البنى ادم من زمان ومن العصر الحجرى حاول ان يتطور ويتعلم
بس التعليم فى ليبيا حسب ماسمعت قالوا ان اخر فترة ظهور ليه فى السبعينات او الثمانيات
ماتقولوش قدافى وطاغية وماطاغية وطمسنا
على مايبدوا ان احنا طمسنا ارواحنا بروحنا وهوا زادهم
العالم كله اتطور واختراعات وسيارات
وليبين مازال يتناقشوا فى دجاجة زعمة تبيض ولا تلد
انا من رائى ان هى تلد , لان احنا الليبين نصدقوا اى شىء
مع الجيل الجديد وطريقة التعليم القديمة الى معادش مشت مع التطور
ناس فدت وماعدش حد عنده نية يقرا
واحنا على سبلة مش قتلكم شعب تنبال
جرب احكى على الثقافة او اى شىء فيه فايدة حاتلاقى الناس المقعمزة كلها هجت واحتمال يشبحولك على جنب شن تبى تتفلسف علينا
ولا قاريلك كتابين وجاى تبى تسمعهم
بس الى يبى يسال علاش الناس معادش عندها نية تقرا , الواسطات كثرت والصغار بدوا ينجحوا فيهم , والمدرس بدى يتبع فى طريقة خلط بالعود واعطى لمسعود
نظام التعليم صار ان الابتدائى مرحلة مشيه تو ينفع فى الاعدادى , والاعدادى ماشى بطريقة توا يشد فى الثانوى , والثانوى ساعده وفكنا من شره توا يحصل ويتغربل فى الجامعه
ودورة حياة ابوقراض هادى الطالب يمشى ويطلع ويتخرج ومش نافع شى حتى روحه لا
وراسه فاضى زى سطل الزواق , المشكلة مش هنا المصيبة ان لو كان دكتور ولا مهندس , معناها خودلك الناس ميته والحياش عوجه والطرق محفرة
وهدا الى صاير , والى قرى بجهده وعنده عقل طلع بره اهنا مش حايحصل معاهم شى , لهدا ماتستغربوش ادا شفتوا الليبين مهبله وجاهلين وحياتهم معكوكه مش منهم من الاساس خايخ
زى الى زرع ورد فى بحرمصيف السندباد راحت صنة الورد وقعدت صنة الخرارير .
