اسماعيل : مش الجامعة العاملاها موضوع دي عشان تمشي على حل شعرك ، تاني مافي ليك
نسرين : انا حأجيب ليك المصحف يا ابوي عشان تصدقني اني والله اتاخرت بسبب المواصلات و كمان عشان بقيت اقرا في الجامعة نهاية اليوم
هناء : امشو بهناك يا بنات
نسرين و عبير يمشو
هناء : يا اسماعيل ، العن الشيطان جامعة شنو التخليها ، و نسرين انت عارفها صادقة و بس عشان قالت ليك زيد ليها القروش ، بقيت تكذب فيها ، انا فاهماك و عاجناك كويس
اسماعيل : دا شنو الكلام البتقولي فيهو دا
هناء : دي الحقيقة و انت عارف كويس ، بالجد لازم تزيد القروش دي للبنات
اسماعيل : قرش ما بزيدو ليهم ، عايزات 14 جنيه يوميا ، حرامي انا و لا شنو ، اكفيكم من وين !
هناء : يعني انت قاعد تكفينا !!!، نحن بسببك يوم ناكل و يوم لا و لو اكلنا بناكل اكل يشحتف لان ما بشبع
اسماعيل : احمدي ربنا انك بتلقي اكل اصلا
هناء : الحمد لله صابرة و ساكتة ، يا اسماعيل اتقي الله في بناتك ديل لان ربنا بسالك منهم ، و لو انت ما اديتهم الحيديهم منو يعني !! ، يمشو لمنو عشان يديهم وريني !!؟؟؟؟
اسماعيل : يمشو لاخوك محمد
هناء : لشنو يمشو لمحمد و كمان محمد براهو بديهم لو عندو و كمان ما تبقى اتكالي ياااخ ، خلي عندك عزة نفس حبة و محمد ما مجبور يصرف علينا لانو هو كمان عندو اولاد مسؤول منهم
اسماعيل : يااخ ما تمشي تشتغلي لو عايزة تصرفي على اولادك كويس
هناء : انت خليت لي حيل للشغل ، انا امراض الدنيا دي كلها جاتني بسببك و بسبب بخلك و حتى علاج ما باخدو لانك ما بتجيبو لي و انا لو بقدر على الشغل ما بقعد ليك دقيقة في البيت دا ، انا ما عارفة انت قروشك دي بتوديها
اسماعيل : زي القطط تاكلي و تنكري
هناء : هههههه ننكر مش ، بدليل انك مشبعنا مش و ملبسنا مش و بتدي البنات مصروف يكفي و زيادة مش !!!!! ، يا راجل حاسب نفسك قبل ربنا يحاسبك و تاني بقول ليك اتقي الله في بناتك و خاصة نسرين لانك ظلمتها و عارف نفسك ظالم و البنت كلامها منطقي بس انت ما عايز تصدقو ، كدي اديها قروش لمذكراتها و قروش للكريز و خليها تقرا في البيت و ما تقفل النور و شوف لو اتاخرت تاني !
اسماعيل :يرتبك و يقول مرة جنك نقة ياااخ ، خلاص بخليها تواصل قرايتها و كلامها دا بظهر يوم النتيجة و بنشوف لو كانت بتقرا او ماشيه على حل شعرها
هناء : سبحان الله !! ، ياخ انت بخيل حتى في نفسك ، العراقي بتاعتك دا اتشرط و بقى ما فيهو حتة سليمة من الخياطة الكتيرة ، اشتري لنفسك غيرو
اسماعيل : من وين يا حسرة و انتو مكملين المرتب كلو
هناء : انا البعرفو يا اسماعيل انو اسرتك كبيرة و ووارث اراضي و دكاكين و بيوت و كمان الشركة الشغال فيها بدوك حوافز طوالي غير مرتبك الما عايز توريني هو كم ، بالجد نفسي اعرف القروش دي بتوديها وين !!؟
اسماعيل :يرتبك و يقول الكلام دا بتجيبهو من وين ، القال ليك كدة خليهو يجيبهم ليك الممتلكات و الاراضي دي كويس هههههه ، قال وارث قال ههههههه ، مرة خيالها واسع جدا
هناء : الله يديك على قدر نيتك ، انت ما سالت نفسك بكري بقرا من وين !!! مع انو انت ما بتصرف عليهو
اسماعيل : ما بخصني كتيير و ان شاء الله عنو ما قرا ، يعني من فلاحو و شطارتو 😏
هناء : عن اذنك يا اسماعيل ماشة جوا ، و بالمناسبة بكري اول دفعتو في اولى و تانية للمعلومية ليك و تمشي من جنبو
اسماعيل يقول في نفسو قال الاول قال ههههه و كمان الولية دي عرفت من ويت انو عندي اراضي !! ، يا ربي قاعدة تبحت من وراي !!!
يتبع...
