((((( زينب )))))
#لولو_محمد
الحلقه الثالثه
يحيي / عندى اوضه بحمامها لو يناسبك
زينب تبص ليحيي
سعيد / بجد !!
يحيي / بخمسميه جنيه فى الشهر و فى منطقه كويسه
سعيد / كويس اوى فين
يحيي / فى بيتنا اوضه بحمامها مفروشه كمان
سعيد / تبقي عملت فيا جميل العمر و هدفعلك شهرين مقدم كمان
يحيي / ماشي ... اتفضل
يحيي يشاور على عربيته و يمد ايده ياخد الشنطه من زينب و يروح يحطها و زينب تركب و سعيد يلف و يركب و يحيي يسوق
يحيي / هستاذنك نقف عند اى مكتبه اشترى نسخه عقد عشان نروح نشرب الشاى و نكتب العقد و نتفق على باقي التفاصيل
سعيد / صدقنى مش هنختلف
سعيد يطلع فلوس من جيبه و يعد الف جنيه و يديها ليحيي
سعيد / و من غير عقد خالص كمان هو انت غريب دا انت فى مقام اخوها الكبير
زينب تبص على سعيد و هو مبسوط جدا يحيي يركن جنب مكتبه و ينزل سعيد يطلع خمسميه تانين و يديهم لزينب
سعيد / خدى دول خليهم معاكى و اول كل شهر هجيب لك زيهم و لو ما كفوش كلمى خالتك هتبعتلك هى كمان زيهم و لما الشهرين دول يعدوا هكون دبرت جمعيه و قبضتها الاول ادفع إيجار سنه قدام و سبتلك مصروف يكفيكي السنه كلها مره واحده عشان ما يبقاش فى نفسك حاجه
زينب تبصله و هو مبسوط جدا و متحمس يحيي يركب و يسوق
............................
فى اوضه يحيي
سعيد / و الله حلوه و فيها كل حاجه حمام و سرير و تلاجه و مكتب هنحتاج اكتر من كدا ايه
يحيي / اتفضل بقي فى الشقه نمضي العقود
سعيد / اتفضل
يحيي يضرب جرس الشقه التانيه زينب تفتح يدخلوا
يحيي / استاذنك كبايتين شاى
زينب تروح المطبخ يحيي يطلع العقود
يحيي / هنكتب العقد باسم زينب باذن الله
سعيد / و ماله بس زينب قاصر هينفع
يحيي / هو حضرتك كنت بتسأل عن اوضه فى التليفون كانوا هيكتبولك عقد بيها ازاى
سعيد / لا دا حوار ودى كدا
يحيي / و لو جم فجاه و طردوها هتعمل ايه
سعيد / اكيد الدنيا مش سايبه للدرجادى يعني
يحيي / بس ممكن ... ممكن صاحب الشقه يجي فى نص الليل و يطرد اللى فيها هتقدر تقوله حاجه
سعيد / اكيد الناس دى ما بتسيبش بناتها على سفر من غير ضمانات اكيد كنت هسال و افهم
يحيي / امتى
سعيد / ما انت شايف كل حاجه جت فجاه و انا ما كنتش عامل حسابى
يحيي / طب انسي العقد ... دى وصولات امانه
سعيد / ايه !!!
يحيي / كل وصل بخمسميه جنيه مترخ ... كل شهر تجيب ليا الفلوس تاخد الوصل
سعيد / ايوه بس
يحيي / ما انا لازم اضمن حقى
سعيد / و انا اضمن حقى ازاى
يحيي / يعني مامنى على بنتك مش هتامنى على وصولات امانه
سعيد يهرش فى دماغه و يبص على المطبخ
سعيد / انا كدا كدا كنت ناوى اعمل جمعيه و اجى اديك إيجار سنه كامله مره واحده و كدا كدا هديك إيجار شهرين قدام يعني ما لهاش لازمه الوصولات دى ما انت حقك واصلك
يحيي / تمام هنمضى وصولات السنه و لما حضرتك تجيب الجمعيه استلمهم
سعيد / دا مساله كام يوم ارتب اموري
يحيي / و ترتبها ليه ما هى مترتبه اهى و لتانى مره بكررها على ودانك ... انت هتمشي و تسيب بنتك امانه معايا وصولات ايه اللى تخاف منها
سعيد يبص ليحيي باصص له بقرف مش قادر يداريه سعيد يهز راسه يحيي يطلع دفتر وصولات و يديه لسعيد سعيد يكتب و يمضي
يحيي/ ثوانى هنادى على مجدى و عم علاء جيرانا يمضوا شهود
سعيد / الله هندخل غرب بينا ليه طيب
يحيي/ الحق ما يزعلش حد و بعدين هو انا هعمل ايه بالوصولات دى دا مساله كان يوم لحد ما تظبط الجمعيه و تجيب ليا الفلوس خدهم
سعيد يتنهد و يهز راسه يحيي ياخد الوصلات و يطلع بره الشقه زينب تدخل تحط الصينيه
سعيد / هاجى بكره باذن الله اجيب لك فراخ و لحمه و خضار خزين يكفيكي فتره مش ناسيكى يعني... ربنا وحده اللى يعلم الفلوس دى كانت آخر مليم فى جيبي لاخر الشهر بس ما يغلوش عليكي
زينب / كتر خيرك
سعيد/ انا مش وحش زى ما جوز خالتك حاول يفهمك انا بس ظروفى صعبه و الموضوع جه فجاه
زينب تهز راسها
سعيد / لو احتاجتى اى حاجه فى اى وقت كلميني و كدا كدا معاكى الف جنيه يسندوا معاكى شويه لحد ما اقبض الجمعيه و اجى اديكي الستلاف التانين ... سته ليكي و سته ليحيي
زينب / كتر خيرك
سعيد يشرب الشاى و زينب بتابعه تليفونها يرن تقوم تطلعه من الشنطه و ترد
زينب / ايوه يا خالتوا ... انا تمام الحمد لله ... لا فى شقه عموا محمود الله يرحمه ... يحيي اجر لبابا اوضته و كتبوا عقود باين ... لا ما قاليش حاجه ... اه بابا لسه هنا ... تمام هبقي اكلمك اطمنك ... تمام ... سلام
زينب تقفل و تحط التليفون قدامها يحيي يدخل يفرج سعيد على الوصولات
سعيد / باذن الله قريب اوى هتلاقينى بكلمك اديك فلوسك
يحيي / و انا فى انتظارك
سعيد / هتعوزى منى اى حاجه تانى يا زينب
زينب تبتسم بسخريه
سعيد / طب استأذن انا بقي لحسن اقسم بالله ورايا مشوار مهم و ماخره من بدرى ... لو عوزتي حاجه كلميني
زينب ما تردش سعيد يمشي يحيي يطلع من جيبه الالف جنيه و يحطها فوق الوصولات و يطلع ظرف فيه العشرين الف
يحيي / دول الالف اللى ابوكى دفعهم و دول العشرين الف تمن العفش اللى مامتك باعته و دة الوصولات اللى على ابوكى لما يجيب الفلوس خديها
زينب تبص ليحيي
يحيي / فى اكل فى التلاجه سخنى و كلى انا ما قولتلكيش امشي عيشي زى ما كنتى هتعيشى قبل ما بابا الله يرحمه يموت و انا فى الاوضه اللى جنبك لو احتاجتى اى حاجه ابقي كلميني
يحيي يقوم و يجى يمشي
زينب / ليه
يحيي / ادخلى اوضه بابا و افتحى درج الكومدينو هتلاقى موبايله شوفي مسجلك ايه و هتلاقى دفتر افتحى اخر صفحه و شوفى كاتب ايه ... تصبحى على خير
يحيي يمشي و يقفل الباب زينب تفتح الظرف و تطلع الفلوس و تستغرب و تروح الاوضه و تفتح الدرج تلاقى كشكول سلك كبير و قلم و موبايل تفتح الموبايل تكتب رقمها تلاقى متسجل بنتى تفتح الكشكول تلاقى مصاريف خضار و فاكهه و حسابات و فواتير تقلب الكشكول تلاقى قايمه طلبات طقم صيني و طقم شاى و ملايات و مفرش مطرز و اطقم حلل و اطقم كاسات و كل واحده قدامها سعرها و كل مجموعه معموله فى بند و مكتوب قدامها تاريخ للمستقبل زينب تعيط و تاخد الكشكول فى حضنها
زينب / ربنا يرحمك ...ربنا يرحمك و يغفر لك ربنا يرحمك
...................
فى اوضه يحيي
يحيي قاعد بيعيط و كل شويه يمسح دموعه تليفونه يرن يمسح وشه و ياخد نفسه و برد
يحيي / السلام عليكم يا عمتى ازيك
رانيا / ازيك يا حبيبي مال صوتك
يحيي / كنت نايم شويه خير اؤمرى
رانيا / جيت خبطت على الشقتين ما حدش فتح و اتصلت عليك بعتلى انك فى الكليه لما تخلص هتكلمنى و اتلخمت و انت ما كلمتنيش طمنى عليك
يحيي / انا زى الفل يا عمتى تسلمى
رانيا / اكلت؟!
يحيي / ايوه اكلت جبت فراخ مشويه برز و سلطات و اكلت و الباقي حطيته فى التلاجه
رانيا / هتعمل ايه مع الجماعه اياهم
يحيي / اجرت لهم الشقه
رانيا / ايه !! ازاى تعمل كدا يا يحيي ؟!
يحيي / عشان خاطر بابا يا عمتى عشان خاطر ابويا الله يرحمه لو كان عايش كان زمانه متكفل بمصاريفها لحد يوم جوازها
رانيا / و انت بقي ناوى تتكفل بمصاريفها لحد جوازها !! يا يحيي ربنا عرفوه بالعقل يا ابنى و اللى انت بتقوله ده ما فيهوش اى عقل خالص
يحيي / انا مرتاح للى بعمله ده و بعدين هو انا بصرف حاجه من جيبي ... انا عشت عشر سنين رافض اخد جنيه من ابويا و بشتغل و عامل نفسي راجل ... اكمل بقي ... هو اتجوز و جاب لنفسه بنت تعوضه عن قله ادبى ... انا كنت سافل اوى ... ما كنتش عارف ايه انه كان أعظم و احن اب فى الدنيا ... ربنا يسامحني بقي
رانيا / طب ممكن تهدى و ما تاخدش اى قرار انفعالي صدقنى يا يحيي ابوك
يحيي / انا مرتاح كدا يا عمتى و يا ستى لو حصل و لقيت بنت الحلال هبقي ابدل هديها هى الاوضه و اخد انا الشقه ايه مش هلاقي عروسه تقبل بواحد عنده شقه اوضتين و صاله كبيره و حمام و مطبخ يعنى اكيد هلاقي
رانيا / طب هى فين دلوقت
يحيي / فى الشقه جوه كل واحد قافل على نفسه
رانيا / طب ما فكرتش فى الناس اللى هتشوفها داخله خارجه ما فكرتش فى الناس هتقول عنها ايه
يحيي / انا اتكلمت من شويه مع الحاج علاء البقال و مجدى صبى القهوه و مضيتهم على الورق شهود و هم هيقوموا بالواجب و يقولوا لأهل المنطقه الوضع
رانيا / و انت فاكرها بالبساطه دى
يحيي/ ما حدش بيعجب كل الناس ... الناس دى كلها عارفه ان زينب تبقي بنت مرات ابويا و لما قولتلهم الجديد فى الوضع ما حدش منهم اعترض بالعكس كلهم دعولى ربنا يباركلى و يجعله فى ميزان حسناتى اهو فين المشكله بقي
رانيا / طب انا عاوزه اجى اطمن عليك
يحيي / تمام بكره بعد الكليه هعدى على حضرتك اعمليلى بقي لقمه حلوه من ايديكى
رانيا / عنيا يا قلب عمتك
يحيي / هستاذنك انام عندى محاضره الصبح بدرى
رانيا / تصبح على خير يا قلبي... فى حفظ الله
يحيي يقفل الخط و ينام
...................
فى شقه زينب
زينب بتتكلم فى التليفون
زينب / التلاجه اصلا مليانه اكل و هو كان جايب اكل النهرده محطوط بلفته فى التلاجه
ايمان / طب عاوزين نروح نسال عن الورق بتاعك نشوف هيطلعلك حاجه و لا ايه الجنيه هيفرق معاكى الفتره الجايه
زينب / ما اعرفش بس انا عندى دروس بكره و مش عارفه الدنيا هتمشي ازاى
ايمان / مشيها زى ما كنتى مرتبه نفسك و انا هروح اسأل و اشوف الورق و كل حاجه و اللى هعرف اعمله هعمله و اللى مش هعرف اعمله هبقي عرفت ورقه و سكته نخلصه يوم تانى
زينب / تعباكى معايا
ايمان / انتى !! دا انتى الوحيده اللى مريحانى فى كل اللى حواليا قبل ما تروحى بكره كلميني هجيب النجار و قفلين كبار و نيجي نركبهم لك النهرده ادخلى اوضتك و اقفلى عليكي الباب و اقفلى الباب بالمفتاح تكتين برده
زينب / عملت كدا
ايمان / جدعه ... على فكره انا الواد يحيي ده مرتحاله و حساه طيب زى ابوه و امك كانت بتقول عليه شعر بس اهو الأمان ما يضرش
زينب / تمام
ايمان / هجيلك بكره و هجيب لك خزين و حاجات برده
زينب / و الله عندى كل حاجه
ايمان/ ما يضرش املى الفريزر و اسحبى على قدك
زينب/ تمام ماشي
ايمان / بقولك ايه انتى مش ابوكى كان عاملك حساب فى البنك بيحول لك عليه الخمسميه جنيه
زينب / اه بس الكارت كان مع ماما و ضاع مع موبايلها و حاجتها فى الحادثه
ايمان/ سهله كلمى ابوكى يروح معاكى يوم يطلعلك واحد جديد و قوليله عشان اريحك من المرواح و المجى و تحولى عليه الفلوس اول بأول و ما تقوليلوش انك هتحطى فيه الفلوس ابقي اروح انا احطهالك إيداع فى اى يوم تانى
زينب / ما اسيبهم هنا و خلاص
ايمان / انا بقول لحسن ... ماشي اريح بس خليهم فى حته امان ما تسبيش حاجتك مكشوفه و لا باينه ما حدش عارف
زينب / حاضر
ايمان / روحى ارتاحى و هكلمك بكره اطمن عليكي تانى
زينب / حاضر ... تصبحى على خير
ايمان / و انتى من اهله يا قلب خالتك ربنا ما يحرمنى منك
زينب تقفل و تحط الموبايل فى الشاحن و تنام
.....................
تانى يوم الصبح
زينب تفتح باب الشقه فى نفس الوقت اللى يحيي بيفتح فيه بابه
يحيي / صباح الخير
زينب / صباح النور
يحيي / رايحه لخالتك اوصلك ؟
زينب / الدروس هبدا النهرده
يحيي / تمام خليني اوصلك ما دام اول مره لحد ما تحفظى المنطقه
زينب / اتمشيتها مع ماما كذا مره و جيت معاها و هى بتحجز
يحيي يبص فى الساعه
يحيي / طب انا لسه قدامى وقت تعالى اوصلك اطمن عليكي برده
زينب تبتسم
يحيي / فطرتى ؟
زينب / ايوه و اخدت سندوتشات عشان ورايا كذا درس ورا بعض
يحيي/ تمام كويس
زينب / فطرت انت ؟ معايا سندوتشات زياده لو عاوز
يحيي / شربت قهوه بفطر مع يس صاحبى فى الكليه لو خونته بيتقمص و يقلبها نكد
زينب تبتسم يحيي يشاور لها تنزل تهز راسها و تسبقه يقفل باب الشقه و يحصلها يحيي يفتح العربيه زينب تركب و يحيي يسوق
يحيي / اوصفيلى الطريق بقي عشان انا مش عارف
زينب / اول درس انجليزى عند مس ماريان منصور
يحيي / دى حبيبتي عارفها دى ... هتخلصى اليوم الساعه كام ... انا هتغذى النهرده عند عمتى فعايز اطمن ان عندك اكل
زينب / فى اكل كتير فى البيت تسلم
يحيي / تمام لو احتاجتى حاجه رقمى عندك مش انتى سجلتيه ؟
زينب / ايوه مسجلاه
يحيي / تمام ... وصلنا ... ناقصك حاجه معاكى مفتاح الشقه و الموبايل و الفلوس ؟
زينب تبص له مستنى رد زينب تفتح الشنطه و تتأكد و تهز راسها يبتسم زينب تنزل يحيي يمشي
.......................
فى الكليه عند يحيي
يس / و الله ما فاهمك فى حد عاقل يدبس نفسه تدبيسه زى دى و لا فاكر ان ابوها هيصدق و يسد الوصولات بمجرد ما يعرف انك اديتها الفلوس
يحيي / يمين بالله احبسه و لا يهمنى ... انا اصلا كان نفسي اضربه اوى امبارح
يس/ يحيي !! ابن الناس المؤدبين الهادى اللى ما بيطلعلوش حس هيتخانق و يضرب كمان لا دا شكل الموضوع كبييير بقي
يحيي / الراجل كان مستفز كدا يا يس مستفز بجد الراجل مش فارق معاه اى حاجه غير ان بنته ما تروحش معاه دا انا قولتهاله فى وشه مرتين انت هتسيبلى بنتك الراجل ما اتهزش ... تعرف ايه اكتر حاجه وجعتني
يس / اكيد البت اليتيمه اللى اتذلت و اتمرمطت دى
يحيي / يعني بس كان فى اكتر
يس / ايه ؟!
يحيي / ابويا ... ابويا طلع راجل عظيم اوى و انا كنت ظالمه الراجل كان عامل جدول زمنى منظم جدا بالاسعار عشان يجهزها لا و الأكبر انه كان عامل حسابه فى نسبه تضخم
يس / محاسب بقي و فاهم هو بيعمل ايه
يحيي / ضحكت و عيطت اوى لما شوفت الدفتر بتاعه هو كان طبعه كدا منظم و بيكتب كل جنيه بيدخل هيتصرف فى ايه و كل جنيه صرفه فى ايه و البيت محتاج ايه و هيجيبه امتى كان طول عمره منظم لدرجه كبيره
يس / ربنا يرحمه
يحيي/ انا جيت عليه جامد اوى قسيت عليه لدرجه انى خليته يدور على غيرى يعيش معاه مشاعر الابوه اللى حرمته منها
يس / دى تدابير ربنا يا يحيي عشان البت دى ما تتبهدلش كل حاجه مترتبه حاجه بتسلم حاجه فصله الشقه و انه يجيبها تسكن فيها قبل ما يسافر
يحيي/ و انه يصمم انى اقعد معاه و يتحايل عليا اوى لحد ما أوافق كان حاسس و بيودعنى
يس / فى ناس بتقول فعلا ان الميتين بيحسوا بمعادهم ممكن كان حاسس فعلا
يحيي / هى الساعه كام ... قوم قوم هنتاخر على السيكشن و انت رغاى كدا و لتات و لما بتفتح ما بتقفلش قوم
يس / دا انا !! ايه خلصت حاجتى من عند جارتي خلاص خدتنى لحم و رميتني عضم يا فاجر
يحيي / على حسك كمان على حسك فرج علينا اللى لسه ما اتفرجش
يس / انت اللى بترغى و بتضيع وقت اهو ما تجيش تقول اتاخرنا
يحيي يضحك و يمشي مع يس
.................
فى شقه زينب
زينب بتتبل فراخ مع ايمان
زينب / دا كان مبهور بيا جدا و هيعمل الاسبوع الجاى امتحان شامل و بيقول فى جوايز و اتعرفت على بنتين هناك و اخدت رقمهم هنبقي نروح و نيجي سوا
ايمان / كويس
زينب / بس بتاعه الإنجليزى ما انبسطتش اوى المجموعه زحمه جدا دا الفصل فى المدرسه مش هيبقي فى العدد دا كله
ايمان / يعني زى قلتها و لا ايه
زينب / انا هكمل معاها الشهر كدا كدا فلوسه اندفعت و ربنا يسهل بقي
جرس الباب يرن
زينب / هروح افتح
زينب تروح تغسل ايدها و تلبس الاسدال تلاقى رانيا
زينب / ازى حضرتك
رانيا / انا بخير عرفت من يحيي انك قاعده هنا جبتلك شويه خضار و فاكهه معايا
زينب / ليا انا !!
رانيا / ليكي امال لمين
ايمان تطلع من جوه
ايمان / اهلا اهلا يا مدام رانيا اتفضلى تحبى تشربى ايه
رانيا تروح تقعد
رانيا / و لا اى حاجه انا مش هطول... يحيي كان بيتغدى عندى النهرده و زمانه يا قلبي بيسعى على اكل عيشه و اللى فهمته منه انه ناوى يكمل اللى ابوه نواه
زينب / انا ...
رانيا / يحيي عنده مشكله من إيام موت والدته و لسه ما قدرش يتجاوزها لحد دلوقت عشر سنين و اكتر و هو على حاله علاقته بابوه كانت زى الزفت و طبعا ندم لما ابوه مات فهو فاكر بقي باللى بيعمله ده بيكفر عن غلطته
ايمان / هو اه سمح لزينب تعيش فى شقته بس ... احنا اكيد مش هنستغله و لا هنرمى بنتنا و اديكي جيتي على غفله جيبالها خزين و اكل يكفيها شهر بحاله و بوضب معاها الحاجه عشان تركز فى دروسها و بالنسبه للمصاريف فالحمد لله زينب معاها مبلغ مش قليل يكفيها و يفيض و ابوها عاملها مصروف و انا عملالها مصروف يعني مش هنيجي على يحيي و لا نكلفه حاجه و باذن الله لما ربنا يفرجها هنسيب له شقته دى خالص انا عارفه ان ده اللى مضايقك
رانيا / انا ما فيش حاجه مضيقانى و لا مستفيده باى وضع يعني مش هاجى اعيش فى الشقه لو سبتوها و لا هاخد إيجارها فى جيبي لو أجرتوها منه و بعدين انا جايه اخد بالى من زينب معاكوا مش جايه اقول لكوا امشوا و باذن الله لو احتاجت اى حاجه انا برده موجوده ليها زى ما انا موجوده ليحيي
زينب / ربنا ما يحرمنا منك
رانيا / انتى يمكن مش بنت اخويا ... بس هو حبك من قلبه بجد ... و انا مش هسيبك
ايمان / ربنا يجعله فى ميزان حسناتك و يوقف لبناتك ولاد الحلال زى ما بتعملى مع زينب بالظبط
زينب / ها ما قولتيش تحبى تشربى ايه ... عندنا عصير فريش اجيب و لا تحبى اجيب لك حاجه دافيه نسكافيه شاى قهوه
رانيا / لا انا عاوزه ادوق قهوتك اللى بيشكروا فيها دى اما ادوق و احكم بنفسي
زينب / حالا ثوانى
زينب تروح المطبخ
ايمان / ربنا يفرح قلبك زى ما فرحتى البت اليتيمه دى
رانيا تبتسم
.........................
فى اوضه يحيي بالليل
يحيي يفتح باب الاوضه يلاقيها متروقه و الورق مترتب جنب بعضه و فى طبق ملفوف بالفويل يفتحه يلاقي اكل سخن
يحيي / دا سخن !!
يحيي يطلع الموبايل و يتصل
يحيي / السلام عليكم
زينب / و عليكم السلام انا اسفه انى دخلت من غير اذنك بس انا و الله ما نقلت حاجه من مكانها انا نضفت من على الوش كدا و لميت الورق فى جنب و كان فى كام غيار فى الحمام حطيتهم فى الغساله و لما تخلص هنشر و اكويهم و بكره تلاقيهم محطوطين جاهزين على اللبس
يحيي / ليه كل ده زينب انتى ثانويه عامه المفروض تتفرغى للمذاكرة
زينب / مذاكره و الله و النهرده خالتوا و عمتو رانيا جولى و رتبوا معايا اكل يكفي باقي الشهر مش الاسبوع بس و قعدت اذاكر و لما زهقت قولت اقوم اروق الدنيا و لقيت المفتاح الاستبن قولت اما ادخل ... بص انا عارفه ان المفروض كنت استاذن بس انا و الله و لا اخدت حاجه و لا حتى فتحت الإدراج انا نضفت و روقت من بره بس
يحيي / انا مش قصدى كدا انا قصدى انى بقدر اعمل الحاجات دى لنفسي فمفيش داعى ترهقي نفسك
زينب / مفيش إرهاق و لا حاجه بالعكس المهم اسيبك ترتاح انا عارفه انك لسه راجع كل لقمه و قولى رايك
يحيي / انا مش جعان اتعشيت قبل ما اجى بس هدوقه برده و اقولك رايي و اشيل الباقي فى التلاجه
زينب / تمام تصبح على خير
يحيي / و انتى من اهله
يحيي يقفل و يدوق و يقلع القميص و يرميه على الكرسي يقع على الارض يجرى يشيله يعلقه
يحيي / مش هتقول علينا معفنين يعني اتلم البت تعبت فى المكان
........................
بعد اسبوع الصبح
زينب تفتح باب الشقه تخبط على يحيي يفتح
زينب / كويس انى لحقتك
يحيي / فى حاجه و لا ايه
زينب تناوله كيس يبص فيه
زينب / خالتوا كانت عندى امبارح و جييالى فول مدمس فى البيت فعملتلك فطار انت و يس صاحبك مش كل مره تنزل من غير فطار هيعجبك ان شاء الله
يحيي / بجد !! تسلم ايدك ... مالك شكلك مش مظبوط فى حاجه و لا ايه
زينب / عندى امتحان فى الدرس و بيقولوا فى جوايز و بتاع و دى اول مره اتحط فى موقف زى ده انا ما كنتش باخد دروس معاهم من اول السنه و كدا يعني انت فاهم
يحيي / لا باذن الله هترفعى راسنا انا متاكد ... عندك غدى النهرده او ناقصك اى حاجه
يحيي يحط الكيس و يلبس الكوتشي
زينب / فى فراخ باقيه من امبارح هقطعها و اعملها نجريسكوا مش هتاخد وقت نص ساعه بالكتير و الاكل هيكون جاهز تخلص الكليه و تيجى تتغدى و بعدين تروح الشركه هبقي اسيب لك الاكل بتاعك فى الاوضه جوه
يحيي / لا ما تعمليش حسابى انا متفق مع صحابى اننا هنضرب شاورما سوا و احنا بنزاكر سوا بعد الكليه ... بقولك ايه انتى بتحبى الشاورما ؟
زينب / كل الناس بتحب الشاورما عادى يعنى
يحيي / طب ايه رايك لو حليتي كويس اعزمك على الغدى
زينب / طب و صحابك
يحيي / هاجى اوصلك و اجيب لك الغدى و ارجع لهم
زينب / هتتعب نفسك و مشاوير و بتاع و انا كدا كدا عندى اكل يعني مش حوار
يحيي / طب صوريلى نتيجه الامتحان و هجيب لك معايا و انا مروح تتعشي بيه
زينب / هو انت لازم يعني ترد السندوتشات فى ساعتها عملت انا الفطار تعمل الغدى عادى يعني ما تكلفش نفسك
يحيي ياخد الكيس وشنطه اللاب يقفل الباب
يحيي/ احنا كدا هنفضل نرغى لحد ما نتأخر هستناكى تبعتي صوره الامتحان هاتى حاجتك و حصليني خلينى اوصلك قبل ما امشي
يحيي ينزل زينب تدخل تجيب شنطتها و تقفل الباب و تنزل وراه
.......................
فى شقه سعيد
سعيد قاعد مع ساميه و اخوه ( سامح )
سامح / لا يا سعيد غلطان طبعا و لو كنت قولتلى من بدرى ما كنتش وافقت على الهبل ده خالص ازاى تسيب البنت تبات لوحدها
ساميه / دا بدل ما تعقله يا سامح جاى تقوله الكلام ده
سامح / ما انا بتكلم عشان عاوز اعقله فعلا
سعيد / البنت زى الفل و خالتها بتروح تبص عليها و تجيب لها كل اللى هى محتاجاه و انا مديها فلوس عشان ما يبقاش ناقصها حاجه
ساميه / فلوس !! دا أداها كل مصروف البيت و روحت استلفت من امى عشان نكمل الشهر و مش بس كدا دا بيدور على جمعيه بالف جنيه فى الشهر فعز الغلا اللى احنا فيه عشان يديهالها
سامح/ لا حول و لا قوه الا بالله انا كنت موافقك على تصرفاتك لما دعاء كانت عايشه انما دلوقت بنتك محتاجه لك و فى سن خطر
ساميه / المتربى متربي فى اى وضع و اى مكان
سامح / يا ساميه انتى عندك بنت ترضي لها يجرالها اللى بيجرا فى زينب ده
ساميه/ يا اخى اتقى الله دا زينب لوحدها بتصرف قد عيالي الاتنين ما بيصرفوا على بعض
سامح / عيالك الاتنين بيصرفوا خمسميه جنيه فى الشهر يا ساميه
ساميه / خمسميه ايه هو احنا نقول طور تقول احلبوه بقولك دفع لها ألف و خمسميه جنيه و مضى على نفسه وصولات بسته غيرهم و هيديها سته تانين مصاريف ايدها ما ياخد كليتي يديهالها بالمره عشان نعجب
سامح / انتى بتحسبيها ازاى خمسميه جنيه فى الشهر ما ياكلوهاش عيش و جبنه و الخمسميه التانين إيجار هى ما بتستفدش منهم حاجه وفريهم يا ستي و خليها تيجي تعيش معاكى هنا
ساميه / انا مستحمله عيالي لما هستحمل غيرهم دا انا طالع عيني و بعدين ما هى بتاخد من خالتها خمسميه تانين يعني الف جنيه
سامح / سعيد ... انا جاى ابرى زمتى قدام ربنا بنتك تتربى فى حضنك ربنا هيحاسبك عليها
سعيد / و انا مقصر فى ايه ما انا يكلمها كل شويه
سامح / سعيد هات بنتك فى حضنك يا سعيد
ساميه / بقولك ايه يا سامح لو مش هتساعد اخوك فى ازمته ما تزودهاش يا خويا بالله عليك كل واحد فيه اللى مكفيه
سامح / بكره الصبح الاتناشر الف هيكونوا عندك ... عن اذنكوا
سامح يقوم و يمشي سعيد مضايق
ساميه / تلاقيها وفاء مراته اللى حقناه ضدك عشان ما يسلفكش الفلوس ما انت عارفها ايحه
سعيد / هقوم اتصل اطمن على زينب
ساميه / و اتفق معاها تروح تطل عليها بكره و هعملك صينيه جلاش باللحمه المفرومه تاخدهالها معاك و انت رايح
سعيد / كتر خيرك
ساميه / و دا يجي من بعد خيرك ربنا ما يوريني فيك حاجه وحشه ابدا
.........................
قدام الدرس
زينب خارجه يحيي يضرب كلاكس تستغرب تجرى تركب و تطلع ورقه امتحان
زينب/ تمنتاشر و نص من عشرين
يحيي / و الدرجه و نص راحوا فين
زينب / على فكره بقي دى كانت اعلى درجه جوه و اخدت ميه جنيه ممضيه
يحيي / كويس بالنص بقى
زينب تبص له باستغراب تلاقيه مبتسم تبتسم يحيي يمد ايده ورا و يسحب شنطه فيها اكل و يحطها على رجل زينب و يسوق
يحيي / كنت متأكد انك هتعلمى عليهم كلهم مش عارف الثقه دى جايبها منين بس اهو
زينب/ هو انت مش وراك مذاكره مع صحابك
يحيي/ احمد صاحبنا اللى هنتجمع فى بيته لسه عنده سيكشن فاستاذنت منهم اعمل رحله و هرجع ليهم على ما يتجمعوا
زينب/ مش فاهمه
يحيي / انتى مضايقه انى جيت اخدتك ؟
زينب / لا و الله ابدا بس ... انا مستغربه بس ... تسلم
تليفون يحيي يرن يحيي يطلعه يلاقيه استاذ سعيد يركن فى جنب
يحيي / دا باباكى
زينب تتوتر
يحيي / السلام عليكم ازى حضرتك ... اه بكره باذن الله هبقي فى البيت... بالسرعه دى !!! اكيد طبعا ... لا ما اعرفش ظروفها رتب معاها و بلغنى... تمام حضرتك مفيش مشكله ... تمام
يحيي يقفل
زينب / خير ؟!
يحيي / المفروض انه هيتصل بيكي يرتب معاكى معاد عشان يجي بكره يطمن عليكي و يديني الفلوس و ياخد الوصولات
زينب / قدر يدبر الفلوس بالسرعه دى !!
صمت و زينب يبان عليها الضيق يحيي يكمل سواقه
زينب / قالى يوم ما قابلته عند عمتى انه هيجي تانى يوم يجيب فراخ و خزين و ما جابش حاجه
يحيي / انتى مستنيه منه حاجه ؟ ناقصك حاجه ؟
زينب / ناقصني اب يا يحيي انا عارفه انك انت و خالتوا و عمتوا رانيا معايا كل يوم و مش مخليني لوحدى و لا مخليني ناقصني حاجه بس ... هو طلق ماما عشان جابت بنت ما هو عنده بنت ... انا اسفه انت ما لكش دعوه بكل ده اصلا
يحيي / بس مش ده اللى حصل
زينب تنتبه
يحيي / باباكى طلق مامتك عشان شالت الرحم و مش هتقدر تخاويكى فقرر يتجوز و مامتك رفضت و اطلقت قرار الطلاق كان بأيد مامتك مش بايده
زينب / طب هو طلقها هى طلقنى انا كمان معاها
يحيي / هو اكيد له
زينب / انت بتبرر له ليه انت بتدافع عنه ليه الراجل ده دبسك فيا و خلع انت مش مستوعب الراجل ده هيرميلك الفكه دى عشان ما تكلموش تانى لمده سنه و شهرين قدام لا عن مصاريفى و لا عن الايجار
يحيي / انا ما ادبستش فيكي
زينب / بجد !! امال انت بتعمل كدا ليه بليت نفسك بيا ليه ... انت عارف الشقه دى كان ممكن تعمل بيها ايه او تاجرها بكام انت عارف انك دلوقت سايب حياتك اللى انت مسستمها من سنين و جاى
يحيي / مش بعملها لسواد عنيكي على فكره انا مستفيد
زينب / انت حتى ما بتاخدش الإيجار الساندوتش ده بكام مستفيد ايه
يحيي / عشان انا كنت عيل اهبل و مغيب ما فوقتش غير بعد فوات الاوان ظلمت نفسي و ظلمت ابويا و ضيعت سنين طويله من عمرى مش هقدر اعوض منها يوم ... فعلى الاقل يكون مرتاح فى قبره و هو مطمن عليكي
زينب / هو مين عمو محمود !! انا اصلا مش بنته يا يحيي انا مش بنته عشان افرق معاه ... انت مشيل نفسك حمل فوق ضهرك من غير ما يكون ليك ذنب او دخل انا ما اخصكش انت مش مجبر تعمل عشانى اى حاجه من الحاجات دى على فكره مش مجبر و ما حدش هيلومك اذا كان الرجلين اللى فى عيلتى اتخانقوا ما حدش فيهم عاوزنى حتى لو هترمى فى الشارع ما كانش فارق معاهم انت هيفرق معاك ليه ما حدش هيلومك
يحيي / هرمى واحده ابويا كان بيحلم يجهزها و يزفها لعريسها و مسجلها على موبايله بنتى ارميها ازاى
زينب / بس انا مش بنته انا مش بنت حد انا ليا اب ... اب عايش ... اب المفروض كنت ابقي فارقه معاه بس انت عارف بقي انا روحت كام رؤيه و ما جاش عارف سمعت كام حجه ... هو مش قالك هيتصل بيا تليفونى اهو مش هيتصل و مش هيرن و مش هيجي هيبعتلك الفلوس مع اى حد لانى مش فارقه معاه ... دا ابويا اللى انا من دمه عاوز تقنعني بقي ان فى واحد يعرفني من فتره بسيطه جدا هيكون احن عليا منه هيفرق معاه جهازى من جوازى تفتكر ده ممكن يحصل فى الحقيقه اصلا دا حتى فى الافلام ما بيحصلش
يحيي يركن تحت البيت
يحيي / طلع بيحصل طلعت حمار و مش فاهم اى حاجه حمار و غبى استسهل انه يرمى ازمه موت امه على ابوه ... ابويا عمره ما كان وحش ابويا كان بيهتم بكل اللى حواليه اولهم انا ... و انا قابلت كل ده بمنتهى الجحود ... و للاسف لا فى اله زمن و لا فى اى حاجه تقدر تخليني اعوضه عن السنين اللى عاشها فى قسوتى و غبائى غير انى اكمل اخر حلم ليه قبل ما يموت ... انا كدا كدا لا كنت بدخل الشقه و لا كنت طايقها عشت عشر سنين من عمرى بتهم الشقه دى انها السبب فى موت امى لو كنا بعنا الشقه دى كانت امى زمانها عايشه انا بفضل كل يوم الف فى الشوارع و من بيت صاحب لبيت صاحب للشركه للكليه للشارع بس عشان ما ادخلش الشقه دى انا معايا فلوس و ابويا الله يرحمه سايبلى فلوس ... عارفه يا زينب الفلوس دى ... انا كنت بتبتر عليها و برفضها و بكل بجاحه بقوله مش محتاج مليم منك انا راجل كبير و بقدر اصرف على نفسي خليلك فلوسك اللى استخسرتها فى امى ... كنت حيوان ... الفلوس اللى اتبترت عليها زمان مش من حقى اخدها دلوقت ... الفلوس دى ابويا من جواه كان مقرر يجهزك بيهم ... و انا هكمل ده
زينب / بس ده مش هيرجعه
يحيي/ هيريحنى انا
زينب تمسح وشها و تنزل تطلع الشقه يحيي يتنهد و يسوق و يمشي
..................
فى عربيه يحيي
يس / بصراحه ليها حق
يحيي يبص ليس
يس / هى تعرفك منين اصلا انت كل علاقتك بيها ما تكملش اسبوعين تهتم بيها بتاع ايه اكيد فسرت اهتمامك غلط
يحيي / انا ما اهتميتش اصلا
يس / لا يا راجل ... يحيي احنا صحاب بقالنا كام سنه ... امتى اخر مره دخلت عليا بساندوتش شاورما
يحيي / النهرده الصبح جبتلك فطار
يس / زينب اللى بعتاهولى ... الرساله وصلت مش هضيف اى كلام تانى
يحيي / هو ايه اللى زينب بعتاهولى انت مخليني اوصلك تحرق دمى بالالغاز
يس / شوفت شوفت ضربت المشوار عشان توصلها لكن صاحبك حبيبك رفيق عمرك مستطول مشواره
يحيي / اقسم بالله ابدا انت فاهم غلط خالص
يس / و عشان ما تتفهمش غلط بقي يا صاحبي اتصرف بالعقل انا عارف انك بتحاول تريح ضميرك و عارف انك بتحاول تملا الفراغ اللى ابوك سابه بس انت يا صحبى هتتفهم غلط هى لا بنتك و لا اختك
يحيي / ساندوتش الشاورما عمل كل ده
يس / مفيش فايده
يحيي توصله رساله يس يبص فى الموبايل
يس / وصلك اتناشر الف جنيه يا سيد المعلمين
يحيي / اقسم بالله ما فايق لك
تليفون يحيي يرن الاستاذ سعيد يحيي يركن العربيه و يرد
يحيي / السلام عليكم ... وصلوا ايوه ... طب و الوصولات ... بجد !!! تمام
... لا ما فيش مشكله و لا حاجه تمام حاضر ... سلام
يحيي يقفل السكه
يس / ابوها ؟
يحيي / حول الفلوس زى ما قالت
يس / كبر مخك يا يحيي و لم الدنيا قبل ما توسع منك و ما تعرفش تروح و لا تيجي فيها
يحيي يتنهد و يكمل سواقه
..................
فى شقه زينب
زينب بتتكلم فى التليفون
زينب / يا بنتى انا مش بعتلك اللوكيشن من يوميها ما تعبرى اهلى مره و تيجي ... خلاص خلاص خلاص هبقي اجيلك انا يا ست المشغوله قال يعني انتى ثانويه عامه و انا دبلوم صنايع مثلا ... ايه !!! ... تمام ... لا لا ما زعلتش ... عارفه انك ما تقصديش ... خلاص تمام ... هبقي اكلمك تانى ... سلام
زينب ترزع الموبايل جنبها و تقوم تروح تطلع الغسيل و هى متعصبه
زينب / انتى لا عندك اب و لا ام رخمين يتحكموا فيكى قال ... غبيه
زينب تطلع تنشر و هى متعصبه و بتفرك تشوف يحيي بيركن العربيه و ينزل يبص يشوفها يبتسموا لبعض يحيي يدخل البيت زينب تسمع صوت موبايلها تروح تجيبه
زينب / السلام عليكم ... احضر لك تتعشي
يحيي/ لا شبعان تسلمى ... باباكى كلمنى
صمت
يحيي/ جتله مأمورية شغل مستعجله و عمك حولى الاتناشر الف على الفودافون كاش
زينب / ما فرقش معاه حتى ياخد الوصولات
يحيي / قالى انه مامنى على بنته هيخونى فى شويه حبر على ورق
زينب / انت متصل تقولى الكلام ده ليه
يحيي/ عشان متاكد انك سهرانه لحد دلوقت على أمل انه يتصل
زينب / انا اللى قولتلك انه هيعمل كدا يا يحيي انا عارفه انه مش هيجي انا قضيت عمرى كله مستنيه كبرت كفايا انى اعرف انى مش فارقه معاه
يحيي / هو الخسران مش انتى .. بفكر اخد الفلوس و اجيب لك بيهم سبايك دهب ينفعوكى قدام
زينب / انت برده مش هتاخد إيجار؟
يحيي / انتى اولى بالفلوس دى انا بشتغل انتى لا غير الفلوس اللى ورثتها عن بابا الله يرحمه ... خلصتى ورق مامتك صحيح
زينب / لازم بابا يجي معايا بس مش هيجي فكبرت مخى
يحيي / كلمتيه ؟!
زينب / لا
يحيي/ طب كلميه يمكن يوافق
زينب / تصبح على خير يا يحيي
صمت
يحيي / و انتى من اهله يا زينب
.........................
بعد فتره فى شقه زينب
جرس الباب يضرب زينب تلبس الاسدال و تروح تفتح تلاقى اكياس محطوطه على السلم تليفونها يرن تروح تجيبه يحيي
زينب / انت اللى جبت الحاجات دى ؟
يحيي / اه و لو فى حاجه ناقصه ابقي اكتبيهالى على الواتس اجيبها عشان انا الفتره الجايه هعتكف للمذاكره مش هبقي فاضي انزل
زينب / ربنا يعينك بس اصلا التلاجه ما فيهاش مكان لا خالتوا و لا عمتك مخليين اى حاجه ناقصه
يحيي / طب يعنى الحق عليا يعني ... ايه ده محشي !!
زينب تحول الاكياس جوه الشقه و هى بتتكلم
زينب / دوق و قولى رايك انا اللى عملته اصلي جبت ميه من ميه فى الامتحان النهرده فقررت احتفل
يحيي / و اداكى ميه جنيه برده ؟
زينب/ ايوه
يحيي / خلاص بكره اجيب لك ساندوتش الشاورما
زينب/ هى هتبقي لازمه و لا ايه
زينب تقفل الباب
يحيي / تسلم ايدك طعمه حلو اوى .. دفعتى فلوس الشهر
زينب / اه و تمن ملازم المراجعه كلها و اتبقي خمسه و سبعين جنيه
يحيي / حلال عليكي بكره كدا كدا هسحب فلوس
زينب / انا معايا على فكره انا دول اللى باقيين من الفلوس اللى انت اديتهانى للدروس انما انا معايا فلوس
يحيي / خليهم يا ستى لسه داخلين على مصاريف جامعه و لبس و ليله هينفعوا بعدين
زينب / على فكره انا مش عاجبنى الوضع ده خالص ... الفلوس دى من حقك انت اديتني فلوس ماما و فلوس بابا اللى بعتها كلها و خالتوا و عمتوا رانيا كدا كدا بيجيبوا اكل و خزين للبيت يعني ما بصرفش حاجه و فلوس الدروس دفعتها انت كلها
يحيي / يا ستى ربنا يديمها عليكي نعمه و يحبب فيكي خلقه انتى مضايقه ليه لو على المصاريف فهى كدا كدا جايه كليه و مواصلات و لبس و مصاريف و بعدين ما انا قايل لك مليون مره قبل كدا انا ما بصرفش مليم من جيبي دا ابوكى سايبهملك ... الله يرحمه
زينب / الله يرحمه ... و انت بقي هتفضل مستحملنى لحد امتى
يحيي / انا قاعد باكل محشي و انا أصلا متعشي يا زينب انا مشكلتى بقت اكبر من الفلوس انا مشكلتى بقت فى الهدوم انا بطخن يا زينب
زينب تضحك
يحيي / حلو اوى بجد
زينب / فى تانى اغرف لك
يحيي / بحبه بايت و متسخن عادى عنيلى طبق اكله بكره
زينب / اعملك كل يوم ما دام عجبك كدا
يحيي / هو عرض مغري جدا بس انتى ثانويه عامه و لازم تركزى دا آخر شهر ما ينفعش نخيب فيه
زينب / لا ما تقلقش عليا هشرفك باذن الله المهم انت برده تركز كدا و تتخرج و تبقي باشمهندس قد الدنيا
يحيي / باذن الله
زينب / هسيبك ترتاح بقي تصبح على خير
يحيي / بقولك يا زينب
زينب / نعم
يحيي / مش عاوزه تخرجى تغيرى جو فى اى حته قبل ازمه المراجعه النهائيه دى
زينب / فين ؟
يحيي / اى مكان انتى بتحبى تروحى فين
زينب / ما لهاش لازمه مصاريف و بتاع و انا كدا كدا عندى دروس كل يوم فخلاص بقي
يحيي / تمام تصبحى على خير
زينب / و انت من اهل الخير
زينب تقفل و تدخل تدخل الحاجه المطبخ
.....................
فى الكليه تانى يوم
يس / بجد !! كل ده من طبق محشي !!!
يحيي / مش هحكيلك حاجه تانى
يس / ما لكش غيرى اصلا و بعدين انا ما قولتش حاجه انا بس
يحيي / الافكار دى فى دماغك بس
يس / كلها بتبتدى كدا
يحيي / خبير علاقات حضرتك
يس / الخمس سنين اللى قضيتهم هنا فى الكليه علموني احلل المعطيات ، ادرس المخاطر و اتأكد من معاملات الأمان
يحيي / لا حول و لا قوه الا بالله و دا جالك من ايه يا حبيبي ما كنت كويس
يس / على العموم انا شايف ان البنت كويسه و راضيه بقليلها و ست بيت شاطره و مش هتتعب مع اهلها لان مفيش اصلا فتوكل على الله و الف الف مبروك
يحيي يبص ليس و يبص قدامه و يتنهد يس يضحك
.....................
قدام شقه زينب
يحيي يضرب الجرس ما حدش يفتح يطلع الموبايل و يتصل يسمع صوت الموبايل على السلم وراه يبص يلاقي زينب طالعه على السلم
زينب / ازيك عامل ايه
يحيي / جبت لك الشاورما ... خير كنتى فين ؟
زينب / روحت أزور لبنى صاحبتى ما شوفتهاش من ساعه ما جيت الشقه هنا
يحيي / طب ما قولتليش ليه كنت وديتك و جيبتك او على الاقل جبتك بدل ما انتى جايه لوحدك دلوقت
زينب / انت عندك شغل و بعدين انا ما اتاخرتش الساعه ما جاتش عشره
يحيي / طب بعد اذنك بعد كدا لو هتخرجى ابقي بلغيني و انا هروحك
زينب / ليه ؟
يحيي / افرضي حد ضايقك افرضي اى حاجه حصلت ما اعتقدش انك هتخسرى اى حاجه لو بلغتيني اكيد مش قصدى اتطفل يعني بس دا لمصلحتك و الله
زينب / تمام ... انا مش بخرج كل يوم يعني
يحيي يناولها الكيس و يفضل واقف
زينب / قولت تمام ايه تانى
يحيي / مستنيكى تدخلى
زينب تبص له باستغراب و تفتح الباب و تدخل تقفل الباب تسمع صوت الباب بيتقفل
زينب / غريب اوى
.......................
DU LIEST GERADE
زينب بقلم / لولو_محمد ( كامله)
Romantikمن سيبقي لنا عندما يتخلى عنا أقرب الناس ... زينب رحله بين الفقد و العوض
