فتحت عيونى وانا كلى تفائل بيوم جديد وشمس جاية فى نص عينى
نلقى روحى رطوبة مع بعضى
وانا الى نحساب روحى نحلم انى فى البحر
الضى هارب 🙄
يلا معليش ساعات ويجى
كيف بنحوس توا هو انا بروحى نخدم بالضى متعودة التفزيون يحكى وانا نضم
هل نشوف الفيس بالك فيه خبر
حتى التغطية مقطوعه
مافيهاش الا نمشى نخش فى كوجينة نقلبها فوقى لوطى
ايح حتى الميه مافيش
😭😭😭 غريبة الهواء قاعد
شنو خش فينا كوكب وانا راقدة
وتمر ساعات وساعات حتى الماكلة والله ماعندى نية نطيب
ولا حتى ناكل سكر حلوقهم زى ماسكروا نيتى
جت الساعة تسعه وليل نفتح الشماعى ونتخيل ان فى فيلم رعب
قعدت نستنى لن خدانى نوم
ونوض تانى يوم غارقة فى ميه رطوبة والشمس فى عينى
تى شنو عايشة فى نفس النهار
نفتح الباب نشوف الشارع بالك حتى ناس ماتت وانا الى قعدت
منفضة مافى حد وسيارات مدرسه
علاش الضى ماجاش 😣😣😣
نحس روحى بنهبل
وراجل ماسك عمل يعنى شن تاكلنى غولة بروحى
وتمر ساعات وساعات
وياخدنى نوم لن نستاقض على صوت عياط وزغاريط مانحسابه الا ناس ناضت حية
جى الضى هذا باش خل نجرى نولع الشحن ونفتح غسالة وميه
وفرحانة قريب نطير ونبى ندير كل شى ماوصلتش للشيشمه بنغسل وجهى هرب تانى
😐😐 لا هك بنشرك شلاتيتى وبنطلع نعيط
فديت شنو هذا الا تقول لقطة من فيلم تعذيب الجبابرة
ولا ندير زى هذاكا الى قعد فى جزيرة بروحه ويكلم فى كورة
نحس فى صدرى مطبق حتى النفس مغموم من الرطوبة ووقت خلاص نفكر ان راح ننجن 😭😭😭😭
يجى الضى وتسمع التزغريط وننسى كل شى نحس بيه ونلقى روحى نجرى نشحن ونغسل ونضحك 😂😂😂
الله اعطيكم ماينزعكم
كرهتونا ف عيشتنا وهبلتونا
