يا مرحبا حبايبي جمعة مباركة ومساء السعادة عليكم فقراتنا المميزة حكاية كاتب نتعرف على صاحبة قلم ذهبي أبدعت بنقل العديد من الروايات الاجتماعية وعيشتنا مع أبطال قصصها تأخذنا وياها بعالم قصصها المبدعة
( ريام الجنابي) أهلاً وسهلاً بيج شرفتينا وشكراً الج على قبول الدعوة ونترك القلم بيدج تعرفينا عليج
بالبدايه شكراً لحضرتج على استضافتي بهذه الفقره و شكراً لمتابعاتي اللي كانو سبب بنشر كتاباتي و انطوني من وقتهم و قرو لكاتبه ما يعرفوها سابقاً و حفزوني ان اقدم افضل ما عندي و اسعى بتطوير موهبتي حتى استحق ثقتهم اسمي ريام او عطر الياسمين مثل ما يعرفوني المتابعات
عمري 38 سنه
متزوجه
و أم لأربع اطفال
متى اكتشفتي موهبتح؟
اني من طفولتي اعشق القصص و احب اقرا قصص الأطفال و بنفس الوقت افكر هوايه و اتخيل هوايه و احلى درس عندي كان درس الأنشاء احس انه ينطيني مساحه اترجم افكاري و مشاعري على الورق فالموهبه موجوده من الطفوله و كثرة القراءه طورتني هوايه الحمدلله
منو أقرب شخص إلى ومنو ساندج بمشوارج
اقرب شخص اكيد الناس اللي حولي زوجي اخواتي و صديقاتي بطلات قصة محلة نجيب باشا هوايه لاقيت منهم تشجيع و اهتمام و دعمهم اثر بيه بشكل ايجابي الحمدلله
أول قصة كتبتيها؟
اول قصه الي هي قلب من رماد هي عباره عن قصة واقعيه ممزوجه بين الحقيقه و الخيال الواقعي تتحدث عن العلاقات العائليه و عن اختياراتنا بالحياة ؛ بعض المتابعات من يسمعون بالقصه خياليه يبتعدون عنها بس اني عالجت بيها مشاكل موجوده بالمجتمع و بعض التفاصيل اللي ذكرتها بهالقصه اني يا إما شايفتها بحياتي صاير ويا ناس اعرفهم يا اما سامعتها من مشاكل بعض البنات بحياتهم الزوجيه او امور صايره ويايه اني شخصياً حتى بعض المشاهد الكوميديه صايره بحياتي بس اني صغتها بطريقتي و ضفت عليها من خيالي لذلك اني اسميها واقعيه لأن كل اللي بيها مو حياتنا ماكو شي فوق الحدود او متجاوز المعقول
هل راضية عن اللي وصلتي إله وشكد عدد روياتج بالواتباد ؟
الحمدلله اني شخصيه قنوعه بس اكيد اطمح للأفضل ؛ عندي قصتين مكتملات و هم :
قلب من رماد و محلة نجيب باشا
و قصه قيد الكتابه ناشره منها فقط المشاهد سميتها : خريف ايلول (موسم الزنبق)
شنو السبب خلاج تصيرين كاتبة ؟
هذا السؤال شويه راح يكون جوابه طويل سامحوني ؛ هوايه اسباب اولها حبي للكتابه و الأدب بكل انواعه الخواطر الأشعار الروايات الأدبيه و القصص البسيطه باللهجه العاميه اللي تمس واقعنا و مشاكل حياتنا اليوميه حسيت انه آني اذا جربت اكتب ممكن اقدم شي حلو اضافةً للموهبه صرنا نشوف للأسف قبل سنتين تقريباً انه كل كاتبه تدخل لساحة الكتابه حديثاً تلجأ لواحد من خيارين
يا إما تختار انه تكتب عن مريض نفسي و تجعل منه بطل او مجرم و يتوب على ايد البطله و هذا الشي ياخذنا الى تعنيف و اذلال المرأه و تقبلها الوضع بحجة الحب و الى المشاهد الأباحيه اللي صارت تقراها بنات مراهقات بعمر صغير
و الطريق الثاني دس النعرات الطائفيه بين الأسطر و التعليقات تصير حدث ولا حرج ناس تغلط على ناس و تصعد قصتها و تنشرها بهالأسلوب المبتذل اعتبره بصراحه من كتبت حرصت انه قصتي تبتعد عن النقطتين و ما ينذكر بيها شي خادش ولا شي يحرض طائفه ضد غيرها و اتحدى اي احد قرأ الي يطلع مشهد متجاوزه بي الحدود بوصف خصوصيات الأزواج او يعرف اصحاب القصه من اي طائفه اصريت انه كل شي يكون حيادي و ردت اثبت انه ممكن تنكتب قصه و تنال اعجاب المتابعات و بنفس الوقت اكون اني قدمت شي يليق بيه و بالناس اللي منطيني من وقتهم حتى يقرأون كتاباتي
أنت تقرأ
حكاية كاتب
Romanceيكتب الإنسان لسبب أو لآخر، ثم تصبح الكتابة عادة لا يمكنه الاستغناء عنها. سلسلة من القاءتي مع الكاتبات صاحبات قلم ذهبي نطق بالحق ودخلنا البيوت العراقية وَ نقلو النا قصص اجتماعية .
