#رهائن_الماضي
#الحلقة_10
خشوا نضال وحسام .....ونضال عينه جت في عين عنان في المطبخ ...صبت لما عرفت حسام يبي ايخش
نجلاء مقمعزة وتبكي وتسأل في البنات ...وحسام ونضال خشوا عليهن ....شهد اول ماشافت حسام قعدت تصرخ ...وتبكي بصوت عالي ...وتطمر في وجهها
ونجلاء أتشوف لبنتها ...وأتشوف لحسام ونضال ...وبعدين هجمت على نضال ..شدته من تيشرته
شن درتلها ...شن درتلها ياواطي ...يامسخ ...بنت صغيرة حرام عليك أنتا اخر واحد شافوك امعاها قبل أطيح ... ...لكن وربي أنخليك اترك في لحبوس ياصايع 😡😤
نضال واقف ومصدوم ...زي حال باقي العيلة اللي خشت على صوت اعياط شهد 😰
نضال ايديه يرجفوا من الصدمة ...شد ايدين نجلاء وفكهم من عليه : شن تحكي انتا ...شن نبي انديرلها البنت ؟؟
نجلاء بتعاود تمسكه واختها اتشد فيها : شن عرفني شن درت ...شوف البنت كيف خايفة منك واتصرخ من اول ما شافتك 😡
نضال : وأقسم بجلالة الله مادرت شي ...شهد كانت تجري وانا قلتلها معاش تجري خفت منها اطيح .. وبعدها خشيت غيرت وطلعت مع نجم وصهيب
نجلاء : كذاااااااب ...واحد وسخ زيك وتفكيره خامر ..شن يبي يطلع منه ..لكن تحسابني نبي نسكت على عملتك ..وربي انشعفك عليها 😤
حسام واقف وراء نضال ويشوف لشهد 😏...وهيا تبكي بصوت عالي وترجف 😭
نضال حس بنظرات الكل عليه ...قرب من شهد : تكلمي شهد ...قولي انا شن درت ...مش حكيت معك وطلعت طول ...قولي انا درتلك شي او طيحتك ؟؟
شهد اتشوف لنضال واعيونها ادموع ...بس نظرات حسام اللي قاعد امفنص ...ويخوف فيها ....خلاتها اتخاف واتزيد تبكي
عنان جت وخشت لدار ...وقعدت مصدومة من الكلام اللي تسمع فيه 😰
نجلاء دفت نضال : حول من عليها ...قاعد اتخوف فيها ..أطلع من حوشي 😤
الحاجة رابحة : أسكتي عليش اتعيطي فجعتي البنت
نجلاء : بنتي خايفة منه هوا ...قوليه يطلع برا 😡
نضال ماردش عليها ونزل قرب من شهد مسك ايديها : شهودي ماتخافيش ...قولي شن صار امعاك ...كيف طحتي ...تكلمي ياشهد
نجلاء : ارفع ايديك من على بنتي ومعاش تلمسها يانجس 😡
نضال وقف بعصبية : أحترمي نفسك ..راه ساكت على خاطر عمي بس 😤
نجلاء : مش لما تحترم انتا حوش عمك واتصون حرمته 😡
الحاجة رابحة : سكتوا خلاص ...واطلعوا تعاركوا برا فجعتوا البنت
نجلاء تلعلع : مانيش ساكتة ...مانيش ساكتة ...هذه بنتي وخايفة عليها ...ماحد يسكتني 😡
مصطفى خش الدار مصدوم : نجلاااااء أسكتي ...كنه صوتك واصل لعند برا ..شن صاير ؟
