إنهيار

الجزء 55

عبير تديهو رقم ابوها و الضابط يتصل باسماعيل و يوريهو الحصل و اسماعيل ما قادر يتكلم من الصدمة و الشرطي وصف ليهو القسم و اسماعيل جاء القسم و طلع عبير بضمان بطاقتو الشخصية و طلع معاها و هو ساكت تماما و ساقها و مشو قعدو مطعم

اسماعيل : اخرتها يا عبير يقبضوك في شقة

عبير : تبكي شديد

اسماعيل : عملتي كدة لشنو !!

عبير : تبكي و تقول : انت السبب يا ابوي ، انت طول عمرك حارمنا من اي حاجة حتى حب الاب حارمنا منو ، ما حسستنا في يوم انو بتحبنا ، ناسي انو نحن بنات و عندنا احتياجات ، انا بسببك بقى ما عندي مانع اصاحب اي زول عشان يصرف علي لانو محرومة ، اكل ما لاقين زي الناس و لا حتى لبس و لا حتى قروش مواصلات و انا لمن مشيت مع معتز مشيت معاهو عشان قال لي يلا اجيب القروش عشان اشتري ليك النضارة الأنت ابيت تجيبها لي و ضربتني بسببها و انا صدقتو لانو عوضني عن الحرمان بكلام الحب بتاعو و بي قروشو و حتى قال لي حاجي اخطبك و اتاريهو كان بكذب علي و نيتو ياخد شرفي

اسماعيل ضغطو ارتفع و بقى يبكي ومن شدة التاثير و الصدمة جاتو جلطة

عبير : الحقوني يا ناااس

الناس جو و جرو بيهو على المستشفى و عبير اتصلت بي امها وورتهم انو ابوها في المستشفى و هناء و نسرين طلعو سرعة من البيت

الدكاترة مع اسماعيل و عبير مقلقة و جاء الدكتور و قال ليها انو ابوها جاتو جلطة في الرأس و اتسببت ليهو في شلل نصفي

عبير بقت تبكي شديد و الدكتور طمنها انو ممكن يرجع يمشي تاني و ودو اسماعيل العنبر

عبير : تبكي و تمسك يدو و تبوسها و تقول سلامتك يا ابوي و الف بعد الشر عليك

اسماعيل : بصعوبة في النطق : سامحيني يا بتي ، ارجووك سامحيني

عبير : ما تتكلم كتيير يا ابوي عشان ما تتعب

اسماعيل : يبكي ، ارجوووك سامحيني

عبير : مسامحاك يا ابوي ، بس انت قوم لينا بالسلامة

اسماعيل : يبكي : انا مشيت ورا طمعي و بخلي و نسيت انو انتو بنات و انو في ذئاب ممكن تنهش لحمكم ، و اهو اخدت جزائي في صحتي و بقيت حتى الحركة ما بقدر عليها ، بتمنى ربنا يسامحني و يغفر لي و بحمدو انك بخييير و ما حصلت ليك حاجة لاني ما كنت حأسامح نفسي طول عمري و الموضوع دا مافي زول حيعرفو غيري و غيرك لانو امك لو عرفت الحصل ليك ممكن تروح فيها

عبير : تبكي : انا كمان غلطانة يا ابوي ، لاني مفروض كنت ما اشيل من اي زول حاجة و اعمل زي نسرين و مفروض كنت ما امشي معاهو بيتو لانو مشيت بحسن نية و هو نيتو كانت الغدر و لولا لطف ربنا كنت انتهيت و شرفي راح

اسماعيل : انا حاعوضكم عن كل حاجة و كل حرمان عشتو بسببي و بتمنى ربنا يسامحني

عبير : انت بس قوم بالسلامة و حبة حبة حترجع تتحسن و تمشي يا ابوي و انا كمان اتعلمت من غلطي و ان شاء الله حأرفع راسك تاني و تلقاني نعم البنت

يبكو الاتنين مع بعض و يصلو نسرين و هناء و يلقو اسماعيل راقد و عبير جنبو

هناء : مالك يا اسماعيل ، ان شاء الله انت كويس

نسرين : تبكي : ابوي كيفك هسي

عبير توريهم انو عندو شلل نصفي

اسماعيل : ما تخافو علي ،، انا كويس ،، و الحمد لله انو صادفت عبير و هو الجابتني المستشفى

هناء : انا معاك و ان شاء الله حتتحسن ، برغم بخلك لكن كمان ما بقدر استحمل و اشوفك عيان

نسرين : اي والله يا ابوي ، وجودك معانا بطمنا

اسماعيل : يبكي : سامحيني يا هناء لانو عمرك ما شفتي معاي يوم سمح و لا كلمة طيبة و برضو فضلتي ساكتة و صابرة و مجملة صورتي قدام الناس و انتي كمان يا نسرين سامحيني ارجوووك لانك كنتي بتحاولي تفرحيني و انا كنت بأذيك بالكلام طوالي و الضرب ، هسي يدي الضربتك بيها ما قادر احركها و بقيت شغال بنص جسم ، ارجوووكم سامحوني 😭

نسرين : ما ترجونا يا ابوي ، انت ابونا و سندنا و مستحيل نشيل في قلبنا منك حتى لو قتلتنا

هناء : ما تتكلم كتيير عشان ما تتعب

اسماعيل : امسكي بطاقة الصراف دي يا نسرين و عبير و امشو اصرفو من الصراف 2000 ج لانو في اليوم ما بسحب اكتر من 2000 ج ، ودا رقم حسابي في البنك احفظوهو و عايز اعترف انا عندي دكاكين في السوق ، حأتصل على السمسار تمشو معاهو عشان يوريكم مكانها و اورقاها عندي في البيت و عندي ارض 1000 متر في الخرطوم و السمسار كمان حيوريكم ليها و عندي قروش في البنك كتييرة 650 مليون ( بالجديد)

هناء و نسرين و عبير مخلوعين

هناء : دا كلو عندك يا راجل و داسي علينا و بخلان على نفسك حتى ، لو كنت عارفة كدة كنت دعيت عليك تمرض من زمان عشان تطلعهم 😂 ، انا كنت حاسة انو عندك قروش و الكلام السمعتو صاح ، انت لو كنت صرفت على الاولاد ديل بالمعقول ، ما كان عانو كدة و الحمد لله انك رجعت لي عقلك

اسماعيل : الحمد لله صحييت من الغيوبة الكنت فيها و حب جمع المال ،، انا شفت الموت يا هناء لمن جاتني الجلطة دي مع الشلل ، دا براهو درس ،، عرفت انو الدنيا ما بتستاهل الكنت بعملو فيها و لو كنت مت فيها ،، روحي ما كانت حترقد بسلام لانو انتو وراي محتاجين و انا غلطت في حقكم كتيير و حتى قروشي دي ما كانت حتمشي معاي في قبري و اتذكرت انو عملي بس الحيمشي معاي و انا ما عندي حاجة سمحة عملتها في حياتي ،، كنت حاخسر دنيتي و اخرتي و كنت متاكد انو نسرين ما حتنساني و حتدعي لي لكن كمان انا ظلمتها كتيير

نسرين تقول في نفسها و تدمع : الحمد لله ربنا اتقبل دعاي و احمدك و اشكر فضلك يارب انو هديت ابوي و خليتو يفوق ، يارب اشفيهو لينا شفاء لا يغادر سقما

نسرين و عبير يمشو يصرفو القروش و يجو يدفعو حساب المستشفى

يتبع...