قراءة ممتعة 🤍 🦋
ضحكت و فت دخلت هاذي خالتي مداصرتها شوي علابيها نعيطلها باسمها عكس الباقي، رحت للكوزينة نلقا خالتي لي قلتلكم مطلقة يسموها حكيمة كانت تشرب في قهوتها صبحت عليها و هدرنا شوي، هي مليحة بصح انا ميشي مداصرتها...
حكيمة: جداك اليوم قاتلنا نتي طيبينا اليوم
فرح: ايه علابيها جيت قاتلي جدي حب ياكل ماكلتي اليوم
حكيمة: هههه سعدك جدك شعال يبغيك من نهار زدتي يبغيك نتي من بين ڨاع احفادو
فرح: ههه يعيشك و جدة وين راهي دك
حكيمة: شوفي فالسطح
رحت و خليتها و علابالي جدة واش مطلعها للسطح، نفخت اليوم هاذا كي راهو جايني ثقيل، وصلت نشوفها منوضة فتانة مع جدة لخرى يمات بابا لي كانت هي ثان فوق سطح دارها و هوما اصلا سلفات و زيد جواريين يعني ماما و بابا ولاد العم ( قلتلكم الحالة مخلطة عندنا)...
خضرة(يمات ماما): يا اللفعة كون كنت عارفة هاك و الله مانمدلكم بنتي
خيرة(يمات بابا): و الله حنا لي كالبين باه ناسبوكم يا السمية
خضرة: ماشفتيش ولدك شعال و هو يحلل باه نمدوهالو
و بدات كل وحدة تطلق فالسب الثقيل مانعرف منين تعلموه و اومبعد يقلك في وقتنا كنا مربيين، وقفت قدام جدة، حتى نطقت جدة لخرى...
خيرة: يا بنتي فرح و كي راكي زينة واش رايك نزوجك لوليد بنتي
خضرة: لوكان طيح السما على الارض ما نمدهالك
خيرة: ياو اذا راكي ناسيا راني جداها كيما نتي
انا قلبت عينيا و يقيت واقفة و نعض في شواربي، حتى نسمع الحس تاع جدي مالتحت، طليت غير بنص عين باه مايشوفنيش و يبدا يبهدل فيا و انا خاطيني المهم هدر ما هدر و جدة خيرة تستشفى في جدة خضرة حتى يجي جدي لوخر يجري بعكازو و ناضت الحرب ،انسحبت بهدوء و هبطت للكوزينة، بديت مع الاول بالكسرة عجنتها و خليتها تخمر و درت للغدا قررت ندير طاجين زيتون، و كي خمرت الكسرة درتها طيب برا ، و درت فريت و سلاطة ذيك هي جات مع وقت الفطور سواسوا، بصح ظهري انقسم بسك الغاشي ياسر و طيبت بزاف تقول عرس،دخلت جدة للكوزينة شافت فيا...
خضرة: شكون نتي و واش ديري هنا
فرح: واش اجدة خرفتي خلاص
خضرة: مانيش نفرز مليح
كمشت عينيها وشافت فيا مليح
خضرة: اااه بنتي فرح وينتا جيتي
فرح: كي كنتي متفاتنة مع عجوزة بنتك اخضرة نسيتي
خضرة: اااه صح تفكرت (شافت فيا شوي اومبعد فاقت) يا بنت الكلب هاكا تهدري معايا
رفدت البليغة و قاستها هي ماتشوفش مليح و تيري و خلاص شوي و جي فالمقلة مع الفريت...
فرح: بلعقل اجدة حابتنا نبقاو بلا غدا
خضرة: اييه طيبتي
فرح: ايه
خضرة: جدك قال حابك نتي طيبي و داركم راح يجو يتغداو هنا
فرح: كي شغل عرضتونا بصح انا لي طيبت
خضرة: اكلبة وينتا تستعقلي
فرح: زوجيني ياك اصلا غير قاعدة القرايا و ماخليتونيش نكملها
شافت فيا مالفوق للتحت و عوجت فمها...
خضرة: ماكلاه تلعبيها دور الضحية، صح هنا مزيرين بصح نتي وجهك اصلا ميشي تاع قراية نفكرك فالعرس لي نوضتيه نهار حبستي ولا نسكت خير
فرح: لا خلاص اسكتي خير
قدمت ليا و ضربتني ماللور بالبليغة حسيت الروح راح تطلع معاها...
فرح: علااه اخضرة واش درتلك
خضرةى اخخخرجي عليا روحي عيطي ليماك و خياتك و ارواحي
فرح: دك نروح لجدة خيرة و تشوفي
رفدت البليغة راح تزيدلي ضربة و انا خرجت نجري جات البليغة في راسي، نلقا وليد خالتي حكيمة ياكل فالشيبس و يضحك عليا، رحت ليه نتبسم معاه قتلو ارواح نبوسك هو قرب ليا و انا نقرصو حتى الشيبس خرجلو من نيفو و بدا ينوح و انا درت خيماري بالزربة و لبست ملايتي و خرجت نجري و نشوف مورايا خبطت في بنادم و رجلي دخلت فالطين حكمت روحي مع الحيط و كملت طريقي و نهدر...
فرح: شوف وين راك تمشي يا خرا.
YOU ARE READING
زواج تقليدي و لكن عن حب
Romanceكرونيك روووعة باللهجة الجزائرية منقولة 🇩🇿 هاذ الكرونيك تحكي على وحدة عايشة في دوار صغير بين عائلة محافظة يقررو يزوجوها، فهل راح تقدر تتقبل هاذ الشي و هل راح تحب الشخص هذا ؟ قراءة ممتعة 🌼😘
