မြတင့်(ပြန်လည်ရှင်သန်ခြင်း)

မြတင့် ပြန်လည် ရှင်သန်လာပြီ

Unicode

အထိအခိုက်များလွန်းလှသည့် မြတင့်၏ဘဝထဲတွင် ချိုမြိန်လွန်းလှသည့် ချစ်ခြင်းမေတ္တာများစွာ တည်ရှိခဲ့ဖူးသည်ကို မြတင့်သည် လွန်စွာ နောက်ကျမှ သိခဲ့ရသည်။

သူသည် အရေးပိုင်မင်းကိုလှသောင်၏ ချစ်ခြင်းမေတ္တာကိုလည်း ပြက်ရယ်ပြုမိခဲ့သေးသည်။ အခွင့်အရေးကလေးများ ရှိဦးမယ်ဆိုရင် မြလေ ကိုလှသောင်ကို တောင်းပန်ချင်လိုက်တာကွယ်။ အခုတော့ဖြင့် မြဟာ မှားပြီးရင်း မှားနေပါရောလား။

မြတင့်သည် စံပယ်တွေဟာ သိပ်မွှေးတဲ့အကြောင်းကိုလည်း လွန်စွာနောက်ကျမှ သိခွင့်ရခဲ့လေသည်။ စံပယ်တွေဟာ သိပ်ကို မွှေးတဲ့အကြောင်း သူ့ကို ပြောပြချင်သည်။ သို့သော်...သူက မြတင့်ကို မုန်းနေနှင့်ပြီလေ။

"ကျွန်တော် မြဆီ ဘယ်တော့မှ ပြန်မလာတော့ဘူး"

"တစ်ခါလောက်တော့ နှင်းဆီတွေအစား စံပယ်တွေကို ပန်ကြည့်စမ်းပါ မြရယ်၊ စံပယ်တွေက သိပ်မွှေးတာ မြရဲ့"

သူသည် ဘယ်ကြောင့်များ ခြံစောင့်ကလေး မြတ်သိန်းကို အဝေးကို တွန်းပို့ခဲ့မိပါလိမ့်။ သူ ဘယ်လောက်တောင် ရက်စက်ကာ အကြင်နာမဲ့ခဲ့မိပါလိမ့်။

ဖြူစင်သန့်ရှင်းလွန်းလှသည့် မြတ်သိန်း၏ ချစ်ခြင်းမေတ္တာများ သူသည် အမြစ်မှနေ၍ ဆွဲနှုတ်ကာ အပိုင်းပိုင်းချိုးဖဲ့ဖျက်စီးပစ်ခဲ့မိလေသည်။

ဒူးထောက်ပြီး တောင်းပန်လျှင်ပင် မြတ်သိန်းအပေါ် ပြုမိခဲ့သည့် အပြစ်တို့ ကျေနိုင်မည် မထင်တော့ပါ။

မြတ်သိန်းဟာ သူ မုန်းသော မိန်းမနှင့် လက်ထပ်ခဲ့ရသည်။ ကျွန်တော်လည်း မြကို ရင်နှင့်အမျှပါပဲဟူသည့် စကားလေးကိုပင် အဖက်မလုပ်မိခဲ့ချေ။

မြဟာ ရူးနေခဲ့တာပဲ၊ ဖြစ်ခဲ့ရတဲ့ ကိစ္စအဝဝဟာ မြရဲ့ ဆုံးဖြတ်ချက်အမှားတွေကြောင့်ပဲ။ မြ တာဝန်ယူချင်တယ်။ အမှားတွေကို ပြန်လည် ပြင်ဆင်ချင်တယ်။

"တစ်ခုတော့ မြ မောင့်ကို မှာချင်ပါသေးသည်။

ပန်းမခူးပါနဲ့ မောင်"

ဒီစာလုံးကလေးများအား မြတင့်သည် သူ၏လက်ကျန်ခွန်အားကလေးဖြင့် ရေးခဲ့ရခြင်းသာ။