بصيص أمل

البارت 5..

البارت 5
بصيص أمل
بقلمي روسكان
لبيج قصص روسكان

يومين اني ساكته حابسه نفسي بغرفتي لا اكل ولا اشرب ولا احاجي احد ..نهشني التفكير نهش شراح اسوي وشلون اتصرف ..
خفت احجي لاحد خاف ميصدكوني وخاف اختي تتخربط وهي حامل وطلع عدهه خفقان بالقلب وتشنج بعضلة القلب ظليت اضرب اخماس باسداس حايرة شسوي وبحجه الدراسه ابد ماطلعت من غرفتي ولا اشتغلت ولا ردت اشوف احد ..
تخربطت لان كطعت الاكل وحالتي النفسيه تعبت كولش گام حته من يخابرني سيف اتهرب منه وحته كرهته حملته مسؤوليه الي صار بيه لان يصير ابن عمه لامير وكمت اتحجج ع الولد وابعد نفسي عنه بدون سبب مقنع .
الف تفكير يوديني ويجيبني بالاخير قررت اسولف لأختي الجبيرة المزوجه يمنه اسمهه ولاء اتصلت عليهه واجتنه وامي جانت طالعه وسولفتلهه كولشي ظلت صافنه عليه ..
طبعا اختي ولاء عاقله وحازمه ورزنه كولش هواي ماخذه من طبع امي فاني بوكتهه صادفت عندي امتحانات سادس اعدادي نهايه السنه واختي ميسون جانت داخله بشهرهه وصحتهه حيل تعبانه فكالتلي اختي ولاء ننتظر فترة بين ما اني اخلص امتحاناتي وبين ما اختي تجيب ونسولف لامي ..
اقتنعت هو هذا انسب حل ..لان صح امير بعد ماتقربلي بس بعيونه ونظراته ماجاز مني احس نظراته وصخه بيهه شي مو حلو ناحيتي ..
جنت احسه حسود وحقود يحقد عليه ويتوعدلي جنت احس اكو شي وراه اكبر من الي صار وجان لازم اتصرف واوكفه عد حده ..
بينه طبع حلو الي هو صلة الرحم ابد ماقطعنه زياراتنه لكرايبنه وعلاقاتنه بيهم القريبين والبعيدين نتناوب بالزيارة لو همه يجونه لو احنه نروحلهم ومن بين گرايبنه اهل سيف جانوا دائما يجونه ونروحلهم ومن يجونه نكعود كولنه كعائله ولمه حلوة بالحديقه وجنت اشبع شوف منه ..
جنت اروح للمطبخ بحجة اجيبلهم ضيافه سيف يلحگني للمطبخ يلزم ايدي او يبوسهه او مثلا جايبلي هديه صغيرة يطينياهه ع السريع ..هيج جان حبنه برئ ومو بشهوة ..وماسوينه اكثر من هيج وجنت حسرة عليه اشوف سيف لان ممنوع عدنه اطلع وحدي حته دوامي جان امير هو يجيبني ويوديني للدوام بسيارته ومن بعد ماصار الي صار طلبت من ماما اروح بخط حالي حال صديقاتي لذلك تحددت بخط وجانت حسرة عليه شوفة حبيبي ..
مرت فترة تقريبا بين فترة مراجعه للسادس وامتحنت نهائي ونجحت بس معدلي مو زين لان جنت لسه مصدومه ولسه خايفه ..
رغم واجهته وصديته وضربته من حاول يتحرش بيه بس شوفة وجهه وابتسامته المستفزة ونظرة الانتصار الي ع وجهه الي تكولي اني هنا بعدني جانت لشتي ترجف وتنعاد ذكريات هذاك اليوم ..
كولشي اثر ع حياتي سلبا تعبت نفسيتي حيل ..
اختي ميسون جابت من بعد ماشافت الموت بعيونهه واني بس جنت منتظرتهه تجيب وامير عباله اني نسيت الموضوع وغلست عليه ..
اجتي اختي ولاء تبارك لولادة طفل ميسون وظلينه اني وياهه بالغرفه نحجي بالموضوع ونتفق شلون نفتحه ويه امي ..
امي طبت علينه وحست اكو شي بيناتنه غريب موضوع او شي احنه ضامينه عليهه فبسرعه ولاء غيرت الموضوع وطلبت من امي انو اروح اني وياهه فترة ارتاح وترتاح نفسيتي لان هستوني طالعه من امتحانات السادس واني جنت متعوده بفترة العطل اروح لبيت اختي اغير جو بس هالمرة امي ماقبلت لان اختي هستوهه جايبه طفل يعني راح تلتهي وياهه هي وابنهه والمفروض اني ادير بالي ع البيت والطبخ وابن اختي حمودي ..
هنا اختي ولاء حست انو الوضعيه متتحمل تاجيل للموضوع لازم نكول لامي بعد مترهم ننتظر اكثر ..

سكتت اختي ع موضوع روحتي وياهه لبيتهه لان امي سدتهه السالفه ..
ظلت امي تلح علينه احجن شبيجن ..قلقتني ..
اختي تشجعت وكامت قفلت الباب وحجت لامي كولشي صار ..
امي ظلت مصدووووومه ..

للحكايه بقيه ..
شراح يصير ؟شاركوني توقعاتكم ..