لاتزعل الدنيا ولا تزعلك يالظبي العفر ان كان ما جازت لك الدنيا ندور غيرها

"١٧"

"الريـاض ، يوم السبت كانوا متجمعين ببيت ام نيّاف ويتقهون"
ورد بتوتر :وشرايكم بالموضوع! مارديتو لنا
ام عبداللطيف :انا اقول انتظروا عبداللطيف والبندري ونيّاف واسألوهم
ورد برجا: البندري تقولي تطلب هي والبنات كل يوم بس مايقدرون يروحون لانه ممنوع بس فيه غيرهم يروح وخصوصًا عيالهم
ميهاف رفعت حواجبها :بس عدد سكان الديره قليل و٩٠٪؜ خسرانين
هناي فهمت ميهاف :عادي نجرب وش ورانا
ورد ابتسمت :صح وبعدين نغير جو حتى راح تكون نفس نظام عربات فود ترك
هناي برفض :لا ويين نبي نستأجر محل حول أسواق الديره وبين الزحمه ومنها نقدر ندخل
ميهاف :اجل خلوه نسائي
ام هناي :صح خلوه نسائي والرجال من برا ياخذون
ورد :اللي هو اهم شي نفتحه مره متحمسه احب الاشياء الجديده
ضحكت ميهاف وابتسمت هناي غصب ، ورد ببراءة: شفيه لهدرجة مستحقرين الديره!
ميهاف :لا سلامتك بس افتحيه بعد زواجي
ورد :طيب امك وامي موجودين
ميهاف :اعاملهم نفس خواتي لاتخافين
ضحكوا وخصوصًا هناي اللي تعبت مع براءة ورد واستقعاد ميهاف ..

الديره ،بيت أم بدر ، كل البنات موجودين هناك وسلطانه تو جايه مع عبداللطيف اللي مب راضي يروح ويتركها وبيقعد لين تنتهي الملكه ويرجعون سوا لان أصلًا وراهم اختبارات نهائيه ولازم يرجعون يوم الأربعاء بعد الملكه !
البندري جابت الاغراض اللي ارسلهم نيّاف لها وهي تحط القهوه وتنهدت :ودي بالسطح بس حر حر اف
حصه :قهر الايام اللي راحت كلها امطار وقبلها شتاء احس ماتقبلت الصيف وخصوصًا شايله هم تخرجي ومكياجي بعد اف
سلطانه بقلق :احمدي ربك ابي اكشخ هنا واروح مع عبداللطيف وشكلي بغسل وجهي والبس نظاره لين اوصل بيتي
البندري : ههههههههه عادي لاتحطين ميكب بشرتس حلوه حطي ماسكرا وتنت ومشطي حواجبك وارسميها على الخفيف
سلطانه تأففت :صعبه بجلس قدام المكيف !
ولفت على فهده :الحلوه هذي بعد زواجها بتروح للجنوب ماعندهم حر ابد
فهده بغيض :بعيش بالرياض صححي معلوماتس!
البندري :بس اكيد بتزورينهم يعني
فهده : بتهاوش معه زياره مره وحده بس
حصه :لاتسمعتس امي بس
الجادل لفت على حصه بهدوء :بتسجلين بجامعتنا ؟
حصه :ايه غصب بيقولون لازم معكم ولا ودي بجامعة نوره
البندري :سعود احس أفخم خليتس معنا
حصه :اهم ادرس حتى لو بالإمام ماعندي مشكله
البندري اشرت للجادل بعيونها تلحقها ووقفت :بجيب الشاهي واجي
حصه وقفت قدام المكيف من كثر الحر وهي تتأفف

-

"العزبه وماكان فيها الا العيال وعبداللطيف"
بدر :علوش سوو الشاهي نختبرك قبل تناسبنا
فواز :ملقوف تدخل نفسك بكل شي
عبداللطيف :لاهم متعاونين تحسهم عايله وحده
علوش :بالنهاية بتزوج وبسحب عليكم وتعاونكم لنفسكم ماهوب عندي
فواز :بيبرد كبد عبداللطيف فيكم
بدر :بيوم العرس بيعرف وش معنى كلامه
نيّاف :آيه مسعود بيتكفل بالموضوع ويربيه
سيف كان منسدح ولا عطاهم وجه وتفكيره بكلام أهله وكلام اهل الديره ، تأفف وهو يحسه مسؤول عن عبداللطيف وبخاطره يروح ويجلس مع نفسه ويفكر بالموضوع وخصوصًا مقرن! وكلامه
مسلط بصوت خفيف :شفيك
سيف :مافيني شي
وبتغيير للموضوع :متى بتمشي ؟
مسلط :يوم الأحد
سيف :البنات بيرجعهم بدر؟
مسلط هز راسه :اتوقع
دخل هادي :من اللي بيخاويني نروح للسوق ندور ذبيحه؟
نيّاف طرت في باله ذكرى قديمه وبنفس هالوقت من السنه اللي فاتت وكان ولد ابو عبيد مسمي العنز البندري! التفت وشاف سيف ساهي والتفت لهادي :بنروح انا وسيف معك
سيف لف باستغراب لكن يفهم نيّاف واكيد عنده شي ، عدل جلسته ووقف وراحوا مع هادي ، التفت سيف :شعندك
نيّاف :بنشوف عبيد ونتافهم معه وبشوف لي شغله قديمه عنده
سيف :زيين
نيّاف :خذيتك تبرد كبدك ليش منفس؟
سيف :اكيد بنفس شايف الشيبان وكلامهم أنت!
نيّاف ضحك باستهزاء :احمد ربك عقاب مب موجود لعبته عاد
سيف بمجاراة :عقاب يمكن يحلف وبيزوجنا لبعض اما غيره هرج بالقفى وبس