لاتزعل الدنيا ولا تزعلك يالظبي العفر ان كان ما جازت لك الدنيا ندور غيرها

"١٥"

عند الحريم اتفقت ام منيره تاخذ منيره وتروح لام بدر لانها لوحدها وجات معهم مزنه وام هادي وام فهاد واختها وسميره اما البنات من عرفوا سميره فيه راحوا لمكانهم المُعتاد بيت مزنه تحديدًا الدكه والجو يهبلل !
_
بعد الفطـور اتجهوا للمسجد وبعد ما انتهوا من الصلاة وحدوا جلستهم بشكل دائري ووزع فهاد عليهم مصاحفهم وابتدوا بالفاتحة وختمو البعض البقره والبعض وقفوا وهم ناوين يكملون بعد التراويح ، وقف سيف وهو اللي نوى يصلي فيهم التروايح ! وابتدت الصلاة بصوته !
_
"الدكه"
ابتسمت سلطانه :أف سيوف ! ياحلو صوته
الجادل بان الرعب بوجهها وهي تنزل راسها تصرف ، حصه ببتسامة :يوووه ماشاءالله عليه صوته حلو وهادي مره
فهده :اسكتوا استكنيت
وكان كل التفاصيل انرسلت لنيّاف والبندري !
_
نجي للرياض .. بيت البندري واللي كانت عازمه اهلها واهل نيّاف وماخلت شي ماسووته وكل شوي توصي نيّاف اللي تعب معها وهو يردد (خلاص اهجدي )
رفعت الألعاب الورقيه وببتسامه :هذي من ضمن فعاليات بيتنا
نيّاف ابتسم بقهر :الحين بدل ماتوزعين مصاحف نفس الخلق جايبه ورقه نلعبها!
البندري ضحكت بخفه :اخواني يقرون بعد السحور لين يأذن الفجر الحين انبسطوا
نيّاف سحبها منها وهو طالع :لازم تخترع شي جديد ماتقعد فاضيه أبد !
وبخاطره انه بالديره ويعيش أجواءها او يكون مع العيال او يكتفي بالبندري اما التجمع العائلي الغريب هذا للحين عجز يتعود عليه واكتشف انه من الصعب يتعود وخصوصًا سنابات العيال واجواء الديره والشوارع والمساجد وسفرتهم كل شي كان حلو !
.
البندري لفت على العامله وهي توصيها تجمع كل شي وشغلت التلفزيون على إحدى البرامج الرمضانية وهي متعمدة ماتحط مسلسلات ابدًا ! واخذت اللقيمات والحلا اللي سوته والقهوه والشاهي وباقي الآكل وهي ترتبه من جديد !!
ورد :مقصوده تبين تزيدين وزني!
البندري :ما اكلتوا شي ترا راقبتكم!
ومدت الصحن الأول :يمه خالتي مدو يدكم
اكلوا وهم مبتسمين ورمضانهم هذا كان غييير خصوصًا ان البندري أحييت الجو وهي ماتركت شي ماسووته .
هناي تربعت :شرايكم بهذا للعيد
ميهاف :استعجلتي الله يحفظك
البندري :انا خلصت
ورد :من لندن صح
البندري :شريت ٣ واحد من قطر والباقي من لندن
ورد :الله وأعلم احس بلبس هديتي اللي جبتيها
هناي ضحكت ولفت :جد ليش مافكرنا !
ميهاف : والله ماقصرت زوجة أخوي فكت أزمه
البندري :كأني اشوف حلطمتكم
ميهاف تنهدت :انا معي عذري وراي جامعه ومتضايقه منها
البندري :وهناي شعندتس انتي الوحيدة اللي انبسطي كلنا جامعييين
هناي :مدري شكلي شبكت معكم
ام طلال :انا قايله تدور الحزن دواره
البنات : ههههههههههههههههههههههههههههههههههههههههههههههههههههههههههه
ام عبداللطيف ناظرت ميهاف :اييه كيفك ميهاف
ميهاف وهي اللي تمون وبقوه عليها :اسألي زايد مالي شغل انا
هناي :ياخوفي تتزوجون بدون علمنا
ميهاف بزعل :شفيكم ضد حب الطفوله وبالحلال يعني غصب الا تحصلون غلط
البندري :بس باقي مادخلتِ ٢٠
ميهاف :هو عند العقل! لازم العمر ٢٠؟
ورد :المشكله انك احترمتيها كلها
ميهاف طيرت عيونها واللي قهرها امهاتهم يضحكون ولا احد اخذ موضوع زواجهم بجديه حتى نيّاف يواعد زايد وكل يوم يقوله بزوجك بكره !
_
عند العيال ..
عبداللطيف :يقولون طاش رجع؟
زايد :اييه بس خلاص ماعاد صرت اتابع اغناني الجوال
نيّاف كان يقهويهم وينتظر علوش وفواز اللي بالغصب عازمهم ربع ساعه ودخلوا وطار من الفرحهه :ارحبوو
جلسوا وزانت الجلسه ونيّاف يحوفهم حوف وزايد يغلط وهو يمدح شغل البندري وينطق اسمها ومايسكته الا صدمات نيّاف وعصبيته الخفيفه ! ضحك علوش بخفه :زايد اعتقه
طلال ابتسم :والله ماخبرت احد من اهلك غيرته قويه
فواز :هذا مربينه فالديره وزادت جرعة الغيره
نيّاف رفع حواجبه :قدها كلكم؟
زايد تأفف :بيبلشني وبيأجل زواجي
طلال بهمس :هذا صدق انه بيتزوج الحين
نيّاف بضحكه جانبيه :ليش؟ مانويت تزوجه
زايد طير عيونه :قرارتي الخاصه محد يتدخل فيها
عبداللطيف :يا ابن ال... استغفرالله مابي اسب ابوي بس ليش محد يتدخل فيها قدام ابوي بعد تقولها ياللي ماتستحي
طلال بنظره :طالع منها يالطيب
ضحك عبداللطيف بورطه ونيّاف متعجب من علاقتهم وكأنهم اخوان مب اب وعياله ، وخصوصًا زايد وسيع صدر وواضح انه اكثر واحد يدلعونه ويمون على الكل البنات وطلال والحريم !
_
نرجع للديره ، عزبة هادي ..
بدر :والله ياسيف حسيتك قاري علي من الهدوء اللي استحل صدري
ابتسم سيف :بصلي فيكم كل يوم انبسط
قاطعهم هادي اللي عدل الشاشه الكبيره وشبكها وشغل مسلسل طاش والتمو يتابعونها كلهم وهادي عزبته ماتخلا من الفعاليات ! وكل شي موجود فيها
_
بيت البندري ونيّاف الساعه 4 الصباح !
مسحت دموعها بشوق للديره وهي تجهز نفسها للدوام وبعد مكالمتها سواء مع اخوانها او البنات ..
_
عند البنات اللي بعد فطورهم اتجهوا لبيت عقاب ورتبوا وساعدوا ام بدر وتقهوو وارجعوا لبيوتهم يستعدون لعزيمة منيره بكره ..