلمك و راضاكى
رانيا / يا على انت عارفني ما استحملش الحال العوج ابدا الوليه الباكسه هتسافر تتفسح و تسيب بنتها مع الواد فى الشقه لوحدهم
على / البت فى شقه و الواد فى شقه و بعدين ما ابن اخوكى اصلا ما بيروحش غير على النوم
رانيا / الشيطان شاطر يا على
على / لا حول و لا قوه الا بالله الشيطان ده فى دماغك انتى استعيذي بالله و هو يتحرق
رانيا / يا اخى أعوذ بالله من برودك انت
رانيا تقوم و تدخل الاوضه و ترزع الباب على يتنهد و يقلب فى التليفزيون
..........................
فى محطه الاوتوبيس
محمود / انا عارف ان زينب ما تخصكش و انك مش ملزم ناحيتها باى حاجه بس يعني لو مش هتقل عليك تكلمها كل يوم فى الموبايل تشوف لو محتاجه لحاجه تجيبهالها و انت راجع و سيبها على باب الشقه و ادخل ارتاح انت و هى تبقي تاخدها و انا كدا كدا سايب لك فلوس فى درج البوفيه اللى فى الصاله عشان لو احتجت اى حاجه ليك او لزينب
يحيي / ما تقلقش كل حاجه هتبقي تمام بإذن الله
محمود يبتسم و بروح ناحيه دعاء واقفه مع زينب
دعاء / تقفلى محبس الغاز قبل ما تنامى و لو احتاجتى اى حاجه فى اى وقت كلميني و انا كدا كدا هتصل بيكي كل شويه اطمن عليكي
زينب / انبسطى
دعاء / ربنا يبارك فيكي و يحميكي
محمود / انا بعت رقمك ليحيي و بعتلك رقمه لو عوزتي اى حاجه كلميه هيجيبهالك و ما تتكسفيش منه
زينب تهز راسها
محمود / خلاص يا يحيي ما تعطلش نفسك اكتر من كدا عشان تلحق تروحها قبل ما تروح كليتك احنا هنستنى الناس تتجمع و نمشي احنا على طول
يحيي / تمام … تعالى يا زينب
يحيي يمشي و زينب تروح تحضن امها و تروح تجرى ورا يحيي تركب ورا و هو يركب قدام و يسوق
……………………..
فى شقه محمود
زينب قاعده بتذاكر و حاطه الهيد فون باب الشقه يخبط ما تسمعش الجرس يضرب ما تسمعش يبدا الباب يرزع جامد تحس تقوم تلبس الاسدال و تروح تقف ورا الباب
زينب / مين
يحيي / انا ... يحيي ... اللبسي رايحين مشوار
زينب / مشوار ايه دلوقت لا مش هاجى و هتصل بماما اقولها على فكره
يحيي / الاوتوبيس عمل حادثه
زينب / ايه قله الادب دى على فكره و الله مش هتعدى على خير
يحيي / انا مش بكدب اتصلوا بيا و بلغونى ... انا همشي خليكي هنا
زينب تسمع صوت رجلين على السلم تجرى تفتح البلكونه تلاقيه بيركب العربيه و يمشي زينب تروح تتصل بمامتها غير متاح تتصل بمحمود واحد يرد
زينب/ الو السلام عليكم عمو محمود يحيي
راجل / انا مش استاذ محمود
صمت
الراجل/ انا اسف جدا بس ... الاستاذ محمود توفى فى العنايه من خمس دقايق
زينب تقفل و تتصل بمامتها غير متاح تتصل تانى غير متاح تفضل تتصل و تتصل و تبدأ تعيط و هى عماله تحاول تتصل و كل ما يقول غير متاح تتصل تانى و تعيط اكتر تتصل بخالتها
زينب / خالتوا اللحقيني ... اللحقيني ... اللحقيني
...........................
فى شقه سعيد
سعيد بيلبس و ساميه بتساعده
ساميه / البت لو سابت الشقه و راحت لخالتها الواد هيحط ايده عليها و مش هتعرف تعتبها لازم تفهمها و تنصحها
سعيد / دا وقته يا ساميه
ساميه / يا ابنى افهم هى ماتت و هى مراته يعني ليها تمن الشقه و مين يورث التمن ده بقي زينب انت عارف الشقه دى تسوى كام
سعيد / مش وقته مش وقته
سعيد ينزل يجرى على السلم و ساميه تقفل الباب
.................
فى المستشفي
ايمان / انت بتقول ايه يا ممدوح 
ممدوح  / بقولك تروحى مع بنت اختك و تباتى معاها فى شقتها يا ايمان
ايمان / يا ممدوح  ابوس ايدك مش وقت هبل دول لسه ما اندفنوش
ممدوح / اختك حكتلك على اللى الحيزابونه عملته و قالته الناس دى مش هتنول بنت اختك جنيه من ورثها
ايمان / البت منهاره يا ممدوح  البت خسرت امها و حتى الواد يا كبدى بقي لا ام و لا اب واقف
لا فارق معاه لا شقه و لا ورث و انت اللى
ممدوح  / مش انا و الله ما انا و لا هاخد منها جنيه فى جيبي و لا حتى لولادى اختك باعت عفش بيتها كله و اتنازلت للغندور طليقها عن نفقه البت يعني حرفيا البت بقت سليطي مليطى لو الوليه اللى اسمها رانيا دى ما لاقتش حد يقف لها هتاكل البت و تقرقشها
ايمان/ سعيد جاى هناك اهو
سعيد يدخل زينب تشوفه تجرى تترمى فى حضنه و تعيط رانيا تقوم تروح ناحيه يحيي اللى متابع اللى بيحصل بحزن و صمت
رانيا / هو ده ابوها و لا ده مين
يحيي / ما اعرفش
رانيا / كان قلبه حاسس كان مستعجل على كل حاجه و بيرتب كل حاجه بشكل مبالغ فيه كأنه... كانه حبها لدرجه انه عاوزها معاه فى الجنه
يحيي يبص لرانيا
رانيا / طول عمره طاهر و قلبه ابيض و قريب من ربنا
يحيي / ربنا يرحمه
رانيا / انا عارفه ان الدنيا بينكوا ما كانتش احسن حاجه بس
يحيي/ كل اللى فى دماغى دلوقت كل مره حاول يكلمنى فيها و قفلته
يحيي يعيط
يحيي/ شكله امبارح و هو بيحلف لى انه اخر طلب هيطلبه و انه نفسه ناكل سوا ... شكله كان حاسس فعلا ان ده اخر طلب و ان دى اخر مره ناكل سوا
رانيا / مات راضي و مبسوط  ربنا يبارك فيك انت بقي ... ولد صالح يدعوا له
يحيي يهز راسه على  يدخل
على / مش هيسلمونا حاجه النهرده بكره
رانيا / طب روح انت عشان البنات
يحيي/ روحى معاه يا عمتى وجودك هنا ما لوش لازمه روحى و على تليفون
رانيا / و انت مش هتروح ؟
يحيي / هخليني هنا يمكن يطلبوا حاجه او يحتاجوا حاجه روحوا انا تمام
على / انا هروح دار المناسبات اسأل و احجز عشان الناس اللى بتسأل عن العزا
يحيي يهز راسه
يحيي / روحى يا عمتى لو احتجت حاجه هكلمك روحى للبنات
رانيا / مش هاين عليا اسيبك
يحيي / روحى عشان تبقي قادره تقفى فى الدفنه و العزا احنا لسه قدامنا يوم طويل
رانيا تهز راسها و تحضن يحيي و تطبطب عليه و تمشي مع على  يحيي يروح ناحيه زينب
يحيي/ مش هنستلمهم النهرده لو تحبوا تروحوا ترتاحوا شويه انا هستنى و لو فى جديد هبلغكم
زينب / انا عاوزه اشوفها ما حدش راضي يخليني اشوفها
ايمان / يا قلبي لما ناخدها باذن الله هنغسلها و ابقي ادخلى شوفيها
ممدوح / بيتهيألي هنستلمها متغسله على الدفن على طول
زينب / انا مش همشي الا اما اشوف امى اللى عاوز يمشي يمشي انا هستنى جنبها هى حاسه بيا و هتبقى مطمنه اكتر و انا جنبها
رانيا / زينب
زينب تسيبهم و تروح تقعد على كرسي
ايمان / اعمل حاجه يا ممدوح
ممدوح / هعمل ايه يعني ... هروح اسأل حد حاضر
ممدوح يمشي و كل واحد يقعد فى جنب و يحيي عينه على زينب منهاره و ايمان جنبها و سعيد قاعد بعيد يطلع الموبايل و يفتح الفايس و يسكرول
.............................
فى الشقه بعد العزا بالليل
زينب قاعده منهاره و ايمان بتطبطب عليها و رانيا قاعده قدامها
رانيا / شدى حيلك شويه مش كدا
زينب / انا ما ليش غيرها
ايمان / اخص عليكي يا زينب امال انا روحت فين
زينب تقوم تدخل اوضتها و تقفل الباب وراها ايمان تقوم تخبط على الباب
إيمان / افتحى يا زينب افتحى يا قلبي ما ينفعش كدا يا بت افتحى يجرالك حاجه ... لا حول و لا قوه الا بالله يا رب
الباب يخبط رانيا تروح تفتح تلاقى ممدوح واقف
ممدوح / انا هروح عشان العيال خليكي معاها و لو احتجتوا اى حاجه كلميني
ايمان / تمام
ممدوح يهز راسه و ينزل يقابل على و يحيي طالعين
على / على فين
ممدوح / والله سايبين العيال من الصبح مع الجيران و كل شويه يكلموني هروح لهم
على / فى حفظ الله
ممدوح / تسلم ... شد حيلك يا يحيي
يحيي / الشده على الله
ممدوح يمشي
على / الراجل ده و الراجل التانى غراب جدا ما بفهمهمش
يحيي / مين التانى ده
على/ مش فاكر اسمه سعيد باين ابو زينب الراجل حضر ربع و خلع دا مش طبيعي و عمتك مش هتسكت و للاسف المرادى بجد بقى معاها حق
يحيي/ لا ابوس ايدك انا فعلا مش قادر لاى كلام لم الدنيا ارجوك
على / و هى عمتك دى حد بيقدر يلمها
يحيي يبتسم و يطلع و على وراه اول ما يحيي يوصل لباب اوضته رانيا تجرى عليه
رانيا/ عوزاك
يحيي / بكره يا عمتى و الله ما قادر من الصبح و انا على رجلى و لسه و الله بكره ورايا هم ما يتلم
رانيا/ طب ادخل عوزاك
يحيي يبص لعلى
رانيا / تعال هنا فى شقتك
يحيي / عمتى ... مش وقته بعدين بالله عليكي
رانيا / لا وقته اللى بيحصل ده ما ينفعش و ما يرضيش ربنا و انت عارف
على / طب اهدى و اصبرى يا رانيا مش وقته فعلا
رانيا / يا على انت ما تعرفش الناس دى قدى صدقنى مش هيجيبوها لبر
يحيي / تصبحي على خير يا عمتى
رانيا / يا ابنى افهم
يحيي / بعدين يا عمتى وعد هحل الدنيا دى و ابلغك
رانيا / مش هتقدر عليهم بطولك ... طول عصابه
يحيي / لو اتزنقت هديكى رنه
رانيا / اما نشوف اخرتها ماشي
رانيا تروح تجيب شنطتها و تبص لايمان متابعها من بعيد رانيا ترزع الباب وراها
رانيا / هجيلك بكره الصبح
يحيي / مش هبقي موجود
رانيا / هو فى ايه انت فاكرنى ابوك هتقعد تبعتنى يوم فى التانى
على / رانيا رانيا
رانيا / حقك عليا يقطعني و الله ما اقصد
يحيي يهز راسه و يفتح الاوضه و يدخل
رانيا/ هبقي اكلمك اطمن عليك
يحيي يهز راسه
على / يلا يا رانيا
على ياخد رانيا و ينزلوا يحيي يقفل الباب و يرمى نفسه على السرير و يفضل باصص للسقف الدموع تنزل من عنيه يمسحها و يقوم يقعد يسحب المصحف من على المكتب و يقعد يقرأ فيه
...........................
فى شقه زينب
زينب تفتح الباب و تيجي تروح الحمام تلاقي ايمان قاعده فى الصاله بتقرا قرآن
زينب / انتى هنا يا خالتوا ما روحتيش ؟!
ايمان / امشي ازاى و اسيبك لوحدك فى الحاله دى
زينب / انا كويسه الحمد لله ثوانى هروح الحمام و ارجع لك
ايمان تهز راسها زينب تروح الحمام ايمان تروح تجيب الموبايل و تبص على صور متصوره لورق فى المستشفي زينب ترجع
ايمان / تعالى يا زينب اقعدى جنبى
زينب تروح تقعد
ايمان / عامله ايه يا بنتى
زينب / الحمد لله بحاول استوعب ... جوايا احساس ان كل ده ما حصلش ... انها هتكلمنى تقولى انها وصلت و مبسوطه و ان مثلا نزلوا استراحه و تاهوا من الباص و سابهم مثلا ... بحاول اقنع نفسي انى مش هشوفها تانى بس مش قادره اقتنع مش راضيه اصدق
ايمان / لا حول ولا قوة الا بالله
زينب / بحاول برده ارتب الدنيا و هعمل ايه بس ... هو انا المفروض اعمل ايه ؟؟
ايمان / و لا اى حاجه
زينب / ازاى ... ماما اللى كانت بتعمل كل حاجه ... طب هروح فين ... عند بابا و لا عندك و لا هفضل هنا لوحدى ... هقدر اعيش هنا لوحدى
ايمان تبلع ريقها و تبص فى الموبايل و تبص لزينب
ايمان / مش هينفع تفضلى هنا يا زينب
زينب / عارفه... هعيش لوحدى ازاى يعني ... دا انا يوم سفرها كنت مرعوبه و لا لما يحيي خبط على الباب ... هو كان عاوز يقولى انهم عملوا حادثه بس انا ما صدقتوش و خفت منه ... أنا ما اعرفوش و لا هو يعرفني انا حتى عموا محمود الله يرحمه ما لحقتش اعرفه ... دا كان لسه بيقولى نفسي ابقي اب ليكي و اعوضك ... و ان فكرت اروح لبابا ... دا انا لما بزوره بس الدنيا بتتقلب عنده و مراته ... بحس انى ضيفه تقيله اوى ... حتى عليه ... كانى مش بنته ... عمرى ما حسيتها ... مش عارفه انا عملت ايه او حتى ماما عملت ايه ... بس هو ما بيحبناش ..  ما بيحبنيش
ايمان / سيبك منه تعالى اقعدى معايا انا
زينب / هبقي بعيد اوى عن الدروس اللى حجزتها ماما حجزت كل الدروس جنب البيت هنا ... دروس !!! دروس ايه ؟!! هروح شهر و بعدين مين هيدفع فلوس الشهر الجاى ؟! بابا ؟! هيرضي ؟!
زينب تتنهد
ايمان / انتى شايله الهم ليه كدا دا ربنا اللى بيرزق
زينب / و نعم بالله
ايمان / زينب انا عاوزه اقولك حاجه قبل ما تعرفيها من بره بطريقه وحشه
زينب تبص لايمان
ايمان / دعاء اتوفت قبل محمود بساعه
زينب / يعني ايه ؟! مش فاهمه ... تفرق فى ايه ؟
ايمان / يعني محمود هو اللى ورث معاكى فى امك مش العكس يعني انتى ما لكيش حاجه فى الشقه دى
زينب / شقه ايه انا ... انا ما بتكلمش عن الشقه انا ما اعرفش
ايمان / انا عارفه انك مش فاهمه لا فى مواريث و لا فارق معاكى ورث بس الشقه دى بتاعه يحيي دلوقت ما ينفعش تقعدى فيها اصلا
زينب تفكر و تهز راسها
ايمان / و اكيد عمته مش هتسكت دى كانت عاوزه تفتح الموضوع امبارح و يحيي اللى سكتها و دخل اوضته من سكات بس هى مش هتسكت كتير ... خلينا نلم حاجتك و حاجه مامتك و تيجي عندى احسن
زينب تهز راسها
.................
فى الكليه
يحيي ماشي ناحيه العربيه مع صاحبه ( يس )
يحيي / هقعد فى البيت اعمل ايه انا بس هروح اكل لقمه و اقابلك فى المكتب
يس / يا ابنى الدكتور بنفسه قالك خد وقتك انت غاوى سحله
يحيي / صدقنى انا دلوقت محتاج الشغل اكتر من اى وقت تانى
يس / ليه ما عكش فلوس و لا ايه قول بجد انت عارف اخوك ... صحيح كحيان بس اتصرف عادى
يحيي / يا ابنى هى الدنيا كل حاجه فلوس و بس
يس / اه فلوس و بس هو لو ما كانتش فلوس كان حد نزل من بيته اشتغل يا ابنى الاكل بفلوس اللبس بفلوس العلاج بفلوس دا النفسيه بفلوس
يحيي / و الله ما قادر اجادلك ها تحب اعديك على المكتب فى طريقي و لا هتروح الاول
يس / لا عديني طبعا و ابقي اكل اى حاجه هناك انت عارف عشان اروح و ارجع المكتب هصرف كام مواصلات يا ابنى احنا بنكح تراب
يحيي / طب تعال اركب
يس يركب العربيه و يحيي يسوق و يمشوا
.....................
فى اوضه ايمان
ايمان/ لو سمحت مش وقته
ممدوح / ما هو ده لو وضع مؤقت كنت سكت لكن انتى عارفه ابوها اكتر منى هينام فى الخط و الحمل كله هيبقي علينا و انا على يدك مكفيكوا بالعافيه
ايمان / ربنا هيبعت ليها رزقها
ممدوح / يا حبيبتي و نعم بالله بس ربنا عرفوه بالعقل و دى ثانويه عامه و اختك على يدك راحت اتجوزت عشان مش قادره تدفع الدروس و باعت عفش البيت و ما نعرفش ودت الفلوس فين يعني حرفيا جنطت البت قبل ما تموت
ايمان/ يا ابنى ما ايمان ليها معاش
ممدوح / انتى بتسمى الملاليم دى فلوس
ايمان / على الخمسميه جنيه اللى سعيد هيدفعهم
ممدوح / مش هيدفع دا كان مدوخ اختك مش هيدوخنا احنا
ايمان / ممدوح ابوس ايدك البت تسمع نفسيتها مش ناقصه
ممدوح / انا مش هقدر اتحمل مصاريفها
ايمان / و هى كلفتك ايه غير لقمتها بس
ممدوح / يا سلام بقولك ثانويه عامه ثانويه عامه ثانويه عامه ما بتسمعيش و بعدها كليه و لبس كليه و مواصلات الكليه يا بنتى احنا ناس على قد حالنا
ايمان / يا اخى دا انا و كافل اليتيم
ممدوح / يعني يبقي ابوها عايش و اكفلها انا طب ليه
ايمان / عشان خاطرى
ممدوح / انا هتصل بسعيد دلوقت يجي ياخدها و دا أخر كلام عندى
ايمان / ممدوح
ممدوح / انا ما عنديش إمكانيات يا ايمان و الأولى كان قبل ما تجرى تلمى هدمتين اختك و بنتها و تفضي للبيه الشقه كنتى تسالي فلوس العفش بتاع شقه اختك راحت فين و تاخديها اهم كانوا نفعوا البت و لا حاجه
ايمان / هبقي اتصل بيه اتكلم معاه
ممدوح / بانهى وش الاول كانت الشقه تحت ايدك و بتتكلمى من مركز قوه انما دلوقت هو جوه و انتى بره و ادى دقنى لو رد على تليفونك حتى
ايمان / انت عاوز منى ايه بس
ممدوح / انتى اللى عاوزه منى ايه انتى مش حاسه بالغلا اللى احنا فيه ما تتقر ربنا فيا بقي دا انا بعد الايام على اول الشهر فوقى
ممدوح يسيب الاوضه و يطلع يلاقى زينب واقفه بصاله
ممدوح / انتى ليكي منى خمسميه جنيه و دا أخرى كل شهر خديهم و اديهم لابوكى هو اولى بيكي مش العكس يرميلى هو خمسميه جنيه و انا اطفح الدم اكتر ما انا طافح
ايمان/ خلاص بقي يا محمود ارحم مش كدا
ممدوح يبص لها و يمشي و يرزع الباب ايمان تروح تحضن زينب بتعيط
........................
فى شقه يحيي
يحيي يطلع شايل اكل يضرب الجرس ما حدش يفتح يضرب تانى تالت
يحيي/ ابو السماعات اللى هتقرف الواحد فى عيشته بقي
يحيي يضرب الجرس جامد مفيش صوت يطلع الموبايل يدور فى النمر
يحيي / هو انا ما سجلتهاش و لا ايه
يحيي يفتح باب اوضته و يدخل يحط الاكل و يفتح الدرج و يطلع موبايل ابوه محطوط فى كيس يقعد على السرير و يفتح الكيس و يطلع الموبايل و يفتحه و يدور فى النمر لحد ما يلاقى رقم بنتى يحيي يتنهد و يتصل
يحيي / السلام عليكم
زينب/ و عليكم السلام ... يحيي ؟!
يحيي / انا جبت اكل و بضرب الجرس من بدرى افتحى خدى الحاجه
زينب / انا مشيت
صمت
يحيي / هتتاخرى ؟ انا قدامى ساعه و نازل لو هتتاخرى افتح بالمفتاح الاستبن و احطهولك فى التلاجه عندك وقت ما ترجعى سخنيه و كلى لانى مش هرجع الا متأخر هروح المكتب و بعدين هروح عند يس صاحبى نذاكر
زينب / انا مشيت
يحيي / فهمت هترجعى امتى
زينب / انا مشيت خالص
صمت
يحيي / تمام
زينب / خالتوا عوزاك
يحيي / تمام
ايمان / ايوه يا يحيي يا حبيبي ازيك عامل ايه
يحيي / انا كويس الحمد لله انا كنت جايب اكل لزينب و لما مفتحتش اتصلت من موبايل بابا لانى ما كنتش مسجل رقمها انا اسف على الازعاج
ايمان / لا يا حبيبي ما فيش ازعاج و لا حاجه انا بس كنت عاوزه اتكلم معاك فى حاجه بس انا عارفه انه مش وقته بس
يحيي / لا لا مفيش مشكله خير
ايمان / انت عارف ان دعاء باعت عفش بيتها كله و الفلوس دى هى اللى باقيه لزينب انا عارفه انه مبلغ مش كبير بس
يحيي / انا ما اعرفش اى حاجه عن الموضوع ده غير ان العفش اللى فى الاوضه بتاعتى كان بتاع زينب فلو حضرتك عوزاه او عاوزه تمنه مفيش مشكله ... لو حضرتك عارفه المبلغ اللى طنط دعاء دفعته انا هجيبه لحضرتك مفيش مشكله برده
ايمان / انا ما اعرفش المبلغ كان كام بالظبط للاسف والدك اللى كان واقف مع دعاء يوميها هو اللى جاب الناس و هو اللى حاسبهم محمود الله يرحمه كان شاطر و الناس كلها كانت بتحبه و بتجامله و ما كانش بيخلى حد من اللى حواليه يتعب فى اى حاجه يقدر يعملها بنفسه فبجد انا شخصيا ما اعرفش المبلغ كام بالظبط و الله و صدقنى محرجه جدا و انا بكلمك دلوقت
يحيي / مفيش حرج فى الحقوق و اكيد زينب اولى بكل جنيه ..  انا هحاول ادور يمكن الاقى بابا كاتب اى حاجه هنا و لا هنا هو كان بيكتب كل حاجه و هكلم حضرتك تانى
ايمان / ربنا يكرمك يا ابنى
يحيي / هستاذن حضرتك اقفل
ايمان / فى حفظ الله
يحيي يقفل السكه و يطلع المفتاح و يفتح الشقه و يدخل يبص على الحيطان بحزن
......................
فى شقه زينب
ممدوح / ما تقوليش ظروفى و بيتي دى بنتك انا مش بدبسك فيها انت خلفتها و انت المسؤل عنها
سعيد / و انا ما اتاخرتش
ممدوح / انت عاوز تنقطنى يا عم انت مش مركز و لا ايه دعاء ماتت دعاء اللى انت كنت بترميلها خمسميه جنيه كل اول شهر و رامى طوبه البت و هى شايله كل حاجه تانيه ماتت مستوعب و لا ايه بنتك محتاجه مكان تعيش فيه محتاج اكل و شرب و لبس و دروس
سعيد / و هى كانت يعني بتاخد دروس طول عمرها ما هى طول عمرها
ممدوح/ بلاها الدروس بلاها تعليم خالص
ايمان / انت بتقول ايه يا ممدوح
ممدوح / بنته و هو حر فيها يعلمها يجوزها يعمل ما بداله المهم انها ملزومه منه
ايمان / هو انتوا ما فيش دم خالص البت سمعاكوا
ممدوح/ قولت ايه يا سعيد
سعيد / قولت انى ما اقدرش اخدها عندى اقول اكتر من كدا ايه انا فى رقبتى اتنين غيرها و امهم و عليا ديون و أقساط اجيب منين يعني اسرق
ممدوح/ انا مالى يا عم انت ابوها مش انا
ايمان/ حسبي الله و نعم الوكيل حسبي الله و نعم الوكيل يا رب خدنى يارب
سعيد / طب بص انت قولت منك خمسميه و انا منى خمسميه ايه هتاكل و تشرب باكتر من ألف فى الشهر
ممدوح / ماشي ما تقول لنفسك انا مالى
سعيد / ما انا ما اقدرش اخدها عندى قولتلك
ممدوح / خلاص ارميها فى ملجأ
ايمان تقوم و ترقع بالصوت
ايمان / يا لااااااااااااهوى
ممدوح / اكتمى بدل يمين بالله ما تبانى على زمتى الراجل الناقص ده كان ذالل اختك طول السنين دى يا تقبل يا ياخد البت و لما جت تتجوز يا تتنازل عن نفقه البت يا ياخدها انا مش دعاء خليه ياخدها خليه يشيل قرفه
ايمان تطلع بره تدور على زينب تلاقيها قاعده فى اوضه على السرير و حاطه السماعات فى ودانها و بتتفرج على فيديو تعليمي ايمان تمدد جنبها فى السرير و تاخدها فى حضنها و تفضل تعيط زينب تفضل مركزه فى الشاشه و ما تهتمش
سعيد / طب بص انا فى واحد صاحبى بياجر شقته للطلبة المغتربين ايه رايك نخليها تقعد معاهم
ممدوح / ما يخصنيش انا كتر خيرى اوى انى هتصدق على بنتك بالخمسميه جنيه
سعيد/ ما هى الاوضه دى بفلوس يا ممدوح
ممدوح / انا مالى امى انا هى بنتى و لا بنتك انا مالى
سعيد / ايوه بس
ممدوح / انا قولت اللى عندى و لو كترت فى الكلام حتى الخمسميه جنيه دول هقولك بيتي اولى بيهم و اسيبلك بنتك بشنطه هدومها على باب بيتك و افرج عليك الجيران انت فاهم و لا لا دى بنتك يا نطع
سعيد / دى اخرتها يعنى ؟
ممدوح/ لا يا حبيبي دا اولها و لسه عندى كتير انا هروح الشغل عندك و اجرسك و مش هسيب حته فيكي يا بلد و لا حد يعرفك الا اما افضحك عنده انا مش دعاء هلمها و اقول طول ما البت فى حضنى انا راضيه انا اساسا البت ما تهمنيش فى حاجه انت فاهم و لا لا
سعيد / انا ما عنديش
ممدوح / مش مشكلتى انت ايه ما بتفهمش
جرس الباب يضرب ممدوح يتنهد و يروح يفتح يلاقي يحيي
ممدوح / خير اؤمر
يحيي / انا اسف على التأخير بس و الله كان غصب عنى
ممدوح / مش فاهم
ايمان تطلع من الاوضه
ايمان / ازيك يا يحيي تعال اتفضل ... وطوا صوتكوا بقي كفايا فضايح
ممدوح / انا قولت اللى عندى و الموضوع خلص ياخدها فى ايده و هو ماشي
ايمان/ اجيب لك ميكروفون تفضحنا اكتر من كدا
ممدوح يدخل اوضه زينب و ايمان تشاور ليحيي يقعد
يحيي / انا حاسس انى جيت فى وقت مش مناسب
ايمان تتنهد
ايمان/ الناس معدنها الاصلى ما بيبانش غير وقت الشده واضح ان كل اللى حوالينا صفيح ... الحمد لله طمنى انت عليك
يحيي / انا لقيت فى كشكول بابا المصاريف زينب ليها عندى عشرين ألف جبتهم لها معايا
ايمان تعيط
يحيي / انا اسف و الله بس هو ده اللى مكتوب لو فى حاجه منسيه بلغيني ... اااه الاوضه اللى عندى؟ ..  انا ما اعرفش هى بكام تمنوها عادى و لو عاوزين تاخدوها عادى برده
سعيد يطلع من الاوضه
سعيد / انا كلموني عاوزينى ضرورى هروح مشوار ساعه صد رد و هرجع على طول
ممدوح يطلع من الاوضه
ممدوح / استنى... بنتك لمت حاجتها و جاهزه
سعيد / يا ممدوح
ممدوح / خلصنا ... خلصى يا زينب ابوكى مستعجل و عاوز يمشي
يحيي يقوم يقف
ايمان / عندنا ضيف يا ممدوح كفايا فضايح
ممدوح / انا لسه ما بداتش الفضايح و لاخر مره بقولك ما تدخليش يا ايمان
ايمان / يا جدعان دا الست جتتها ما بردتش اتقوا الله
زينب تطلع لابسه و شايله شنطتها
ايمان / لو زينب مشيت همشي معاها يا ممدوح
ممدوح / الباب اللى يودى و يمين بالله يا ايمان لو رجلك عتبت باب الشقه ما انتى دخلاها تانى
زينب / خلاص يا خالتى انا ماشيه كدا احسن للكل عمو ممدوح معاه حق انا اصلا ما كنتش فضيت هدومى و جاهزه مفيش مشكله
سعيد / طب نقسم البلد نصين
ممدوح / و لا نصين و لا تلتربع خلصت يا سعيد بيه بنتك عندك انت اتكفل بيها و ادى يا بنتى الخمسميه جنيه دول و ليكي عندى زيهم كل اول شهر و كدا عدانى العيب و ازح
ممدوح يدى لزينب الفلوس و إيمان واقفه بتعيط
يحيي / انا اسف انى بدخل بس ... هو ليه كل ده
ممدوح/ معلش فكرنى انت كنت جاى ليه اصلا
ايمان / كان جاى يطمن على زينب و ماشي كتر خيره جت من الغريب ما جاتش من القريب واحد يعرفها بقاله يومين و انتوا تعرفوها من يوم ما وعيت على الدنيا... حسبي الله و نعم الوكيل... حسبي الله و نعم الوكيل فيكوا
ممدوح / من هنا للصبح حسبي الله و نعم الوكيل فى كل واحد بيخلف و يرمى هو ابوها مش انا
سعيد / يا سيدي خليها بس يومين لحد ما أدبر لها مكان اقسم بالله مراتى ما هتدخلها البيت هتخرب بيتي
ممدوح / مش احسن ما اخرب بيتي انا ... ما تسترجل كدا و تمشي كلمتك فى بيتك هى مراتك دى اهم عندك من بنتك دا انت نطع صحيح
سعيد / كتر خيرك ... يلا يا زينب
زينب تشيل شنطتها و تنزل سعيد ينزل وراها يحيي متابع اللى بيحصل
يحيي / بالنسبه ل
ايمان / هبقي اكلمك اطمنك اول بأول تسلم يا ابنى روح انت دلوقت
يحيي يبص لايمان و يهز راسه و ينزل ممدوح يقفل الباب
ممدوح / انا بحب زينب زى عيالي بالظبط و عارف ان اللى عملته وحش و انك شيفانى بقرون و نياب دلوقت بس اقسم بالله دا التصرف الصح مع واحد زى سعيد ده حتى لو جيت على زينب شويه
ايمان / شويه !! ربنا ما بينساش حد لا هينسي زينب و لا هينسى اللى عملناه فيها انا داخله انام
ايمان تسيب ممدوح و تدخل الاوضه ممدوح يتنهد
......................
فى الشارع
سعيد واقف بيتصل بحد فى التليفون و زينب واقفه وراه و شنطتها على الارض قدامها
سعيد/ ما بيردش
سعيد يبص على زينب بصاله
سعيد / انا لو عامل حسابي من بدرى كنت اتصرفت خالتك ما ادتنيش فرصه ما دام مش هتستضيفك عندها سيبتك بيتك ليه
زينب / عشان مش بيتي
سعيد يضرب كف على كف و يحاول يتصل تانى يحيي يطلع من المبنى
يحيي / معايا عربيه تحبوا اوصلكوا اى حته
سعيد / ايوه يا كريم ايه يا عم بكلمك من الصبح ... لا يا عم الله يعينك حقك عليا لو كنت بكلمك فى وقت زى ده بس كنت عاوز اسال عن الاوضه اللى كلمتك عنها ... الف جنيه !! ليه يا عم امال لو شقه لوحدها بكام ... عارف يعم انها جنب الجامعه بس انا مش فارق معايا الجامعه فى حاجه ... لا حول و لا قوه الا بالله... طب ما تشوف كدا لو ينفع تهزها شويه ... خالص ... طب ما تعرفش حد يشوفلى حاجه حنينه شويه ارخص شويه ... اوضه بحمامها فى اى حته  .. لا يا عم دا انا عاوزها دلوقت بكره الصبح ايه
يحيي / عندى اوضه بحمامها لو يناسبك
زينب تبص ليحيي
سعيد / بجد !!
يحيي / بخمسميه جنيه فى الشهر و فى منطقه كويسه
سعيد / كويس اوى فين
يحيي / فى بيتنا اوضه بحمامها مفروشه كمان
سعيد / تبقي عملت فيا جميل العمر و هدفعلك شهرين مقدم كمان
يحيي / ماشي ... اتفضل
يحيي يشاور على عربيته و يمد ايده ياخد الشنطه من زينب و يروح يحطها و زينب تركب و سعيد يلف و يركب و يحيي يسوق
يحيي / هستاذنك نقف عند اى مكتبه اشترى نسخه عقد عشان نروح نشرب الشاى و نكتب العقد و نتفق على باقي التفاصيل
سعيد / صدقنى مش هنختلف
سعيد يطلع فلوس من جيبه و يعد الف جنيه و يديها ليحيي
سعيد / و من غير عقد خالص كمان هو انت غريب دا انت فى مقام اخوها الكبير
زينب تبص على سعيد و هو مبسوط جدا يحيي يركن جنب مكتبه و ينزل سعيد يطلع خمسميه تانين و يديهم لزينب
سعيد / خدى دول خليهم معاكى و اول كل شهر هجيب لك زيهم و لو ما كفوش كلمى خالتك هتبعتلك هى كمان زيهم و لما الشهرين دول يعدوا هكون دبرت جمعيه و قبضتها الاول ادفع إيجار سنه قدام و سبتلك مصروف يكفيكي السنه كلها مره واحده عشان ما يبقاش فى نفسك حاجه
زينب تبصله و هو مبسوط جدا و متحمس يحيي يركب و يسوق
............................