👑العُــــــــــــمــــــــــدة👑

البارت 10💞

👑العمـــــــدة👑
♡..مجنــــون ليلـــى..♡
#10

فاق من ذكرياتو وعنيه مازالة على صورتها ..تنهد وناض جالس خدم ضواوات ديال بيتو مقادو على كانتو بالوان غامقة و انيقة مابين البني غامق و الاخضر كلاسيكي داير فيه كلشي حمامو الخاص جليسة بلفوطوي وطبيلة فالوسط..سرير كبير وسط البيت وركن صغير فيه تلاجة حيت مبلي باامشروبات الغازية ماكاتفارقوش والعاب الكترونيه و مساحة صغيرة فيها حوايجو و ساعاتو و الضوبل من الريحة لي كيستعمل و نظارات شمسية و احذية انيقة و رياضية وكاسكيطات من انواع وماركات فخمة وتلفازة بلاصمة كبيرة
رجع شعرو اللور كيحس بالنفس مقطوعه فيه مني رجع وهو فبيتو وحتى واحد مقدر يمشي عندو حيت عارفين فهاد اللحضة مستحيل شي حد يطلع عندو ويفتح معاه شي موضوع
على عكس ليلى لي طلعات تجمع عند لبنات هاربة من مها وكلامها من بعد ما تأكدات من خالتها انه فلبيت ومع الصيف كينعسو فالصالة بالوناسة من بعد العشا مجموعين هي وحورية و كنزة و هدي كيتناقز عليهم : مازال مبغيتي تحيد هاديك الكاسكيطة من على راسك
حورية كترتب الوسايد ديال نعاس : الموت كدور
ليلى مطلعه رجليها مع الحيط وهازة تيليفونها فيدها : لي مبغاش يتفهم ليا واش غتولي تنعس بيها
كيعض فالتفاحه وفمو عامر : واخا نعرف ندوش بيها
كضحك عليه كنزة : غضبر عليها مزيان معاه نهار يشوف داك اللون
رما عليها بالوساده لي فيد حورية حتى تلف عليها راسها و ختموها بكواغط زريعة و القص و الضحك كيتسمع للزنقا و لبيت عندو فالسطاح كيفرز ضحكتها مزيان...تنهد ودخل للحمام خدا دوش خفيف لبس شورط وخلا صدرو عاري كيف العادة تحنة توضا وصلاة صلاة لعشا لي فاتو..هدي من بين لحوايج لي خداها من باه صلاة رباه عليها من صغر ووصاه انه يوقع لي يوقع مايقطعهاش وانه يخليها هي بليتو الاولى ..سالا صلاتو ...مشا حل تلاجة لقاها عامرة بالمشروبات لي كيبغي ..حنان غير عرفاتو ايرجع طلعات ضربات للبيت تخميلة وقدات كلشي كيف كيبغي..بتاسم هدي هي مو لحنينة حنان اسم على مسمى هز.كانيطاا..وواحد لكريطينة تماك صغيرة..وسد تلاجة حط لكانيطة وقرب للشيشة ديالوو لبلية ديالو الوحيدة ..جرب كلشي شراب ..كارو..حشيش..كلشي ضربو بركلة الا هاد الشيشة لي ديما معاه عندو لجميع انواعها تا شيشات الاليكترونية بجميع النكهات.مااكايفارقوهش..قاد ليها لمعسل كيفضل ديال التفاح ولكن هاد المرة ..دارو ميكس باغي يرد لمزاج..سخن جميرة وقادها فبلاصتها وخدا تيوو وبدا كيطلع فيها ويبخ تا طلعاات كيف بغاا وختمها وهو كيسوط واحد لكمية كبيرة ديال الدخان من فموو..هز داك الشيشة ولكانيطة وخرج للبالكون عندو تماك واحد جليسة صغيورة جلس وشيشة قدامو كيبخ منها مرة مرة وريح خفيف كيضرب فيه....دقايق وهو فعز ااصمت ديالو وااهدوء من غير دماغو لي خدام كيفكر وصوت الشيشة ملي كينتر منها كيتسمع..ميل راسو على صوت طليفونو وصلاتو رسالة من الايمايل ديالو فتح الرسالة كان تقرير على الحفلة  ديال داك راقصة ..صيفطولو جميع المعلومات معاياش واامكان ومعلومات على الفندق وشكون ايحضر لهاد الحفلة.من رجال اعمال مشهورين ولاباس عليهم..ووزراء وشخصيات متنوعة..كل واحد جاي وداير احتياطاتو..هو حفل فالاصل خيري ولكن كيغتانمو الفرصة باش يزهاو..ومن ضمن هاد الزهو كاينة هاد الراقصة المشهورة عالميا لي فاش كيتهز خصرها كيتهزو معاه قلوب رجال لهفانة عليها .ومحضووض هدا لي اتعطيه وقت ولا يشوف ابتسامتها على وجها لييه..كتحط عليها فلوس كتيرة غا غرامة اما خلصتها شي تانييي ..جمالها الطاغيي خلا كلشي يدوي عليها عاد جسمها لي عالم اخوور.عليها الحراسة كتكون متشدة عليهاا حيت عارفين شنو ممكن يوقع .ربع ساعة كافية باش يجمع المعلومات لي باغي..وشحال درجال الامن لي ايخدمو معاه غدا وكل واحد فين ايشد بلاصتو ..وطبعا ختار لي غيمشي معاه وصيفط ميساج لكل واحد فيهم باش غدا يكونو واجدين فااوقت..وكونفيرما الضوصي للشاف ديال شركة الامن انه كلشي مزيان..وطفا طليفون وكمل ااشيشة ديالو بهدوء كيقاد افكارو ويرتبهم
👑العمـــــــدة👑
♡..مجنــــون ليلـــى..♡
#التتمة

جا نهار جديد

كانت متكية فبلاصتها وكتلعب فطليفونها لبارح قصرات مع لبنات وماهبطات تا ل3دصباح نعسات ودابة فاقت معطلة اصلا لمحال ليوم كيحلوه معطل..تنهدات وجمعات الوقفة دخلات للحمام قدات حاجتها وغسلات سنانها ووقفات كتشوف راسها فلمراية بلا تاشي نقطة دلماكياج..بقات كتحقق فملاميحها تحت عنيها زورق ووجها دبال بلماكياج رموشها قلالو بكترة لماسكارا وشي مرات كتركب الرموش كاع.. كانت جامعة شعرها شفنجة طلقاتو نزل على كتافها تا لنص ديال ضهرها هلكاتو بصبايغ وسوشوارات ..ماكانش هكا كان طويل بزاف وقوي وكحل مسبسب كلشي كان حاسدها عليه وماكاينش لي ماكيشوفش فشعرها ويقولها سعداتك بيه تاوجها كان صافي وزوين رموشها كتاف من عند الله زينها يفتن لي مايتفتن وكلشي كيسهة فيها..ماعرفاتش لاش وصلات راسها لهاد الحالة ومنين تسلطات عليها هاد البلية دلماكياج لقات راسها اتبدة تفكر وتمرض عااود ..تنهدات وحنات غسلات وجها مزيان ونشفاتو وجبدات لاتخوز دلماكياج ديالها ..دهنات وجها للفوندوتان وقدات مكياج لي كيعجبها باتقان ..كتصرع لماكياج وهادي هي هوايتها كتحماق على شي حاجة سميتها لمكياج والتغيير وصبايغ كل مرة لوك جديد هدشي فاش كتقيل فالانستا بين لي باج ديال لي مايك اب ارتست ولفنانين وكتعلم من هادي وهديك وباغة تولي تاهي بحالهم وتولي مايك اب ارتست مشهورة وماركة دلماكياج خاصة بيها بحال هدى بيوتي وكايلي جينير وغيرهم هدشي خدا ليها عقلها تا ولات باغة دير بحالهم لا فشكل ولا فلوكات لي كيدرو ولكن هوما لاباس عليهم اش جاب شي لشي..جمعات شعرها مزيان وحلات واحد لمجر عندها تماك وبتاسمات وهي كتشوف لبيريك ديال شعر لي شرات من واحد الموقع ..ركباتو فراسها وقداتو وشافت فلمراية وهي كتهز لمشطة وكتمشطو كان زعر وطويل تا لخصرها كيبان طبيعي بحاليلا شعرها..بتاسمات عاجبها راسها بزاف جات زوينة بحال داكشي د الانستاا ..تمتمات بابتسامة:بربي غا ضايعة فهاد المغرب
وصيفطات لراسها بوسة فلهوة وحلات باب لحمام وخرجات نيشان لبيتها جبدات ماتلبس دقايق وكانت واجدة وهي كتشم ريحة اتاي منعنع ولبيض مقلي ..خرجات من لبيت نيشان للصالون كانت رقية كتسناها غير شافتها شهقات:بسم الله الرحمان الرحييم
ليلى جلسات بابتسامة :صباح لخير أمِّي كيف جاك اللوك جديد
رقية حاطة يديها على قلبها:اش هاد لحالة منين جبتي هاد الشعر
ليلى كتلعب بيه:زويين ياك عجبني وشريتو ياك قلتي مابغيتيش نبقة نحرق شعري بسوشوارت وبغيتيه يطوال ويرجع كيف كان ايوا هنا غنبعد منو الالة وانخليه يطوال ولبارح قطعت ليه لي بوانت وصباغة لتحتانية ولكن انبقة ندير لبيريكات عارفاني مانقدرش نبقة بلا ماندير شي حاجة فراسي مازال نزيد نشري الوان خرين
رقية غا كتشوف فيها مصدومة من هاد البنت لي عطاها الله مامفهوماش:ابنتي قلت لك بغيت نشوفك على طبيعتك ماشي ديري هاد لعجب
ليلى:مالو زوييين شوفي كيبان بحاليلا شعري
رقية مدات يديها كتحركو ببن صباعها:هو صراحة دالله جاك زوين وواتاك بحال دوك لي فالمجلات تقول ديالك
ليلى كتعمر كاس داتاي وتقطع فلخبز وبدات تفطر:مالنا كنلعبو هناا راه ليلى هدي لي دارتها كتواتيها
رقية بتاسمات كتبقة بنتها تنهدات:لبارح ماعرفتش كيف درت تا مديت يدي...
قاطعاتها:أمِّي نساي لبارح صافي نتي امِّي ونتي لي عندي فهاد الدنيا ديري لي درتي انبقة كنبغيك
رقية:الله يرضي عليك تانا ابنتي بقيتيلي غا نتي وهضرتي ونكيري عليك غير حيت باغة نشوفك فحالة زوينة
ليلى:ربي كبيير امِّي.خليني نفطر بلا درامة على صباح
رقية:كتقلبي كيف زمان
ليلى:انمشي نشري شي تواشي خاصين للصالون مشاطي وشي عكورة عاد ندوز لصالون
رقية:صافي وعندك بعدة باش
ليلى:اه
وناضت وفمها عامر:يلاه هاني مشيت
رقية:الله يعاونك ابنتي