لا يعلم أدهم لماذا رجف قلبه عندما رأى رسالتها ، ونهض يعدل جلسته في سريره ، وباصابع راجفة كتب يجيبها :
- وانا جاهز ... بس احكيلي شو اعمل عشان اساعدك .
- اول اشي لازم احكيلك كل اشي عني ... وعن الأسباب الي خلتني الجأ الك .. ممكن تسمعني ؟
- طبعا .. طبعا بسمعك
- أنا متزوجة من عشر سنين .. ودقت الذل والخضوع والظلم بكل أنواعه ... كنت إذا اعترضت عالظلم انضرب بحجة اني طويلة لسان وقليلة ادب .. مع العلم بعمري ما سبيت أو شتمت أو حتى رفعت صوتي على زوجي أو حماتي ... وإذا بكيت عالظلم انضرب لانو زوجي ما بحب يشوفني ببكي .. وحتى لما اسكت انضرب لاني قليلة ادب ولازم احترم زوجي وحماتي واحكيلهم ماشي وحاضر ومتل ما بتحبو وما اتركهم يحكو لوحدهم وانا اضل ساكتة ... حاولت اكسب حبهم وكان دائما ابوي وامي يحكولي إذا ضليتي منيحة معهم رح يتغيرو ويحبوكي .. وكانو يضلو يحكولي اوعي تفكري انو إذا طلقتي زوجك رح تلاقي احسن منه .. الناس كلها هالايام متل زوجك واتعس .. وانا ضليت مصدقة كلامهم لحتى طفح الكيل .. وقلت لنفسي لازم اطلع من حياتهم وما بهمني إذا تزوجت احسن أو ما تزوجت اساسا .. أنا بدي ابعد عنهم واحافظ على كرامتي .. ولما بعدت هددوني ببنتي وهلأ هي بالاردن هربو فيها وحارميني اشوفها .. والمحامي مش طالع بايده يرجعلي ياها...
- الله يساعدك .. بس عفوا .. كيف المحامي مش قادر يرجعلك بنتك ؟
- ابوها بالاردن وستها وسيدها لحقوه واخدوها معهم وانا هون محروق قلبي عليها .. ومش عارفة شو لازم اعمل
-فهمت .. طيب احكيلي كيف اساعدك ..
- بدي اسافر للأردن واعمل اوراق واهرب أنا وبنتي لغير بلد ..
- لو هربتي رح ياخدوها منك ... لا تعملي هيك لانو رح تزيدي الوضع سوء .. الافضل تتركي كل شي للمحامي ..
- بس المحامي واهلي اهملو الموضوع .. وأخوي بيحكيلي اتركيها معه ... خليه هو يتكفل فيها .. مفكرين الموضوع موضوع مصاري وبس ..
- ما بدي احكي كلمة تجرحك .. بس عدم المؤاخذة .. انتي ام ولازم يراعو لهفتك عليها ..
- أنا ما بحكي مع اهلي حاليا .. لكن سمعت اخوي الكبير بيحكي لامي أنه الأفضل تبقى البنت مع ابوها .. وطالما أنا طالبة الطلاق وعندي نية الزواج فكل تعبهم رح يكون عالفاضي .. لانو بزواجي تسقط حضانتي للبنت ..
- ظلم .. والله ظلم ..
- لهيك أنا مقهورة .. مش عارفة شو اعمل .. جواتي ناااار ومش عارفة اطفيها .. زعلانة من كل الدنيا .. عمري ما اذيت حد ... بحب الخير لكل الناس .. والكل آذاني ..
- دائما الإنسان الطيب هو الي بيتعرض للظلم ... لانو الكل يشوفه اهبل مش طيب ..
- فعلا .. حتى حماتي كانت تضل تحكيلي انتي هبلة .. وتضحك وتسخر مني ..
YOU ARE READING
قلوب قيدها الضعف
Romanceظهر في حياتها كطيف حلم منسيّ واحكم على قلبها بقبضة حب حليمة ، كيرقة ظنت أنها تموت لتُخلق فراشة بين انامله ،وما لبث أن طبطب على جروحها وانشقّ من روحها كتوأم نخلة شامخة ، حتى أنعش قلبها وأعاد املها في الحياة مرة أخرى ، فأحاطته بهالتها القمرية القرمزي...
