زينة الهاشم 2

الجزء 13

زينة الهاشم 2 💝
الجزء 13
الصباح درت ميناج لدار ووجدت الغدا هدرت مع  صليحة قتلها هشام قالي قولي لكريمة تجي وحكيتلها قاع واش هدرنا وحتى هشام عيط لنجيب عيا معاه ارواحو تتغداو قالو مانقدرش مرة خلاف عجوزتي لتحت تاني خبرتها بلي جايين اهلي ، مع2 ولا 3 تاع لعشية لحقو لدار سلمنا على بعض صافا صافا لباس لباس وغافرنا لبعضانا كعاد كانو يامات العيد دخلنا كامل لصالو من بعد رحنا انا ولبنات صليحة وسعاد وكريمة لصالو الصغيرة قعدنا نقصرو شوية وشفت نجيب فات داه هشام باش يغسل وجا قعد معانا شوي واش صافا لباس واش حوالكم يحكي هو مع لبنات عادي خصوصا مع كريمة يحكي معاها عادي مكانش حساسية بيناتهم شوي هكا خزر فيا وناض تبعتو  قالي نجيب راهو تعبان ورقد وانا ثاني نرقد شوي ونخلي لبنات على راحتهم احكيو كيما تحبو هو دخل لشومبرة وغلق الباب وانا رجعت لبنات لقيتهم يضحكو عليا خصوصا سعاد قالتلي تأبرني يالي بتفهم من نظرة وحدة شو بدو زوجا من بعد صليحة قالتلي نوضي اجبدي الصوالح لايفزدو ، جابولي بزاف حوايج مخلاو ماجابو وحتى حقي تاع العيد منساوهش صليحة كيما عوايدها جابتلي القاطو ومام اللحم جابولي قلتلهم راهو عندي و عجوزتي مدتلي قاتلي لالا هذا حقك وعلبالنا متقدريش تجي كعاد هشام راهو بلبلاتر ميقدرش يجيبك المهم حنا درنا حسابك، المهم حطيتلهم الضيافة جي و فاكهة وقاطو  ومن بعد قيس مارتحنا شوي كان قريب يلحق العصر كان نجيب ديجا ناض هو وهشام درتلهم قهوة شربو وراحو يصليو العصر ويفوتو لعمومو وانا كنت بعثتلهم لتحت قولتلهم رانا هابطين لعندكم، خملت من القاطو هذاك كامل الي جاباتو صليحة وكان عندي منقبل هبطلهم شوي هبطنا لتحت منقولش مكانش حساسية كاين خصوصا بين لعجوز وكريمة بصح مش حاجة بصح كي دخلت لالة مولاتي هذيك لبنات دارو المستحيل باش ميحكوش معاها وميسمعوش كلامها جمعنا شوي كامل من بعد عيطلي هشام قالي رانا جايين ونجيب ثاني كان عيط لصليحة قالها وجدو رواحكم باش نروحو هذاك هو باش يكفينا الوقت عيات لعجوز تحلف والله غير تقعدو تباتو وتتعشاو محبوش قالولها ديجا رانا خلينا ولادنا ومجبناهمش مكانش كيفاش نقعدو طلعنا لفوق كريمة غير طلعنا لفوق وتطرطق ملي جات وهي تحاول تقفل فمها ومتقول والو قاتلي ملقى بواش يبدلك غير بهذيك انت كامل يبدلك بهذيك هبل هذا قلتلها مبدلنيش بيها كونك هانية مستحيل يبدلني بهذيك الله غالب تكتبت ،هوما روحو وانا رجعت خملت الدار سمانة تقريبا مقعدتش كامل في الدار اليوم الثالث تاع العيد عرضتني مريم روحت لعندها اليوم الرابع جاو دارنا ونهار الي بعدو عرضني عمو الصغير على لعشا عرضنا كامل بصح السبة هي انا وجدت روحي  كي كنا رايحين هبطت لعندهم نلقا لعجوز تحاول فيها ياهدى ربي يهديك روحي تلبسي وهيا معانا قالتلها لالا منروحش معرضونيش انا عرضوها هي كي جا هشام قالها مكيش حابة تروحي متروحيش واحد ماقالك روحي بالسيف حابة تروحي هيا مكيش حابة اقعدي من بعد لعجوز قالت لزهية اقعدي معاها نطق هشام وعلاه تقعد معاها مهيش حابة تروح تقعد وحدها ميهمنيش فيها مش راح نحاولها همسلي قالي غير اقفلي الباب الدخلاني قلتلو لالا خليه برك قالي قلتلك روحي اغلقيه وجيبي معاك المفتاح روحت غلقتو وجيت هبطنا جا لينا رياض دانا رحنا عندهم فوتنا ليلة تهبل لعجوز غير مرة مرة تقولو لوكان غير تروح تشوفها قالها منروح نشوفها منحوس عليها منكسر راسي معاها قولنالها تجي معانا محبتش تخبط راسها للحيط تقعد وحدها معندو مدخلني فيها، المهم تعشينا وسهرنا قعدنا نقصرو فوتناها هايلة من بعد روحنا كي جينا دخلنا كامل من لتحت من القاراج وطلعنا لقينا عندها ختها وباين من حالتها كانت تبكي عينيها منفخين انا مديتهاش كامل فيها طلعت كملت لداري فتحت الباب ودخلت نرقد اليوم الي بعدو ثاني عرضني عمو لكبير زادو عرضوني عماتو بصح هي صاي كلي قراوها مليح راحت معانا ومقالتش منروحش وعرضوها غير هي وهي قبل مانروحو تشكي وتقول انا كي تزوجت واحد ما عرضني وواحد ماقيمني عندها مادير بصح كي نلبسو ونكونو رايحين تسكت وتلبس وتروح معانا كعاد هذاك نهار لول قعدت وحدها تبالي عيتطلو وقالتو يرجع محبش منعرف كيفاش المهم كي قعدت وحدها وخافت عيطت لختها جات لعندها وباتت معاها.
فاتو يامات لاباس هشام مزال بالبلاتر بصح دخل يقري انا روتيني هو هو نهبط معاه الصباح نصبح على العجوز ونطلع نقضي شغلي ندير لغدا خاطر يتغدى هشام عندي والعشا يقولي نتعشا لتحت بصح انا نتحايل عليه نوجد العشا بكري ونقولو كول معايا مناكلش وحدي يتعشى عندي منبعد يهبط عندهم ينقب غير شوية يجمع مع يماه لي عيات فيه اعدل بيناتهم نهار الفوق ونهار بات لتحت وهو مسمطها يطلع يبات عندي صح نتحاضنو نتباوسو شابعين في بعض بصح الحاجة الكبيرة مقدرتش عليها شحال من مرة حاول معايا بصح كي يلقاني مش حابة يجبد روحو ، واحد اليوم كي طلع لقاني مدوشة وخارجة غير بالكاب قلت كعاد مكانش نلبس فالبيت خير ياخي دخل عليا شفتو عينيه قلوبا ارواح حبي نتباوسو شوية ونذوقو التوت قتلو بوساتك باينين وين يوصلو والو خلي نلبس قبل يخي طاح يبوس ويمص ناسي روحو خلاص هبط مع رقبتي وحاب ينحيلي الكاب محبيتش بقيت ندز فيه بصح هو والو عييت نفارع فيه بصح هو تحسب مهوش واعي بلا ما نحس خبشتو بظفاري من رقبتو حتى سال الدم فاق واش بيك متوحشة نتي قتلو اسمحلي والله منقصد بصح نتا قالي خلاص اسكتي عليا وخرج وليت نبكي ونرجف واش درت انا بصح هو حب يفورصيني جبت شحال نوح ممبعد لبست وخرجت سمعت الهدرة فالصالة لقيت زهيرة داويلو فالجرح انا نشوف وساكتة وهيا منتبهتش بلي جيت حتى كملت قاللها صحا ختي ومكلاه نوصيك قاتلو تهنى السبتة جرحاتك في رقبتك كي دارت شافتني تبسمت معايا وراحت  رحت نعنقو اسمحلي حبيبي والله مفقت بروحي قالي روحي ترقدي ، بقى مشنف عليا  قريب سمانة وانا خلاص حاسة قلبي راح يخرج شحال نكره تجاهل نتاعو وبرودو معايا ملقيت بيها وين عيطت لصليحة قتلها بهدلتني قاتلي كي يروح ليها مكالاه تبداي تنوحي وتبكي خاطر نتي راكي تمديلها فيه على طبق من ذهب دارتلي درس بصح انا والله غير فوق طاقتي منيش قادرة نخليه  كي جا مع العشية حبيت نحكي معاه مخلانيش بدل وهبط لتحت شبعت بكا حتى لعشا مهوش يجي يتعشا معايا يجي يرقد برك ويرقد وحدو فالصالة تعشيت وحدي وشديت بلاصتي شحال عييت نتقلب مقدرتش رجعت رحت لعندو لقيتو يتفرج دخلت معاه في فراشو هو غير ساكت قتلو علاه هاجرني قالي ياك نتي حابة هكا قتلو لالا والله ماني حابة قالي كي وصلتي تبعديني عليك وكرهتيني علاه نبقى لاصق فيك شديتلو وجهو بيديا واش هذي الهدرة كيفاه كرهتك كون كرهتك نتحداهم كامل ونرجع ليك!!! قالي يا ريتك مرجعتيش تصدمت منو هكا مالا نتا لي كرهتني جيت نايضة قالي كنتي بعيدة صح توجعت عليك بصح كي قربتي وجعتيني كثر كي راكي رافضتيني قتلو والله ما بيدي سامحني بصح منيش قادرة قالي علاه خاطر عفتيني شفت فيه باستغراب واش الهدرة هذي قالي هيه هذا هو ياك نتي قلتي نعيف الحاجة المستعملة  حطيت يدي على فمو والله ما حق عليك تقولي هكا وبالاك نتا لي راح تعافني بعد ما تشوفني قالي هبلتي نتي انا نعافك علاه مشفتيش واش يصرالي كي تكوني بين يديا قتلو هذي زمان بصح ضوكا كلشي تبدل واش لي تبدل قتلو كلشي وخرجت مني شهقة مليانة وجاعة زربت نوضت جبدني من يدي دارني تحتو واش لي تبدل واش بيك حنونتي حكيلي علاه صاري فيك هكا حطيت يدي على صدري وزدت فلبكا نحاهالي وجا ينحيلي تريكو زيرت عليه قالي نحي يدك حبي دورت وجهي ونبكي نحالي التريكو حسيتو يشوف ليا بالسيف  شفت معاه غير جاو عينينا مع بعض هبط لصدري يبوس فسيكاتريس نتاع العملية هذي لي معقداتك هكا قتلو كيفاه ميعقدنيش جرح ب 14 غرزة شوهلي جسمي كامل وعلابالي راح تنفر مني حط يدو على فمي ردي بالك تعاوديها شكون الحمار لي سباب هذا الجرح مش انا خصني ضوكا غير نعافك عنقتو ربي قدرها عليا مش نتا السبة متقولش هكا لالا انا السبة وكي نطلب السماح صباح وعشية مراحش نوفي وكي نطلب السماح غير باه نتي ترتاحي وتنساي خاطر حتى وتسامحيني نتي انا عمري لا نسامح  نفسي وحتى ربي مراحش يسامحني.
هشام محمل نفسو مسؤولية مرضي وكيما عييت نحاول نقنعو انو مكتوب وقدر محبش يقتانع وكيما يقولو مصائب قوم عند قوم فوائد استغليت نقطة الضعف نتاعو هذي وحولتها لمصلحتي ، زدنا يامات غير قيس لي رتاح ونحا البلاتر ثاني يوم لقيتو قالي هيا تروحي معايا للطبيب قتلو غير الخير قالي لالا خير رحنا لقيتها طبيبة أمراض جلدية كي دخلنا حكالها هو على سيكاتريس نتاوعي شافتني قاتلي تروح بعد 4 حصص لازاغ عادي ودارتلي اول حصة على صدري وعلى بلاصة السيزاغيان ، كي خرجنا من عندها فالطونوبيل قتلو هشام علاه هكا راح تكلف بزاف قالي خلي تكلف لي بغات المهم نتي تكوني مرتاحة ويا زينة حبي هذا تصحيح درتهولك على جالك ردي بالك يروح تخمامك لبعيد نتاع انا نفرت منك أبدا والله كون جات ليا نخليه باه ديما نتفكر واش درت فيك عنقتو ربي يخليك ليا حبيبي قالي ويخليك ، كملت لي سيونس نتاوعي وصح رجع جسمي كيما كان وليت كل يوم نقول اليوم نوجد سهرة مع حبيبي بصح منيش عارفة علاه نعجز ولا ربما كي جبد مني خاطر ضوكا هشام مهوش يتقربلي كيما كان صح رجعنا نرقدو مع بعض بصح حسيت لهفتو عليا طفات، صح مكانش مشاكل فالدار مع الجماعة بصح هذي الحاجة أرقتني حتى سمعت بلي هذي السمانة عرس خو هدى هي راحت منبعد عيطو لعجوز عرضونا انا من الاول قتلها منروحش قاتلي علاه ياك كبرو بيك وعرضوك قتلها منعرف قلت لبنات ارواحو عندي ونشوفو واش نلبسو جابو حوايجهم وبقينا نقيسو قيست لاغوب نتاع زهيرة لي شراهالها هشام في عرسنا قالولي يا عمري والله ثلاث جيتي انجولينا جولي فيها قتلهم بعدا قالولي والله ، كي حكيت مع خواتاتي ومريم قالولي والو متروحيش هبلتي كون كاش ميديرولك قتلهم علاه ياك مع لعجوز قالولي بالخف أمنتي فيها متروحيش ونتي دبر راسك كي عاودت سقسيت هشام قالي من رايي متروحيش علابالي يستفزوك يا لوكان بالهدرة وتمرضي ولا كاش مايصرا فيك خايف عليك مش باه نمنعك وزيد عرس حسين ولد عمي قريب وروحي نحي على خاطرك انا من الاول منيش حابة نروح وكي قالولي هكا عولت منروحش ،نهار العرس جاو عندي لبنات مشطتلهم ومكياو زهية حشامة بالسيف لبستلها صواغي بلون كاسي نتاعي وزهيرة هيا اختارت صواغي الغوج لي حضرت بيها عرس مريم قاتلي تجيبلي الحظ عييت معاها البسي نتاعك بزاف شابة قاتلي ما مخلاتنيش نلبسها في عرس خويا حتى حبيتيها تخليني نلبسها  في عرس الناس وديجا كي شفتها عليك محال جيني شابة كيما نتي قتلها مالا تأمني لاغوب نتاعي جاتك خير مني قاتلي مالا سيبون تبادلنا لبسو وصلهم هشام برك وجا بقى معايا فالدار مع العشية عيطلو سعيد باه يروحو للعرس قالو وقيلا منروحش زينة وحدها وزيد تعرفني نكره جدهم قالو هيا على وجه خالك برك قتلو انا روح وإذا عليا متخافش نغلق البيبان ونلهى مع خواتاتي فالتيليفون قالي صح هزيتلو راسي قالي مالا نروح وكان خفتي ولا كرهتي وحدك عيطيلي قتلو داكور هو راح وانا عيطت لمريم نقرعج على العرس قاتلي مزية مجيتيش تأمني راهم غير من ورايا انا ولواساتك بالكلام المسموم لي ميحشموش ندمت لي جيت ماني قادرة نبلعها ونسكت ماني قادرة نرد دايرة وجه غير لعجوزتي وعجوزتك سيرتو ذيك هدى قلبي كاليني باه نعطيها طريحة ومخلاونيش قتلها يا بنتي خطيك منها يرجع عليك صالح قاتلي هذي لي خايفة منها ونتي كاش حب كاش رومنسية قتلها منين راني وحدي جاو للعشا قاتلي يا نندب هيا معليش.