راشد بهدوء: مرت عمي فديتج اذكري الله، احلف لج انه سعيد بخير واصاباته خفيفة، كلهم عنده الحين
أم سعيد تمسح دموعها وقامت: ودني عند ولدي
راشد: حاضر من عيوني، انتي بس اهدي
العمة شيخة من سمعت طاري سعيد والحادث، تيبست، ماعطت أي ردة فعل.. بالنهاية هذا سعيد اللي غير عن كل حد
راشد بحنيّه: عموه حبيبتي البسي عباتج يلا عشان اوديكم عند سعيد
العمة شيخة بتهديد: راشد يا ويلك مني لو عرفت انك تقص علينا
راشد يمسح على كتفها: والله اني صادق بكل كلمة قلتها، يلا عموه عشان مانبطي عليهم
سارة: احنا مانسير وياكم ؟
راشد عقد حاجبه: انتي قري مكانج، هذا قسم رياييل، لين باجر يصير خير
العمة موزة تتنهد: عيد وخير من وين يتنا هالمصيبة
راشد: ماعليه عموه تحصل.. المهم انه سعيد اللي ياه بسيط الحمد لله
********************************************
نورة بشفقة: أمون حبيبتي قومي نسير داخل
دخلو الغرفة، وآمنة هادية.. ماعطت أي ردة فعل
نورة: أمون ترى صدق ماتعور، بس فيه رضوض وبيخلونه فالمستشفى لين ما يتأكدون انه كل شي زين، والحادث بسيط الحمد لله، في واحد مسرع ودعم سيارته من ورا، وسعيد الله يهديه مب لابس حزام عشان جيه تعور ، وفي جرح بويهه لكن أظن انه بسيط
آمنة تتنهد: الله يشفيه ويعافيه
********************************************
في المستتشفى
سعيد يحضن أمه: ليش الصياح يا الغالية، عوقي خفيف الحمد لله مافيني إلا العافية
أم سعيد تشهق: أنا مالي غيرك بهالدنيا، أنته راس مالي
سعيد يمسح على ظهرها: عدت على خير الحمد لله، لا تحاتين حبيبتي، والله مافيني شي
أبو سعيد كان طالع ورجع..
سعيد ابتسم: شو هالشنطة اللي بإيدك أبوي ؟
أبو سعيد: أنا بكون مرافق المريض، برقد عندك
مايد: أفا عليك عمي، أنا برقد عنده وانته ارجع البيت
محمد: أنا بعد أروم أرقد عنده، نومة المستشفى صعبة عليك عمي، ارتاح فبيتك أحسن ومن أصبح أفلح
أبو سعيد: الله يبارك فيكم، لكنني مابتطمن إلا لو كنت وياه
سعيد:يتضاربون علي، لهالدرجة النومة عندي حلوة ؟
محمد: اندوكم، هذا صدق عمره
سعيد: أنا أقول كل واحد يرجع بيته ويريح.. وأنا مافيني الا العافية وأظن باجر بالكثير بيرخصوني
العمة شيخة بعتاب: ما حيدك مستهتر، ليش مب لابس الحزام ؟
سعيد: العمة، والله الحادث بايخ، وياليته بشارع عام ولا شارع سريع، واقف بأمان الله، اللي ورا حضرته مسرع وماسك التلفون ومب منتبه انه الشارع واقف من الزحمة، دعم سيارتي من ورا وأنا سيارتي بعد دزت السيارة اللي جدامي، فجسمي طار على جدام أول شي وبعدين رجع على ورا، وارتد مرة ثالثة على جدام.. من جيه انا متروس رضوض.. الدكتور قال ماشي نزيف داخلي الحمد لله لكن للاحتياط لازم يخلوني تحت الملاحظة
أم سعيد بانفعال: فالك ماقبلناه، بعييد الشر
سعيد: أفا عيل اليوم بترقدين بدون أبوي ؟
أم سعيد بعصبية: سعود يوز عني، بروحها أعصابي تلفانة
سعيد يحاول يلطف الجو: فديتج وفديت أعصابج، ترى السكيورتي الحين بيي وبيروغكم، تارسين المكان الله يحفظكم
محمد: ماعليه بنروح بعد شويه أصلًا
أم سعيد: بعدي أنا بيلس ويا ولدي
أبو سعيد: يا حرمة اذكري الله.. ان شاء الله من الصبح بشلج عنده
أم سعيد تتنهد: لا تتأخر الصبح، لو تأخرت بطلع بروحي
أبو سعيد: لا لا ماعليج.. ع الوقت ان شاء الله
محمد باستغراب: مرت عمي انتي ماتسوقين؟
أم سعيد بإحراج: امبلا أسوق، بس عمك ما يرضى، لازم هو يوصلني مشاويري
محمد ابتسم بدون تعليق
العمة شيخة وَخت باست سعيد على خده: تصبح على خير حبيبي
سعيد: وانتي من أهل الخير والعافية
العمة شيخة: اذا رخصوك باجر إكتب فالقروب لا تنسى
سعيد بابتسامة عريضة: بتيبون هدايا ؟ من الحين أقول مابا ورد، اللي بيب شي ايب كاكاو
العمة شيخة: حتى بهالوضع اللي انته فيه ماتفكر الا فالبلعه ؟
سعيد يضحك: مايعدل النفسية الا هالخرابيط عموه
العمة موزة تبتسم: اطلع من المستشفى بخير وسهالة، و وعد مني اسويلك كل السويتات اللي تحبها
سعيد: أهم شي الكوكيز
العمة موزة: من العين ماطلبت شي
سعيد: لا خليت منكم يميع.. الله يحفظكم.. توكلو يلا الوقت متأخر وأكيد كلكم تعبانين
*******************************************
على الساعة 12.. صلت آمنة الوتر ولبست بجامتها وانسدحت على السرير، بالها مشغول، وتحاتي، ودها تتطمن.. لكن تحس انه غلط تتصل أو تتواصل، بالأخير استسلمت لرغبة قلبها واتصلت
