وجع قلب

حلم يتحقق

حلا...بعد وكعتي رجعنا ثاني يوم لبيتنا واني شبه مطمنة من عمر واسامة انطاني كورس مقويات...بس بقيت فترة اعاني من الدوخة...وطبعا اسمع اخبار عمر ومشاكله وية ووسن...وجنت دائما اخابره واكوله لا تفكر بية ...اذا انت مرتاح اني اكون مرتاحة ..وبقيت متواصلة وياه ...وطلعت النتائج جان معدلي ٩٥ ...ونورس طلعت ٩٢...بيوم النتائج اجى بابا بلغنا لان خفت اروح اخذ النتيجة من سمعت بجيت...وصعدت بغرفتي لحد ما اجوي بيت خالي كوة نزلت سلمت عليهم....من رجعوا دك تلفوني باوعت عمر
عمر...هلو حلا شلونج
حلا...الحمد لله ..انت شلونك
عمر..بخير...مبروك المعدل تستاهلين..بس ليش تبجين ماما كالت من استلمت النتيجة لسة بس تبجي
حلا...سويت نفسي ابجي ومامكدر ارد عليه
عمر...شبيج خاف جنتي متأملة بالطبية.
حلا..اصلا ماردت طبية...بس
عمر...بس ..شنو
حلا...شفت فرحة اهلي بية...وبداخلي نقهرت هيج فرحانين واني كسرتهم...عمر سكت ماكمل..
عمر...ماكو كسر ..ان شاء الله اني اصلح كلشي ..
بعدها التهينا بكتابة الانسيابية بس اعرف امور عمر وية وسن نحو التدهور...لحد ما يوم نزلت من غرفتي شفت مرت خالي تبجي يم امي...افتهمت عمر رايح ومطلك وسن...وهو ضايج وطالع...صعدت لغرفتي ودكيت عليه...ماجاوب ورة شوي هم دكيت عليه...جاوبني كتله ارجع اهلك قلقين عليك واني اريد احجي وياك...ورحت لبيتهم انتظره...امه كالت احجي وياه بلكت يرجع يفكر...يفكر والله يالله سويت كل هذا علمود اخليه يرجعلها
اجى المغرب...كتله خلي نطلع بالحديقة نحجي
حلا...عمر الله يخليك...اذا علمودي اتركهه الموضوع...اني براي دراسة ومن اخلص الله كريم ..بس لا دمر روحك
عمر...كتلج سابقا هذا قرار نهائي
حلا...ماريد اشوفك متأذي ...كوله لخاطرك يهون
عمر...جنت اتمنى اسمع منها هذا الحجي ..لج حلا باعتني بسهولة...فوكها مجلبة بنيشان الخطوبة...يعني ماهمها راح نتفارك
حلا..يحجي واني احترك بنار...جان حجيه مامترابط ...مال واحد مقهور ومايعرف شلون يعبر عن نفسه..تقربت منه ولزمت ايده..هو باوعلي
حلا...عمر هي الخسرانة...لو عندي انسان يحبني نص حبك لها اعوف الدنيا كله عاموده..اترجاك لا تقهر نفسك..اشر براسه وكام دخل جوة...
خلصنا من سالفة وسن بس اذا ما نتتم كلشي هم يبقى الموضوع
مهدد...عمر ...كال انطي مجال فترة ..وبعدها نتمم كلشي
خلال هاي الفترة طلعت قبولاتنا اني قبلت صيدلة ونورس هندسة وعمر راح ويانة قدم لنا...وبدينا دوام...وبيوم رجعت من الدوام لكيت بيت عمي يمنا...وبعد ماراحوا ...محمد اخوية اجاني للغرفة...وكال عمو خطبج لابنه...اني ارتفعت حرارتي...وراسا دكيت على عمر...
حلا...عمر الحكني
عمر...شبيج حلا صار شي
حلا...عمي جاي يخطبني لابنه
عمر...شلون شوكت...
حلا..اليوم...شلون شسوي
عمر...ابوج شرد عليهم
حلا...ماعرف
عمر...اذا صاحج كولي اريد اكمل..هذا صعب المسالة علينا
حلا...ليش
عمر...تعرفين بيت عمج اذا اتقدم هسة راح يسوها شغلة عناد ليش تقبلين بيه وترفضيه
حلا...ضجت من حجي عمر...كتله اوكي
بس بابا مادز علي يومين..واني كطعت وية عمر..ثالث يوم دك عمر...وينج ليش ادك عليج ماترفعيه ..جان عصبي
حلا...ردت مهلة افكر
عمر...بشنو تفكرين
حلا...يجوز هذا حل مناسب اوافق على ابن عمي..وانت تكدر ترجع لخطيبتك
عمر...شتتخربطين بالحجي...عمامج بابة عرب...اذا حس بشي كتلج اسهل منها ماكو..ماريد اسمع هذا الحجي مرة ثانية
صعدت رشا كالت بابا رايدج...نزلت كال تعاي بابا عندي حجي وياج...وحجالي على ابن عمي ...
حلا...بابا اني اريد اكمل ودراستي صعبة...بيت عمي عائلة جبيرة...يريدون شغل
ابو حلا...الولد خوش ولد...اذا انتي مارافضته ممكن يكعد ويانة لحد ماتخلصين...بس اذا ماعندج رغبة بيه ...نسد الموضوع
حلا...بابا انت معودني على الصراحة...اني احسه مثل محمد اخوي
ابو حلا...ها هية لعد راح ارد لهم خبر...
بعدها...كان لازم عمر يأجل موضوعنا فترة لحد ماينسي موضوع ابن عمي او يخطب ...بس بقينا اني وعمر على اتصال وبدينا نتقرب من بعض اكثر ..خلصت السنة الاولى...
عمر...مرات احس حلا مامطمنة من ناحيتي..صح اني اتمنى انام واكعد الكه هذا كله حلم ...رغم حلا حلوة وماقاصرة شي وحتى فاهمتني...وتحاول تتقرب مني ..بس مادام شي انت مجبور عليه ...تحس نفسك ما تتقبله ...اليوم خابرت نورس كالت خطي مايجي ..ورحت داجيبها من الكلية ...ومن دانتظرها بالكراج شفت وسن وية ولد من شعبتها...طبعا بحكم علاقتنا ل٣ سنوات اعرف كل ولد مرحلتها...ماجان مبين عليها متاثرة ..عكسي مامر علي يوم اذا ماذكر كعداتنا...بيومها الدنيا طارت من عيني...ومن رجعت ...حجيت وية امي على خطوبتي...
ام اسامة...ماما اكيف..اكو وحدة بالك
عمر...اي...حلا
ام اسامة...ياحلا...بنت عمتك
عمر...اي
ام اسامة....ماما متاكد ...طول عمرها مترباية بنصكم...اني اكيف بس اريدك تكون انت متاكد ...لان هذا حياة طويلة...وماريد تأذي البنية
عمر...ياريت اكدر اكول متاكد بس من لا جارة...جنت احجي بكلبي...اي ماما متاكد
ام اسامة....على خير...اليوم نحجي وية ابوك...الباقي  جان مثل حلم خلص كلش بسرعة والتهينا بالتجهيز وطبعا عمامي عتبو على بابا..لذلك قررنا نكمل كلشي بسرعة ...وحتى الخطوبة صارت بسيطة واني طلعت حلوة وجنت فرحانة بشكل ...بس عمر ماجان بعينه فرحة مثل فرحته بخطوبته لوسن ولا حاول مرة وياي مثل اي مخطوبين...بس ميخالف ...عندي وقت اعوده علي ...واجى يوم الحنة شبعت ركص وفرحانة ...واهلنا هم جانو كل فرحانين...يوم الزفة جانت بسيطة مباشرة للفندق...واجت اللحظة الحاسمة....وللقصة بقية