عبير : بعد بكرة عيد ميلاد عمر لكن و لازم اجيب ليهو هدية
نسرين : عمر منو !!!
عبير : عمر صحبي في الجامعة
نسرين : و انتي دخلك شنو بعيد ميلاده
عبير : هو عزمني عليهو
نسرين : اوعي تقولي لي ماشة عيد الميلاد
عبير : لا ما ماشة لانو بالليل لكن مفروض اجيب ليهو هدية
نسرين : عبير يا حبيبتي ، انا خايفة عليك جدا و ما بقدر احكم على ناسك ديل كعبين او لا لكن البعرفو انو هم ما من توبنا ، ما شبهنا و انتي صاحبي ناس عاديين لانك لو بقيتي تجاري الناس دي حتتعبي معاهم لانو مستحيل نحصلهم و انتي عارفة الظروف و حق الهدية دا ممكن يمشينا اسبوع
عبير : شنو هو ، يعني نحن نكون مفلسين و كمان نصاحب مفلسين لشنو !!! ، احسن اصاحب ناس مرطبين عشان يمكن يعجب بي زول منهم و يطلعني من الفقر دا ،، ياااخ انا من عرفت الشلة دي ، اول مرة اشوف اماكن في حياتي و اول مرة اكل اكلات جديدة عمري ما شفتها
نسرين : ربنا يحفظك يا اختي و يحميك من نفسك ، بالجد بقى منك خوف 😔
عبير : انا زولة كبيرة و عاقلة ، ما تخافي علي ، و هسي لازم تديني 100 ج على الاقل اشتري بيها ريحة لي عمر
نسرين : مافي ليك اي قروووش يا عبييير ،، شوووونقر دااااااامو ( معناها قروش مافي برطانة المحس نعلمكم حبة 😁 )
عبير : كدة بنخسر بعض يا نسرين
نسرين : عايزة تخسريني انا اختك عشان ولد غريب 😔
عبير : انتي ما عايزة تديني القروش لكن
نسرين : انتي ما بتفهمي يا عبير ، قلت ليك دي قروووش بكري للمدرسة
عبير : هو فضل ليه 2 مليون و ما اظن تكمل و ما بتفرق اذا شلت منها مية او متين بس قولي انك غيرانه مني عشان انا لقيت شلة زي دي و حابة تحرجيني قدامهم
نسرين :لا حول و لا قوة الا بالله ، انا اغير منك و انتي دمي و عشنا مع بعض في بطن واحدة و طلعنا على الدنيا سوا ، انتي عارفة اني عمري ما بخلت عليك بحاجة و قروشي قروشك و ممكن احرم نفسي من اي حاجة عشانك و مش على القروش لمن اصل البيت حأديك القروش الفضلت كلها شيلي العايزاهو و خلي لبكري الباقي ، بالجد ما كنت متوقعة تقولي علي كدة
نسرين تبكي و تمشي من جنبها و تقرر ترجع البيت براها
يتبع....
