زينة الهاشم 2

الجزء 17

زينة الهاشم 2 💝
الجزء 17
مع طلع من ورايا قالي غير الخير واش كاين قتلو معلباليش من الصباح بعثتلي اهبطي ومخلاتنيش نطلع باسني على رقبتي قالي جبت لعمري طاكوس اقعدي تغداي وانا نهبط عندهم قتلو لالا اصبر نهبطو كيف كيف قسمنا هذاك الطاكوس كليناه بالزربة وهبطنا لقيناهم يستناو فينا تغدينا هو رجع للخدمة وانا رحت مع زهية لبيتها بقات تحكيلي على فاتح قاتلي مزال يحكي معايا وتقريبا يوميا بصح مجبدليش كامل على الخطبة ولا زواج قتلها متعرفي انتي المهم ردي بالك تغلطي وتقوليلو قيلنا ونضنا طيبنا قهوة شربنا ثاني بغيت نطلع نستنى هشام مخلاتنيش لعجوز بديت نتوسوس هذي واش بيها اليوم ،جا هو وبقينا تم حتى تعشينا جينا طالعين عيطتلو يماه لبيتها هوما دخلو وانا طلعت بدلت  وجيت فالفراش نستنى فيه مع جا سقسيتو غير الخير حضني عندو والو حبي انا البارح نسيت الباب مفتوح وسمعونا قتلو يا فضيحتي قالي نوغمال ما راهي دارتلي درس مخلاتليش وقاتلي متزيدش توشيها خليها تبرا بقينا نضحكو ممبعد قتلو حبيبي والله نموت عليك ومنحب يشاركني فيك حتى واحد بصح ثاني منحبلكش الاذية مذا بيا تولي يوم هنا ويوم لتحت نهدر ونبكي عنقني حنونتي متخمي في والو ، منها بدا ليلة عندي وليلة عندها حتى نرقد باه يهبط وكي يصلي الفجر يجي عندي وليلتي انا باينة من العشية عندي .
جبنا كثر من شهر  صافا كل واحد في حالو حتى في يوم نهدر مع مريم قاتلي زينة راني خايفة راني فالروطار قتلها لي فيها الخير ربي يجيبها تفكرت بلي حتى انا فالروطار كيفاش ندير عيطت لزهية قتلها قاتلي اصبري نقول لما ونروح نشريلك تاست قتلها لالا نخاف ميكون والو وترجع دير حالة واش رايك البسي حجابي وروحي اخرجي وانا نقوللهم بلي انا بعثتك قاتلي اوكي لبست وراحت شوية سمعت الدقديق فالباب الدخلاني يا ربي وتكون زهيرة مع فتحت لقيتها هدى معا شافتني دهشت ممبعد قاتلي زهية هنا قتلها انعم عيطيلها عمتي محتاجتها قتلها ضوك نقوللها قاتلي محتاجتها ذوك قلتلها متفهميش قتلك ضوك جي وغلقت الباب خليتها تمتم شوية جات زهية قتلها اهبطي يماك تحوس عليك قاتلي ديريه ونهبط قتلها محتاجاتك ضوكا اهبطي وارجعي هيا راحت وانا درتو سمعتها تعيطلي خرجت هازينة هزيتلها راسي ماتت بالفرحة تعنق وتبوس نبشر ما ونجي شديتها لالا بليز متقوليلهاش حتى نقول لهشام بليز خليها بيناتنا قاتلي اوكي مالا اليوم فيها سهرة للصباح قتلها حتى غدوة اليوم يبات لتحت قاتلي دوماج  جمعنا شوية وراحت عشية كاملة عييت نشد روحي مقدرتش قريب طرطقت مزية هبط هشام لتحت عيا معايا هيا لتحت قتلو لالا منجيش تعشيت ورحت دوشت جبت كثر من ساعة فالدوش حتى هشام كان عاود طلع ودقدق عليا علاه طولتي عاود هبط وانا خرجت سشورت شعري وزعما رقدت جابتني الفطنة على 1 تاع ليل اف عييت نرجع نرقد والو رحت فرشت فالصالة وزينتها لبست نويزات نواغ المعري كثر من المغطي قلت نبعث ميساج ونشوف بيبيتلو ممبعد بعثتلو حبيبي معليش تجيني ضوكا.
مكاش 5 دقايق سمعت الباب تفتح حنوني راني هنا دخل يلهث واش بيك العمر واش يوجع فيك _والو حنوني جيست توحشناك _قتلتيني حسبت كاش ما صرالك كنت ديجا واقفة معاه ومحاوطة رقبتو بصح بالخف جيت واش كنت خايفة متشوفش لميساج تأمني كي نرقد لتحت نبات عين مغمضة وعين مفتوحة _ياعلاه بصح _نخاف بعيد الشر كاش ما يصرالك وتعيطي ولا تبعثي ميساج ومنفطنش بيك _تحبنا قاع هكا _شكون هذو لي نحبهم _أنا وبنتي شفتو لونو تبدل زينة حبي كلشي مكتوب ر......_اششت متخافش مقصديش على بنتنا لي راحت قصدي على لي جاية_قولي والله حبي _والله كيما نقولك باسني بوسة طويلة حتى ضاق فيا النفس وقالي الحمد لله كي ربي جبر بخاطرك قتلو بخاطرنا _انا منستاهلش يا عمري غلقتلو فمو اشتتت واش الهدرة هاذي بليز انسى باش حتى انا ننسى هكا راك كل مرة تفكرني ونتوجع بزاف_اسمحيلي عمري والله ما نقصد...كملنا ليلتنا ،غدوة منو كي جا تغدى داني للطبيبة قاتلي حملك في أولو لابوش كاينة بصح مزال مكان والو فيها زيدي اصبري يامات هدرتها حطمتني يا ريت متأملتش باطل ومأملتوش معايا خرجنا من عندها قالي واش بيها حبي قتلو خايفة قالي متخافي موالو بإذن الله ربي راح يجبر بخاطرك شفت معاه قالي بخاطرنا تبسمت قالي هيا حنونتي فرجيها تفرج داني درنا شحال شرينا عشا من برا ودخلنا تعشيت ورقدت جبت يامات هذو سماطتلي لدرجة كبيرة عيطتلي مريم فرحانة زينة غير بلوكاج سيبون طاحت عليا صليحة الوحيدة لي قلتلها قاتلي نفس هدرة هشام تصبر فيا هي وزهية،  هشام هذو اليامات مع الاختبارات تقريبا ولى مايقعدش بزاف قالي غير نكمل نرجعك للطبيبة ، اليوم الخميس قيلت جابتني الفطنة على ريحة المثقبة (كاين لي يقوللها الفطير ، المبسس) كيفاش ولى قلبي يدق عليها يا ربي وتكون لتحت عندهم غسلت هبطت دخلت طول للكوزينة لقيت العجوزة قاعدة فالطابلة وهدى هيا لي طيب خلاص قلبي فالطاجين والله مقدرت نحي عيني منها قاتلي لعجوز فوتي تتقهواي معانا شفت هدى كيفاه تخنزرت فيا فطنتني من شرود نتاعي قتلها لالا صحا نحتاج زهية برك قاتلي راها الفوق تجيب فالحوايج عاودت طلعت لداري شرڨت بالبكا حتى عينيا قريب خرجو جا هشام لقاني في هذيك الحالة واش بيك واش صرا بسيف لاخرجت زوج كلمات والو ضياقت عليا برك علاه عمري ديري في روحك هكا استغفري حنونتي حنا هكاك دقدق الباب راح فتح لقاها زهية جايبة المثقبة عيا معايا هيا ناكلو قتلو لالا مش قادرة ودخلت فالفراش دخل معايا بقى يواسي فيا حتى العشا ومدرتش قالي نجيب من برا قتلو مناكلش ونتا تعشى لتحت ديجا اليوم نورمالمو ترقد لتحت قالي علاه معنديش قلب حتى نخلي حبي وحدها في هاذ الحالة غفيت كي نضت ملقيتوش غسلت رحت للكوزينة كاش ما ناكل لقيتو حاطلي الماكلة على الطابلة انا ناكل حتى سمعتو جا واش عمري تنحاتلك شوية قتلو شوية برك قالي دفي روحك وهيا ندير بحنونتي دورة جريت بستو على خدو ورحت لبست وخرجنا البرد يقطع بصح انا كون لقيت مندخلش هذا وين حسيت روحي نتنفس بقينا ندورو ممبعد دخلنا رقدنا طول على الفجر هو راح للجامع وأنا صليت ورجعت لبلاصتي حتى جا هشام تاني رجع لبلاصتو شوية سمعنا الدقديق فالباب الدخلاني قالي اللهم اجعل الخير وراح فتح  وجا قالي ما قاتلك اهبطي قتلو خير قالي معلاباليش بصح كيطلعت هيا بروحها لهنا كاين حاجة لبست جيت هابطة تبعني قتلو وين قالي باينة معاك ضحكت هبطنا لقيناها فالكوزينة مصدرة القهوة والحليب وذيك المثقبة الله الله صبحت عليها قاتلي سربي القهوة سربيت ليا ولهشام  مع جيت نهز حبة مثقبة قاتلي لالا متاكليش من هذيك ولات طيب وتمدلي سخونة هكاك من الطاجين وليت ناكل ونتبنن وهيا حتى نكمل تعطيني الحبة لي هذا وين طابت كليت قريب 10 حبات تفسخت قتلها ربي يحفظك والله عينيا دمعو من الجاست نتاعها سلمتلها على جبينها قاتلي وقيلا تتوحمي قتلها منعرف وحكيتلها كلشي بلي زهية شراتلي تاست والطبيبة واش قالت قاتلي رسمي راكي تتوحمي ربي يبشرنا بشارة خير قتلها آمين استسمحت منها مش قصدي نخبي عليها قاتلي عادي المهم كي ترجعي للطبيبة بشريني قاللها هشام بالسبت الصباح نديها كملنا ونضنا طلعنا لدارنا.
السبت الصباح كنا حنا فالدار وهيا عيطت لهشام قاللها ما مزال فالدار قاتلو ها روحو وطمنوني قاللها ان شاء الله رحنا جزنا  بالخف كنا شادين رونديفو وخرجنا قالي ندورو شوية قتلو لالا خلي نروحو للدار يماك راها تستنى رجعنا دخلنا طول عندها فالصالة لقينا معاها هدى قاتلها روحي حطي لغدا مع زهية خرجت تشنف وتخبط في رجليها قاتلنا هاه واش قاتلكم قاللها هشام باذن الله كاين حمل ولات تحمد في ربي باستني ممبعد قاتلنا بالاكم تهدرو قدامها ودرنا برايها أهل الدار كل علابالهم غير هدى، يامات بداني الوحم كارثة نهار بطول وانا نرجع وليت من الفراش منوضش ولتحت منهبطش كامل عجوزتي قاتلي والو الدروج مهمش ملاح ليك وأصلا ماولات عندي طاقة للمشي ومنقدرش نوض بصح الحق يقال لواساتي وعجوزتي قايمين بيا ماكلتي حتى لفراشي وكل يوم تجي زهيرة ولا زهية يديرولي ميناج خفيف وبالأحد ديما منين يخدم هشام جي زهية ديرلي ميناج لكلشي ربي يعطيها على قد نيتها ضرتي صح خاطيتني بصح قداه من مرة نسمعها متقابضة مع لعجوز على جال الماكلة كي تبعثلي قتلها متزيديش تجيبيلي ديجا منيش نقدر ناكل بصح هيا معندة ممبعد ولات لعجوز طيبلي ، هشام من يوم رجعت ليه حاملني على كفوف الراحة أما ضرك بزيادة خواتاتي جاو زاروني مرتين ضوكا راني فالشهر الثالث قريب الرابع خلاص اليوم كرهت وغلبت كنا بيوم الجمعة دوشلي هشام وسشورلي شعري ورجع دوش وراح للجامع وجا يرقد انا قتلو نهبط لتحت كرهت من التكسال قالي هيا نهبطك قتلو لالا نقدر نهبط وحدي قالي زينة بالشوية مع الدروج صحا حبي انا خرجت لقيتو تبعني بقى يطل عليا من لفوق بقيت نضحك معاه حتى فتحت الباب نتاعهم (هوما بابهم ميغلقوهش بالمفتاح ندقدق وندخل طول مع دخلت سمعت الهدرة واقيلا الضياف خلي نرجع خير  مع جيت دايرة خرجت هدى قالتلي شرفتي وأخيرا طل القمر كانت معاها ختها تشنفت عليها وكملت طريقي مع طلعت الدرجة الثانية غفلتني وجبدتني من شعري نهدر معاك يا القحبة لالا ونطيح فالارض عيطت لربي لي خلقني عند دقيقة لقيتهم كامل دايرين بيا وهشام سوطا فوقي وطاح فيها بالكوتبيات انا نعيط وهيا تعيط جرات ليه يماه خليك منها اجري لزينة  كاش ما يصرا فالصغير.