قلوب قيدها الضعف

-7-

- هاا ماما !! كيف اول يوم بالمشغل  ..
سالت ام سليم ابنتها غالية لتجيبها بابتسامة مرحة :
- بجنن .. صح تعبت بس بسرعة تعلمت والمديرة كانت مبسوطة مني كتير .

- يلا منيح .. ربي يبعتلك الخير ويهنيكي ..
قالت الام لتدنو رنيم من غالية وتسالها بفضول بحاجبين مرفوعين :
- بيحكو معكم شباب .. صحيح هالكلام ؟

- لا لا .. القسم الي انا فيه كلو بنات .. وبصراحة ما شفت شباب غير ابن المديرة ..
قالت غالية بملامح مستهترة لتقول والدتها بحذر :
- الي بيسألك احكيله مافي شباب وخلص ..

- ماشي ماما .. ما تهتمي ..
قالت غالية طوعا فاردفت رنيم بفضول اكبر :
- يعني انتي وظيفتك خياطة ولا مصممة ازياء ؟

- خياطة حاليا .. بس لما اتعلم كلشي رح اظهر للمديرة موهبتي في تصميم الازياء ..

- مش غلط يماما .. كلشي بهالحياة بصير خطوة خطوة ..

- بالزبط .. لازم امشي خطوة خطوة  .. وهاد الي رح اعمله ..

- برافو عليكي .. الله يوفقك يماما ..

خلال ذلك رن هاتف غالية لتجيب المتصل :
- الو .. وعليكم السلام يعمري .. عنجد ؟؟ .. يلا مستنيتك ..

- مين ؟
سالت الام لتجيبها غالية بابتسامة عريضة :
- ملك عالطريق جاية لعندي ..

- اهلا وسهلا .. يسعدها ملوكة الاميرة
قالت ام سليم بابتسامة لطيفة لتبادلها غالية نفس الابتسامة ثم نهضت تتجه نحو غرفتها لتبدل ملابسها .. تخلع العبائة والحجاب لتبقى ببلوزة صيفية قطنية وبنطال اسود ضيق .. ونثرت شعرها القصير الناعم ليتنفس براحة بعد يوم طويل من المكوث اسفل حجابها ..

.....

- اااخخ .. %₪#%@%₪ هالحياة .. %#₪#&*الدنيا كلها ..
صاح عامر بأعلى صوته.. يشتم بأنبى العباراة ..  وهو ممسك بابهامه يعتصره بألم بعد ان ضربه بالمطرقة دون قصد .. خلال سرحانه بالمنحنى الذي اتخذته حياته منذ سنتين .. بدئا بمطالبة الناس له باموالهم ونهاية بطلب غالية الطلاق منه .

- صلي عالنبي يا زلمة .. طول بالك ..
قال أحد رفاقه في العمل لينظر له بحدة ويصيح فيه قائلا :
- لا تخليني ₪#@%^ ..

- استغفر الله يا زلمة .. ول .. الي بحكي معك بورط .. وحد الله
قال الشاب مصدوما من جرأة عامر في التعدي على الدين فشعر عامر بالخجل وقال بوجه محمر :
-يا زلمة الحياة دعست على عرضي .. مش عارف شو عامل بحياتي لحتى هيك الله بيعمل فيني ..

- استغفر الله .. ياخي احنا الي بنعمل بحالنا هيك مش الله حاشاه .. ربنا عطانا عقل وحكالنا اختارو واعملو .. بس الانسان بطبعه كنود .. ما بيشبع فبتلاقي الواحد فينا كل ما غامر ونجح بيطمع لمغامرة تانية وتالتة لحد ما يوقع وبس يوقع بصير (يصبح) يصيح ليش هيك يارب ..
قال الشاب بعقلانية وحكمة رغم صغر سنه ليقابله عامر بسخرية قائلا :
- غسان اطلع من راسي عامل فيها شيخ ؟!!