زينب بقلم / لولو_محمد ( كامله)

الحلقه الاخيره

((((( زينب ))))
#لولو_محمد
الحلقه الاخيره
رانيا / انت هتنام
على / عاوزه حاجه
رانيا / انا مضايقه و مش عاجبنى اللى بيحصل
على يتنهد و يتعدل
رانيا / انا مش شريره يا على و انت عارف بس اللى بيحصل ده كله ما يرضيش ربنا و مش هينفع نسكت عليه
على / عاوزه ايه يا رانيا قوليلى اقدر اعمل ايه و انا اعمل
رانيا / ما اعرفش فكر معايا فى حل
على / حل لايه ؟ وضع و اتفرض على الكل و اولهم يحيي و زينب و خصوصا زينب على الاقل زينب فى شقه يحيي بمزاجه و هو اللى عرض
رانيا / عشان احساسه بالذنب مش اكتر
على / بس هو مبسوط و البنت خدماه و هو ما بيشتكيش
رانيا / بتمص دمه يا على
على / بكيفه ... يحيي مش صغير و ما تدخليش فى حياته عشان ما تبوظيهاش و فى الاخر هتبقي انتى الوحشه عشان تبقي عامله حسابك
رانيا / يحيي سايب زينب عايشه فى الشقه عشان لسه ما لقاش بنت الحلال انا بقي هلاقيهاله عشان يعرف قيمه الشقه اللى راميها دى و يتحرك
.................................
فى الشركه
يحيي بيشتغل موبايله يرن يرد
يحيي / يا مساء الخير لسه قدامى ساعه على فكره
زينب / هو احنا ينفع نجيب شاورما او اى حاجه من بره
يحيي يضحك و يكتمها و يبص حواليه
زينب / انا مشيت على الوصفه بالظبط و باظت حاولت اصلحها برده باظت بعد ما وسخت نص المواعين و على ما اغسلهم مش هيبقي فيا حيل اعمل اى اكل تانى انا بجد هعيط حسبي الله و نعم الوكيل فى الناس دى
يحيي / طب خلاص ما تضايقيش نفسك نبقي ناكل بره اى حاجه
يس يسحب كرسيه و يقرب من يحيي و يتسنط يحيي يزقه
يحيي / تمام هرن لك و انا جاى تجهزي سلام ... سلام
يحيي يقفل
يحيي / ايه يا زفت فى ايه ؟
يس / زينب صح ؟!
يحيي / بوظت الاكل ... شكل فى حد رخم نق عليها... يا ترى مين ؟ ما عندكش فكره
يس / و انا مالى و بعدين سيبك انت ما تاخدنيش فى دوكه انت ناوى تاخدها تعزمها على الاكل بره يا نمس
يحيي / فكك منى يا يس و خلينا نخلص ام الشغل ده عشان نروح
يس / يا عم انا عامل عليك كنت هقولك على اسم مطعم حلو
يحيي / باماره ما انت مقطع المطاعم خروجات
يس / لا بس توب فإن فى صفحات كل الفود بلوجرز فى مصر و عامل لسته بالمطاعم اللى هموت و اروحها و هطلب ايه و عاملها فولو
يحيي / انت جايب الدماغ دى منين
يس / لا هى نازله مع الشاسيه بيلت ان
يحيي / مفيش فايده
يس / طب بص جرب نصيحتي مره و لو فكست ما تكررهاش
يحيي يبص ليس
يس / يا عم دا انا اخوك و عاوز مصلحتك و بعدين مش هتتعور فى مبلغ كبير يعني المهم تقضي خروجه حلوه و تدعيلى
يحيي/ وله انت نيتك مش سالك و نظراتك مش مريحانى
يس / لا انت فاهم كل حاجه بس عاجبك دور استهبال البدايات ده فبيس يعني مش مشكله
يحيي / على فكره للمره المليون زينب زى اختى
يس / ما هى كلمه زى ام حرفين دى هى سبب نص مشاكل المجتمع عارف انت لو احنا سمينا كل حاجه باسمها هنعرف احنا عاوزين ايه و هنوصله ازاى انما زى دى ما فيش حاجه اسمها زى هى مش اختك و انت مرتاح لها و هى واضح جدا انها مرتاحالك بتستهبلوا على بعض ليه
يحيي / عشان ما فيش حاجه يا يس مش كل واحد و واحده اتعاملوا مع بعض
يس / الا و كان الشيطان تالتهم
يحيي / وسعت منك اوى دى
يس / يا عم دا مش كلامى و بعدين اعتبرني ما قولتش حاجه ادينا هنقعد جنب الحيطه و نسمع الزيطه عادى يعني
يحيي يتنهد و يكمل شغل يس يروح يكمل شغل هو كمان
......................
فى محل ملابس
زينب / تؤ القميص ده مش عاجبنى جرب ده
يحيي / ما ينفعش فى المكتب خالص ده
زينب / مش عارفه بس انت كدا لبسك كله هيبقي ساده و كلاسيك انت مندوب مبيعات يا ابنى و لا ايه
يحيي / هو مناديب المبيعات بس اللى بيلبسوا كلاسيك انتى اخر مره خرجتي للشارع كانت امتى
زينب / امبارح بالليل فى السينما
يحيي يبتسم
يحيي/ هو مش وحش هاخده بس ممكن لخروجه او زياره عائليه لكن مش للشغل
زينب / تمام هروح ابص على الناحيه دى على ما تغير يمكن حاجه تانيه تعجبني
يحيي / تمام
زينب تروح تقلب فى القمصان تليفونها يرن خالتو
زينب / السلام عليكم ازيك يا خالتوا عامله ايه
ايمان / ما كلمتنيش من امبارح قلقت عليكي
زينب / انا تمام اتلخمت بس حضرتك عامله ايه
اتنين شباب بينقوا لبس زينب تروح بعيد بالموبايل
ايمان / انتى فين و مين دول
زينب / انا فى محل لبس كدا روحت مع يس يجيب كام حاجه للشغل
ايمان / و دا ينفع
زينب / و ما ينفعش ليه
ايمان / عشان ما ينفعش يا زينب
زينب / ليه برده
ايمان / مش هينفع كلام فى التليفون بكره عدى عليا نتكلم
زينب / اوك تمام ... مع السلامه
زينب تقفل الموبايل و هى مضايقه يحيي يدخل
يحيي / يلا نحاسب ... مالك ؟
زينب / لا مفيش دى خالتوا و ما اعرفش اضايقت ليه لما عرفت اننا خرجنا سوا
يحيي / مش عارف ... هبقي اكلمها و افهم منها ايه اللى ضايقها
زينب / عوزانى اروح لها بكره نتكلم فى الموضوع ده
يحيي / هاجى معاكى
زينب / بلاش لتتحرج منك خلينى اروح لها لوحدى
يحيي / تمام اللى تشوفيه ... فى محل حريمي جنب المحل ده اسبقيني عليه على ما أحاسب و شوفي كدا لو حاجه عجبتك نجيبلك بالمره و احنا بره طقمين تلاته للكليه
زينب / خلينا سوا احسن
يحيي / تمام تعالى
...................
فى شقه ايمان
ايمان / عشان هو مش اخوكى يا زينب
زينب / قولت زى
ايمان / يا حبيبتي انا خايفه عليكي
زينب / من مين من يحيي !! يحيي اللى بيوديني و يجيبني و مسؤل عنى من ساعه ما ماما ماتت و مقعدنى فى بيته ببلاش 
ايمان / مش لوحده على فكره انا بعمل كل اللى بقدر عليه
زينب / و انا عمرى ما طلبت من حضرتك اكتر من اللى بتعمليه و لا قللت منه بالعكس مقدراه جدا لأن بعد يحيي ما ليش فى الدنيا غيرك
ايمان / بعد يحيي !!
زينب / مش هنضحك على بعض انا انطردت من الدنيا كلها و المكان الوحيد اللى اتفتحلى كان بيت يحيي يا خالتوا يوم ما جالى عريس ما لقيتليش راجل يقعد معاه غيره حضرتك بقي دلوقت جايه تقوليلى ايه عن يحيي دلوقت
ايمان / انا ما بقولش عنه حاجه انا
زينب / انا هبعد عن يحيي ممكن اجى اقعد عندك؟ عندك اصلا مكان تانى اقعد فيه و يكون امان زى بيت يحيي؟
ايمان / انتى فاهمه قصدى
زينب / لا انا مش فاهمه اى حاجه انتوا كلكوا رضيتوا بوضع و فرضتوه عليا و لما اخيرا اتأقلمت عليه و اطمنت جايه تقولى لا دا مش اخوكى و خايفين عليكي ..  من امتى ؟؟
ايمان / طول عمرى... زينب انا عمرى ما قصرت ناحيتك
زينب / و شيلاها لحضرتك و الله ... بس انا مش هستحمل ربع كلمه عن الشخص الوحيد اللى محسسني انى مهمه
ايمان تبص لزينب و عنيها تتملى بالدموع
زينب/ حضرتك عملتى كل اللى تقدرى عليه و انا عارفه ده و عارفه انك جايه على بيتك و عيالك عشانى و عارفه المشاكل اللى بينك و بين عموا ممدوح بسببي و عارفه انى عمرى ما احتاجتك و ما لقيتكيش بس يحيي مختلف يحيي بيبقي موجود قبل حتى ما احتاجه يحيي حاجه تانيه
ايمان تبص الناحيه التانيه و تحاول تكتم دموعها
زينب / امشي ؟
ايمان الدموع تنزل من عنيها زينب تروح تحضنها و تمسح وشها
ايمان / حقك عليا
زينب/ حقك انتى عليا انا مش فاهمه ليه كل ده اصلا لا هو ليه غيرى و لا انا ليا غيره ليه اضايقتى و ايه اللى فى دماغك
ايمان / مفيش حاجه فى دماغى ... مفيش حاجه يحيي ابن حلال و متربي و انا عارفه انه ... انه مفيهوش غلطه ... حقك عليا انا اللى ... كنت مضايقه شويه و طلعت همى فيكي ... حقك عليا
زينب تطبطب على ايمان و تبوس راسها
.......................
فى شقه رانيا
على / انتى اتجننتى يا رانيا يحيي لو عرف هيزعل منك جدا
رانيا / و مين هيقوله بس
على / لا حول و لا قوه الا بالله و البنت اللى الموقع هيجيبهالك ليه مش هتقوله انه عرفها عن طريق الموقع
رانيا / لا مش هتقوله عشان احنا مش هنروح عن طريق الموقع الست اللى ماسكه الصفحه اكدتلى على السريه التامه و قالت لى انها هتبعت ملف البنت و لو البنت مناسبه انا اتواصل مع اهلها
على / و هم كسبوا صلاه النبى مش كدا
رانيا / دى حاجه لله يا على
على / مش عارف ليه مش مصدق بقك
رانيا/ يا عم اوريك الشات انت هتاكل دماغى ليه
رانيا توريه الشات يلاقيها باعته بيانات و صوره زينب
على / مش ممكن تصرفاتك دى ازاى تعملى كدا ترضي حد يحط صوره بنتك على موقع زى ده و لا ترضي اصلا ان بيانات بناتك و صورهم يتبعتوا لرجاله اغراب بحجه انهم لو عجبوهم هيروحوا يرتبطوا بيهم انا ماكنتش مصدق انهم اصلا يبعتولك بيانات العروسه كدا لله فى لله بس دلوقت فهمت واحده قصاد واحده
رانيا / اقسم بالله ابدا
على/ اسمعى انتى تسلمى الصفحه دى و تتأكدى انهم مسحوا صوره زينب و بياناتها و مش هيبعتوها لحد قوليلهم اتجوزت او هاجرت او اى حاجه دا انتى عندك بنات يا شيخه ايه مفيش مخ خالص
رانيا / انا عملت كدا عشان
على / عشان الشقه ... كل اللى همك الشقه
رانيا / يحيي كل اللى هاممنى يحيي يا على يحيي اللى مضيع عمره و فلوسه على واحده
على / يحيي مش صغير و زينب مش وحشه و لعلمك انا لو لفيت الدنيا لا هلاقي لها عريس احسن منه و لا هلاقي له عروسه احسن منها اطلعى انتى منها و هى تعمر
رانيا / انا !!
على / اقسم بالله لو الموضوع الزباله ده ما اتلمش لتشوفى منى رده فعل ما حدش يلومني عليها انتى فاهمه و لا لا ... انتى حطيتي رقم مين عشان لو العريس حب يتواصل مع البنت
رانيا / حطيت رقمى ليها و ليه عشان اضمن الناس اللى هتيجي تيجي عن طريقي
على / كويس هروح اشتري لك شريحه جديده و نرمى النمره دى خالص و نلم الموضوع ده و كانه ما حصلش و مش هنفتحه تانى
رانيا / انا بس
على / رانيا !!!
رانيا / يووووه حاضر
على يسيبها و يمشي و يرزع الباب
......................
قدام بيت ايمان 
زينب تخرج تركب عربيه يحيي يسوق و يمشي 
زينب / اتاخرت فى الشغل النهرده
يحيي / كنت عارف انك عند خالتك فسبتك تاخدى راحتك ايه الاخبار خير كانت عوزاكى فى ايه ؟
زينب / و لا حاجه بعتت لك منابك فى الغدى برده
يحيي / ربنا يبارك لينا فيها خالتك ست طيبه و تنحب بصراحه
زينب / و هى كمان بتحبك اوى
يحيي / مش هتحكيلى برده كانت عوزاكى فى ايه كان فى حاجه مضيقاها و مضيقاكى
زينب / قولت مفيش حاجه خلاص بقي
يحيي / خلاص براحتك
زينب / هى عمتك كلمتك فى حاجه ؟
يحيي / حاجه ايه ؟
زينب / يعني فتحت معاك موضوع العريس تانى؟
يحيي / مش فاهم ؟! انتوا غيرتوا رايكوا و قررتوا تقابلوه و لا ايه ؟!
زينب / لا بس ... عاوزه اعرف ... الوضع اللى احنا فيه ده غلط صح
يحيي / وضع ايه ؟
زينب / و لا حاجه ما تاخدش فى بالك
يحيي / زينب فى ايه ؟
زينب / خلاص يا يحيي مش عاوزه اتكلم دلوقت
يحيي/ بس انا عاوز اسمع محتاج اسمع
زينب / لما اكون جاهزه هتكلم
يحيي / و انا هستني
زينب تبص ليحيي مركز فى الطريق
زينب / لحد امتى
يحيي يبص لها و يرجع يبص للطريق و يرجع يبص لها مش فاهم و هى بصاله
زينب / هتستنى لامتى هتستحملنى لامتى هتفضل شايلني كدا لحد امتى 
يحيي يركن و ياخد نفس و يبص لها
يحيي / اولا انا لا معطل حياتى بسببك و لا مضايق نهائى و لا انتى تقيله عليا و لا حاسس انى بقدم لك اى حاجه او حتى بتنازل عشانك عن اى حاجه بالعكس بقي اولا انا لأول مره من سنين بحس ان بيتنا فيه روح البيت اللى كنت بستتقل كل خطوه و انا رايحه اخر اليوم و انا مروح مع انى هموت من التعب بقيت بعد الدقايق عشان ارجع له ... مش هكدب لو قولت انى كنت بصحى كل يوم مضايق انى مضطر اعيد نفس اليوم الممل من أوله تانى بقيت بصحى سعيد ان لسه ليا عمر حتى لو يوم كمان اقضيه معاكى
زينب / ليه
يحيي / مش عارف ... تعرفى ان لما المدرس بتاعك ده أتقدم لك ... انا كنت مقرر انك لما تتجوزى و تسيبي البيت انى هبيعه و اشترى شقه فى اى حته بعيده و مش هعتب المنطقه دى تانى
زينب / بتهزر
يحيي يهز راسه لا
زينب / ليه
يحيي / مش عارف و الله ما عارف ... على قد ما كنت مضايق جدا انك كنتى زعلانه كنت فرحان اوى انه مشي
زينب / ما كنتش زعلانه عليه
يحيي / و انا ما كنتش عاوزك تمشي و تسبيني
زينب / ما كنتش هسيبك على فكره
يحيي / مفيش حد هيسمح لك تتواصلي معايا حتى
زينب / ما فيش حد هيقدر يمنعنا
يحيي / نفس اللى منع خالتك انها تاخدك فى حضنها بعد موت طنط ... ماما دعاء كان هيمنعك عنى ... بيتك و عيالك و دنيتك اللى بنيتيها
زينب / هشترط عليه قبل اى حاجه
يحيي/ هو مين بقي
زينب / ما اعرفش ... مش هتجوز خالص
يحيي يبتسم
زينب/ و بعدين ما انت كمان ممكن تقابل واحده و تحبها و تقولك يا انا يا هى
يحيي / تفتكرى ؟
زينب/ اكيد هتقولك كدا اكيد هتغير عليك و مش هتقبل بوجودى هتقولك يا انا يا هى و اكيد هتختارها
يحيي / تؤ هختارك انتى
زينب / اكيد لا هتخرب بيتك عشانى يعني
يحيي / تتجوزيني
زينب / ايه !!!
يحيي / انا عمرى ما كنت من العيال اللى بتصاحب و لا كان عندى وقت للمشاعر و الحب و الكلام ده ما اعرفش بيحسوا بايه و لا بيتكلموا فى ايه و لا بيعبروا ازاى كل اللى انا حاسه ان فكره انك تبقي لغيرى و تبعدى عنى رعبانى ... تعرفى ان الكل ملاحظ انى متغير من ساعه ما دخلتى حياتى ... يمكن كنت بنكر فى الاول او بحاول ما الفتش الانتباه ... كنت خايف ... خايف لما تحسي بالمشاعر اللى بتتحرك جوايا تبعدى تسيبي البيت و تروحى فى اى حته تانيه بعيد
زينب / و ايه اللى غير رايك
يحيي / ما اتغيرش انا قاعد قدامك مرعوب مستنى ردك بس لازم أواجه لازم اتكلم قبل ما اصحى فى يوم الاقيهم جابولك عريس تانى او اقنعوكى انى مش عاوزك فتسبيني و تمشي
صمت و تبادل نظرات و توتر بين الاتنين زينب تبص فى الارض و هى بتفرك فى ايديها
يحيي/ انا مش عارف الاحساس اللى جوايا ناحيتك ده حب و لا حاجه تانيه بس انا مش لاقيله اسم عمرى ما جربته و لا عارف اوصفه بس لو مش حب يبقي ايه و مش عارف ينفع اقولك بحبك هنا و دلوقت و لا لا انا ما كنتش مجهز للحظه دى و حاسس انى عكيت الدنيا
زينب تبص له يحيي يتنهد
يحيي/ اى كان ردك دا مش هيغير اى حاجه فى الاتفاقات القديمه اللى بينا هفضل جنبك برده لحد ما تظبطى دنيتك و تقفى على رجلك سواء بقي مع ابن الحلال اللى يستاهلك او ...
زينب / موافقه
يحيي / على ايه
زينب / نتجوز ... موافقه
يحيي / زينب فكرى كويس انا مش عاوزك توافقي تحت ضغط او خوف من اى حاجه انا ما كنتش ناوى اتكلم لحد ما فعلا تبقي واقفه على رجلك
زينب / و هو انا موجوده دلوقت غير بسببك يا يحيي ... انا ما ليش غيرك ... انت عوضي عن الدنيا كلها ... انا موافقه كلم خالتى و اطلبنى منها و انا مش عاوزه منك اى حاجه لا شبكه و لا مهر و لا فرح و لا عفش و لا اى حاجه و الله ما فارق معايا حاجه
يحيي / ليه يا زينب اقل من باقي البنات فى ايه ليه ما يتعملكيش احسن حاجه و يتجابلك الحلو كله ليه ما تفرحيش زى كل البنات ليه تتنازلى دلوقت على حاجه ممكن بعدين تندمى و ما تقدريش تعوضيها ... انا هروح اطلبك من ابوكى على فكره مش من خالتك انتى مش شويه
زينب / لا ... لو عاوز تتجوزنى ابويا ما يدخليش نهائى
يحيي/ ازاى يا زينب
زينب / كدا ... دا شرطى ... ما ينفعش ... مش بعد كل ده هيجي و يحط رجل على رجل و يعمل اب و لا يحط ايده فى ايدك و يقول زوجتك موكلتى انا مش موكلته و لا عمرى هوكله ابدا ... انا بكرهه
زينب تعيط
يحيي / تمام هكلم خالتك ... اهدى
زينب / انت مش هتعمل معايا زيه صح ... انا ما ليش غيرك
يحيي / اهدى و وحدى الله و انسي اى حاجه حصلت و ما تحطيهاش فى دماغك عشان دا مجرد شيطان مش اكتر صدقيني
زينب تهز راسها يحيي يسوق
يحيي / طب انا المفروض اعمل ايه دلوقت اروحك و اكلم خالتك و لا استنى بكره الصبح و لا ارجع لها دلوقت و لا اعمل ايه ... الو ايوه يا خالتوا ازيك كنت بتصل عشان احدد معاد اجى اطلب ايد بنت اخت حضرتك
زينب تضحك
يحيي / كليشيه اوى صح ... ازيك يا خالتوا عامله ايه يارب تكونى بخير بقولك لو فاضيه اعدى عليكي بس اشرب فنجان قهوه من ايديكى لا لا خير بإذن الله انا بس كنت عاوز اطلب ايد زينب ... و لا ما اقولش رايح ليه و اسيبها على اعصابها و لا اتصل بجوز خالتك على طول و لا اكلم عمتى تكلمها هى
زينب /  انا ممكن اكلمهالك على فكره
يحيي/ بس انا برده لازم اكلم عمتى انا مش هاجى بطولى
زينب تبص ليحيي و تبتسم
يحيي / و دى بيلبسولها ايه المشاوير دى
زينب / هدوم
يحيي / و الله !! خفه
زينب / يعني خمس سنين فى هندسه و كلمه حفل التخرج و الحوار التافه ده هيوترك ... تؤتؤتؤ
يحيي / هشرفك ما تقلقيش انا بس بحب اهتم بالتفاصيل
زينب / انت مشرفنى من غير حاجه
يحيي يبصلها مبتسمه يبتسم
يحيي /اخد معايا بسبوسه و لا جاتوه
زينب / مش هنخلص بقي
زينب تبص ليحيي تلاقيه بيضحك تضحك
.......................
فى شقه رانيا
رانيا / و الله كان قلبي حاسس ... قولتلك
على / الف مبروك يا يحيي
رانيا / بتباركله على ايه
على / رانيا من فضلك
رانيا / انا مش موافقه على الجوازه دى مش مناسبه ليك
يحيي / بحبها
رانيا / صعبانه عليك مش اكتر الحب حاجه تانيه اسألني انا
يحيي / انا مش صغير و عارف انا حاسس بايه و ايه اللى هيسعدنى
رانيا / يا حبيبي دا جواز و هى
يحيي / ما تتعيبش و حضرتك بقالك شهور معشراها و عارفه اخلاقها و سلوكها و دينها كويس اعتقد مفيش بعد كدا
رانيا / النسب يا حبيبي زى اللبن هم دول اهل تناسبهم
يحيي / ما شوفتش من خالتها حاجه وحشه ست طيبه و بتحبها و بتحبنى
رانيا / ابوها راجل ناقص و واخدها سبوبه
يحيي / ما ليش دعوه بيه
رانيا / ازاى مش هتحط ايدك فى ايده
يحيي / لا هروح اطلبها من خالتها و جوزها
على / ازاى الكلام ده ما ينفعش طبعا
يحيي / انا شايف ان ده الصح و مرتاح جدا للموضوع ده
على / ايوه بس دا ابوها ما ينفعش يا ابنى ما يصحش انت ابن أصول و عارف
يحيي / زينب مش موافقه
رانيا / و الله قولت ما تنفعش
يحيي / اللى شافته مش شويه برده لازم نقدر
رانيا / انا مش موافقه على البت دى يا يحيي و دا آخر كلام عندى
يحيي / انا ببقي مبسوط و هى جنبى يا عمتى ... بحبها ... انا مش عاوز نبقي قرع فى الفرح لا أهل عريس و لا أهل عروسه دا حضرتك بالنسبالها عمتها زى ما انتى عمتى
رانيا تبص له
يحيي / اقسم بالله ما بشتغلك و حضرتك عارفه هى بتعاملك ازاى
رانيا / يا حبيبي الواحد بياخد جوازه تضيف له
يحيي/ انا كلمت خالتوا ايمان خلاص
رانيا / يعني انت مش جاى تاخد رايي جاى تحطنى قدام الأمر الواقع
على / ما خلاص بقي يا رانيا عشان خاطر يحيي ما تكسريش بخاطره و لا بفرحته
رانيا تبص ليحيي يعملها بايده عشان خاطرى
رانيا / هروح اللبس اما نشوف اخرتها
.......................
فى شقه ايمان
ممدوح / كان لازم يعرف برده حتى لو ما جاش كنا نبقي بلغناه انما اللى حصل ده لعب عيال و بدل ما ألحق كان عنده بقي علينا
زينب / مفيش مشكله ما تضايقش نفسك كانى ما جيتش عادى
زينب تروح ناحيه الباب
ممدوح / انا ما قولتش انى مش هقعد معاه انا بقول الصح انا هقعد معاه اقوله ايه ؟! انا هقوله ايه ... لازمه القاعده كلها ايه اصلا
ايمان / اهدى يا ممدوح البنت على اخرها
ممدوح يبص لزينب عنيها مليانه دموع
ممدوح / انتى فاكره انى مش عاوز اقعد لك و اتشرط و احط رجل على رجل نفسي دا احنا كنا بنحلم مع امك باليوم ده ... بس ابوكى منه لله كتفنا كلنا ليحيي عارفه لو كان حد غير يحيي كان الوضع اختلف ... انتى فاهمه قصدى
زينب تهز راسها
زينب / بس انا اصلا لا عاوزه شروط و لا فارق معايا حاجه
ممدوح/ كان نفسي اعززك
زينب/ فات الوقت خلاص... لعله خير ... ترفض تستضيفنى فى بيتك عشان ما لاقيش غير يحيي و أقرب منه و نحب بعض ما حدش عارف وقتها انه كان خير ... زى دلوقت كدا ... الحزن اللى فى عيون الكل فى يوم المفروض يكون مهم زى ده ... اكيد خير برده بس هيبان بعدين ... مش كدا؟!
ممدوح/ انا هنزل اجيب طبق حلويات شرقي و ازازتين ساقع و انتوا جهزولنا عشوه حلوه .. باذن الله مش هتاخر
......................
فى شقه سعيد
سعيد نايم تليفونه يرن سامح يرد
سعيد / خير يا سامح فى حاجه و لا ايه
سامح / الف مبروك يا سيدي مش كان اولى تعزمني بدل ما اعرف من الفايس كدا زيي زى الغرب على الاقل كنت جيت نقطت
سعيد/ الساعه كام يا سامح على هزارك ده
سامح / انا لما سجلت رقم المحروس يحيي طلعلى على الفايس ضفته لقيته منزل من ساعه صورته مع بنتك فى الصاغه و هم لابسين الدبل
صمت
سامح / ما قالتلكش و لا ايه ؟ ما كنتش تعرف ؟
سعيد / يحيي شاب كويس و ابن حلال
سامح / مش هتعمل حاجه برده !!!
سعيد / هى اللى اختارت و هى حره هى مش صغيره و عارفه مصلحتها كويس
سامح / طب على الاقل كلمها بارك لها
سعيد / تصبح على خير يا سامح
سامح / بارك لها ما تعاتبهاش ..  ابعت لها رساله يا اخى
سعيد / تصبح على خير يا سامح
سعيد يقفل السكه
ساميه / خير ماله سامح بيتصل بيك السعادى ليه مستعجل على قسط الجمعيه و لا ايه ؟
سعيد / بيقولى ان زينب و يحيي اتخطبوا
ساميه / الف مبروك و الله لولا الوقت متأخر كنت رقعت خمسين زغروطه فى نفس واحد و الفرح امتى ان شاء الله
سعيد / ما عزمتنيش حتى
ساميه / تعزمك !! لتكون صدقت انك فارق معاها هى بتفتكرك الا عشان الفلوس ؟! لقت الواد جاهز و عنده شقه و ورث رسمت عليه و بلفته 
سعيد / زينب مش كدا
ساميه / امال ازاى
سعيد / نامى يا ساميه نامي
ساميه تبصله بقرف و تديله ضهرها و تنام سعيد يمسك الموبايل و يقلب فيه
......................
فى الشركه عند يحيي
يحيي داخل المكتب زمايله يفرقعوا صاروخ ورق و يس يمسك صينيه الشاى و يطبل و هم يغنوا "يا نجف بنور يا سيد العرسان يا سيد العرسان يا نجف و منور عالخلان يا سيد العرسان اه يا نجف اه يا نجف اه يا نجف حلو يا نجف اااه" يحيي يضحك
يس / صاحبى الواطى فين يا رجاله
يحيي / اقسم بالله جت كدا
فريد ( زميل فى المكتب ) / على صحابك يا معفن
يحيي/ اقسم بالله زى ما بقولكوا كدا انا اصلا ما كنتش فاكر اننا هنشترى الشبكه و نلبسها احنا لسه كنا بنفتح الكلام و نقرأ الفاتحه اخر القاعده قولنا ما ننزل نسأل و نتفرج هوب اشترينا لبسناها و قولنا نبقي نعمل فرح كبير بقي و خلاص الموضوع كان بسيط و على الضيق و على كل انا مش ناسيكوا انا عازمكوا النهرده اطلبوا و انا جاهز
هانى ( زميل فى المكتب ) / تعال يا يحيي عاوزك
يس / اقسم بالله
مهندس ٢ / لازم يعرف يا يس
يحيي/ اعرف ايه ؟!
مهندس ١ / مفيش يا عم دا هانى بس عاوز يرخم
يحيي / لا فى حاجه اتكلم يا هانى فى ايه
هانى / يس بيقول ان العروسه تبقي بنت مرات أبوك و انك عارفها كويس
يحيي / ما تلخص يا هانى
يس / يا عم قولتلك هزار سخيف ما تدوقش
يحيي / لا أدق فى ايه
هانى يطلع اسكرينه من موبايله فيها صوره زينب و بياناتها على صفحه خاطبه
هانى / انا لما شوفت صورتكوا سوا قولت ان شكلها مش غريب و بعدين كنت بقلب فى الصفحه لقيت دى
يحيي باين عليه الزعل و الغضب
يس / على فكره ممكن يكون حد سارق صورتها او حد منفسن عامل فيها مقلب على فكره اصلا ان الصوره تنزل بابليك كدا دا فى حد ذاته مريب الطبيعي بتتبعت على الخاص لما يتأكدوا انه جد
يحيي / تمام ... نشوف الموضوع برده
يحيي يمشي يس يجرى وراه
يس / يحيي يحيي ... بالعقل ممكن يكون ابوها آو مراته عاوزين يخلصوا منها ما حدش عارف ممكن تكون اصلا ما تعرفش فدور الاول بعيد عنها و شوف
يحيي يهز راسه و يجي يمشي يس يمنعه
يس / هتروح فين اهدى الموضوع مش مستاهل و الدكتور زمانه جاى صدقنى هتطلع حاجه هبله فى الاخر تواصل مع الصفحه بعيد عن زينب و اعرف مين اللى باعت الداتا
هانى يدخل و فريد وراه
هانى / انا ما قصدتش انكد عليك و لا اكسر فرحتك انا بس كنت بقولك عشان تلحق تتصرف و تشيل الصوره من الجروب
يس / انت اصلا بتعمل ايه فى جروب زى ده
هانى/ بقلب فى الفايس ياعم عادى ... بص هى تروح مباحث النت تعمل محضر ان حد بيستخدم صورتها و صدقنى هتتشال و اللى عمل كدا هيتحاسب
يحيي / تمام يا جماعه تسلموا عن اذنكوا
يحيي يمشي و يروح يركب العربيه يدور على اسم الجروب و يدخل يقلب لحد ما يلاقى الصوره و يبعت رساله للى منزلها و يتصل بسعيد
يحيي / ايوه يا استاذ سعيد ازى حضرتك ... ايوه ما انا كنت متصل عشان الموضوع ده ... لا و الله الموضوع مش كدا بس اسمحلى نتقابل فى اى مكان و اشرح لحضرتك كل حاجه... اه اه عارفه ... تمام انا فى الطريق
.......................
على القهوه
يحيي / و لما حضرتك تبقي عارف ان فى عريس جاي هو و أهله و ما تجيش و لا تعتذر
سعيد / حصلى ظرف طارق اقسم بالله و صدقنى حاولت اكلمها كذا مره بعدها ما كانتش بترد
يحيي / ما روحتلهاش ليه كان لازم تشرح لها حضرتك اصلا ما تعرفش اللى حصل يوميها و لا ام الولد ده كلمتها ازاى
سعيد/ برده كل ده ما يديكش الحق تخطبها من ورايا يا يحيي انا امنتك عليها
يحيي / اولا انا ما خونتش الامانه و صونتها يمكن اكتر منك انت شخصيا ثانيا حضرتك اصلا ما كنتش سايبها معايا امانه كنت بتخلص منها
سعيد / انت قليل الادب
يحيي / ما اختلفناش خلينا فى زينب دلوقت
سعيد / اسمع يا ابنى ... انت مش مكانى و لا اتعرضت للى انا اتعرضتله واللى لسه بتعرض له
يحيي / مفيش مبرر فى الدنيا يخليك تسبب لبنتك فى تروما بتحاول تتجاوزها لوحدها
سعيد / انت مكلمنى ليه دلوقت انا يا سيدي اب وحش و ابن كلب عاوز منى ايه
يحيي / عاوزك تلاقي حاجه تقولها لربنا يوم ما نقابله كلنا تقوله انك حتى لو غلطت فوقت فى يوم و حاولت تصلح الغلط ده
سعيد / انت عارف انا حاولت اكلمها النهرده كام مره
يحيي / روح لها البيت... حتى لو اتجننت و قالت اى كلام اهبل عديه حتى يا سيدي لو مش ناوى تغير نظام حياتك عشانها بس على الاقل حسسها انك بتحبها و انك فرحان عشانها و انك جنبها يا سيدي انا عارف ان الحال مش احسن حاجه انا لا طلبت منك تجهزها و لا تصرف عليها جنيه ودها بس مش اكتر اقف جنبها و شرفها حتى لو ساعه زمن واحده بس أظهر فى الصوره
سعيد يبص فى الارض
يحيي / فى موضوع تانى مفيش حد فى الدنيا يقدر يعمله غير حضرتك و الموضوع ده بيخص سمعه زينب
سعيد عنيه توسع و يبص ليحيي بصدمه
........................
فى شقه رانيا
يحيي/ حضرتك عارفه انا كنت عامل ازاى قدام الراجل
رانيا / اقسم بالله كانت وحده ست انا مكلماها فى التليفون قبل ما ابعت ليها الصوره اقسم بالله كلمتها تانى و طلبت منها تشيل البيانات و بعدين انا ما اعرفش ان ليهم صفحه على الفايس دا موقع خاطبه
يحيي/ موقع نصب  ... و لو ما كنتيش رجعتى فى كلامك و خلتيها تمسح الداتا و لا كانت عروسه من اللى بعتتهملك عجبتك كانت نصبت علينا فقرشين و خلعت حضرتك عارفه معمول كام محضر فى الناس دول
رانيا / و انا اعرف منين
يحيي / طب عملتى كدا ليه اصلا
رانيا / عشان بحبك و كنت بحاول اساعدك
يحيي / بأنك تاذى بنات الناس
رانيا / انا كلمت الست و اتأكدت انى ببعت الصوره لست ما كنتش اعرف و الصوره كانت بالحجاب و البيانات اللى خدوها لا كان فيها عنوانها و لا نمره تليفونها اقسم بالله ما كنت اعرف
يحيي/ طب على الله نكون اتعلمنا
رانيا / انا كنت بدور لك على عروسه و قولت بالمره ادور ليها على عريس و وريتك صور البنات و بياناتهم
يحيي / قدر الله و ما شاء فعل ابوس ايدك ما تعمليش كدا تانى
رانيا / هتقول لها
يحيي / لا هستنى اما حد من زمايلها يبلغها زى ما كان شكلى فنله حمالات مقطعه فى الشركه النهرده و زميلى بيفرجنى صوره خطيبتي
رانيا تخبط كف على كف و هى حزينه و ندمانه
يحيي / و الله يا عمتى ما عارف اقولك ايه قدر و لطف حقيقي قدر و لطف
رانيا / و الله ما كنت اقصد اى حاجه وحشه انا عندى بنات
يحيي / ابقي فكرى فيهم بعد كدا قبل ما تعملى اى تصرف من دول تانى ... انا لازم امشي ورايا معاد مهم ... عن اذن حضرتك
.....................
فى شقه سعيد
ساميه / هو مش كفايا القرف اللى بقالك كام يوم مسحول فيه بسببها
سعيد / خليكي فى حالك يا ساميه
ساميه / اصل لو مصدق ان الحوار ده مش هتغرم فيه جنيه تبقي غلطان
سعيد / هو انا مش قولت خليكي فى حالك لما اجى على مصروف بيتك ابقي اتكلمى
ساميه / و انت بتسمي ده مصروف بيت و لا عشان راضيه و مشياها بقليله فكرت ان كدا تمام ... يا سيدي لو معاك زياده وسعها علينا يوسعها عليك ربنا
سعيد / انا رايح لبنتى يا ساميه بنتى اللى المفروض ليها زر ما لعيالك بالظبط
ساميه / و بتاخدهم مقدم بالسنه
سعيد / انا بنتى ملزمه منى زيها زى باقي عيالى
ساميه / هم غسلولك دماغك و لا ايه
سعيد/ لا فوقت لقيت نفسي ما حصلتش حتى ضيف لقيت الكل بينهش فى بنتى و مستضعفينها و مستتقلينها فوقت و الحمد لله انها ما ضاعتش و ربنا سترها معاها و معايا الف حمد و شكر ليك يا رب
ساميه / ايه الاوفر ده جرالها ايه يعنى عمه الغندور كانت بتدور ليها على عريس ضاعت و مستضعفينها و فوقت و ما فوقتش
سعيد / خلاص الكلام.. انا رايح لبنتى و الوضع من هنا ورايح ليا تلات عيال عاجبك عاجبك مش عاجبك الباب يفوت جمل احنا مش هنعيده تانى
ساميه / و ان مشيت يا سعيد هتقدر تربى العيال دول
سعيد / اتكلى انتى على الله و انتى تشوفى ... انا ماشي سلام
....................
فى شقه زينب 
زينب / و انا مش عاوزه اسمعك و لا حتى اشوفك حتى لو هبقي بنت عاقه
يحيي / زينب لو سمحتى
زينب / انت عارف انى زعلانه منه عارف انى مش مسمحاه
يحيي / و جاى يراضيكى اهو فاق و ندم و جالك لحد عندك و طول الفتره اللى فاتت كان بيحاول يكلمك برده
زينب تبص الناحيه التانيه و تحاول ما تعيطش
يحيي/ فاق و ندم غيره ما بيفوقش و لا بيعترف انه غلط اصلا هو اه ما كانش بيقف جنبك بس ما كانش بياذيكي و حتى لو بالفلوس بس حتى لو شيفاهم قليلين دا مقدرته و جايلك ندمان ما تصغريهوش قدامى
زينب / مش قادره اسامحه
سعيد / ما تسامحيش خليكي زعلانه منى بس خليني جنبك اعوضك و أقرب منك خليني ازفك و افرح بيكي ..  حتى لو ما استاهلهاش خليكي احسن منى
زينب تتنهد و تمسح تحت عنيها قبل الدموع ما تبان
يحيي / انتى عارفه انا كنت مشغول فى ايه الفتره اللى فاتت
سعيد يبص له بخوف
يحيي / كنا ناويين ما نقولكيش عشان نفسيتك بس عمتى اتضحك عليها من واحده نصابه عامله خاطبه ادتها صور عرايس ليا و عمتى من طيبتها ادتها صورتك اهو يمكن تلاقي لك عريس كويس و الست النصابه نزلت الصوره على جروب عملاه و بتنصب على الناس من وراه كل ده و احنا و لا على بالنا
زينب / يعني ايه !!
يحيي / ما تقلقيش الحمد لله ربنا بصرنا و باباكى اول ما عرف ما فكرش مرتين و اتعامل و راح بلغ و صلح كل حاجه
زينب / انا لسه مش فاهمه حاجه ... هو انا صورى نزلت على النت ؟!
سعيد / لا لا القصه مش كدا خالص و بعدين هو انتى ليكي صور وحشه اصلا
زينب / امال
يحيي / صوره شخصيه من اللى هم اربعه فى سته بالحجاب عادى ما فيهاش حاجه بس كانوا بينصبوا بيها و خلاص الحمد لله الموضوع اتقفل
زينب / بتتكلموا كان مفيش حاجه حصلت او ان دى حاجه عاديه
يحيي / زينب انا فاهم و حقك تضايقي و اقسم بالله لسه جاى من عند عمتى و شديت معاها بس هى فعلا عملت ده بنيه خير دى حتى بعتت صورتى انا كمان للعرايس يشوفوها
زينب تبص ليحيي و ساكته
يحيي / موقف و عدى و الحمد لله لحقناه بدرى بدرى و كدا كدا ما كانش فى حوار اصلا كلو هبل المهم دلوقت خلينا فى عموا سعيد تمام
زينب / تمام ... اؤمر يا بابا خير
سعيد/ انا مش طالب منك اى حاجه و مش مستنى منك حاجه بالعكس انا اللى جاى اسمع طلباتك و اكون جنبك
زينب / مش محتاجه حاجه الحمد لله ... يحيي مش مخليني محتاجه حاجه
سعيد يبص ليحيي بحرج
زينب / بتبص له ليه
سعيد / زينب
زينب / هو انا ينفع اجى اعيش فى بيتك لحد معاد الفرح
يحيي / زينب
زينب / ايه ؟! مش من حقى اخرج من أبيت ابويا يعني؟! ما لو كدا كدا بقي ما تجيب الماذون و تكتب على طول و مش فارقه اصل معلش انا هفضل هنا انت تصرف عليا و تعملى كل حاجه و فى الاخر يجي بابا باشا يحط ايده فى ايدك و يمثل قدام الناس انه ابويا و انه ربى و يمكن كمان ينزل الدمعتين و كانى هقطع بيه مش كدا
يحيي / بالراحه يا زينب الأمور ما بتتاخدش كدا
زينب / لو مش عاوز يكون اب ليا جاى ليه و يعنى ايه اب و بنته مش فى حضنه يا يحيي يعني ايه بنته و فى حد تانى بيصرف عليها يعني ايه فهمنى
سعيد / لمى هدومك يا زينب و تعالى معايا بيت ابوكى
يحيي / ايوه يا عمى بس
سعيد / هى بتتكلم صح يا يحيي زينب لازم تخرج من بيت ابوها
زينب تعيط سعيد ياخدها فى حضنه
....................
فى شقه سعيد
ساميه / انت اتجننت اكيد
سعيد / قولتلك لو مش عاجبك الباب يفوت مليون جمل
ساميه / ماشي يا سعيد سيباهالك ربى عيالك انت بقي
سعيد / سكه السلامه و اعملى حسابك لو خرجتي من الباب ما تفكريش ترجعى
ساميه / انت بتهددنى !!
سعيد/ لا بفهمك انا كبرت و اتعلمت من اخطائى و مش هكررها عيالي انا اللى هراعيهم و مش هفرق بينهم
ساميه/ و انا كنت قولتلك فرق ما انت بتديها فلوس
سعيد / انتى عندك بنت ... تحبى يوم ما يجيلها عريس تبقي بطولها ... تحبى بنتك يوم ما تتجوز ما يكونش ابوها جنبها و يزفها
ساميه / انا ما ممنعتكش عنها
سعيد / تمام بنتى هتعيش معززه مكرمه فى بيتي لحد ما تتزف على بيت جوزها
ساميه/ و ماله بس تعمل حسابك بقي و تفهمها انى صحتى على قدى و قد عيالى بس
سعيد/ كتر الف خيرك مش عاوزين منك اكتر من كدا
ساميه / و هتنيمها فين بقي ان شاء الله
سعيد / مع اختها فى اوضه العيال و ابنى كدا كدا كبر و كان لازم افصله عن اخته هفرشله الليفينج مؤقتا لحد ما اجيب له اوضه و لا نشوف هترسي على ايه
ساميه / يعني هتنيم ابنى فى الارض عشان خاطر بنتك
سعيد / ابنى و هى اخته و ده اخر كلام عندى دوريها فى دماغك عليا الطلاق منك يا ساميه ان استقصدتى البت و لا ضايقتيها لحد ما تتزف على بيت جوزها معززه مكرمه لا تبقي مراتى و لا تحلى ليا
ساميه / انت بتحلف عليا بالطلاق يا سعيد
سعيد / خلص الكلام يا ساميه و خلى ايامك تعدى
سعيد يطلع بره و ساميه تقعد على السرير بتفرك
…………………….
فى مطعم
زينب / لا كلها حاجات عبيطه و انا بكبر دماغى و بتجنبها و خلاص
يحيي / هانت النقاش خلص الشقه اهو ننزل بكره و لا بعده نشوف العفش و ننجز
زينب / خالتوا تعبانى خالص فى الموضوع ده يا يحيي و عماله تخوفني و تتخيل قصص و حوارات و الموضوع زاد اوى معاها
يحيي / هو انتى اول واحده تتجوز فى الكليه يا زينب
زينب / انا قدامى خمس سنين يا يحيي خمس سنين وارد جدا يحصل فيهم حمل و انا بطولى لا معايا ماما تساعدني و لا حد يشيل عنى
يحيي / انا موجود
زينب / يا حبيبي انا مش معترضه ربنا يبارك ليا فيك و كل حاجه بس انت كمان عندك شغلك و شغلك مش سهل و محتاج تركيز و راحه و تفرغ هتوفق ازاى
يحيي / صدقيني هنرتبها و بعدين خمس سنين زى سته زى عشره
زينب / يحيي !!!
يحيي / و الله هعمل كل اللى اقدر عليه عشان اساعدك و اوفر لك كل اللى تحتاجيه
زينب / و هتتحمل لامتى ما اكيد هيجي عليك وقت و تتعب او بعد الشر تقع
يحيي / انا متاكد انك هتسنديني وقتها
زينب / اللى على البر عوام و انت مش بتحسبها كويس دلوقت
يحيي / يعني هتستحملى العيشه مع مرات ابوكى دى خمس سنين يا زينب
زينب / و لا خمس ساعات اقسم بالله
الاتنين يضحكوا
زينب / انا خايفه
يحيي يتنهد
يحيي / ما انا للاسف ما كتبتش الكتاب عشان اقدر امسك ايدك و ابص فى عينك و اقولك ما تخافيش
زينب تبص الناحيه التانيه
يحيي / ادى لنفسك فرصه صدقيني هنوفقها سوا و هتقدرى هنعمل الاكل من بليل و نجهز اكل الاسبوع كله مره واحده و اليوم اللى يقع هنقضيها او نجيب اى اكل من بره و التنظيف انا هساعدك فيه و لو ربنا كرمنا و يحصل حمل انا يا ستي راضي باللي تقدرى تقدميه مش هتكلم المهم سلامتك انتى و اللى فى بطنك اقولك ايه اكتر من كدا  ... ارحمى يا زوزو انا ما عدتش قادر اصبر دا انا
زينب / اقسم بالله لو ابحت لاسيبك و امشي
يحيي/ انتى هتتلككى انا كلمتك كنت هقولك مرمى فى اوضتى مستني اليوم اللى نخرج فيه سوا او اتعزم عند عمتى عشان اكل لقمه نضيفه
زينب/ اه بحسب
يحيي / انتى كنتى فكرانى هقولك ايه هاه
يحيي يغمز لها
زينب / يحيي !!!
يحيي يضحك زينب تبص الناحيه التانيه و ترجع تبص له
زينب / خلاص بقي الله
يحيي يقفل بقه سوسته زينب تضحك
........................
فى زفاف بسيط على البحر
يحيي و زينب بيعملوا سيشن على البحر و ايمان و رانيا و ممدوح و على و سعيد و ساميه و الاولاد قاعدين على ترابيزه كبيره تحت برجوله
ساميه / الأفراح اتغيرت خالص عن زمان ما شاء الله
ايمان / الشباب اتغيروا بقوا عمليين اكتر و بيعرفوا يسعدوا نفسهم بأقل المصاريف
ساميه / بس كان حتى دى جى و لا اى حاجه الواحد يهيص بدل التزنيبه دى
سعيد / هانت دلوقت يخلصوا و يطلعوا اوضتهم و نروح
ساميه / نيجي لحد البحر و ما نبلش حتى رجلينا
رانيا / البحر قدامك يا حبيبتي ما تحرميش نفسك من حاجه
ساميه تبص لها و تبص الناحيه التانيه يحيي ينادى
يحيي / ايه يا جماعه مش تقوموا تتصوروا معانا و لا ايه
الكل يقوم يجرى ما عدا ساميه و ياخدوا صوره عائليه جميله على البحر
..........................
البدايه