في اليوم اللي بعده، خلصت نورة كلاساتها، تغدت وقيلت شوي، بعدها ع العصر اتصلت لراشد
نورة: مساء الخير
راشد: مساء الورد يا هلا، شخبارج ؟
نورة: طيبة طاب حالك، انته علومك ؟
راشد: بخير الحمد لله
نورة: عسى ماشر رشود ؟ شو موضوعك ؟
راشد: كل خير لا تحاتين، شرايج نملج قبل رمضان ؟
نورة:..........................
راشد يضحك: نواري وينج ؟
نورة: صدمتني
راشد: شو اللي يصدم ؟
نورة: ليش العيّله!!!، بلاك فجأة قررت ؟؟؟
راشد: انا خطبتج ع أساس اتصبر لين وقت الملجة، بس اللي صار العكس، احس اني مستعيل اكثر واكثر
نورة تتنهد: انزين رشود احنا متفقين أخلص هالكورس على خير وعقب نحدد التواريخ المناسبة
راشد: مافيها شي لو ملجنا الحين، أحس عادي
نورة: وماديًا انته مستعد ولا لا ؟
راشد: من هالناحية لاتحاتين أبد.. أموري طيبة
نورة: انزين رشود انا بخلص فاينلات شهر خمسة، اصبر شويه، ماباقي شي!! بتغمض عين بتفتح عين وعدت الأيام
راشد: لاترديني نواري
نورة: ويييييت، ترى يدي توه متووفي ؟ احس مب وقته
راشد: انا بشاور عموه شيخة قبل، بس ماحس التوقيت مشكلة، ثانيًا عادي بنسوي ملجة بسيطة بين الأهل وبدون اغاني وبدون شي
نورة: وايد بنضغط رشود، ابا اركز بدراستي وعقب يصير خير على هالأمور
راشد: صدقيني بتقدرين وأنا بساعدج بكل شي، تراه آخر كورس خلاص مابتفرق يعني
نورة: مادري مادري، بفكر وبرد عليك
راشد: لو لي خاطر عندج لاترديني.. ودي بهالشي أنا
نورة: خاطرك على عيني وعلى راسي، بس الله يهديك صرعتني
راشد: ماعليه خذي وقتج فكري زين، وردي علي
نورة: تمام
****************************************
فالمدرسة عند عاشة وسارة.. يات لهم مها وحضنت سارة
مها: وينج ساروه وحشتيني
سارة تبادلها الحضن: وحشتيني أكثر مهوي، شو الأخبار
مها: تمام الحمد لله، ليش ماتيين النادي ؟ من زمان ماشفتج هناك
سارة بارتباك: مشغولة شوي بالدراسة
مها: الله يوفقج ويوفقنا يا رب
سارة: آمين
مها باحراج: بغيت أكلمج بموضوع شوي حساس
عاشة قامت بتروح عنهم..
سارة مسكت ايدها: عواش مب غريبة، عادي خل تسمع، وانتي خذي راحتج
مها تأشر على الكراسي: اوكي تعالو نقعد أول
مها: بصراحة انا وايد متلومة منج، بس لازم أتكلم، خالد ولد عمي كم مرة ياني يسألني عن رقمج، وانا طبعًا مارضيت أعطيه، لكنه يقدر يحصله من أي حد من البنات، فلو سبب لج أي أذية خبريني وبوصل الكلام لأبوه وبيشوف العين الحمرا بيأدبه.. خلود ولد عمي وأعرفه.. انسان طايش ومايحشم حد.. فأنا من واجبي أنبهج
سارة تمت تطالع مها مصدومة.. أما عاشة تنهدت براحة.. و أخيرًا صار كل شي واضح!
سارة: عادي اطلب منج طلب ؟
مها: آمريني
سارة: يوم بتسيرين النادي قولي هالكلام لحميد
مها باستغراب: ليش ؟
سارة: بدون كيف وليش.. اذا سويتي هالشي بكون شاكرة لج، لأنه ولد عمج سبب لي مشاكل أنا في غنى عنها
مها بتوتر: عشان جيه ماتيين النادي؟ بسبب خلود ؟ امسحيها بويههي، انتي ما تستاهلين الا الخير، هذا فاضحننا فكل مكان وعند كل حد.. بلاويه ماتخلص
سارة: خسي ماسير النادي عشانه، آخر همي خالد، أنا صدق مشغولة عشان جيه ماسيير
مها ابتسمت وقامت: السموحة مرة ثانية، وخلينا نشوفج قريب
سارة تبادلها الابتسامة: ان شاء الله حبيبتي
عاشة: هاه الحين ماعندج عذر.. الموضوع بينحل، ويلا سيري النادي وارجعي لحياتج الطبيعية
سارة: لا مابسير
عاشة باستغراب: ليش عاد
سارة: بس
عاشة عقدت حاجبها: بشو تفكرين ؟ اعترفي ؟
سارة: ولا شي
عاشة: مادانييييج يوم ترمسين بالقطارة... تنرفزييييييين يا ربييييه
سارة تحضنها وتضحك: وأنا أحبج وأموت فيج.. بس مابا اسير النادي لانه في شي فبالي
عاشة: زين اللي يريحج
*****************************************
عند نورة وآمنة، يالسين فالغرفه مشغلين شمعة.. وكل وحدة حاطة شيت ماسك على ويهها
آمنة باحراج: نوار ترى سعيد كلمني، وقلتله اني موافقة
نورة صارخت ونقزت: يا حيوااااااااااانه ليش ماخبرتيني ؟
آمنة تضحك: ما أمداني، يوم كنا متيمعين قال لي تعالي المطبخ، وسرتله، قاللي خلاص طمنيني شو ردج ؟ موافقه ولا لا.. تبين الصدق ماكنت بجاوب، بس كسر خاطري، وقلتله اني موافقة بشرط كل شي يصير عقب ماتخرج
نورة تتنهد: ياليت اللي عندي يفهم
آمنة: ليش ؟
نورة: اخوج صدمني، يبانا نملج قبل رمضان
آمنة بطلت عينها على وسعها: من صدقه هذااااااا
نورة تتنهد: هيه والله
آمنة: وانتي شو قلتيله ؟
نورة: بفكر وبرد عليه
آمنة: أخوي ماله حل بصراحة.. حبكت الحين ؟ يعني تقريبًا عندج شهر واسبوعين بيمديج تتجهزين ؟
نورة: مادري أمون مادري.. المشكلة لو قلت له اني مابا بيزعل
آمنة: مب اي شي يقوله تقولين سمعًا وطاعة
نورة بضيق: مادري أمون يصير خير
آمنة عقدت حاجبها: انتي قولي انج مستعيلة نفسه
نورة: لا والله أمون، بالعكس احس ضغط الوضع بيكون وقلتله.. بس هوه وايد مصر ومستعيل
آمنة: مادريبكم.. بس فكري زين انتي ولا تسوين شي مب مقتنعه فيه
نورة: هيه أكيد
********************************************
اليوم اللي بعده.. راحت مها صوب حميد وقالت له موضوع خالد.. حميد كان متوقع هالشي لكنه ينتظر الحقيقة تنكشف.. خطر على باله أخوه حمد واتصل له خبره عن كلام مها.. -طبعًا حمد عنده علم بموضوع خالد وسارة- لانهم ما يخبون على بعض شي
حميد: ها حمد شو تشور علي ؟ كيف أراضيها ؟
حمد: صراحة مادري.. سارة المشكلة زعووولة، وانته قسيت عليها وايد ترى
حميد: بغيتك عون صرتلي فرعون
حمد: شرايك تكلم عواش ؟ وتشوفلنا حل
حميد: انزين دقلها انته احسن.. وتناقشو وخبرني بكل شي
حمد: تمام
********************************************
حمد اتصل لعاشة
حمد: السلام عليكم
عاشة بحيا: وعليكم السلام ورحمة الله
حمد: شحالج عساج طيبة ؟
عاشة: الحمد لله بخير وعافية انته علومك ؟
حمد: بخير الحمد لله.. احتاااااي مساعدتج
عاشة: حاضرين شو بغيت ؟
حمد: سارة مب راضية تيي النادي،، وحميد يبا يطيب خاطرها، لكن السؤال كيف ؟
عاشة: اممممممممممم عطني ثواني افكر
حمد: زين
عاشة بحماس وصوت مرتفع: يسسسسس،،، والله عررررررررفت الطريقة اللي بتخليها تروح النادي...يتني فكرة جهنمييييييية
حمد يضحك على اسلوبها: قولي يا أم الأفكار انتي
عاشة: ركز معاي واسمع زين اللي اقوله.....
******************************************
على العصر لبست عاشة لبس الفروسية، وراحت بيت عمها عند سارة ودخلت عليها الغرفة فجأة
سارة بصدمة: عواش ؟ شو يابج ؟
عاشة: البسي بسرعه رشود يتريانا برع
سارة بخوف: ليش شو صاير ؟
عاشة: ستورم تعبان.. ماياكل زين، والسبب انج غايبة عنه فترة طويلة
سارة نقزت: تمزحيييين ؟
عاشة: عندج عشر دقايق.. اترياج فالسيارة
سارة لبست بسرعه.. وطلعت.. بالها مشغول على خيلها وتحس بتأنيب ضمير
وصلو النادي وسارة راحت لستورم.. أول ماشافها الخيل صهل بصوت عالي وارتفع شوي وضرب بريله.. كأنه يرحب فيها
سارة لمعت عينها وحست بغبنة.. راحتله باست خده وحضنته من رقبته.. سبحت سارة الخيل وعقب بدت تمشط شعره وتعقصه
حميد كان يراقب سارة من بعيد، بعدها راح صوبها
حميد: السلام عليكم
سارة بدون ماتطالعه: وعليكم السلام
حميد: شحالج
سارة: الحمد لله
حميد: شفت مها اليوم، وكلمتني عن كل شي
سارة: والمطلوب ؟
حميد يتنهد: أنا آسف وحقج علي
سارة: حصل خير
حميد: طالعيني وانا ارمس
سارة التفتت عليه وتطالعه ببرود: أنا بسير
حميد مسسك كتفها: سارة عاد ....
سارة قاطعته بحدة وعصبية: لا تمسسسسك كتفي
راحت عنه.. أما حميد تنهد بضيق وعرف انه بيتعب وايد لين مايراضيها
راحت سارة لعاشة وهيه معصبة ع الأخير..
سارة: الخيل مافيه شي، صحته زينة وبعافيته، شو هالحركة اللي سويتيها عواش ؟ أنا لو ابا اشوف حميد بشوفه بدون كل هذا
عاشة بترجي: ساروه لاتزعلين، بس الولد يبا يراضيج ولجأ لي وانا مارديييته
سارة: لا والله ؟ انتي عارفة اني مابا ايي النادي ومابا اشوف حميد، شو يعني تخوفيني وتخليني ايي هنيه غصب ؟؟؟
عاشة تمسك ايدها: سويرة يلا عاد
سارة تسحب ايدها بعصبية: انا دقيت لمايد أخوي وبروح الحين.. لو بغيتي تروحين تعالي وياي
******************************************
اليوم اللي بعده كان يوم اليمعه.. الكل متيمع كالعادة.. حميد عينه ماخازت عن سارة، وسارة متجاهلتنه تمامًا..
خلصو من العشا ويا وقت السويت والشاي والقهوة.. قامت سارة فجأة وراحت داخل عند المغاسل تغسل خشمها
حميد: من متى خشمج ينزف ؟
سارة:.....................
حميد مسك ايدها ولفها صوبه.. مسك خشمها وضغط عليه عشان يوقف النزيف
حميد: الخدامه بعد شوي بتيب ثلج
سارة بصوت مغبون: أنا بدبر عمري، توكل
حميد مطنشنها
سارة مسكت ايده تحاول تبعدها عن خشمها: ابا اسير عندهم برع
حميد مسك ايدها ونزلها: سارة لو تميتي على هالعناد بتتعبين من خشمج
سارة: أي عناد ؟
حميد يتنهد: انتي فاهمة قصدي!
سارة دمعتها نزلت: حميد ممكن تهدني وتخوز ايدك عن خشمي؟ خلاص ابا اروح
حميد ارتبك و خوز ايده: خلاص خلاص بدون صياح خوزت ايدي، بس على الاقل لاتطلعين لين ما أتطمن انه النزيف وقف
دخلت الخدامه عندها ثلج.. حطته سارة على فتحة الأنف دقيقة، وبعدها حطت ايدها تضغط شوي لثواني
حميد واقف يتأملها.. قلبه يعوره لأنها مضايقة وايد، ومبين زعلها كبير
حميد: ممكن أناقشج شوي ؟ عطيني مجال أراضيج.. انتي لو تميتي شالة فخاطرج خشمج بيصب دم كل شويه
سارة باستهزاء: تطيب خاطري على شو ؟ انك كنت شاك فيني ؟
حميد طلع نفس طويييل: سارة حاولي تفهميني الموضوع مب موضوع شك
سارة بعصبية ودموعها بدت تنزل: مب شكك؟ عيل شوووو ؟ فهمنننني شوووو سبب عصبيتك ؟ حميد قلبي عورني من أسلوبك هذاك اليوم، والله وايد حز فخاطري، أنا وانته قراب لبعض من يوم كنا صغاااااار!! المفروض عارف طبعي، عارف شخصيتي، كيف تتوقع مني أدخل بهالدرب وأسوي علاقات ومع منو ؟ واحد وصخ مثل خالد ؟؟؟ المفروض من أقولك انه مابيني وبينه شي تصدقننني، مب توقف ضدي !!!!
حميد: والله مصدقنج، والله يابنت الناس مصدددددق، لكن ساعتها أنا ماكنت أشوف جدامي من العصبيية، نار شبت فداخلي،، تعرفييين شو يعني أحترق من داخلي ؟
سارة تشهق: مب عذر، كل كلاااااامك ما أقنعني، وتجاهلك لي ؟ تطنيشك ؟ حتى من زود انك مب طايقني مب رايم تطالع بويهي
حميد: أنا ماطيقج ؟ والله لااا، ماتوصل لهالمرحلة سارة ماتوصل... أنا مب عارف كيف اشرحلج الموضوع.. مب عارف كيف أوصللله
سارة تمسح دموعها: مب عارف ؟ اللي فخاطرك قوله وخلصنا... عيل حزتها رمت تعق علي كلام مثل السم وتشكك فيني
حميد: المفروض تكوني فاهمتني... افهمي تصرفاتي سارة.. أنا مادريبج فاهمة ومطنشة ولا انتي جد مب عارفة وين الله حاطنج
سارة بنظرة مكسورة: انته يالس تبرر لنفسك عشان ماتقول انك غلطان، خلاص حميد نسكر الموضوع انته صح وانا غلط... وزعلي ؟ مب مهم
حميد يغمض عينه ويتنهد: استغفر الله العلي العظيم، لاتخليني أتكلم لأنه الشي مب لصالحنا... خليني ساكت وحاولي ترضين سارة.. والله زعلج مهم وانتي بكبرج ماتهونين، عندي أنا بالذات ماتهونين
سارة باستهزاء: هيه صح.. واضح من تصرفاتك والموقف البايخ اللي صار، أول موقف يصيرلنا وانته ما شاء الله سيدة صدقت وأول واحد وقف ضدي
حميد بانفعال: وبعديييين يعني ؟؟؟ سارة أنا............
