وجع قلب

خطة جريئة

باوعت الساعة الخامسة الفجر...بديت اهز عمر اريد اصحيه
حلا...عمر اكعد الله يخليك لا يجي احد...كوم يمعود....عمر كعد يفرك بعينه...ولازم راسه...انتبه الي وفتح عينه على وسعهم
عمر...حلا هاي شبيج من سوة هيج بيج...ليش ملابس ملخكة وشعرك مكفوش احجي شبيج صافنة علي شبيج...لزمني يهز بيه
حلا...عمر النوب نسيت سويت انت...بديت ابجي...عمر عفية افتح الباب لا يكعدون شنكول لهم
عمر...لج شنو اني...شنو افتح الباب...منو سوة هيج بيج
حلا...والله انت عمر...ليش ماتذكر عفية ابوس ايدك افتح الباب لايجون...ابوي يموت والله ..ورجعت ابجي بحركة
كعد عمر على الجرباية مصدوم وايده على راسه...والله ماذكر شي....مستحيل هيج اسوي ...النوب وية منو عرضي.
حلا...خلي ارجع يم نورس وبعدين نتفاهم بس ابدل...ماريد اهلنا يتخاربون لو خالي يسويلك شي
عمر...ليش وين المفتاح...جان مصدوم مايعرف شيسوي...
حلا..المفتاح انت ضميته...ومخليتني اطلع..بدة عمر يدور المفتاح لكاه جوة المخدة ...انطانياه...فتحته وطلعت على كيفي لغرفة نورس ...اخذت ملابس من نورس وبدلت .مشطت شعري...وخليت راسي على المخدة واني افكر بالي سويته...

عمر...حسيت واحد يكعدني من النوم ..الصوت مو غريب علي..بس احس راسي ثكيل وماكدر افتح عيني...بس الصوت ظل يصحيني...فتحت عيني اشوف بنت عمتي...بس وضعها مخربط ..دشداتها مشكوكة من يم الياخة ...وشعرها مكفوش...واكو طكع زركة على ايدها...حاولت افهم شبيها ...كالت انت سويت هيج...بس الثكل الي براسي مديخليني استوعب الي تكوله ...بس مظهرها والبجي والتوسل مالتها ...سطرني اكثر...النوب فعلا طلع اني ضام المفتاح...خليتها تطلع...واني بعدني دايخ...دخلت اسبح...اريد اصحى زين..وشربت بنادول اثنين...وكعدت اريد اذكر الي صار ...ذكرت صح اخر شي من شبكتها لان جانت ترجف بس ماتلاه ماذكر شي صور مشوشة بيها اني صح احاول وياها بس ماذكر بالتفصيل...معقولة اني واطي اعتدي على بنت عمتي وعرضي ....مالكيت غير حلا  الي عمري كله ادافع عنها واحسبها مثلها مثل نورس...راح يطك راسي...زين لوين وصلت ...ماكدرت اعرف منها ..جانت مرعوبة...وفوكها تخاف لا ابوية يسويلي شي...فوك ماكسرتها هي الخايفة علي....شراح اسوي...ظلت فكرة تجيبني وفكرة توديني ...بلحظتها كلش استحقرت نفسي....بس شينفع اللوم هسة لازم الكة حل ...واشوف حلا...
حلا...مانمت...وبس صارت ب٨ الصبح طلعت قبل مايكعدون لان جانت جمعة والكل يبقى نايم ...بس من نزلت لكيت خالي ومرته
ابو اسامة...صباح الخير حلاوي ...شبيج خالو...شو وجهه اصفر ومخروعة
ام اسامة...اسم الله بنيتي شبيج
حلا...مابية شي بس مغص كامشني اريد ارجع للبيت
ابو اسامة...خالو اتريكي وياي وهسة اوصلج
حلا...خالو هو كل بعد بيتين
ابو اسامة...ميخالف ..الدنيا صبح والناس نايمة...وصلني للبيت وصعدت راسا لغرفتي جنت تعبانة من السهر والتفكير...نمت ...
عمر..سمعت صوت جوة نزلت..كالت امي ابوك راح يوصل حلا...لان مصبحة وجهها اصفر وعبالك مريضة
ام اسامة...هاي البنية نحسدت البارحة طالعة حلوة والعين مانزلت من عليها
عمر..اوووف يوم لو تدرين ..جنت احجي بكلبي...خاف اذيتها شلون هسة ...صعدت لغرفتي ادك عليها محد يجاوب ...ظليت الوب هسة غير اعرف شصار..حتى وسن دكت علي جاوبته بدون خلك وزعلت..الفرحة مادامت لي...للعصر ماصبرت كتلهم خلي نروح لبيت عمتي ...هم نسلم وهم نشوف حلا...خاف زعلت من البارحة....رحنا وطول ما احنة كاعدين هي مادخلت اخر شي
نورس...عمة اشو حلا ماكو
ام حلا...والله عمة مادري من اجت من يمكم لسة بس نايمة
ام اسامة...شبيها هاي البنية...من الصبح وضعها متخربط...ماكعدتيها
ام حلا...حاولت ترجع تنام...
عمر...نورس روحي كعديها...خلي نطلع
ام اسامة...عمر شايل هم خاف زعلت من البارحة
ام حلا...فدوة لعينه...من همة صغار هو يدافع عنها
عمر...بكلبي...اي تالي اني الي أذيتها
حلا....كعدت على صوت نورس...وج عوفيني اريد انام
نورس...شتنامين..المغرب صار...كومي عمر عازمنا
حلا...سمعت اسم عمر فزيت ..مابية حيل تعبانة عفية
نورس...حلا شبيج ناخذج للدكتور
حلا...لا بس مالي خلك ..اريد انام
عمر..دخلت نورس...وكالت شوية مالها خلك خلوها ترتاح ...رجعنا للبيت...دكيت على حلا...جاوبت هالمرة..بس صوتها تعبان ..
عمر...حلا شلونج
حلا...يعني شلوني...وكمت ابجي
عمر...لا تبجين...باجر اريد تجين حتى نتفاهم
حلا..قابل نتفاهم كدام الكل
عمر...زين امر اخذج للمطعم
حلا...اكيد لازم احد ويانة
عمر...معليج اني ادبرها...لا تشيلين هم...باي
حلا...الخطوة الاولى والمهمة خلصت..الثانية عليه...
كعدنا اني وعمر بمطعم بعد ما حجة وية امي وكال لها عندي موضوع مهم وية حلا وبعدين اشرحلج من لحت شنو الموضوع....هي جانت قلقة علي بعد الخطوبة لان شكلي تعبان ..طول الطريق بقينة اثنينة ساكتين ...اني جنت افكر شراح اكول ...وهو اكيد دايخ شراح يسوي
عمر...حلا اريد افهم الي صار شنو
حلا...عفية اعفيني ...دنكت واني اتصنع الخجل .
عمر...اترجاج احجي ...راسي راح ينفجر صار يومين مانايم
حلا...ماعرف شكولك اني اجيت اعتذرلك وانطيتك الكاكاو وانت سالتني من داحجي وياك كمشتني الباردة وانت لفيتني بالجرجف وعلى اساس ارجع لغرفة نورس بس فجاة تغير تنفسك وكمت تتحارش حاولت ابعدك بس انت جنت اقوى وحتى ايدي زركتهن وانت تحاول سيطر علي...و
عمر...و ..شنو ..وين وصلت
حلا...دنكت وبجيت بس مو لسبب الي يخاف منه عمر...لا بجيت لان حسيت حيل متأذي من الموضوع ...وخايف علي...بس بعد مابيها مجال تراجع
عمر...والحل شنو...اني ماصار يومين خاطب...زين وسن شراح اكولها...شسوي...ما داتخيل نفسي واطي...زين ليش ماذكر بس صور مشوشة عن الموضوع
حلا...عمر...الله يخليك لا تاذي نفسك...كمل زواجك انت تحبها لوسن
عمر...وانتي شلون
حلا...اني خلاص ...راح اكمل دراستي وبعدها الله كريم
عمر...يعني شنو الله كريم
حلا...لعد شسوي...على الاقل واحد منة يشوف حياته
عمر...وليش انتي ادفعين ثمن نذالتي...لازم اكو حل ثاني
حلا...شنو الحل..
عمر...جنت دايخ من يوم الي صار...وسن حبيبتي صار ٣ سنوات احلم بيوم زواجنا...ومصدكت تمت خطوبتي عليها وجنت اخطط لمستقلنا...بس حلا شلون ان ضيعت مستقبلها...جنت افكر وية نفسي
حلا...عمر...عندي حل ماعرف اذا يناسبك ..بس يبقى تقنع وسن بيه ...بس بدون ماتكول الي صار ...لا تنسى احنة البنات اسهل ماعدنا نعير غيرنا باي شي ...
عمر...كولي شنو الحل
حلا...اوعدني وعد رجال
عمر...وعد مني محد يعرف الي صار..احجي شنو الحل
حلا...ازوجني كم شهر ونطلك
عمر..ووسن واهلنا ..
حلا...وسن قنعها تصبر كم شهر...واهلنا كول ماتفاهمت انت وسن وراح يصورون الموضوع رد فعل على وسن من تخطب..وبعد فترة يكون طلاكنا سهل لان انت اكتشفت اخطات بتسرعك بالزواج
عمر...وسن شون اقنعها...وانتي فوك غلطي النوب اكسرج
حلا....خلاص ...لعد خليني للظروف وشوف حياتك...ماوصلنا لشي بنقاشنا...انقفل الموضوع بدون حل ...رجعت للبيت وامي اكلت راسي شراد عمر...كتلها يراضيني على الي صار بالحفلة...واجى بابا ماكدرت تكمل الموضوع..بعدها اني حاولت اتجنبها لحد مانست...بس كلت لازم اكو ضغط يصير على عمر...لان ممكن يستسلم لعواطفه ....وللقصة بقية