المليحة والمهووس

الجزء ٢٥

المليحة والمهووس
الجزء الخامس والعشرين

قاسم لازمه من جهة ورضا وحيدر من جهة وهو مثل النار صاير مينلزم...
نريد نفهم شي ماكو..
الى ان وكعت شمس ..
ركضنا عليها ذبو  بوجها ماي..
اني ركضت للغرفه جبت عطر..
شمموها شوي فتحت عيونها ..
كوة تحجي تكول لزمو ليطلع وبيده سلاح جلال عصبي..
ضل يحجي وياها كلها مااطلع ..
وشوي مرغنا رجليها وراسها استعادت قوتها..

كام قاسم واخذه وطلعو..
احنا متطمنين مدام قاسم ويا..
بس منعرف شنو القضية..
كالت شمس جيبو فوني اخابر مرت منذر..
انطيتها الها صدك خابرت..
انوب ضلت تخرط بخدودها..
عزااا العزاها الله ياخذها ام الولد ..
مادري اشمت مادري اخاف من الفضايح..
واحنا وحده اذنها ع الفون وحده تدغ بيها..
وامي تصيح ولجن عيب خل نفتهم اوكفن..

سدت الخط شمس كالت..
ولكم مصيبة مصيبة..
رواء لوحدها بالبيت باقية لان كلهم عد منتصر..
وراجعه امه وسامعه صوت رجال..
باقية تعيط وهو شارد من السطح..
ولازمه رواء مشبعتها ضرب..
بس ذيج شاردة لبيت اخوها..
يا عزا خفت اني..
شلون تسوي هيج هاي وهي ع ذمه رجال!!
كالت لطياف ع ذمه زمال قصدج..
رزلتنا امي ويكتنا..

بقينا يم شمس لليل..
اجه جلال وقاسم..
احنا ترخصنا وطلعنا..
امي حققت وي قاسم..
كال جلال كلش كارها..
وجان رايد يروح يكتلها لو مالازمي..
بس هي متلاحكة نفسها وشاردة..

كال اخوها هاد عليهم..
يكلهم تتهمون اختي..
وامه من البدايه متريدها،.
اكيد تتهمها..
كلتله امي الله يستر علينا..
ويبعدنا عن هيج اشكال..
اطياف شبعت ركص..
تكلي فرحانه فرحاااانه ممصدكة..
عوع رح يختفي وطلك روية..
بس اجيب اركص للصبح هسه اخاف..

ورا يومين طالع من المستشفى..
وجايين عمام رواء هدادة..
ومهدئين الجو بالكوة..
وكلوله مترجعلك نطلكها منك وابنه يطلك اختك..
ورايدين فصل بس بعد مفاوضات فاضه الامور..
واتفقو بس رواء تجيب الطفل تنطي لمنتصر..

خلال هالفترة اداوم بس حتى من القاعه مااطلع..
اخاف اتصادم وي مرتضى..
خجلانه منه لان سوالي فضل كلش جبير..
بس اني تصرفت بوقاحة..
وكارهته لان شاف الصور وماخجل..
اطياف تسحل بيه بس نطلع بالحديقه ولج..
واني ماكو لاطشة بالقاعة..

مرت فترة وبعبير رجعت لاهلها ورواء تطلكت..
رافد مقابل يطلك بس عمامه حاجين عليه..
وعبير متخبله كلش تبوس بالايادي بس يرجعوها..
ضلت تتصل علي بس غيرت رقمي وفضيتها..
اما منتصر سافر لبغداد من وقتها..
وناوي يطلع عن طريق الشركة برا..
ماتصل ابد ولا حاول وياي..

مرت الايام واحنا نداوم صارت الامتحانات النهائية..
كاعدين نراجع هيج ساعة ٨ وشويه..
واطياف تعبت..
اني خفت واصفريت..
توقعتها حتولد..
ضلت تعيط..
وديني للطبابة ولجججج..
نسيت وضعي ونسيت مشكلتي جنت خايفه عليها..
اخت عمري هاي وهواي احبها..
ماهان عليه تتألم كدامي..

رحنا بسرعة واني ابجي ع بجيها..
كعدتها بالباب ودكيت الباب وفتت..
جانت واكفة بنيه ..
انت فتت بلا سلام..
عفية اطياف تعبانه فدوة يمكن حتولد..
كام مفزوع..
وينها هسه ؟؟؟
هاي هي برا كاعدة..
اجه بسرعة كومها وفوتها للغرفة..

نامت ع السرير كلها بس اشوف وضع رحمج..
لزم بطنها وضل يحسب وهي خطيه تعيط بخنكة..
كال ولادة عدها امشو اني اخذكم للمستشفى...
وانت خابري الاهل يجون ورانا..
صعدنا بالسيارة كعدت يمها بالورا..
وهي تعض بيدي من الالم..
ضليت اقرا ع راسها واهدي عليها..
شوي ضلت تسمن وتهدأ ..
اني اقرا ودموعي تصب..

اجت عيني ع المراية شفته يباوع..
بس نظراته هالمرة هواااااي تختلف..
حسيتها دافية كانها حضنت احساسي..
غمضت عيني ودموعي تنزل بسكوت واقرا ..
وصلنا للمستشفى فوتنا لان ثنينا مانندل..
وعنده زملاء هنا تكفلو بينا..
اخذو اطياف جوا شفت البنات وهن يطلكن..
قلبي احسه فارغ..
خاوي مثل البيت القديم..
طلعت فوني خابرت ع رضا ..
حسيت اللهفة بصوته وشلون قلق ..
دعيت ربي تكوم  بسلامات..
كال حجيب امي واجي..

طلعت هو جان موجود...
كعدت بالانتظار بس دموعي جانت مستمرة موكفت..
منها خوف ع اخت عمري..
ومنها تذكرت نفسي وطفلي..
الحمدلله ع كل حال..
كلشي مقسوم حتى الحلم بالنوم..
فززني من صفنته انطاني كلينكس..

مسحي دمعج كافي وادعيلها..
امبين طفلها نازل كلش ..
فد نص ساعة متطول اكثر..
اه يعني هيج بسرعة ميسوولها عملية؟
ههه ليش عملية بلة..
قابل لعب العملية موت الا شوية..
ماكو افضل من الطبيعي..
وهي الحمدلله  وضعها طبيعي توة طمني حامد صديقي..
كال وضعها كله اوكي ووصيتهن عليها..

انشالله تكوم بالسلامة فديتها بيه ولا بيها..
كلتها بلا ماركز..
جان كاعد ع الكرسي ومخلي ايديه ع رجليه...
دار وجها علي مبتسم..
انشالله يجي يوم ويصير بيج وتصير ام..
مخلي عيونه بعيوني وعيونه ماكدر اطول بيها..
تسلم يوم التصير اب انت هم..
_تتوقعين هالشي؟؟؟
ليش لا شاب ومرغوب من شكل وثقافة ومركز مناقصك شي..
تكدر تتزوج وتخلف..
صحيح بس ناقصني مقدرتي اجيب طفل.
شلون؟؟
حوراء اني عقيم!!!

للحكاية بقية..
بقلم شقراء (قمر كانون)
لحد يكول قصير ويحجي حجي زايد ويسم البدن 😒ترى اهد عليكم خطاري يخلوكم تصيرون بقرات عجاف🙁