زواج تقليدي و لكن عن حب

الحلقة 1

بسم الله الرحمان الرحيم 🤍🦋

فتحت عينيا على صوت يما تعيطلي، نفخت و درت للجيهة لخرى كارهة حياتي ميشي حابة نوض مالفراش، زادت عيطتلي خرجت راسي من تحت الغطا عين مفتوحة و عين مغلوقة، خياتي فزوج مازالهم راقدين واش معناها تنوضني غير انا، نضت لبست فيستا و رحت للدوش شفت روحي فالمراية نبان شابة مالڨغي شعري ميشي شباب بزاف و طالع فالسما تبسمت مع روحي و غسلت وجهي، رجعت للشمبرة شعلت عليهم الضو باه ينوضو و درت تيليفوني يتشارجا، رحت للكوزينة يما كانت مع الغدا، قتلها صباح الخير و فرغت حليبي، هي بدات تعاير و انا مالقيت وينتا نوض شربتو على ضربة و نضت اخر حاجة سمعتها قالتهالي هي انها شافتني دخلت في فراشي على 9 و دك نضت على التسعة مستغربة كيفاش نرقد 12 ساعة و انا في قلبي نقلها ابقاي في ذاك الحساب انا مانيش نرقد حتى ل 3 ، لقيت ختي الكبيرة ناضت و راحت تغسل و الصغيرة مازالها راقدة ( ايه ايه انا الوسطانية)، قست خيمار على راسي و لبست ملاية و فوقها فاست و لبست بليغتي و خرجت نسحب في رجليا، فتحت الباب قابلني المنظر لي نشوفو كل يوم البزوز يجرو في كل بلاسة و الرجال لاعيين مع الارض و النسا لي مجمعين مالتواقي و لي حاكمين عجاراتهم و واقفين فالطريق مجمعين، و لي قاعد يتبلا في كاش وحدة و شافو خوها جا جرها من شعرها و رجع ليه كرفسو المهم واش نحكي و واش نخلي عايشة في دوار مازال فالعصر الجاهلية، بصح هكاك و فيه صوالح ملاح تنهدت ندخل فالهوا نقي غلقت الباب و بديت نتمشى ضربت فيا الشمس نفخت شعال نكره الصيف وينتا يلحق الشتا، زوج خطوات كنت عند دار جدة، عايشين كامل مع بعض كامل حنا في حنا عايلة كبيرة دايين الجزء الكبير مالدوار و قلال لي برانيين، دخلت بلا ماندقدق اصلا بابها على العام مفتوحة و دايرين ليزار، قابلني منظر ثان نشوفو كل يوم خالتي الصغيرة و لي كبيرة عليا ب6سنين ( عمري 18) و كبيرة على ختي الكبيرة بعام ( يعني ختي عمرها 23 و خالتي 24 بسك جدة تزوجت صغيرة) بففف المهم واش جابنا للحساب دك، خالتي الصغيرة تجري ورا وليد خالتي لخرى لي مطلقة و هو يجري بخناينو و يضحك في عمرو 7 سنين فات فيا و هي جايا تجري موراه حكمتها في اخر دقيقة شوي و تخرج هكاك بشعرها يلالي فالسما و نص تريكو لي لابساتو يشوفها خالي الكبير يقسمها...
فرح(يسموني فرح نسيت باه نقلكم ههه): وين الزين خارجة هكاك حابة يذبحوك
كريمة: هاذاك الطفل كاش ما خلا فيا عقل راح يكلبني
قراءة ممتعة 🤍🦋